Amamas Long “Laip Em i Laip Tru”

GOD JEHOVA i bin putim tingting long bel bilong ol man na ol inap pilim olsem taim i save stap oltaim oltaim. (Saveman 3:​11) Dispela i mekim na taim i dai i laik painim ol, ol i pilim olsem nau ol i no gat rot, tasol maski ol i pilim olsem, ol i gat bikpela laik yet long i stap laip.

Tok Bilong God, em Baibel, i stori long ol gutpela samting yumi ken wetim i kamap. (2 Timoti 3:​16) Jehova em i as bilong pasin sori, olsem na em i no ken wokim man em inap long pilim olsem taim i save go i go na i no gat pinis bilong en na bihain Jehova i makim em bilong i stap sampela yia tasol, nogat. God i no wokim yumi bambai yumi mas bel hevi long i stap bilong yumi​—⁠dispela i no stret wantaim ol gutpela pasin bilong em. Em i no wokim yumi bilong i stap olsem “ol abus i no gat tingting, na ol i save bihainim ol laik bilong bodi tasol, . . . [na ol i] bilong ol man i ken holimpas ol na kilim ol i dai tasol,” nogat.​—⁠2 Pita 2:​12.

God i wokim Adam na Iv na bai ol inap pilim olsem taim i save go i go inap oltaim oltaim. Em nau, God i wokim samting “i gutpela” ; em i wokim tupela bambai ol inap i stap oltaim oltaim. (Stat 1:​31) Tasol sori tru, namba wan man na meri i bin mekim nabaut long strong God i bin givim long tupela long makim wanem rot ol i laik bihainim; ol i sakim wanpela lo Man bilong wokim ol i bin putim long tupela na nau ol i no stap gutpela moa olsem pastaim. Dispela i mekim na ol i dai, na ol pikinini bilong ol i kisim sin na indai long ol.​—⁠Stat 2:17; 3:1-24; Rom 5:12.

Baibel i tokaut klia i gat wanem as na yumi stap, na dai em i wanem samting​—⁠dispela i no stap hait, nogat. Baibel i tok, man i dai pinis em i “no inap mekim wok o tingting o kisim gutpela tingting na save” na em “i no inap save long wanpela samting.” (Saveman 9:​5, 10) Olsem na man i dai pinis, em i dai tru tru. Baibel i no tok yumi gat wanpela tewel i no save dai, nogat, olsem na man i dai pinis i stap olsem wanem, dispela i no samting i stap hait.​—⁠Stat 3:​19; Song 146:4; Saveman 3:​19, 20; Esekiel 18:⁠4.a

God i gat wanpela laik; em i no wokim graun “bilong i stap nating. Nogat.” Em i wokim graun “bilong olgeta samting i ken i stap long en”​—⁠em i laik bai graun i stap olsem wanpela paradais i gat ol man i gutpela olgeta i stap long en, na God i no bin senisim dispela laik bilong em. (Aisaia 45:18; Malakai 3:⁠6) Bilong kamapim dispela laik, God i salim Pikinini bilong em i kam long graun. Long rot bilong stap gut long God i go inap long taim em i dai, Krais Jisas i baim bek ol man long sin na dai. Jisas i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”​—⁠Jon 3:​16.

Long bipo yet, God i tok promis pinis olsem em bai wokim “nupela skai na nupela graun.” (Aisaia 65:17; 2 Pita 3:​13) Bilong mekim olsem em i mas makim sampela gutpela Kristen bilong kisim laip long heven. Dispela lain wantaim Krais Jisas ol i kamap wanpela gavman. Baibel i kolim dispela gavman olsem “kingdom bilong heven,” o “kingdom bilong God,” na em bai stiaim ‘olgeta samting long graun.’ (Matyu 4:​17; 12:28; Efesus 1:​10; KTH 5:​9, 10; 14:​1, 3) Taim God i bagarapim pinis olgeta man long graun i givim baksait long em na em i klinim graun, em bai kamapim wanpela stretpela nupela lain, olsem “nupela graun.” Em ol manmeri God bai lukautim ol long taim em i pinisim ol pasin nogut bilong nau. (Matyu 24:​3, 7-14, 21; KTH 7:​9, 13, 14) Ol man i kamap laip gen long rot bilong kirap bek em God i tok promis pinis long en, ol tu bai insait long dispela nupela graun.​—⁠Jon 5:​28, 29; Aposel 24:⁠15.

“Laip Em i Laip Tru” Long Bihain

Bilong strongim ol tok i stori long laip long Paradais long graun long bihain, God i tok: “Harim. Mi mekim olgeta samting i kamap nupela.” (KTH 21:⁠5) Tingting bilong man i no inap pilim tru tru ol gutpela gutpela samting God bai mekim bilong helpim ol man. God bai kamapim wanpela gutpela paradais long olgeta hap bilong graun i wankain olsem gaden bilong Iden. (Luk 23:43) Olsem long Iden, bai i gat kain kain gutpela swit bilong kaikai na planti gutpela gutpela kala na pairap. Yumi save ol lain i no ken i stap rabis moa na kaikai i no ken sot, long wanem, Baibel i tok long dispela taim olsem: “Ol dispela samting bilong bipo ol i pinis olgeta.” (KTH 21:​4; Song 72:16) Bai i no gat wanpela man i ken tok moa, “Mi gat sik,” long wanem, sik bai pinis inap olgeta taim bihain. (Aisaia 33:24) Tru tumas, olgeta kain samting i kamapim pen ol bai pinis olgeta, na birua bilong ol man, em dai, em i bin i stap longpela taim, em tu bai pinis. (1 Korin 15:26) Long wanpela driman, aposel Jon i lukim “nupela graun,” em nupela lain manmeri em Krais bai bosim ol, na em i harim wanpela nek i tok: “[God] bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.” Truim bilong dispela promis bilong God bai mekim gut bel bilong ol man na givim bikpela amamas long ol. I no gat narapela samting inap mekim olsem, a?

Taim Baibel i stori long i stap bilong yumi long bihain, em i stori gut long ol samting bilong inapim tingting na bel bilong man. Olgeta samting i stret ol man i bin wok strong long kamapim i kam inap nau, ol dispela samting bai kamap tru tru long bihain. (Matyu 6:​10) Wanpela samting olsem, em laik bilong ol man olsem narapela i mas mekim stretpela pasin long narapela, tasol inap long nau dispela samting i no bin kamap, long wanem, i gat ol man i bin mekim hatpela wok bos na daunim ol man nating. (Saveman 8:⁠9) Man bilong raitim Song i tok profet long ol samting wok king bilong Krais bai kamapim, olsem: “Taim em i stap yet ol manmeri i ken bihainim stretpela pasin tasol . . . [na] planti gutpela samting i ken kamap.”​—⁠Song 72:⁠7.

Pasin olsem olgeta man i mas i gat rot long kisim wankain sindaun, dispela tu em samting planti man i bin lusim sampela samting bilong ol yet bambai ol inap kisim. Long “taim olgeta samting i kamap nupela,” God bai pinisim pasin bilong daunim narapela. (Matyu 19:28) Olgeta man bai i stap olsem man i gat nem. Dispela pasin olsem olgeta man i mas i gat rot long kisim wankain sindaun, em i no samting wanpela hatpela gavman bai kamapim, nogat. Ol samting i mekim na narapela i daunim narapela, ol dispela samting bai pinis, na pasin mangal na pasin antap i kirapim ol man long kisim strong long bosim ol narapela o long kisim planti mani kago samting, dispela tu bai pinis. Aisaia i tok profet olsem: “Ol . . . bai i wokim ol haus na stap long ol. Na bai ol i planim ol gaden wain na wokim wain na dring. Ol birua bai i no inap kam moa na rausim ol manmeri bilong mi na sindaun long ol haus bilong ol na kisim ol gaden wain bilong ol na wokim wain na dring.”​—⁠Aisaia 65:​21, 22.

Ol man i bin kisim bikpela hevi tru long ol pait i bin kapsaitim blut bilong man. Kirap long taim Kein i kilim i dai Abel i kam inap long ol bikpela pait bilong nau, dispela pasin i bin i stap. Ol man i bin wet longpela taim tru long bel isi i ken kamap! Tasol long Paradais i kamap bek, olgeta man bai stap bel isi wantaim ol narapela na daunim ol yet; ol bai “sindaun gutpela tumas na amamas i stap.”​—⁠Song 37:⁠11.

Aisaia 11:9 i tok: “Olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.” Tasol sin yumi kisim long papamama, na sampela narapela samting tu, dispela i mekim na yumi long nau i no inap pilim tru insait bilong dispela tok. Olsem wanem stretpela save bilong God bai helpim yumi long kamap wanbel wantaim em na stap amamas tru, em samting yumi no save yet long en. Tasol Baibel i tok Jehova em i God i gat bikpela strong, na gutpela tingting na save, na stretpela pasin, na pasin sori, olsem na yumi ken bilip tru olsem em bai harim olgeta beten bilong ol man bilong “nupela graun.”

Kisim “Laip Em i Laip Tru”!

Planti man i ting laip i stap oltaim long gutpela taim em i no inap kamap tru; em i olsem wanpela tingting giaman. Tasol ol man i bilip tru long dispela promis bilong Baibel, ol i save dispela samting ol i wetim em bai kamap tru tru. Em i olsem wanpela anka bilong ol. (Hibru 6:​19) Olsem anka i save holimpas sip na bai sip i no ken trip nabaut, olsem tasol, dispela tingting long laip i stap oltaim em i helpim ol man long stap isi na no ken pret, na i helpim ol long karim na winim tu ol bikpela hevi i painim ol.

Yumi ken bilip tru olsem God bai truim ol tok promis bilong em. Na em i bin mekim wanpela tok tru antap i no inap senis bilong strongim ol dispela tok promis. Aposel Pol i tok: “God i mekim promis long em bai i mekim gut tru long yumi ol lain bilong Abraham. Na em i laik soim yumi klia tru olsem, em i no inap senisim tingting bilong em, olsem na em i tok tru antap bilong strongim tok bilong em yet. Olsem na nau i gat tupela tok i stap, em promis bilong God na dispela tok tru antap em i bin mekim. Tupela i no inap senis, na long dispela tupela tok God i no inap tru long giaman. Olsem na yumi ol manmeri i . . . ken tingim dispela promis bilong God na yumi ken strongim tru bel bilong yumi long wet long kisim ol dispela samting God i promis long givim long yumi.” (Hibru 6:​17, 18) Dispela “tupela [samting]” God i no inap senisim, em tok promis bilong em na tok tru antap em i bin mekim​—⁠dispela tupela samting i as bilong ol samting yumi wet long en.

Pasin bilong bilip long ol tok promis bilong God i save mekim gut bel bilong man na i helpim em long stap strong long spirit. Josua, em gopas bilong ol Israel, i gat kain bilip olsem. Taim Josua i mekim laspela tok bilong em long ol Israel, em i lapun pinis na em i save klostu bai em i dai. Tasol tok bilong em i makim olsem em i stap strong na em i stap gut long Jehova, em pasin bilong bilip tru long ol tok promis bilong God em i as bilong dispela samting. Em i tok “klostu nau bai mi lusim yupela,” olsem em bai dai, na nau Josua i tok: “Yupela i save pinis, God, Bikpela bilong yumi i bin givim yupela olgeta gutpela samting em i bin promis long givim yupela. Olgeta samting em i bin promis long mekim, ol i kamap pinis, na i no gat wanpela promis i popaia.” Tripela taim Josua i tok olsem oltaim God i save truim olgeta tok promis bilong em.​—⁠Josua 23:⁠14.

Yu tu inap holim wankain bilip long tok promis bilong God olsem klostu nau wanpela nupela taim bai kamap. Long rot bilong givim bel long stadi long Baibel, bai yu kisim save long Jehova em i husat na i gat wanem as na em inap long yumi bilip tru long em. (KTH 4:​11) Abraham, Sara, Aisak, Jekop, na sampela bilipman moa bilong bipo, ol i gat strongpela bilip, na as bilong dispela bilip i olsem ol i save gut long trupela God, Jehova. Ol i bilip strong long samting ol i wetim, maski taim ol i stap yet “ol i no kisim ol dispela gutpela samting God i bin promis long givim ol.” Tasol ol i “lukluk i go long ol dispela samting i stap longwe tru long ol, na ol i amamas long lukim.”​—⁠Hibru 11:⁠13.

Yumi save long insait bilong planti tok profet bilong Baibel, olsem na yumi save “bikpela de bilong God I Gat Olgeta Strong” em i kam klostu pinis​—⁠long dispela taim em bai rausim olgeta pasin nogut long graun. (KTH 16:​14, 16) Olsem ol man bilong bipo em ol i bin stap gut long God, yumi mas bilip na wetim yet ol samting i laik kamap em pasin bilong bilip na pasin bilong laikim tru God wantaim “laip em i laip tru” em i kirapim yumi long wetim. Klostu nau nupela taim bai kamap na dispela i mas kirapim ol man i bilip long Jehova na laikim em long ol i mas wok strong. Ol i mas wok long kisim dispela pasin bilong bilip na pasin bilong laikim God na bai God i ken orait long ol na lukautim ol long taim bilong bikpela de bilong em, klostu bai kamap.​—⁠Sefanaia 2:3; 2 Tesalonaika 1:3; Hibru 10:​37-​39.

Orait, olsem wanem? Yu amamas long i stap laip? Na yu laik moa yet long kisim dispela “laip em i laip tru”​—⁠olsem stap laip olsem wokboi bilong God em i orait long en, na tingim olsem yu inap kisim laip i stap oltaim long gutaim i kamap long bihain? Sapos yu laik kisim dispela kain laip, orait bihainim tok bilong aposel Pol, em i tok yumi ‘no ken bilip long ol samting i save bagarap kwik; yumi mas bilip tru long God.’ Na Pol i tok moa: ‘Yumi mas mekim planti gutpela pasin bilong helpim ol arapela manmeri,’ em ol samting i save givim biknem long God, na bai yumi inap “kisim dispela laip em i laip tru.”​—⁠1 Timoti 6:​17-​19.

Sapos yu orait long stadi long Baibel wantaim ol Witnes Bilong Jehova, bai yu inap kisim save i bringim yu long “laip bilong i stap gut oltaim.” (Jon 17:⁠3) Baibel i kamapim dispela singaut i olsem singaut bilong papa i go long olgeta man: “Pikinini, mi laik skulim yu nau, na yu no ken lusim tingting long dispela tok. Nogat. Oltaim yu mas tingim gut. Sapos yu bihainim dispela tok bai yu stap longpela taim long graun na bai yu sindaun gut tru.”​—⁠Sindaun 3:​1, 2.

[Futnot]