Bilip Fandamental i Wok Long Go Bikpela

BILIP FANDAMENTAL—i no longtaim i go pinis na liklik lain tasol insait long ol lotu Talatala i bin bihainim dispela bilip. Tasol nau bikpela senis i kamap! Bruce B. Lawrence, em wanpela niusman i save mekim ripot long lotu, em i raitim stori olsem, inap 30 yia i go pinis, planti man i no bin ting olsem klostu long yia 2000 ol nius na televisen samting bai wok long stori planti long bilip fandamentala na ol lain bilong yunivesiti bai mekim bikpela stadi long en.

Tasol dispela samting i kamap pinis. Ol nius i kamapim ol stori olsem: Ol man i mats long rot na ol i kros pait, na ol i kilim ol man i dai, na sampela lain i tokaut strong long ol meri i no ken rausim bel, na ol lain bilong lotu ol i strong long kamapim senis na ol i stiaim sampela samting long wok politik, na long ai bilong ol man sampela i kukim ol buk ol i ting i mekim tok bilas long God​—⁠em ol dispela kain pasin ol man i bihainim bilip fandamental ol i save mekim. Wanpela nius bilong Itali (Mondo Economico) i tok, long olgeta hap ol man i holim dispela bilip ol i ‘wok strong tru long kamapim senis insait long wok politik long rot bilong lotu.’

Planti stori bilong ol lain fandamental i tok, ol i strong tumas long bihainim bilip bilong ol na ol i no save isi liklik, na ol i save painim rot bilong daunim gavman na mekim pasin bilong birua na tromoi ol bom samting. Ol man i tingting planti long sampela lain i wok long go bikpela, olsem lain Comunione e Liberazione bilong Misin Katolik, na lain Gush Emunim bilong lotu Juda, na lain Christian Coalition bilong lotu Talatala long Not Amerika. Bilong wanem bilip fandamental i wok long go bikpela? Wanem samting i as bilong dispela bilip? Olsem wanem? Ating em rot bilong “God i bekim rong bilong ol man olsem saveman Gilles Kepel bilong Frans i tok”?

[Futnot]

[Piksa Kredit Lain long pes 3]

Nina Berman/Sipa Press