Kingdom Nius Wok Bilong Tilim i Kamapim Gutpela Samting
“BILONG Wanem Yumi Gat Planti Hevi?—Yu Ting Wanpela Paradais i No Gat Ol Hevi Long En Inap Kamap?” Dispela em nem bilong Kingdom Nius Namba 34, wanpela liklik nius i gat 4-pela pes long en, em ol i bin tilim long olgeta hap long 139 tok ples long mun Epril na Me long yia i go pinis. Ol Witnes long Jameka i stori long wok bilong tilim dispela nius na ol i tok: “Em wanpela bikpela samting tru i bin kamap long dispela yia.” Ol Witnes long Beljam i stori long dispela nius olsem: “Em i kamapim bikpela amamas tru long ol brata.” Long Ripablik Sek, em namba wan taim rot i op long ol Witnes Bilong Jehova i ken insait long wok bilong tilim Kingdom Nius. Brens-ofis i tok: “Dispela wok i bin kirapim pasin bilong wok strong na givim bel long wok.” Wankain tok i bin kam long ol narapela hap tu.
Kingdom Nius Namba 34 i kamapim wanpela bikpela tok bilong helpim ol man i bel nogut na i tingting planti long ol pasin nogut tru ol lotu i bin mekim. (Esekiel 9:4) Em i mekim gut bel bilong ol man i gat planti hevi long dispela ‘taim bilong planti hevi nogut tru,’ em ol i no inap long stretim. (2 Timoti 3:1) Em i kamapim tok bilong Baibel bilong soim olsem, klostu nau ol dispela hevi bai pinis. Tru tumas, wanpela paradais i no gat ol hevi long en bai kamap. (Luk 23:43, NW) Ol tok bilong Kingdom Nius i bin kirapim planti man long bilipim tok bilong en. Wanpela man long Togo i tokim wanpela Witnes olsem: “Mi no inap tru long sakim dispela tok yupela i bin mekim.”
Wok bilong tilim dispela Kingdom Nius i bin kirapim tingting bilong planti man. Long Denmak, taim wanpela Witnes i laik tilim nius long wanpela man, em i tok: “Nau tasol mi kam bek long Amerika. Taim mi laik lusim Amerika, wanpela i bin givim dispela nius bilong yupela long mi. Nau mi kamap pinis long dispela hap na yupela i laik givim wankain nius long mi long tok ples Denmak!”
Ol i Givim Bel Long Mekim Dispela Wok
Ol Witnes Bilong Jehova long olgeta hap i givim bel tru long wok bilong tilim dispela nius. Ostria, El Salvado, Haiti, Hangari, Itali, Nu Kaledonia—em sampela bilong planti kantri i mekim ripot olsem planti pablisa tru, winim olgeta taim bipo, i bin insait long dispela wok long ol mun ol i bin tilim Kingdom Nius.
Long Sambia, wanpela wasman sekit i bin lainim pikinini meri bilong em i gat 3-pela krismas, em Deborah, long tilim ol buk samting long ol haus. Taim ol i mekim wok bilong tilim Kingdom Nius Namba 34, Deborah i tilim 45 samting. Mama bilong em i kirapim Baibel-stadi wantaim sampela man i bin kisim Kingdom Nius long Deborah.
Long Saut Afrika, wanpela yangpela i tilim dispela nius long wanskul bilong em, em Cashia. Cashia i kaunim nius na em i tok: “Man! Dispela em narapela kain tru—stap oltaim long Paradais long graun! Bilong wanem ol i no bin tokim mi bipo long dispela samting?” Em i kirap stadi long Baibel. Insait long wanpela wik Cashia i kisim narapela nius. Namba tu nius i kam long wanpela pren Katolik i save sindaun long Saiprus. Dispela pren i stori long Cashia i gat wanem as na ol bilip bilong Misin Katolik i giaman, na em i tokim Cashia olsem em bai kirap stadi long Baibel wantaim ol Witnes Bilong Jehova. Em nau, dispela i strongim tru tingting bilong Cashia long stadi yet.
Wanpela manki i gat 10-pela krismas long Swiselan i bin wok wantaim mama bilong em long tilim dispela nius. Em i givim wanpela long wanpela yangpela meri na kirapim em long kaunim gut. Dispela yangpela meri i askim em, em i bilip tru long dispela samting em piksa long skin bilong nius i kamapim o nogat—em laip i stap oltaim long graun. Manki hia i bekim wanem tok? Em i tok: “Yes, mi bilip tru long en.” Bihain meri i tok em i wok long painim bilip tru, long wanem, long lotu bilong em planti tok i pait wantaim narapela tok. Taim ol i mekim gobek, ol i kirapim Baibel-stadi wantaim em.
Wantu Ol i Kirap Mekim Sampela Samting
Sampela taim, Kingdom Nius i bin kirapim ol man wantu tasol long mekim sampela samting. Long Beljam taim wanpela pikinini meri i gat 11-pela krismas i kaunim pinis dispela nius, em i autim rong bilong em long wanpela Witnes—em i bin stilim samting long wanpela stua. Mama bilong dispela meri i laik haitim dispela samting, tasol ol tok yangpela meri i bin kaunim long nius i kirapim maus bilong bel bilong em, na em i strong long em i mas go lukim maneja bilong stua. Bihain mama i orait long pikinini meri bilong em i ken go bek long stua wantaim dispela Witnes. Maneja hia i kirap nogut tru long yangpela i autim rong bilong em. Taim em i kisim save olsem Kingdom Nius i bin kirapim em long mekim olsem, em i kisim wanpela bilong em yet bambai em inap lukim wanem tok i stap insait long en na i gat kain strong olsem. Nau dispela pikinini i stadi long Baibel na em i wok long kamap strong.
Wanpela Witnes long Kamarun i bin lusim wanpela Kingdom Nius wantaim wanpela man, na em i stori olsem: “Taim mipela i go bek, mipela i lukim olsem em i bin katim pinis sampela tok na em i gat planti askim. Taim em i kisim pinis ol gutpela bekim, em i tok: ‘Em i stret tru olsem lotu i gat hap asua long ol hevi i bin kamap long graun. Dispela nius bilong yupela i bin helpim mi long kisim planti save, tasol mi laik kisim sampela save moa.’ ” Nau em i save stadi oltaim long Baibel.
Wanpela Witnes i autim tok long ol haus long Yurugwai na em i tilim wanpela Kingdom Nius long wanpela man. Em i autim tok i go inap long em i raunim blok na em i kamap long dua long baksait bilong haus bilong dispela man. Em i kirap nogut long lukim dispela man i wetim em i stap na i holim nius long han bilong em. Em i kaunim pinis na nau em i laik kisim sampela save moa. Long dispela taim stret wanpela Baibel-stadi i kirap.
Ol Man i Helpim Wok Bilong Tilim Nius
Long Japan, wanpela yangpela Witnes i go lukim wanpela man i gat 50 krismas samting na i soim nius long em. Man hia i askim em: “Yu save mekim wanem long dispela nius taim yu bungim ol manmeri ol i no inap lukluk?” Witnes i tok, em i no save. Man hia i tokim em long wet liklik na em i go bek insait long haus bilong em. Taim em i kam bek em i holim wanpela Kingdom Nius na em i tok: “Mi kisim pinis dispela nius. Mi ting ol tok i stap insait long en i gutpela na i bikpela samting, olsem na mi bin tanim i go long rait Brel. Plis, mekim wok long dispela bilong helpim ol aipas.” Dispela man i bin lusim planti aua long tanim tok bilong Kingdom Nius i go long rait Brel bambai ol aipas tu inap kisim ol dispela tok.
Long Slovakia wanpela man i laikim tru dispela nius, olsem na em i wokim 20 kopi bilong en na em yet i tilim. Wanpela pablisa long Swiselan i bin lusim Kingdom Nius wantaim wanpela famili na em i autim tok i go i go long ol plua antap, insait long dispela traipela haus dispela famili i stap long en. Taim em i kam daun, wanpela yangpela manki bilong dispela famili i bungim em na i tok, em i laik kisim 19 moa bilong dispela nius. Long skul bilong dispela manki ol i bin tokim ol sumatin long raitim stori long ol hevi na long ol samting ol man i mekim long painim rot bilong stretim ol dispela hevi. Em i laik kisim ol Kingdom Nius bilong givim wanpela long olgeta wanklas bilong em.
Ol i No Lusim Wanpela Man
Ol Witnes i bin insait long dispela wok bilong tilim nius, ol i bin wok strong na bai ol i no ken lusim wanpela man. Long Nu Kaledonia, tupela Witnes i raun long ka bilong go long hap bilong wanpela lain i stap long wanpela liklik longwe ples, bilong ol i ken tilim Kingdom Nius long ol. Taim ol i ran long rot ol i lukim wanpela liklik rot em i luk olsem ol man i no save wokabaut long en, tasol ol i ting gutpela sapos ol i go na painimaut, i gat man i stap long pinis bilong en o nogat. Ol i lusim ka na wokabaut long dispela liklik rot na brukim ol liklik wara i go inap long ol i kamap long wanpela haus. Tupela marit em ol i no bin save liklik long ol Witnes Bilong Jehova i sindaun long en, na ol i kisim wanpela Kingdom Nius. Bihain, taim ol pablisa i mekim gobek, ol i kirap nogut long lukim olsem dispela tupela marit i bin stretim rot na sampela ol liklik bris bambai ol Witnes inap draivim ka bilong ol i go olgeta long haus. Ol i kirap stadi wantaim ol long Baibel.
Long Polan, taim wanpela Witnes i wokabaut i go bilong tilim Kingdom Nius long wanpela man, em i abrusim wanpela hap em ol man i wokim haus long en. Ol wokman i lukluk tasol taim em i wokabaut i kam bek na abrusim ol gen. Bihain wanpela bilong ol i singaut long em na askim em long no ken lusim tingting long ol. Taim em i go klostu long ol, ol i lusim wok na putim gut yau long stori em i mekim long dispela nius. Ol i kisim sampela Kingdom Nius na sampela magasin tu, na taim em i go bek lukim ol bihain, ol i kisim sampela buk.
Ol i bin tilim planti handet milion Kingdom Nius Namba 34 long planti tok ples. Tok bilong en i gat strong na i bin kirapim tingting bilong planti man. Planti i kisim save pinis olsem wanpela paradais i no gat hevi long en inap kamap. Mipela i beten long ol man i gat stretpela bel i ken wok yet long harim tok na bihain bai ol inap stap wantaim “ol manmeri i daunim nem bilong ol yet,” em God bai “i givim olgeta graun long ol” na bai “ol i sindaun gutpela tumas na amamas i stap.”—Song 37:11.
[Blok long pes 31]
Wok Yet Long Tilim Ol Magasin!
Long Epril na Me 1995, wok bilong tilim Kingdom Nius Namba 34 i bin kamap gutpela tru. Long dispela tupela mun, ol i mekim bikpela wok tu long tilim ol Wastaua na Kirap! Olsem: Wanpela brata long Ripablik Sek i tok, long Epril em i bin tilim 250 Kingdom Nius na 750 magasin. Long Guadelup, ol i makim Sarere, Epril 15, olsem de magasin. Klostu olgeta pablisa bilong kantri i bin insait long wok bilong autim tok long dispela de! Long Slovakia, ol i tilim planti magasin moa long Epril, winim olgeta narapela taim. Planti narapela kantri i mekim wankain ripot olsem.
Olsem na yumi ken makim mun Epril na Me long 1996 bilong mekim bikpela wok tru long tilim ol magasin. Ol kongrigesen i ken stretim rot na makim de magasin. Sampela pablisa i ken mekim wok painia haptaim. Long ol dispela rot na long sampela narapela rot tu, ol i ken kirapim tingting bilong olgeta long tilim ol magasin, na dispela bikpela tok em Kingdom Nius Namba 34 i bin kamapim bai wok yet long go nabaut. Na yumi save, olsem i bin kamap long yia i go pinis, Jehova bai blesim dispela pasin bilong givim bel em yumi kamapim.—2 Timoti 4:22.