Yu Ting Ol Spirit Nogut i Stiaim Ol Samting?

“Nau long dispela taim i olsem ol man i gat sik bilong ai raun na tingting i paul, na i olsem ol spirit nogut i pasim rot bilong ol long abrusim bagarap.”​​—⁠Niusman Jean-Claude Souléry.

‘Pasin bilong pilim olsem i no gat rot, dispela i save kirapim ol man long pilim olsem wanpela strong nogut i save stiaim ol samting.’​​—⁠Saveman Josef Barton.

SAMTING nogut tru ol teroris i bin kamapim long Septemba 11, 2001, dispela i bin kirapim planti manmeri long tingim ol samting i painim dispela graun. Long nius Financial Times bilong Inglan, Michael Prowse i tok: “Ol animal i no inap mekim pasin i nogut tru olsem, nogat.” Nius The New York Times i tok, ol teroris i bin redim planti planti samting bambai ol inap kamapim dispela bagarap, “tasol yumi mas tingim tu olsem, bilong ol inap mekim tru tru dispela samting, strongpela pasin birua i mas i stap long bel bilong ol. Em i wanpela kain pasin birua em i nogut moa yet, winim pasin ol lain i save mekim long taim bilong ol bikpela pait, na i no gat lo bilong en.”

Ol man bilong kain kain bilip i bin tingting olsem, wanpela strong nogut i mas i stap na stiaim ol samting. Long Bosnia, wanpela bisnisman bilong Sarajevo i bin lukim ol samting nogut em pasin bilong bel nogut long ol narapela lain i bin kamapim, na em i tok: “Wanpela yia bilong dispela pait long Bosnia i pinis, na mi bilip olsem Satan i bosim dispela pait. Dispela pait em longlong pasin stret.”

Taim ol i askim saveman Jean Delumeau, em i bilip long Satan o nogat, em i tok: “Mi no inap tok wanpela strong nogut i no stap, long wanem, mi lukim ol samting i kamap long nau na ol samting i bin kamap bihain long taim mama i karim mi, olsem: Namba Tu Pait na 40 milion manmeri ol i bagarap; Auschwitz na ol banis kalabus nogut; pasin bilong bagarapim na pinisim wanpela lain olgeta long Kambodia; hatpela gavman bilong Ceauşescu; na long planti kantri, gavman i save givim bikpela pen nogut tru long ol man. Lista bilong ol samting nogut em i go moa yet . . . Olsem na mi ting i stret long yumi ken tok olsem ol dispela wok em ‘wok bilong Satan.’ Tasol dispela Satan mi tok long en em i no gat kom na lek bilong bulmakau, nogat; dispela Satan mi tok long en em i makim wanpela strong na dispela strong em i as bilong olgeta pasin nogut i save kamap long graun.”

Olsem Jean Delumeau, planti man i tok olsem ol samting nogut i kamap insait long famili na ol kantri long nau, em ‘wok bilong Satan.’ Tasol dispela i makim wanem samting? Yu ting sampela strong nogut i as bilong ol dispela pasin, o yu ting i gat ol spirit nogut i wok strong i stap long subim ol man long mekim ol pasin i nogut tru i winim tru ol pasin nogut ol man i save mekim long olgeta de? Na yu ting ol dispela spirit nogut i gat wanpela hetman i stiaim ol​—⁠em Satan?

[Piksa Kredit Lain long pes 3]

Children: U.S. Coast Guard photo