Ol Man i Soim Gutpela Rot o Nogat?
HUSAT i wokim olgeta samting? Sapos yu tok “God,” orait yu wanbel wantaim planti milion manmeri i bilip long God bilong Baibel, em Man bilong wokim olgeta samting.
Tasol planti man i bilip long God, ol i no bilip olsem em i mekim ol wok bilong stretim hevi bilong ol man. Olsem wanem? I gat as na yumi ken ting olsem God i wokim rot bilong helpim ol man? Planti man i tok, i no gat as bilong ting olsem.
Inap sampela tausen yia pinis, ol man i bin traim kain kain rot bilong helpim ol yet, na ol i no tingim God. Olsem wanem? Ol i painim pinis gutpela rot? O ol hevi i kamap moa nogut na i hatwok moa long stretim? Ol man i mekim wanem bilong stretim ol bikpela hevi bilong nau?
Wanpela saveman i tok: “Kirap long taim ol man i wokim ol masin na haus faktori, ol kantri i gat planti wok bisnis ol i bin wokim planti samting bilong inapim laik bilong ol man, na ol i pinisim planti samting bilong graun. Dispela i bagarapim graun na ol kantri i no gat planti wok bisnis.”
Ol man i bagarapim yet dispela graun. Wanpela nius bilong Ajentina (Clarín) i tok: “Bihain long yia 1950, ol wok bisnis i mangalim mani, na ol man i no tingting gut, na ol i no mekim gut wok, na long dispela as planti bikpela bagarap i bin kamap, em ol i kilim i dai planti man na bagarapim tru dispela graun.”
Planti man i stap rabis olgeta na i olsem i no gat rot bilong pinisim dispela hevi. Dispela hevi i painim tu ol kantri i olsem i gat gutpela sindaun. Wanpela nius (The Globe and Mail) bilong Toronto, long Kanada, em i tok, ol man i ting, “planti man long Kanada (inap 33 pesen) bai i no gat wok long sampela taim, na bai ol i stap rabis.” Na nius i tok: “Ol famili i bruk na dispela em i wanpela bikpela as na planti manmeri i stap rabis. Dispela hevi i kamap bikpela hariap long nau.”
Narapela hevi em pasin bilong kisim drak. Ol man i ken mekim wanem bilong stretim dispela hevi? Ating ol i no gat rot. Planti milion ol i kisim drak na dispela i bagarapim skin na tingting na pasin bilong ol. Dispela hevi tu i wok long i go bikpela kwiktaim long nau.
Na i olsem ol saveman bilong saiens i no inap pinisim ol sik. Tru, ol i wokim ol nupela masin na marasin na ol dokta inap helpim sampela sikman. Tasol sampela wok bilong saiens yet i mekim na nau i gat sampela liklik binatang i kamapim sik, em ol i gat strong bilong sakim ol marasin.
Long nau planti man i mekim rong long ol narapela na ol gavman i no inap pinisim dispela pasin. Ol i mekim planti tok promis na putim planti lo bilong pinisim wok kalabus, tasol long olgeta hap bilong graun, winim 100 milion man i wok kalabus yet na ol i no gat rot bilong lusim.
Tasol olsem wanem na ol man i no inap soim gutpela rot long yumi? Tingim ol dispela samting: Ol i man na i gat planti samting ol i no inap mekim. Na ol i save stap sotpela taim tasol, na planti ol i save stap long wanpela hap tasol na long wanpela pasin tumbuna tasol, na ol i sot long save. Olsem na ol i no inap soim gutpela rot long yumi. I olsem aposel Pol i tok: “Yumi olgeta man yumi bin mekim sin,” olsem na yumi no inap.—Rom 3:23.
Tasol as tru bilong planti hevi i painim planti man long nau, em olsem: Ol i no laik bihainim rot God i makim. Tasol bai yumi kisim save we long dispela rot? God i soim rot long yumi olsem wanem long nau? Tok i kamap bihain long dispela, bai bekim ol dispela askim.