Famili—Em i Laik Bagarap!
“NA OL i stap amamas wantaim i go inap long olgeta taim bihain.” Long nau dispela gutpela samting i painim wan wan marit tasol. Tok promis tupela marit i mekim long narapela i laikim tru narapela ‘inap long olgeta taim tupela i stap wantaim long graun,’ planti taim dispela em i wanpela tok promis nating tasol. I olsem pasin bilong stap amamas insait long famili i no inap kamap.
Namel long yia 1960 na 1990, pasin bilong katim marit i go bikpela tru, olsem dabol, long ol kantri i gat planti wok bisnis long en long hap bilong Wes. Long sampela kantri dispela pasin i go bikpela inap 4-pela taim. Olsem: Long olgeta yia long Swiden inap olsem 35,000 i marit, na 17,000 bilong ol i save katim marit. Dispela i nogutim 45,000 pikinini. Maski planti man na meri i stap nating wantaim—ol i no marit—planti moa bilong ol i no save stap gut wantaim, narapela i lusim narapela, na dispela i nogutim planti tausen pikinini moa. Kain samting olsem i kamap long planti kantri long olgeta hap, olsem yumi ken lukim long blok long pes 5.
Tru, pasin bilong katim marit na famili i bruk, dispela pasin i no kamap long nau tasol. Lo Bilong Hamurabi bilong yia 1750 B.C.E. samting, em i gat sampela lo i larim ol man long Babilon i katim marit. Na Lo Bilong Moses tu, God i kamapim long yia 1513 B.C.E., em i orait long ol Israel i katim marit. (Lo 24:1) Tasol i no gat wanpela taim bipo em famili i no pas gut wantaim olsem long nau. Inap 13 yia i go pinis, wanpela niusman i tok: “Kirap long nau na i go inap 50 yia bihain, ating bai yumi no gat moa ol famili tru. Ol man bai stap nating wantaim long kain kain pasin.” Na ol samting i kamap, kirap long dispela taim na i kam inap long nau, em i kamapim olsem dispela tok i tru. Pasin bilong famili long stap gut wantaim i bin go nogut hariap, olsem na i stret yumi kamapim askim olsem: “Famili inap abrusim bagarap?”
Bilong wanem i hatwok long planti marit long pas gut wantaim na stap olsem wanpela famili i wanbel? Wanem samting i helpim sampela marit long stap gut wantaim inap planti yia, na ol i amamas long tingim de bilong marit bilong ol i bin kamap 25 o 50 yia bipo? Long 1983, wanpela ripot i tok, wanpela man na meri long Ripablik Asebaijan em bipo Rasia i bosim, ol i bin tingim de bilong marit bilong ol i bin kamap 100 yia bipo—man i gat 126 krismas na meri i gat 116 krismas.
Wanem Samting i Bagarapim Famili?
Long planti kantri sampela as na ol manmeri i katim marit i olsem: Pasin pamuk, pasin bilong bagarapim poroman marit long samting bilong tingting na skin, narapela i lusim narapela, pasin bilong dring oltaim, man o meri i kamap longlong, man o meri i marit yet na em i kisim narapela poroman marit, pasin bilong kisim drak, na sampela samting moa. Tasol as na planti i katim marit long nau em tingting bilong ol long marit na famili—tingting bilong ol i senis olgeta. Inap longtaim tru ol man i bin ting marit em i wanpela samting holi, tasol nau ol i no ting olsem. Ol man bilong wokim musik, na ol piksa wokabaut, na ol stori nating long televisen, na ol buk na nius em planti man i save kaunim, ol i litimapim pasin bilong i stap fri long mekim maritpasin long laik bilong ol yet, na mekim pasin pamuk, na kain kain pasin nogut, na bihainim laik bilong ol yet tasol. Ol i kirapim ol man long bihainim kain kain pasin na dispela i bagarapim tingting na bel bilong ol yangpela na lapun tu.
Long 1996 wanpela lain i tok, long Amerika inap 22 pesen bilong ol manmeri i tok sampela taim i gutpela sapos man o meri marit i prenim narapela. Wanpela bikpela nius bilong Swiden (Aftonbladet) i bin kirapim ol meri long katim marit, long wanem, “em bai helpim sindaun bilong ol.” Na sampela kain saveman i tok insait long skin bilong yumi, yumi gat wanpela samting i mekim na taim sampela yia i go pinis dispela samting i kirapim yumi long senisim poroman marit bilong yumi. Orait, sampela yia moa yumi senisim gen poroman marit, na i go i go. Tok bilong ol dispela saveman i olsem yumi ken kisim planti poroman na sapos yumi laik katim marit, no gat rong long en. Na sampela i tok sapos papamama i katim marit dispela inap helpim ol pikinini, em i ken redim ol long karim hevi taim ol i katim marit bilong ol yet!
Planti yangpela i no laik stap insait long wanpela famili i gat papa, na mama, na pikinini. Planti i tok: “Mi no inap ting olsem long laip bilong mi olgeta bai mi stap wantaim wanpela poroman tasol.” Wanpela yangpela man bilong Denmak i gat 18 krismas, em i tok: “Marit i olsem Krismas, em wanpela stori nating bilong ol pikinini. Mi no bilip long en.” Wanpela meri bilong lain Nesenel Kaunsil Bilong Ol Meri long Aialan, em Noreen Byrne, i tok: “Planti manmeri i tingting olsem: Maski long stap wantaim wanpela [man] na wasim sokis bilong em. Raun wantaim ol man na amamas maski long marit . . . Planti meri i ting ol i no gat wok long sindaun wantaim wanpela man bambai ol i ken stap gut.”
Papa o Mama Tasol i Lukautim Pikinini
Long olgeta hap bilong Yurop ol manmeri i gat dispela kain tingting na dispela i mekim na planti meri i no marit i karim pikinini. Sampela bilong ol i gat 13 i go inap 18 krismas samting, tasol ol i ting kisim bel nating i no gat rong. Sampela meri yet i laik mekim bikpela long pikinini bilong ol. Planti em ol mama i stap nating wantaim papa bilong pikinini inap sotpela taim, na ol i no tingting long marit. Long yia i go pinis, nius Newsweek i kamapim wanpela bikpela stori nem bilong en “Marit i Dai Pinis?” Stori i tok, long Yurop namba bilong ol pikinini ol meri i karim tasol ol i no marit i wok long go antap, na i olsem i no gat man i tingting planti long dispela pasin. Namba wan kantri em dispela samting i wok long kamap long en em Swiden—long olgeta 2-pela 2-pela pikinini i kamap, wanpela pikinini i kamap nating—mama i no marit i karim. Long Denmak na Nowe klostu i wankain, na long Frans na Inglan long olgeta 3-pela 3-pela pikinini i kamap, wanpela pikinini i kamap nating—mama i no marit i karim.
Long Amerika, inap planti yia nau namba bilong ol famili i gat papa na mama long en i wok long i go daun tru. Wanpela ripot i tok: “Long 1960, . . . inap 9 pesen bilong ol pikinini i stap long ol famili i gat papa tasol o mama tasol. Long 1990, dispela namba i go antap tru—inap 25 pesen bilong ol pikinini i stap long kain famili olsem. Long nau, inap 27.1 pesen bilong olgeta pikinini bilong Amerika ol i kamap insait long famili i gat papa tasol o mama tasol, na dispela namba i wok long go antap yet. . . . Kirap long 1970 na i kam inap long nau, namba bilong ol famili i gat papa tasol o mama tasol i go antap tru olsem dabol. Sampela saveman i tok, ol famili i gat papa na mama long en i wok long bagarap—ol inap pinis olgeta.”
Long ol kantri em Misin Katolik i lusim bikpela hap strong bilong en long bosim ol man bambai ol i bihainim stretpela pasin, ol famili i gat papa tasol o mama tasol ol i go planti moa. Long Itali klostu 50 pesen tasol bilong olgeta famili i gat mama na papa na ol pikinini long en, na dispela kain sindaun i wok long senis—planti marit i no kamapim pikinini na ol famili i gat papa tasol o mama tasol.
Welfe long sampela kantri i save kirapim ol manmeri long ol i no ken marit. Ol mama singel i gat pikinini bai lus long mani ol i kisim long welfe sapos ol i marit. Ol mama singel i gat pikinini long Denmak ol i kisim sampela mani moa bilong lukautim pikinini. Na ol mama singel i no gat yet 18 krismas ol i kisim sampela mani moa na gavman i baim rent bilong haus. Olsem na mani i mekim na sampela i no laik marit. Alf B. Svensson i tok, ol manmeri long Swiden i mas tromoi 400 i go inap 600 tausen kina olsem takis bilong helpim ol wan wan marit i katim marit long baim haus, na kisim mani bilong helpim sindaun bilong ol.
Ol lotu i holim nating nem Kristen i no mekim planti samting bilong senisim dispela pasin nogut insait long ol famili. Planti pris pasto i wok strong long stretim hevi long famili bilong ol yet, na ol i pilim olsem ol i no inap helpim ol narapela famili. Na i olsem sampela i kirapim ol man long katim marit. Nius Aftonbladet bilong Epril 15, 1996, i tok, pasto Steven Allen bilong Bretfot, Inglan, i kamapim wanpela kain bung bilong em yet long katim marit, na em i tok i gutpela sapos dispela kain bung i kamap olsem samting olgeta misin i ken mekim wok long en long Briten. Em i tok: “Em wanpela bung bilong helpim ol manmeri bambai ol i ken orait long ol samting i bin painim ol. Em i bilong helpim ol long save olsem God i laikim ol yet na ol i no ken bel hevi moa.”
Olsem na wanem samting bai painim famili? I gat as na yumi ken bilip olsem famili inap abrusim bagarap? Sampela famili inap stap wanbel, maski planti hevi i painim ol? Plis kaunim stori i kamap bihain long dispela.
[Sat long pes 5]
LISTA BILONG MARIT NA PASIN BILONG KATIM MARIT LONG SAMPELA KANTRI
KANTRI YIA MARIT KATIM MARIT
Denmak 1993 31,507 12,991
Estonia 1993 7,745 5,757
Frans 1991 280,175 108,086
Japan 1993 792,658 188,297
Jemani 1993 442,605 156,425
Kanada 1992 164,573 77,031
Kuba 1992 191,837 63,432
Moldaiv 1991 4,065 2,659
Nowe 1993 19,464 10,943
Ostrelia 1993 113,255 48,324
Pueto Riko 1992 34,222 14,227
Rasia 1993 1,106,723 663,282
Ripablik Sek 1993 66,033 30,227
Swiden 1993 34,005 21,673
Yunaitet Kingdom 1992 356,013 174,717
Yunaitet Stets 1993 2,334,000 1,187,000
(Mipela kisim dispela ripot long buk 1994 Demographic Yearbook, Yunaitet Nesen, Nu Yok 1996)