Ol i Stap Rabis Tasol Ol i Gat Planti Samting—Em Inap Kamap Olsem Wanem?
Long bipo yet wanpela man i gat gutpela tingting na save em i beten askim God long em i no ken kamap rabisman. Bilong wanem em i askim God olsem? Long wanem, em i ting nogut em i kamap rabisman na dispela i kirapim em long kisim sampela kain tingting na pasin na nau em i no pas gut moa wantaim God. Dispela i kamap klia long tok bilong em, olsem: “Yu ken givim mi kaikai inap long skel bilong mi . . . nogut mi kamap rabisman na mi stilim ol samting na mi daunim nem bilong yu, God bilong mi.”—SINDAUN 30:8, 9.
OLSEM WANEM? Ating dispela i makim olsem rabisman i no inap i stap gut long wok bilong God? Nogat! Long bipo yet na i kam inap nau, planti wokboi bilong Jehova ol i bin stap gut long em, maski ol i stap rabis na dispela i givim planti hevi long ol. Na Jehova i save laikim tru ol man i bilip long em, na em i save lukautim ol long kaikai samting.
Ol Man i Stap Gut Long God Long Bipo
Sampela taim aposel Pol yet i sot long ol samting. (2 Korin 6:3, 4) Na em i stori long planti witnes i bin stap paslain long taim bilong ol Kristen na ol i stap gut long God, em sampela bilong ol i bin “pasim skin bilong sipsip na meme olsem laplap, na ol i wokabaut i go. Ol i sot long olgeta samting bilong bodi . . . na ol i go nabaut na hait long graun i no gat man na long ples maunten na long ol hul bilong ston na long ol hul insait long graun.”—Hibru 11:37, 38; 12:1.
Wanpela bilong ol dispela gutpela witnes em Elaija. Wanpela taim i no gat ren inap 3-pela yia hap, tasol long olgeta taim Jehova i lukautim em long kaikai. Pastaim Jehova i kirapim ol kotkot long bringim bret na abus i kam long em. (1 King 17:2-6) Bihain Jehova i wokim mirakel na long olgeta taim i gat plaua wantaim wel long ol sospen bilong wanpela meri em man bilong em i dai pinis, na long dispela plaua na wel em i wokim bret bilong Elaija. (1 King 17:8-16) Tru, em bret nating tasol, tasol dispela profet, na meri wantaim pikinini bilong em, ol i stap laip long dispela kaikai.
Na Jehova i bin lukautim gutpela profet Jeremaia long taim nogut ol man i sot tru long kaikai. Taim ol Babilon i kam banisim Jerusalem, ol manmeri i mas “skelim gut kaikai na wara, bilong ol i ken kaikai na dring long ol wan wan de,” tasol Jeremaia i abrusim bagarap long dispela taim. (Esekiel 4:16) Orait bihain bikpela hangre nogut tru i kamap na sampela meri i kirap na kaikai pikinini bilong ol yet. (Krai 2:20) Jeremaia i kalabus long rum gat, long wanem, em i bin autim tok, tasol Jehova i mekim na long olgeta de ol i givim “wanpela bret” long Jeremaia i go inap long “taim olgeta bret long taun i pinis.”—Jeremaia 37:21.
Olsem na Jeremaia i wankain olsem Elaija—em i gat liklik kaikai tasol. Baibel i no tokim yumi olsem Jeremaia i kisim wanem kain kaikai taim bret i pinis long Jerusalem, o em i kaikai hamas taim. Tasol yumi save, Jehova i bin lukautim em long kaikai na em i no bagarap long dispela taim nogut tru bilong bikpela hangre.
Long nau, long olgeta hap bilong graun i gat sampela lain ol i stap rabis. Yunaitet Nesen i tok, i gat planti lain bilong Afrika ol i stap rabis, winim ol narapela kantri. Wanpela ripot bilong Yunaitet Nesen long 1996 i tok, ‘Inap 50 pesen bilong ol manmeri bilong Afrika ol i stap rabis.’ Tasol maski ol i sot tru long mani na kaikai, planti manmeri bilong Afrika ol i wok long bihainim ol lo bilong Baibel long i stap bilong ol na ol i mekim wok bilong God—ol i bilip tru olsem em bai lukautim ol long kaikai. Yumi ken tingim stori bilong sampela man na meri em ol i sindaun long wanpela kantri i gat planti hevi.
Ol i Bihainim Stretpela Pasin
Maikel,a em wanpela fama long Naijiria, em i gat 6-pela pikinini em i mas lukautim. Em i tok: “I hatwok long bihainim stretpela pasin taim yumi no gat mani bilong lukautim famili bilong yumi. Tasol taim wanpela traim i kamap na i laik pulim mi long mekim sampela pasin i no stret, mi save tingim Efesus 4:28, i tok: ‘Ol stilman i no ken stil moa. Nogat. Nau ol i mas wok. Ol i mas mekim gutpela wok long han bilong ol yet.’ Olsem na taim wanpela traim i painim mi, mi save askim skin bilong mi, ‘Mi bin mekim sampela wok na bai mi inap kisim dispela mani?’ ”
Maikel i tok moa olsem: “Wanpela taim mi wokabaut long rot na mi lukim wanpela paus i pundaun long wanpela motabaik. Mi no inap pasim draiva bilong motabaik, olsem na mi kisim dispela paus na mi lukim olsem mani i pulap tru long en! Mi lukim nem insait long paus, olsem na mi inap painim papa bilong en na mi bekim paus long em.”
Daunim Bel Hevi
Wanpela man long Not Afrika i tok: “Taim yumi stap rabis, em i [kain] olsem yumi pas insait long wanpela hul i daun tru, na yumi inap lukim lait i stap ausait na ol man i wokabaut i go i kam, tasol yumi no inap singaut long ol i kam helpim yumi o givim wanpela lata long yumi bambai yumi ken lusim dispela hul.” Em nau, taim man i stap rabis, dispela inap mekim na em i stap bel hevi na tingting planti. Na sampela wokboi bilong God tu ol inap lukim sampela man i gat planti samting na nau ol i kirap na ting olsem pasin bilong i stap gut long God i no inap helpim ol liklik. (Skelim wantaim Song 73:2-13.) Yumi inap mekim wanem bilong daunim kain bel hevi olsem?
Pita em i wanpela man bilong Wes Afrika. Em i bin mekim wok bilong gavman inap 19 krismas na nau em i pinis long wok. Em i save kisim liklik pensen tasol bilong lukautim em long kaikai samting. Em i tok: “Sampela taim mi stap bel hevi, na long dispela taim mi save tingim ol tok mi bin kaunim long Baibel na ol buk samting bilong Sosaiti Was Taua. Dispela olpela pasin i stap long graun em i laik pinis, na yumi wetim nupela pasin i kamap, i winim dispela olpela pasin.
“Na tu, mi save tingim tok bilong 1 Pita 5:9, i tok: ‘Yupela i mas i stap strong long bilip na sakim [Satan]. Yupela i save, ol arapela manmeri bilong God, ol i stap long olgeta hap bilong graun, ol tu i save karim wankain pen olsem yupela.’ Olsem na i no mi wanpela tasol i save karim hevi. Ol dispela tok bilong Baibel i helpim mi long rausim ol tingting i save bagarapim bel bilong mi.”
Pita i tok moa olsem: “Taim Jisas i stap long graun em i bin wokim planti mirakel, tasol em i no bin helpim sampela man long kamap maniman. Olsem na mi no ken ting em i mas helpim mi long kamap maniman, a?”
Beten i Gat Strong
Taim yumi beten long God Jehova, dispela em i narapela rot bilong daunim ol tingting i save mekim yumi i bel hevi. Taim Maria i kamap wanpela Witnes Bilong Jehova long 1960, famili bilong em i lusim em. Em i no marit, na nau em i winim pinis 50 krismas na skin bilong em i no strong moa, na em i stap rabis long ol samting bilong skin. Tasol em i save wok strong long mekim wok Kristen bilong autim tok.
Maria i tok: “Taim mi bel hevi, mi save beten long Jehova. Mi save i no gat narapela man inap helpim mi olsem Jehova. Mi lain pinis olsem: Taim yumi bilip na wetim Jehova, em i save helpim yumi. Oltaim mi save tingim tok bilong King Devit, i stap long Song 37:25: ‘Bipo mi yangpela, na nau mi lapun pinis, tasol mi no lukim God i givim baksait long wanpela stretpela man. Na mi no lukim ol pikinini bilong stretpela man i sot long kaikai, na i singaut long ol arapela man bilong ol i ken helpim ol. Nogat tru.’
“Na taim mi kaunim stori bilong ol lapun brata sista long Wastaua, dispela i save strongim mi. God Jehova i bin helpim ol, olsem na mi save em bai wok yet long helpim mi tu. Em i save mekim gut long liklik wok mani bilong mi long maketim fufu [ol i wokim long tapiok], na long dispela rot mi inap kisim liklik mani bilong baim kaikai bilong dispela de. Sampela taim, klostu mi lus olgeta long mani na mi tingting planti, na long dispela taim Jehova i save salim wanpela i kam na em i givim wanpela presen long mi na i tok, ‘Sista, plis yu kisim dispela.’ I no gat wanpela taim Jehova i bin lusim mi.”
Stadi Long Baibel i Bikpela Samting
Ol Witnes Bilong Jehova i ting em i bikpela samting long stadi long Baibel, na ol rabisman i stap namel long ol, ol tu i ting olsem. Jon i gat 60 krismas na em i mekim wok painia (em man i save autim tok bilong Kingdom long olgeta de), na em i wanpela wokman insait long kongrigesen. Em i save sindaun long wanpela pipia haus nogut i gat tupela plua na i gat 13 famili i save sindaun long en. Jon i save stap long namba wan plua, long wanpela hap ol i bin banisim long sampela hap plaiwut. Long dispela rum i gat tupela olpela sia na wanpela tebol i gat planti buk i hip i stap long en, em ol buk bilong helpim yumi long stadi long Baibel. Em i save slip long wanpela mat.
Bipo Jon i save maket long bret, na em i save kisim olsem wan kina long en long olgeta de. Tasol bihain i gat tambu long kisim wit i kam insait long kantri, olsem na dispela wok mani bilong em i pinis. Em i tok: “Sampela taim i stap bilong mi i gat hatwok tru long en, tasol mi mekim yet wok painia. Jehova yet i save lukautim mi. Wanem kain wok mi inap painim, mi save mekim dispela wok, na mi no save wetim wanpela man i givim mani o kaikai long mi, tasol ol brata sista long kongrigesen ol i save helpim mi gut. Ol i helpim mi long painim wok, na sampela taim ol i givim mani long mi olsem presen.
“Mi save makim taim bilong kaunim Baibel na ol buk samting bilong Sosaiti Was Taua. Mi save stadi long bikmoning yet, taim i no gat ol pairap long haus, na taim mipela i gat paua mi save kaunim ol buk samting long biknait. Mi save mi mas stadi oltaim na no ken lusim.”
Skulim Ol Pikinini Bambai Ol i Ken Kisim Laip
Daniel i gat 6-pela pikinini, na meri bilong em i dai pinis. Long 1985 ol i pinisim em long wok mani em i bin holim inap 25 yia, tasol em i kisim wanpela wok bilong lukautim stua. Em i tok: “Mi na famili bilong mi i gat hatwok tru long painim mani samting. Nau mipela inap kaikai wanpela taim tasol long olgeta de. Wanpela taim mipela i no bin kaikai inap 3-pela de. Mipela inap dring wara tasol bilong helpim mipela long i stap laip.”
Daniel em i wanpela elda long kongrigesen. Em i tok: “Mi no save lusim wanpela miting Kristen, na oltaim mi save mekim wok bilong redim ol tok samting mi mas mekim long miting. Taim i gat sampela wok bilong mekim long Haus Kingdom, oltaim mi save stap bilong mekim sampela wok. Na taim mipela i painim taim nogut, mi save tingim tok Pita i bin mekim long Jisas, i stap long Jon 6:68: ‘Bikpela, bai mipela i go long husat?’ Sapos mi lusim wok bilong Jehova, bai mi go we? Tok bilong Pol long Rom 8:35-39, dispela tu i save strongim mi, long wanem, em i kamapim klia olsem i no gat wanpela samting inap pasim yumi long kisim sori bilong God na Krais. Mi wok strong long putim dispela kain tingting long bel bilong ol pikinini bilong mi. Oltaim mi save tokim ol, yumi no ken lusim Jehova.” Daniel i save wok strong tru long mekim wok bilong God, na oltaim em i save mekim Baibel-stadi wantaim famili, na dispela i bin helpim gut ol pikinini bilong em.
Pasin Bilong Givim Samting
Yumi inap ting olsem ol man i stap rabis nogut tru ol i no inap givim sampela samting bilong helpim wok bilong Kingdom. Tasol nogat. (Skelim wantaim Luk 21:1-4.) Sampela Witnes long Gana em ol i save wokim gaden na kisim kaikai long dispela rot tasol, ol i makim hap graun bilong ol na ol i planim kaikai long en bilong helpim wok bilong Kingdom. Taim ol i maket pinis long dispela kaikai, mani ol i kisim ol i save mekim wok long en bilong helpim wok bilong Kingdom—na hap bilong dispela mani ol i save putim olsem kontribusen long Haus Kingdom bilong ol Witnes Bilong Jehova i stap long hap bilong ol.
Joan i save sindaun long hap bilong Sentral Afrika na em i wanpela painia. Bilong lukautim man bilong em, em bun bilong em i dai, na 4-pela moa long famili, em i save maket long bret. Wanpela taim kongrigesen bilong em i mas kisim sampela bang bilong Haus Kingdom, na famili bilong Joan i pasim tok long givim olgeta mani i stap long haus bilong ol. Nau ol i no gat mani. Tasol long de bihain long dispela, wanpela man i bekim dinau bilong em long ol, em wanpela dinau i bin stap longtaim; dispela mani em i givim long ol, ol i bin ting ol i no inap tru long kisim!
Joan em i stap amamas na em i no save tingting planti oltaim long mani. Em i tok: “Mi save beten na kamapim dispela hevi bilong mi long Jehova, na nau mi save go na mekim wok bilong autim tok. Mipela save, ol samting i no inap kamap gutpela long dispela taim nau yumi stap long en. Tasol mipela i save Jehova bai lukautim mipela long ol samting mipela i mas kisim.”
Ol i Save Wok Strong
Ol Witnes Bilong Jehova i save laikim tru ol narapela insait long lain bilong ol, na dispela i olsem wanpela mak bilong ol. (Jon 13:35) Sampela i gat mani, ol i save helpim ol wanbilip Kristen ol i sot long ol samting. Sampela taim ol i save givim mani olsem presen na sampela taim ol i save helpim ol long kisim wok mani.
Mak i save sindaun long Kongo, na em i gat sik lepra. Dispela sik i bagarapim ol pinga long han lek bilong em. Em i mas wokabaut long tupela stik. Taim Mak i tingting long mekim wok bilong Jehova, em i kirap senisim sampela pasin long i stap bilong em. Em i lusim pasin bilong em long sindaun long rot na singaut long kaikai, na em i kirap wokim gaden na planim kaikai bilong em yet. Na em i wokim ol brik long wanpela kain graun na ol man i baim.
Maski skin bilong Mak i nogut, em i wok strong i go. Bihain em i baim hap graun na wokim wanpela liklik haus long en. Long nau em i wanpela elda long kongrigesen, na ol man long taun em i stap long en ol i save tingim em olsem man i gat nem. Nau em i save helpim ol narapela i sot long ol samting.
Tasol long sampela hap, i no inap tru long kisim wanpela wok mani. Wanpela elda Kristen i wok long wanpela brens-ofis bilong Sosaiti Was Taua long Sentral Afrika em i tok: “Planti brata long dispela hap ol i no gat wok mani. Sampela i wok strong long kamapim liklik wok mani bilong ol yet, tasol dispela i hatwok. Planti ol i kisim tingting olsem: Maski ol i mekim wanem samting, hevi bai i stap yet long ol, olsem na ol bai lusim sampela samting bilong skin na mekim wok painia. Taim ol i mekim dispela wok, planti ol i lukim olsem God i mekim gut long ol na ol i gat ol kaikai samting, winim ol samting ol bai kisim sapos ol i mekim wanpela wok i gat liklik pe tasol o i no gat pe long en.”
Jehova i Save Lukautim Lain Bilong Em
Krais Jisas i stori long em yet olsem: “Ol weldok i gat hul long graun, na ol pisin i gat haus bilong ol. Tasol Pikinini Bilong Man em i no gat ples bilong slip.” (Luk 9:58) Na aposel Pol tu i tok: “Bipo tru na i kam inap nau, mipela i save stap hangre, na nek bilong mipela i drai tumas, na mipela i save putim ol klos i brukbruk pinis. Ol i save paitim mipela nabaut. Na mipela i no gat ples bilong sindaun gut.”—1 Korin 4:11.
Jisas na Pol tu, long laik bilong ol yet ol i gat liklik samting tasol bilong skin bambai ol i ken lusim bikpela hap taim moa long mekim wok bilong God. Planti Kristen bilong nau ol i stap rabis, long wanem, i no gat narapela rot bilong ol. Tasol ol i save bihainim ol lo bilong Baibel long i stap bilong ol na ol i wok strong long mekim wok bilong God. Jehova i laikim tumas ol na ol i save long dispela samting taim ol i lukim tok bilong Jisas i kamap tru long ol, em i tok: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting [bilong skin] tu long yupela.” (Matyu 6:25-33, Nupela Testamen na Ol Sam, bilong 1978) Na tu, ol dispela wokboi bilong Jehova i stap rabis ol i lukim ol samting i kamapim klia olsem “Bikpela yet i givim yumi planti gutpela samting.”—Sindaun 10:22.
[Futnot]
a Mipela i senisim ol nem long dispela stori.
[Blok long pes 6]
Husat Ol i “Bihainim” Tok Bilong Baibel?
LONG 1994, wanpela lain (Gallup) i gat wok long kisim tingting bilong ol man long ol samting, ol i tok, klostu olgeta manmeri long Amerika (96 pesen) ol i save “bilip long God o long wanpela spirit i stap antap.” Na wanpela nius (U.S.News & World Report) i tok, ‘taim yumi skelim hamas manmeri i stap long Yunaitet Stets na hamas haus lotu i stap bilong dispela lain, yumi ken tok, i gat planti haus lotu moa long dispela kantri, winim ol narapela kantri long Graun.’ Tru, long skin i olsem ol i bilip tru long God, tasol George Gallup, Jr., em i bin mekim wok longpela taim long kisim tingting bilong ol man, em i tok: ‘Planti manmeri bilong Amerika ol i no save olsem ol i bilip long wanem samting na i gat wanem as na ol i bilip long en.’
Na ol samting ol dispela lain i kisim save long en i makim olsem bilip bilong planti man i narapela kain tru long pasin ol i bihainim. Olsem: ‘Ol man i gat wok long skelim sindaun bilong ol man ol i lukim olsem ol hap bilong kantri i gat planti pasin raskol long en, long ol dispela hap yet ol man i holim strong bilip bilong lotu na ol i strong long bihainim.’ Man i tok olsem, em Jeffery Sheler, em man bilong raitim buk.
Tasol yumi no ken kirap nogut long dispela. Bilong wanem? Long wanem, long bipo yet aposel Pol i bin givim tok lukaut long ol wanlain Kristen long was gut long ol man i save tok, “ ‘Mi save long God.’ Tasol pasin bilong ol i soim olsem, ol i givim baksait pinis long em.” (Taitus 1:16) Na tu, Pol i tokim yangpela man Timoti, long “taim bilong las de” ol man bai i “bihainim pasin bilong God long skin tasol na ol bai i no save liklik long bikpela strong i stap long pasin tru bilong God.”—2 Timoti 3:1, 5.
Tasol ol Kristen tru ol i wok strong long bihainim tok bilong Krais Jisas long “go mekim olgeta lain manmeri i kamap disaipel.” (Matyu 28:19) Taim ol i mekim dispela wok, ol i “bihainim” tok bilong Baibel na ol i no “harim nating tasol.”—Jems 1:22.
[Piksa long pes 7]
Long olgeta hap bilong graun ol man i save ting em i bikpela samting long stadi long Baibel