Dispela Olgeta Samting i Makim Wanem Samting?
JISAS KRAIS i tok: Long taim bilong “dispela graun i laik pinis,” bai i gat ol woa, bikpela hangre, bikpela sik, na graun i guria.—Matyu 24:1-8; Luk 21:10, 11.
Kirap long 1914, ol woa namel long ol kantri na ol lain man i bin bagarapim sindaun bilong ol man. Planti bilong ol dispela woa i kamap taim ol pris pasto i insait long wok politik, na long nau long planti hap pasin teroris i as bilong ol woa.
Maski saiens i bin wokim rot bilong kamapim planti kaikai moa, planti handet milion manmeri long olgeta hap ol i sot tru long kaikai. Long olgeta yia planti milion manmeri i dai, long wanem, ol i sot long kaikai.
Ol bikpela sik, em ol bikpela sik i save kalap i go long planti man, em tu i wanpela hap bilong mak Jisas i tok long en. Bihain long Wol Woa 1 wanpela bikpela sik kus i kilim i dai winim 21 milion manmeri. Long bipo sampela bikpela sik i kamap long sampela hap tasol, tasol dispela sik i bin go long olgeta hap bilong graun na long ol ailan i stap longwe. Long nau planti manmeri long olgeta hap i gat sik AIDS, na ol kain sik olsem TB, malaria, sik Sagas, na binatang jem i mekim man i kamap aipas, i wok long givim hevi long ol kantri i no gat planti bisnis samting.
Ol ripot i kamapim olsem long olgeta yia graun i save guria inap planti tausen taim; strong bilong ol guria i narapela narapela. Maski i gat ol gutpela masin i toksave long taim graun i guria na strong bilong guria i bikpela olsem wanem, planti taim ol niuspepa na TV nius i stori long ol bikpela bagarap i kamap long hap i gat planti manmeri taim graun i guria.
Baibel i tok profet tu: ‘Tasol yu mas save, long taim bilong las de planti hevi nogut tru bai i kamap. Ol man bai i laikim ol yet tasol, laikim tumas mani, litimapim nem bilong ol yet, hambak nabaut, tok kros, tok nogut long ol arapela, sakim tok bilong papamama, na i no tok tenkyu, na givim baksait long ol pasin bilong God. Ol bai i no stap pren bilong ol arapela, na taim ol i kros, bai i no gat rot bilong pinisim kros. Ol bai tok nogut long ol arapela, na i no bosim laik bilong bodi, pait na bagarapim ol man nabaut, birua long olgeta gutpela pasin, mekim nogut long ol pren bilong ol yet, na bihainim kwik olgeta kranki tingting bilong ol yet. Ol bai i tingim ol yet i bikpela man tru, laikim tumas ol kain kain pasin bilong amamas, na i no laikim God, na bihainim pasin bilong God long skin tasol na i no save liklik long bikpela strong i stap long pasin tru bilong God. Yu mas stap longwe long ol dispela kain man.’—2 Timoti 3:1-5.
Ating yu wanbel long tok olsem yumi stap long taim i gat “planti hevi nogut tru.”
Olsem wanem? Yu luksave olsem planti manmeri i save laikim ol yet, laikim mani, na pasin antap i kirapim ol long mekim ol samting?
Ating olgeta man i wanbel long tok olsem long olgeta hap ol manmeri i strong long ol i mas bihainim laik bilong ol yet na ol i no tok tenkyu, ol i no kamap wanbel wantaim arapela, na ol i no stap gut long arapela.
Pasin bilong sakim tok bilong papamama na i no gat pasin bilong laikim arapela i go bikpela tru long olgeta hap bilong graun.
Ating yu luksave olsem yumi stap long graun em pasin bilong laikim ol amamas bilong skin i pulap long en, tasol i no gat pasin bilong laikim gutpela pasin. Baibel i mekim dispela tok bilong kamapim pasin bilong ol man long taim bilong “las de.”
Olsem wanem? I mas i gat sampela arapela samting moa bilong yumi ken luksave long taim yumi stap long en? Jisas i tok tu olsem long dispela wankain taim ol bai autim gutnius bilong Kingdom Bilong God long olgeta hap bilong graun. (Matyu 24:14) Yu ting dispela samting i kamap?
Wastaua, em wanpela nius Baibel i as bilong ol tok bilong en na i autim gutnius bilong Kingdom Bilong Jehova. Ol i prinim dispela nius long planti tok ples, winim olgeta arapela nius ol i save prinim long olgeta taim.
Long olgeta yia, ol Witnes Bilong Jehova i lusim winim wan bilion aua bilong autim tok long Kingdom Bilong God long ol arapela.
Ol i wokim ol buk na nius i kamapim mining bilong tok bilong Baibel long 400 samting tok ples, ol tok ples tu bilong ol longwe hap na ol hap i no gat planti man. Ol Witnes Bilong Jehova i bin autim gutnius long olgeta kantri, ol i autim tok tu long planti ailan na liklik ples i no gat nem o namba samting long wok politik bilong dispela graun. Long planti kantri ol i save skulim ol man long Baibel.
Tru tumas, wok bilong autim gutnius bilong Kingdom Bilong God i kamap long olgeta hap bilong graun bilong mekim wok witnes, na i no bilong kirapim ol man long tanim bel na senisim lotu bilong ol. Rot i op long ol man bilong olgeta hap i ken soim olsem ol i tingim man i bin wokim heven na graun, na ol bai daun long ol lo bilong em na laikim ol arapela man o nogat.—Luk 10:25-27; KTH 4:11.
Klostu nau Kingdom Bilong God bai rausim olgeta kain pasin nogut long dispela graun na kamapim wanpela paradais long olgeta hap.—Luk 23:43, NW.
[Blok long pes 6]
Las De Bilong Wanem Samting?
I no las de bilong ol lain manmeri. Ol man i bihainim laik bilong God, Baibel i tok ol inap i stap oltaim oltaim.—Jon 3:16, 36; 1 Jon 2:17.
I no las de bilong dispela graun. Tok Bilong God i tok promis olsem ol manmeri bai i stap oltaim oltaim long graun.—Song 37:29; 104:5; Aisaia 45:18.
Nau em las de bilong pasin bilong pait na bagarapim man, pasin bilong i no laikim ol arapela, na las de bilong ol man husat i bihainim pasin bilong dispela graun.—Sindaun 2:21, 22.
[Blok/Piksa long pes 7]
Tru Tru Baibel Em i Tok Bilong God?
Planti taim ol profet bilong Baibel i bin tok: “Bikpela i tok olsem.” (Aisaia 45:1; Jeremaia 2:5) Jisas Krais, Pikinini Bilong God, em tu i tok em i ‘no mekim tok long tingting bilong em yet.’ (Jon 14:10) Baibel i tokaut klia olsem: “Spirit bilong God yet i bin kamapim olgeta tok i stap long buk bilong God.”—2 Timoti 3:16.
I no gat wanpela narapela buk ol i bin wokim long planti tok ples olsem ol i wokim Baibel—lain United Bible Societies i tok ol man i bin wokim Baibel long winim 2,200 tok ples. I no gat narapela buk ol i bin tilim planti olsem Baibel—winim 4 bilion kopi. Na i stret i olsem sapos Baibel em i tok bilong God em i givim long olgeta lain man, a?
Bilong kisim sampela save moa long ol samting i kamapim klia olsem God i bin kamapim ol tok bilong Baibel, lukim buklet Yumi Stap Bilong Mekim Wanem? Yu Ken Save Olsem Wanem? long pes 10-16, ol Witnes Bilong Jehova i wokim.
Sapos yu ritim Baibel na luksave olsem tru tru em i Tok Bilong God, dispela bai helpim yu tru.
[Blok/Ol Piksa long pes 8]
Kingdom Bilong God Em i Wanem Samting?
Em i wanpela gavman em trupela God, Jehova, em Man Bilong Wokim heven na graun i bin kamapim.—Jeremaia 10:10, 12.
Baibel i tok Jisas Krais em i man God i givim namba long em bilong bosim dispela gavman. (KTH 11:15) Taim Jisas i stap long graun, em i soim olsem em i kisim pinis narakain namba long God—em i kisim namba long bosim bikpela win na solwara samting, oraitim olgeta kain sik, na kirapim bek ol man i dai pinis. (Matyu 9:2-8; Mak 4:37-41; Jon 11:11-44) Tok profet bilong Baibel i kamapim olsem God bai “mekim em i kamap king na i givim em strong na biknem. . . . Na olgeta manmeri bilong olgeta kantri na olgeta lain na olgeta tok ples bai i stap aninit long en.” (Daniel 7:13, 14) Dispela gavman em Kingdom bilong heven; long nau Jisas Krais i mekim wok king bilong em long heven.
[Ol Piksa long pes 7]
Wok bilong autim gutnius i kamap long olgeta hap