Yu Tingim Yet?
Olsem wanem? Yu bin amamas long kaunim tok bilong ol nupela Wastaua? Sapos olsem, bai yu amamas long tingim gen ol tok daunbilo hia:
▫ Yu inap painim tok bilong lotu em i tru?
Krais Jisas i tok: “Yupela bai i save long tok tru, na tok tru bai i mekim yupela i kamap fri.” (Jon 8:32) Jisas i makim olsem yumi inap painim tok i tru, na yumi mas kisim save long en bambai God i ken orait long lotu bilong yumi. Jisas i tokim wanpela meri Samaria: “Olgeta man i laik lotu tru bai ol i lotu long Papa long [spirit] na long pasin i tru.” (Jon 4:23)—4/15, pes 5.
▫ Robet Estien em i husat? Na olsem wanem em i kisim biknem?
Robet Estien em i wanpela man bilong prinim ol buk, em mama i karim em long yia 1503. Em i givim bel tru long prinim ol Baibel, na em i wok strong long kisim save long ol tok bilong Baibel olsem ol man i bin raitim long pastaim. Em i kirapim pasin bilong brukim ol tok na putim namba long ol wan wan hap, o ves, olsem long ol Baibel bilong yumi long nau.—4/15, pes 10, 14.
▫ Sapos yumi kaunim Baibel long olgeta de, dispela bai helpim yumi olsem wanem?
Bai yumi kisim ol nupela save, na taim yumi skelim ol tok profet bilong taim bilong yumi wantaim ol samting yumi lukim na harim na yumi save long en, bai yumi pilim moa yet truim bilong en. Na taim yumi lain long planti samting na yumi wok long stretim ol hevi, yumi pilim moa yet gutpela rot Baibel i soim long yumi. (Sindaun 4:18)—5/1, pes 15.
▫ Wanem samting inap helpim yumi long holim ol tok bilong Baibel long tingting?
Taim yu kaunim Baibel, makim sampela tok yu laik tingim, o raitim long ol liklik hap kat na putim long ples yu inap lukim long olgeta de. Taim yu wok long holim long tingting ol tok bilong wanpela ves, tingim gut ol dispela tok long bel na mekim wok long en. No ken wok long lainim lainim planti tumas tok wantaim; traim lainim wanpela o tupela long olgeta wik.—5/1, pes 16, 17.
▫ Gutnius Luk i raitim i stori long wanem ol samting em ol narapela man bilong raitim Gutnius i no stori long en?
Sampela tok bilong Luk i wankain olsem bilong Matyu, tasol i gat planti tok bilong en, inap 59 pesen, i no stap long Gutnius Matyu i raitim. I gat 6-pela mirakel bilong Jisas em Luk tasol i raitim stori bilong en, na em i kamapim planti tok piksa moa bilong Jisas, em ol narapela man bilong raitim Gutnius ol i no bin kolim.—5/15, pes 12.
▫ Wanem bikpela lait bilong tok i tru i kamap long 1935?
Long dispela yia lain bilong Jehova i kisim save olsem ol dispela “planti manmeri tru” em Kamapim Tok Hait 7:9, 14 i stori long en i no wanpela nambatu lain bilong i go long heven. Nogat. Ol i gat tingting long i stap long graun. (Jon 10:16)—5/15, pes 20.
▫ Yumi ken mekim wanem bilong strongim bel bilong ol manmeri i krai sori?
Putim yau. Mekim gut bel bilong ol. Redi long helpim ol. No ken wetim ol i askim yu. Raitim pas o salim kat. Beten wantaim ol. (Jems 5:16) Mekim yet wok bilong helpim ol.—6/1, pes 13, 14.
▫ Ol brata sista long kongrigesen i ken mekim wanem bilong helpim ol wanbilip long sanap strong, em ol i stap insait long famili i no wanbel long lotu?
Long olgeta taim, mekim tok bilong strongim bel bilong ol, na kamapim ol gutpela tok i mekim gut bel bilong ol. (1 Tesalonaika 5:14) Sapos i stret long mekim, singautim ol long wok wantaim yu taim yu mekim wok bilong Jehova o taim yu mekim liklik bung bilong amamas. Taim yu beten, tingim ol. (Rom 1:9; Efesus 1:16)—6/1, pes 29.
▫ Bilong wanem pasin bilong i stap isi na i no les kwik em i bikpela samting taim yumi autim tok?
Taim ol man i les long harim tok o birua long pablisa bilong Kingdom, dispela pasin bai helpim em long karim dispela hevi na em i no ken les. Na taim ol man bilong haus i kros, pablisa i no tok pait wantaim ol—em i bekim tok isi long ol, o isi tasol em i lusim ol; olsem bai em i stap bel isi na i stap amamas yet. (Matyu 10:12, 13) Na ol man i kain olsem sipsip ol bai i gat laik long harim tok bilong Kingdom.—6/15, pes 12.
▫ Taim yumi save long tok i tru bilong Baibel, bilong wanem em i wanpela gutpela samting tru?
Taim yumi save long tok i tru, dispela i mekim yumi i kamap fri na yumi no kalabus moa long ol tok giaman na stori nating na bilip kranki bilong ol tumbuna. Taim yumi bihainim tok i tru, em i save strongim yumi long karim ol hevi na sanap strong na i save kirapim yumi na yumi wetim gutpela samting bai kamap bihain, na nau yumi inap sanap strong taim wanpela hevi o traim i painim yumi.—7/1, pes 8.
▫ Lain Kristen God i bin makim ol, ol i kisim wanem namba wan wok bilong ol Israel?
Ol i kisim wok long tokaut long biknem bilong Jehova namel long ol narapela lain. (Aisaia 43:21; 1 Pita 2:9)—7/1, pes 19.
▫ Wanem insait bilong dispela tok bilong aposel Pita olsem man i mas “mekim gutpela pasin” long meri bilong em? (1 Pita 3:7)
Man i givim biknem long meri bilong em, em i no save semim o daunim meri. Taim tupela tasol i stap na taim ol i stap wantaim ol narapela, long olgeta taim em i mekim ol tok na pasin i litimapim nem bilong meri bilong em. (Sindaun 31:10-31)—7/15, pes 19.
▫ Pasin bilong kongrigesen long rausim man i mekim rong na em i no tanim bel, olsem wanem em pasin sori?
Pasin bilong rausim man i kamapim klia olsem ol kongrigesen i laikim tumas Jehova na ol pasin bilong em. (Song 97:10) Dispela pasin i helpim ol manmeri i wok long bihainim stretpela pasin, nogut ol i larim dispela man nogut i stap namel long ol na em i pulim ol long bihainim pasin i no stret. Na dispela pasin i lukautim kongrigesen bambai ol i ken i stap klin. (1 Korin 5:1-13)—7/15, pes 25.
▫ Long nau, olsem wanem yumi inap luksave long dispela “wokboi i gat gutpela tingting” em Jisas i stori long en long Matyu 24:45-47?
Yumi inap lukim ol wok bilong ol, ol i wokim ol buk na nius i gat ol tok bilong Baibel long en, na ol i autim tok na lainim ol man long “gutnius bilong kingdom,” na ol i bihainim gut Tok Bilong God, em Baibel. (Matyu 24:14; 28:19, 20)—8/1, pes 16.