Yu Ting Krismas i Lusim Pinis Krais?

“Mi no inap wanbel liklik long ol amamas ol man i save mekim long taim bilong Krismas. Long tingting bilong mi, ol dispela amamas i narapela kain tru long ol samting Jisas i bin mekim na ol tok em i bin skulim ol man long en.”—Mohandas K. Gandhi.

PLANTI man bai ol i no wanbel wantaim Gandhi long dispela tok. Ating bai ol i tingting, ‘Wanpela bikman Hindu i no inap save long ol samting bilong wanpela bikpela de bilong ol Kristen.’ Tasol pasin bilong mekim Krismas em i go kamap long olgeta hap, na i go insait long olgeta lain. Long olgeta Disemba, i olsem olgeta lain i save mekim Krismas.

Olsem: Inap olsem 145 milion manmeri bilong Esia ol i save mekim Krismas, na dispela namba i winim bilong tenpela yia i go pinis inap 40 milion. Na taim Gandhi i tok long “ol amamas,” sapos em i tingim pasin bilong Krismas yumi olgeta i save lukim long nau, em ol man i mekim save long baim planti samting, yumi mas tok dispela em i nambawan bikpela pasin ol i mekim long Krismas, winim ol narapela pasin. Wanpela nius (Asiaweek) i tok: ‘Krismas long Esia​—⁠ol lait long Hong Kong i gat kala kala em ol i save putim bilong Krismas, na ol diwai bilong Krismas ol i sanapim insait long ol hotel long Beijing, na bokis kaikai bilong bulmakau i gat nupela pikinini long en, em ol i putim long ples bilong ol bikpela stua long Singapo​—⁠ol dispela pasin ol i mekim, klostu olgeta em i samting bilong graun (olsem samting bilong bisnis tasol).’

Pasin bilong nau long mekim Krismas, i olsem i no tingim moa Krais, a? Kirap long yia 350 C.E. samting, ol lotu i bin tingim Disemba 25 olsem bikpela de bilong Krismas. Misin Katolik i bin makim dispela de bilong tingim de mama i bin karim Jisas. Tasol wanpela lain long Amerika long nau i bin askim ol man long tingting bilong ol long Krismas, na 33 pesen tasol i ting, nambawan bikpela samting insait long Krismas, em mama i bin karim Krais.

Orait olsem wanem? Ol toksave bilong baim ol samting bilong Krismas, na ol man i mas baim ol presen, na bilasim ol diwai, na stretim rot bilong wokim ol pati, na ol kat bilong Krismas​—⁠ating yu pilim olsem ol dispela pasin i mekim na ol i no tingim Jisas moa insait long Krismas, a?

Planti man i ting, gutpela rot bilong putim Krais i go bek insait long Krismas, em ol i mas wokim ol piksa bilong makim taim mama i bin karim em. Ating yu bin lukim piksa ol i wokim bilong makim pikinini Jisas i slip long bokis kaikai bilong bulmakau, na Maria wantaim Josep na sampela wasman bilong sipsip ol i sanap lukluk long em, na “tripela saveman” na sampela bulmakau na donki, na sampela man bilong ples ol tu i stap. Planti man i ting ol dispela piksa ol i wokim ol i save kirapim tingting bilong ol manmeri na ol i tingim as tru bilong Krismas. Wanpela nius (U.S. Catholic) i tok, ‘ol dispela piksa ol i wokim i save skulim yumi moa yet, winim wanpela stori bilong gutnius, tasol ol dispela piksa i kamapim tu olsem ol dispela stori i no stori long ol samting i bin kamap tru tru.’

Tasol olsem wanem ol dispela piksa i makim olsem ol stori bilong Gutnius long Baibel i no stori long ol samting i bin kamap tru tru? Ol dispela liklik piksa ol i wokim na penim gut na ol i sanapim, dispela i givim tingting long yumi olsem stori bilong taim mama i bin karim Jisas em i wanpela stori nating tasol. Inap 700 yia samting i go pinis, wanpela bruder i bin kamapim dispela pasin bilong wokim piksa bilong pikinini Jisas i slip long bokis na Maria tupela Josep i stap wantaim em, na pastaim i no gat planti bilaspasin ol i mekim long ol dispela piksa. Tasol long nau ol kampani i save kisim bikpela mani long wokim ol dispela samting, wankain olsem ol narapela samting bilong Krismas. Long Nepels, Itali, planti stua i save putim ol piksa bilong pikinini Jisas na Maria na Josep, na ol man i save baim long olgeta taim, i no long taim bilong Krismas tasol. Tasol sampela piksa ol man i save laikim tru, i no makim ol man na meri em stori bilong Gutnius i kolim, nogat; ol dispela piksa i makim Prinses Diana, Mama Teresa, na wanpela man bilong wokim piksa bilong ol klos i gat stail, em Gianni Versace. Na long sampela hap ol i save wokim ol dispela liklik piksa long sokolat, o plaua olsem pasta, o ol gam samting bilong solwara. Olsem na taim yumi lukim ol dispela piksa, i hatwok long tingim dispela stori i olsem samting i bin kamap tru long bipo.

Em nau, olsem wanem yumi ken ting ol dispela kain piksa inap ‘skulim yumi moa yet, winim stori bilong gutnius’? Olsem wanem? Ating ol dispela stori long Gutnius i no stori long ol samting i bin kamap tru? Maski sampela man i no bilip long Baibel, ol i mas tokaut olsem Jisas em i wanpela man i bin stap tru long graun long bipo. Olsem na i mas i gat wanpela taim em i bin stap olsem pikinini tru, na mama i bin karim em long wanpela ples tru. Orait, i mas i gat wanpela rot i gutpela moa bilong kisim save long ol samting i bin kamap long taim mama i karim em, winim pasin bilong lukluk long ol dispela piksa bilong pikinini Jisas ol i save wokim!

Na tru tumas, wanpela gutpela rot i stap. I gat tupela man i bin raitim stori bilong taim mama i karim Jisas. Sapos sampela taim yu pilim olsem ol man i save givim baksait long Jisas long taim bilong Krismas, orait yu ken skelim ol dispela stori i stap long Baibel, a? Long ol dispela Gutnius bai yu no lukim ol stori nating tasol, nogat; bai yu lukim wanpela gutpela stori yu bai laikim tru​—⁠em stori tru tru bilong taim mama i bin karim Krais.

[Piksa Kredit Lain long pes 3]

Bilas long arere bilong pes 3-6, 8, na 9: Fifty Years of Soviet Art