Ol Samting i Stret Long Mekim na Katim Man na No Gat Wok Long Blut
NAU long dispela taim ol dokta samting i kisim planti nupela save long ol marasin na ol narapela samting bilong helpim ol sikman. Tru, ol dispela nupela save i helpim ol long stretim sampela kain sik, tasol sampela save ol i kisim, ol i kamapim sampela hevi, olsem i stret long bihainim dispela save sapos sikman i no orait long en, o nogat.
Ol dokta i mas skelim ol samting olsem: Sampela taim dokta i mas lusim wok bilong givim planti tumas marasin o mekim ol narakain samting long wanpela sikman bambai em i ken stap isi na i dai? I stret dokta i ken sakim tok bilong sikman na dokta i strong long mekim wanpela samting sapos em i ting dispela inap helpim sikman? Sapos ol samting dokta inap mekim i gat bikpela pe bilong en na sampela sikman i no inap baim, olsem wanem ol inap skelim ol marasin samting ol inap givim long ol sikman na bai olgeta inap kisim helpim long en?
Ol dispela kain kain bikpela askim i kamap na dispela i kirapim ol long putim dispela tok i go insait long ol samting ol i save skulim ol dokta long en. Dispela samting i bilong helpim ol dokta na saientis long stretim ol hevi inap kamap long taim ol i wok long kisim save long ol samting bilong helpim sikman, na long taim ol i kisim nupela save long ol marasin samting. Planti bikpela tok long ol samting bilong sik em i save kamap insait long ol haus sik yet na i hatwok long stretim, olsem na planti haus sik i bin kamapim ol komiti bilong skelim wanem pasin i stret long mekim bilong helpim ol sikman. Ol man insait long ol dispela komiti—em ol dokta na loya tu—ol i save go long ol bung bilong skelim ol hevi i save kamap long sampela pasin bilong oraitim ol sikman, olsem ol samting i stret long mekim o i no stret long mekim.
Sampela askim i save kamap planti taim long ol dispela bung i olsem: Ol Witnes Bilong Jehova i save sakim blut, long wanem, dispela i no stret long bilip bilong ol, olsem na ol dokta i mas daun long bilip bilong ol i go inap long wanem mak? Maski man i no laik kisim blut, i stret dokta i mas givim long em sapos dokta i ting dispela bai helpim em? I stret dokta i givim blut long sikman sapos sikman i no save long dispela samting, na dokta i ken ting olsem ‘samting sikman i no save long en, dispela i no inap givim hevi long em’?
Bilong stretim gut ol dispela bikpela askim, ol dokta i mas kisim gut tingting bilong ol Witnes. Na ol Witnes Bilong Jehova i amamas long kamapim bilip bilong ol long ol dokta, long wanem, ol i save sapos narapela i save gut long tingting bilong narapela, dispela bai helpim ol long abrusim pasin bilong tok pait.
Ol i Kamapim Tingting Bilong Ol
Profesa Diego Gracia bilong Spen, em wanpela saveman bilong ol kain pasin ol i save mekim bilong helpim ol sikman, i stret long mekim o nogat. Em i laik bai klas bilong em i ken kamapim tingting bilong ol na ol narapela long klas i ken harim. Em i tok: “I stret ol i mas givim rot long yupela [ol Witnes Bilong Jehova] long kamapim tingting bilong yupela . . . long wanem, yupela i bin kisim sampela hevi long pasin bilong yupela long sakim blut.”
Olsem na long Jun 5, 1996, ol i singautim 3-pela Witnes Bilong Jehova i go long Yunivesiti Komplutense long Madrit, Spen, bilong kamapim tingting bilong ol long dispela samting. Inap olsem 40 dokta na ol narapela saveman ol i kam.
Ol Witnes i mekim sotpela tok, na bihain ol man i kamapim sampela askim. Olgeta i wanbel long tok, sapos sikman i bikpela pinis, i stret em i ken sakim wanpela samting dokta i laik mekim bilong stretim sik bilong em. Na dispela klas i bilip tu olsem ol dokta i no ken tru givim blut long sikman sapos ol i no toksave long em pastaim na em i no tok orait long en. Tasol ol i tingting planti long sampela samting bilong dispela bilip bilong ol Witnes.
Wanpela askim i kamap, em i samting bilong mani. Taim ol i katim man na ol i no mekim wok long blut, sampela taim ol i mas i gat ol masin samting i gat bikpela pe bilong en, olsem laser, na ol marasin i gat bikpela pe, olsem erythropoietin, em bilong kirapim gris insait long bun long wokim blut. Wanpela dokta i tok, taim ol Witnes i sakim samting i no gat bikpela pe (olsem blut), nogut ol i ting ol lain bilong helt i mas larim ol i kisim ol samting i gat bikpela pe bilong stretim sik bilong ol.
Ol Witnes i save, mani em i wanpela samting ol dokta i mas tingim taim ol i mekim wok bilong ol, tasol wanpela Witnes long dispela bung i tokim ol long wanpela nius i kamapim ripot bilong sampela lain i bin skelim mani ol i mas tromoi bilong givim blut long man, tasol dispela pe i no stap ples klia. Ol i mas tromoi pe long stretim ol sik samting i kamap taim ol i givim blut long man, na taim man i kisim dispela sik, em i lus long kisim pe long wok mani bilong em taim em i gat sik na em i no inap wok. Na i gat sampela samting moa ol i mas tromoi mani long en. Dispela Witnes i kamapim ripot bilong wanpela lain long Yunaitet Stets i bin skelim gut dispela samting, na dispela ripot i makim olsem: Pe bilong 500 miligram blut i olsem 250 dola, tasol taim ol i tromoi sampela mani moa bilong mekim dispela wok, pe bilong en inap i go bikpela, winim 1,300 dola—em i antap moa yet long dispela 250 dola. Olsem na taim ol i skelim olgeta mani ol i mas tromoi long givim blut long man, ol inap save, mani ol i tromoi long ol samting taim ol i katim man na i no givim blut long en, dispela mani i liklik. Na tu, mani ol i tromoi long katim man na i no mekim wok long blut, bikpela hap bilong dispela mani i bilong baim ol masin samting ol inap mekim wok long en long ol narapela sikman tu.
Sampela dokta i tingim narapela samting tu inap kamap, olsem ol wanlotu bilong sikman i strong long em i mas sakim blut. Ol i tok, sapos wanpela Witnes i no sanap strong na em i kisim blut, ol wanlain Witnes bilong em bai givim baksait olgeta long em o olsem wanem?
Ol Witnes bai skelim gut dispela samting em i bin mekim, long wanem, pasin bilong sakim lo bilong God em i bikpela samting, na ol elda bilong kongrigesen i mas skelim dispela samting. Ol Witnes i laik helpim wanpela man em dokta i ting em inap bagarap na ol i mas katim em, na em i kisim blut. Yumi save, sapos Witnes i mekim olsem, em bai i bel hevi tru long dispela samting em i bin mekim, na em bai tingting planti, nogut God i no orait long em. Kongrigesen i mas helpim kain man olsem, na pilim gut hevi bilong em. Nambawan bikpela pasin bilong lotu Kristen, em pasin sori, olsem na taim ol elda i harim kot bilong em na ol i strong long mekim ol samting i stret, ol i mas mekim pasin marimari tu.—Matyu 9:12, 13; Jon 7:24.
Wanpela profesa bilong dispela kain wok bilong skelim ol samting i stret long mekim long ol sikman, em bilong Yunaitet Stets, em i tok: “Ating i no longtaim na bai yupela i skelim gen pasin bilong yupela long holim strong sampela bilip bilong yupela, a? Nau long dispela taim sampela lotu i bin mekim olsem.”
Ol Witnes i tokim em, pasin bilong ol Witnes long tingim blut i holi, dispela em i wanpela bilip bilong lotu bilong ol—em i no wanpela tingting tasol long wanem samting i stret long mekim na sampela taim ol i skelim gen olsem ol bai i bihainim yet o nogat. Dispela lo bilong Baibel i stap ples klia tru na i no givim rot long yumi long mekim pasin i narapela kain long dispela lo. (Aposel 15:28, 29) Ol Witnes i no orait liklik long kalapim dispela lo bilong God, olsem ol i no orait liklik long lotuim ol imis o mekim pasin pamuk.
Ol Witnes i tenkyu tru long ol dokta—olsem ol dispela dokta i stap long dispela bung long Madrit—em ol i save daun long tok bilong ol Witnes long ol i no ken kisim blut, na ol i wok long painim narapela rot bilong helpim ol Witnes na i stret wantaim bilip bilong ol em Baibel i as bilong en. Yumi save, pasin bilong skelim wanem ol samting i stret long mekim bilong helpim sikman, dispela bai helpim dokta na sikman long toktok gut wantaim, na dispela bai kirapim dokta long tingim laik bilong sikman.
Ol i tok, wanpela dokta bilong Spen i gat biknem, em i bin mekim tok olsem, ol dokta i no ken lusim tingting long ol i save “mekim wok long ol masin samting i no nambawan olgeta, na rot ol i mekim wok long en, dispela tu inap popaia.” Olsem na i gutpela ol i ken ‘bilip olsem ol i mas mekim pasin sori taim ol i no gat bikpela save tumas long wanpela samting.’