Yu Ting Olsem Wanem Long Sin?

“YU NO gat sin, yu no gat hevi; olgeta strong i stap long yu.” Wanpela saveman bilong ol Hindu, em Vivekananda, em i bin tok olsem taim em i stori long hap tok bilong wanpela buk holi bilong ol Hindu, em Bhagavad Gita. Em i kamapim sampela tok bilong Vedanta na em i tok: “Sapos yu tok yu no gat strong, na yu wanpela sinman, dispela em i nambawan bikpela popaia.”a

Tasol tru yumi ol man i no gat sin, o olsem wanem? Na taim mama i karim yumi, yumi kisim wanem samting long em? Wanpela saveman bilong ol Hindu, nem bilong em Nikhilananda, em i tok, yumi save kisim ol mak bilong skin tasol long papamama. Na em i tok, ol narapela samting, olsem ol pasin bilong yumi, ol dispela pasin i bin kamap long “ol samting yumi bin mekim taim yumi stap long ol narapela bodi bipo.” Vivekananda i tok: “Ol samting yu mekim, dispela yet i makim ol samting bai painim yu long bihain.” Lotu Hindu i no gat wanpela tok olsem yumi bin kisim sin long papamama.

Na ol lotu olsem Soroastrian, Sinto, Konfusas, Buda, ol tu i no tok olsem yumi kisim sin long papamama. Na sampela lotu, em lotu Juda na lotu Kristen i as bilong en, ol i holim bilip olsem yumi bin kisim sin long papamama, tasol nau tingting bilong lain bilong ol long sin i wok long senis. Planti man long nau ol i no ting ol i gat sin.

Wanpela tisa bilong lotu (Cornelius Plantinga Jr.) em i tok: ‘Tingting bilong nau i no orait long kotim man long ol samting bilong stretpela pasin, na i no orait long man i kotim em yet long sampela pasin em i bin mekim.’ Ol lotu i holim nating nem Kristen ol i gat hap asua long dispela tingting olsem sin i no bikpela samting. Na wanpela pris bilong Yunivesiti Duk i tok: “Sapos yu laik harim sampela tok long sin, yu no ken go long lotu.” Na Plantinga i tok, sampela lotu, taim ol i toktok long sin ol i tingim pasin bilong daunim sampela lain na ol i stap nogut.

Tru, i gat planti hevi long i stap bilong ol man long nau. Ol pasin olsem pait na bagarapim man, pasin raskol, ol bikpela pait bilong ol kantri, pasin birua namel long ol narapela narapela lain, kisim drak, pasin giaman, daunim sampela lain na mekim nogut long ol, bagarapim ol pikinini, ol dispela pasin i go bikpela tru. Olsem na wanpela nius i bin tok, taim bilong yumi em i taim nogut bilong pait na kapsaitim blut bilong man, winim olgeta taim bipo. Na yumi ken tingim ol pen na hevi i save kamap taim sik na lapun na dai i painim man. Tru tumas, yumi laik tru bai ol dispela bikpela hevi bilong nau i ken pinis na bai yumi ken i stap gutpela, a?

Orait, yu gat wanem tingting long sin? Yu ting yumi bin kisim sin long papamama? Bihain bai yumi no gat pen na hevi moa? Stori i kamap bihain long dispela bai toktok long ol dispela askim.

[Futnot]