Mama i Karim Jisas—Olsem Wanem na Bilong Wanem Dispela i Kamap?

TAIM ol man i no Kristen ol i harim stori bilong mama i karim Jisas, planti ol bai tok, “I no inap tru!” Ol i ting, i no stret wantaim tok bilong saiens long bilip olsem wanpela nupela meri singel inap karim pikinini na i no gat wanpela man bilong graun i papa bilong en. Orait wanem tingting bilong yu?

Long 1984, nius The Times bilong London i kamapim tok bilong wanpela pas i stori long dispela samting na i tok: “I no stret ol man i kamapim save bilong saiens bilong daunim ol mirakel. Sapos i no gat as na man i ken bilip long ol mirakel, orait i no gat as tu na ol i ken bilip olsem ol mirakel i no inap kamap.” I gat 14 profesa bilong saiens long ol yunivesiti bilong Inglan i sainim nem long dispela pas. Ol i tok: “Dispela tok olsem wanpela nupela meri singel i bin karim Jisas, na ol mirakel em 4-pela Gutnius i stori long en, na Krais i bin kirap bek long matmat, mipela i bilip olsem ol dispela samting i bin kamap tru long bipo.”

Tasol yumi save, long namba wan taim man i harim stori bilong nupela meri singel i bin karim Jisas, em inap tingting planti long en. Mama bilong Jisas tu, em wanpela nupela meri, em i tingting planti long taim ensel bilong God i tok: “Harim. Yu bai kisim bel na karim wanpela pikinini man. Na yu mas kolim nem bilong en Jisas.” Tasol Maria i askim em: “Dispela samting bai i kamap olsem wanem? Mi no marit yet long wanpela man.” Orait nau ensel i tok God bai wokim mirakel long rot bilong spirit holi bilong Em, na ensel i tok: “I no gat wanpela samting God i no inap mekim.” (Luk 1:​31, 34-37) Tru tumas, dispela Man i bin wokim skin bilong ol manmeri bambai ol inap kamapim pikinini, em inap mekim na bai wanpela nupela meri i karim Jisas. Sapos God i bin wokim olgeta samting long heven na graun i gat ol lo bilong en i wok stret tru, orait em inap mekim wok long wanpela kiau long bel bilong Maria bilong kamapim wanpela Pikinini bilong em long graun, i gutpela olgeta.

Bilong Wanem Em i Mas Mekim Olsem?

Taim Maria i no kisim bel yet, ol i makim gutpela man Josep long maritim em. Long driman ensel bilong God i tokim Josep long as na dispela nupela meri i gat bel. Ensel i tok: “Yu no ken pret long kisim Maria olsem meri bilong yu. Harim. Dispela pikinini i stap long bel bilong en, em Holi Spirit i bin givim long em. Bai em i karim pikinini man, na yu mas kolim nem bilong en Jisas, long wanem, em bai i lusim sin bilong ol manmeri bilong en na kisim bek ol.” (Matyu 1:​20, 21) Insait bilong nem Jisas long tok Hibru em “Jehova i Save Kisim Bek Ol Man.” Em nau, yumi save God i mas kisim bek yumi long sin na indai, na yumi tingim ol samting God Jehova i bin mekim bilong kisim bek yumi long rot bilong Jisas.

Namba wan man, Adam, i bin mekim sin, olsem na olgeta pikinini bilong em i gat sin taim mama i karim ol, na pasin bilong brukim ol lo bilong God i stap long skin bilong ol. (Rom 5:12) Orait olsem wanem God inap tekewe sin bilong ol pikinini bilong Adam na bai ol i ken kamap gutpela olgeta? Wanpela man i gutpela olgeta, wankain olsem Adam long pastaim, em i mas givim laip bilong em olsem pe i stret long samting i bin lus. Long dispela as God i bin mekim ol samting na wanpela meri i karim Jisas, em man i gutpela olgeta, na long dispela as yet Jisas i larim ol birua i kilim em i dai. (Jon 10:​17, 18; 1 Timoti 2:​5, 6) Taim Jisas i kirap bek na i go antap long heven, em inap tok: “Bipo mi dai pinis, tasol lukim, nau mi stap laip oltaim oltaim. Na mi holim ol ki bilong Dai na bilong Ples bilong ol man i dai pinis [em matmat].”​—⁠KTH 1:⁠18.

Nau Jisas i holim ki bilong indai na bilong matmat, olsem na em i opim rot bambai ol sinman bilong graun inap kisim bek samting em Adam i bin lusim. Jisas i tok: “Kirap bek, em mi yet. Na laip, em mi yet. Na man i bilip long mi, maski sapos em i dai, em bai i stap laip yet. Na olgeta man i stap laip na i bilip long mi, bai ol i no i dai. Nogat. Bai ol i stap laip oltaim oltaim.” (Jon 11:​25, 26) Man! Em wanpela gutpela tok promis tru! Tasol i gat wanpela bikpela as moa na Jisas i kamap man long graun.

Nambawan As

Taim Jisas i kamap long bel bilong Maria, dispela em i no kirap bilong laip bilong em, nogat. Em i tokaut klia olsem: “Mi no lusim heven na kam daun bilong bihainim laik bilong mi yet.” (Jon 6:38) Jisas i bin stap long ples bilong ol spirit wantaim Papa bilong em long heven, stat long taim God i bin kirap wokim ol samting. Baibel i tok em i “namba wan samting God i bin wokim.” (KTH 3:​14, NW ) Jisas i stap long heven na em i lukim wanpela ensel nogut i bikhet long God na i pulim namba wan man na meri long sakim wok bos bilong God. Dispela i mekim na i gat wanpela bikpela as tru na Jisas i laik bai wanpela meri i karim em na em i kamap Pikinini bilong God long graun, i gutpela olgeta. Wanem dispela as?

Em i laik kamapim klia olsem i stret Papa bilong em long heven i stap King bilong heven na graun. Kirap long taim mama i karim em na i go inap long taim em i dai, Jisas i stap gut long God, na long dispela rot em i kamapim laik bilong em long i stap aninit long pasin bilong God long bosim ol lain Em i bin wokim. Klostu long taim Jisas i dai long han bilong ol birua bilong God, em i tokaut klia long as na em i orait long i dai na givim laip bilong em olsem ofa. Em i tok em i laik bai ol manmeri bilong graun i save, em i laikim tru Papa. (Jon 14:31) Sapos namba wan man na meri, em Adam na Iv, i bin kisim pasin bilong laikim tru Papa bilong ol olsem Jisas i mekim, ol inap i stap gut long God na winim dispela traim bilong ol i no bikpela olsem traim bilong Jisas.​—⁠Stat 2:​15-17.

Na pasin bilong Jisas long i stap gut long God i kamapim klia olsem dispela ensel nogut, Satan, em i man bilong giaman. Satan i bin bagarapim gutnem bilong God na ol man taim em i tok long ai bilong ol ensel long heven: “Sapos wanpela man i laik i stap gut, em inap givim olgeta samting bilong en bilong baim bek laip bilong en.” (Jop 2:​1, 4) Satan i tok giaman olsem olgeta man bai sakim tok bilong God bambai ol i ken lukautim laip bilong ol.

Ol dispela bikpela tok i bin kamap i sutim tok long wok bos bilong God, olsem em i no mekim long stretpela pasin, na i no stret em i bosim ol man. Bilong stretim ol dispela tok, Jisas i orait long kamap wanpela man bilong graun na stap gut long God i go inap long taim em i dai.

Olsem na nambawan as tru na Jisas i kamap man long graun​—⁠olsem em yet i tok​—⁠“em bilong autim tok tru.” (Jon 18:37) Long tok na pasin bilong em, em i soim olsem wok bos bilong God i stret olgeta, na sapos man i daun long en bai em i stap amamas oltaim. Na Jisas i tok tu olsem em i bin kam long graun bilong givim laip bilong em olsem man “bilong baim bek planti manmeri,” na dispela i opim rot bambai ol sinman bilong graun inap kamap gutpela olgeta na kisim laip i stap oltaim. (Mak 10:45) Bilong man i ken klia gut long ol dispela bikpela samting, i mas i gat wanpela buk i stori long ol samting bilong taim mama i bin karim Jisas. Na tu, ol samting i kamap long taim mama i karim Jisas, em inap skulim yumi long sampela bikpela samting moa, olsem stori i kamap bihain long dispela bai soim yumi.

[Ol Piksa long pes 4]

Olsem wanem God inap kisim bek ol pikinini bilong Adam long sin?