Stori Bilong Wanpela Man

Bikpela Hevi i Traim Tru Bilip Bilong Mi

Stori bilong Pericles Yannouris

Rum kalabus i kol na smel na mi kol nogut tru. Mi karamap long wanpela liklik blanket na mi stap wanpis long rum kalabus, na long tingting mi lukim yet pes bilong yangpela meri bilong mi, em i no sori long mi taim ol man bilong ami i kam kisim mi long haus tupela de i go pinis na lusim em i stap wanpis wantaim tupela bebi bilong mitupela i sik. Bihain meri bilong mi, em i no wanbilip bilong mi, em i salim wanpela karamap na wanpela liklik pas i tok olsem: “Mi salim ol dispela kek long yu, na mi laik yu mas kisim sik wankain olsem ol pikinini bilong yu.” Olsem wanem? Bai mi stap laip yet na go bek lukim famili bilong mi?

DISPELA em wanpela bilong ol hevi mi bin karim bilong holimpas bilip Kristen bilong mi, ol samting insait long ol dispela hevi em ol famili bilong mi i birua long mi, na ol lain long hap mi stap long en ol i givim baksait long mi, na ol man i kotim mi, na ol i mekim nogut tru long mi. Tasol olsem wanem wanpela man i save pret long God i go i stap long kalabus, na i gat wanem as bilong dispela samting? Orait, mi ken stori long dispela.

Wanpela Mangi Nating i Laik Winim Bikpela Mak

Taim mama i karim mi long 1909 long Stavromeno, Krit, kantri i gat bikpela pait, ol man i stap rabis, na ol i no gat kaikai. Bihain mi na fopela liklik brata susa bilong mi, klostu mipela i kisim dispela strongpela kus bilong Spen. Mi tingim yet papamama, ol i no bin larim mipela i lusim haus inap sampela wik bambai mipela i no ken kisim dispela kus.

Papa i stap rabis na em i man bilong wokim gaden, em i save givim bel tru long lotu, tasol em i save amamas long kisim save long ol nupela samting. Bipo em i bin stap long Frans na Madagaska, olsem na em i bin harim ol kain kain nupela tingting long samting bilong lotu. Tasol famili bilong mipela i stap gut long Misin Otodoks, long olgeta Sande mipela i save go lotu na mipela i save singautim bisop long i kam stap wantaim mipela taim em i mekim raun bilong em. Mi insait long lain bilong mekim singsing long haus lotu, na mi gat bikpela laik long kamap wanpela pris.

Long 1929, mi joinim polis. Mi wok i stap long Tesalonaika long hap not bilong Grik, taim papa i dai. Bilong mekim gut bel bilong mi na bilong painim save bilong ol samting bilong spirit, mi go wok wantaim ol polis long maunten Atos. Dispela hap i gat ol haus bruder i stap long en na ol Kristen bilong lotu Otodoks i kolim olsem “maunten holi.”a Mi wok long dispela hap inap fopela yia na mi skelim gut pasin bilong ol bruder. Dispela i no helpim mi long go klostu moa long God, nogat tru, mi bel nogut tru long pasin bilong ol pris long mekim pasin pamuk na paulim ol samting. Mi les tru long pasin bilong wanpela bikman mi bin rispek long em, namba bilong em i klostu wankain olsem wanpela bisop na em i bin i gat laik long mekim pasin sem long mi. Maski i gat dispela kain hevi, mi gat laik yet long mekim wok bilong God na kamap wanpela pris. Olsem na mi pasim wanpela klos bilong pris na kisim piksa bai mi ken putim i stap na mi ken tingim. Bihain mi go bek long Krit.

“Em Wanpela Man Nogut Tru!”

Long 1942 mi maritim wanpela gutpela meri, nem bilong em Frosini, famili bilong em i gat nem. Marit i strongim laik bilong mi long kamap wanpela pris, long wanem, ol tambu bilong mi ol i save givim bel long lotu.b Mi gat bikpela laik stret long go long bikpela skul bilong lotu long Atens. Klostu long pinis bilong yia 1943, mi go long pasis bilong Iráklion, Krit, bilong i go long Atens, tasol sip i go pinis. Ating samting i kamap olsem, long wanem, mi bin painim narapela rot bilong kisim ol gutpela samting bilong spirit. Wanem samting i bin kamap?

Emmanuel Lionoudakis, em wanpela yangpela strongpela man bilong autim tok i save bung wantaim ol Witnes Bilong Jehova, na inap long sampela yia em i bin skulim ol man long ol tok i tru bilong Baibel long olgeta hap bilong Krit.c Ol Witnes i kamapim gut tok bilong Baibel, olsem na sampela manmeri i laikim dispela na ol i lusim lotu giaman. Long wanpela taun i stap klostu, em Sitía, i gat wanpela liklik grup bilong ol Witnes i save givim bel long wok autim tok. Dispela i mekim na bisop bilong dispela hap i no amamas long ol, em i bin stap long Amerika bipo na em yet i bin luksave long olsem wanem wok bilong ol Witnes Bilong Jehova long autim tok i karim kaikai. Em i strong long rausim dispela lain em i tingim olsem lain i paulim tok bilong lotu long hap em i bosim. Em i kirapim ol polis na planti taim ol i kisim ol Witnes na putim ol long sel na kotim ol long kain kain ol tok giaman tasol.

Wanpela bilong ol dispela Witnes i traim long stori long mi long tok i tru bilong Baibel, tasol em i ting olsem mi no gat laik long harim. Olsem na em i salim wanpela i save gut long autim tok long toktok wantaim mi. Mi sakim tok bilong em na dispela i mekim na namba tu Witnes i go bek na tokim ol narapela long dispela grup bilong ol olsem: “Pericles i no inap kamap wanpela Witnes. Em wanpela man nogut tru!”

Namba Wan Taim Ol Man i Birua Long Mi

Mi amamas olsem God i no tingim mi olsem man nogut tru. Brata bilong mi, Demosthenes, em i bilip tru olsem ol Witnes Bilong Jehova i lainim ol man long tok i tru, olsem na long Februeri 1945 em i givim mi buklet Comfort All That Mourn.d Mi kirap nogut long ol tok i stap insait. Wantu mipela i lusim lotu Otodoks, na mitupela kirap bung wantaim dispela grup long Sitía, na autim tok long ol brata susa bilong mitupela long dispela nupela bilip. Na ol i amamas long tok i tru i stap long Baibel. Mi lusim lotu giaman na dispela i mekim na meri bilong mi na famili bilong em ol i birua long mi. Inap sampela taim papa bilong meri bilong mi i no laik toktok wantaim mi. Long haus, mipela i no wanbel long ol samting na kros i wok long kamap olgeta taim. Maski i gat ol dispela hevi, long Me 21, 1945, Brata Minos Kokkinakis i baptaisim mitupela Demosthenes.e

Nau mi inap long bihainim laik bilong mi na mekim wok bilong God! Mi tingim yet namba wan taim mi autim tok long ol haus. Mi karim 35 buklet long bek bilong mi, na mi wanpela kalap long bas na mi go long wanpela ples. Mi pret liklik taim mi kirap long go autim tok long ol haus. Tasol taim mi mekim wok i go i go, mi no pret moa. Olsem na taim wanpela pris i kam na kros mi inap long sanap strong na mi no bihainim tok bilong em long go wantaim em long polis-stesin. Mi tokim em olsem mi bai lusim dispela ples taim mi go long olgeta haus long dispela hap, na mi mekim olsem mi tok. Amamas bilong mi i mekim na mi no wetim bas long kam, mi wokabaut inap 15 kilomita i go bek long haus.

Wanpela Lain i Mekim Nogut Long Mipela

Long Septemba 1945, ol i givim mi sampela wok moa insait long nupela kongrigesen long Sitía. I no longtaim na bikpela pait i kirap insait long kantri Grik. Sampela lain i wok bung wantaim na mekim nogut tru long sampela narapela lain. Na bisop i kirapim wanpela lain ami long mekim ol samting long laik bilong ol yet bilong rausim ol Witnes. (Jon 16:⁠2) Taim dispela lain ami i kalap long bas na kam long hap mipela i stap long en, wanpela meri i stap long bas i harim ol i stori long ol samting ol bai mekim bilong inapim wanpela wok ol i tingim olsem wok God i givim ol, na em i toksave long mipela. Mipela i hait na wanpela wanblut bilong mipela i mekim ol samting bilong helpim mipela. Olsem na mipela i no kisim bagarap.

Dispela samting i opim rot bilong planti hevi moa long kamap. Planti taim ol i paitim mipela nogut tru na mekim ol tok bilong pretim mipela. Ol birua bilong mipela i traim long subim mipela long go bek long lotu, na baptaisim ol pikinini bilong mipela, na mekim mak bilong kruse. Wanpela taim ol i wok long paitim brata bilong mi i go na ol i ting em i dai pinis. Na mi bel hevi tru long lukim ol i brukim klos bilong tupela susa bilong mi na paitim tupela. Long dispela taim, lotu i kisim etpela pikinini bilong ol Witnes Bilong Jehova na subim ol long baptais.

Long 1949 mama bilong mi i dai. Wanpela pris i sutim tok gen long mipela olsem mipela i no bihainim stret lo bilong kisim pepa bilong wokim bung bilong planim man. Olsem na ol i kotim mi long dispela samting tasol kot i tok mi no gat asua. Dispela i kamapim gutpela wok witnes, long wanem, ol i kolim nem bilong Jehova long taim kot i kirap. Ol birua i ting mipela i no gat stretpela tingting, na i gat wanpela rot tasol bilong stretim em long holim mipela na salim mipela i go sindaun long hap i stap longwe tru. Ol i mekim olsem long Epril 1949.

Ol Bikpela Traim Tru

Mi wanpela bilong ol tripela brata ol i holim. Meri bilong mi i no kam lukim mi long polis-stesin. Pastaim ol i kisim mipela i go long wanpela haus kalabus long Iráklion. Na olsem mi bin stori long kirap bilong stori, mi stap wanpis na mi bel hevi. Mi lusim yangpela meri bilong mi, em i no wanbilip bilong mi na tupela liklik pikinini bilong mitupela. Mi beten strong long Jehova long helpim mi. Mi tingim tok bilong God i stap long Hibru 13:​5, em i tok: “Bai mi no lusim yu. Bai mi no larim yu i stap nating. Nogat tru.” Mi save olsem em i gutpela tingting long bilip tru long Jehova.​—⁠Sindaun 3:⁠5.

Mipela i kisim save olsem mipela bai i go i stap long Makrónisos, em wanpela ailan i stap long nambis bilong Attica, Grik. Sapos wanpela man i harim nem bilong dispela ailan em bai pret nogut tru, long wanem, ol soldia i save givim bikpela pen nogut tru long ol kalabusman na subim ol long mekim wok. Sip i karim mipela i go long kalabus i go sua long Piraeus. Na sampela wanbilip bilong mipela long dispela hap i kalap long bot, maski ol i pasim mipela long hankap mipela i kisim strong taim ol brata i holimpas mipela.​—⁠Aposel 28:​14, 15.

I stap bilong mi long Makrónisos i nogut tru. Ol soldia i save mekim nogut long ol kalabusman kirap long moning i go inap long nait. Planti ol kalabusman em ol i no Witnes ol i kamap longlong, sampela narapela i dai, na sampela i kisim bikpela bagarap long skin na ol i no inap orait. Long nait mipela i save harim bikpela krai bilong ol kalabusman taim ol i mekim nogut long ol. Liklik blanket mi karamap long en long nait i bin helpim mi liklik tasol long ol nait i kol.

I no longtaim na planti man i save long ol Witnes Bilong Jehova long haus kalabus, long wanem, ol i kamapim dispela nem long taim ol i kolim nem bilong ol kalabusman long olgeta moning. Olsem na mipela i gat planti rot bilong autim tok. Mi bin amamas long baptaisim wanpela man em wok politik i as na em i kalabus, em i bin kamap strong na dediketim laip bilong em long Jehova.

Long dispela taim mi stap long kalabus, mi wok long salim ol pas i go long gutpela meri bilong mi maski em i no bekim pas bilong mi. Dispela i no pasim mi long raitim pas long em na mekim ol tok long pasin isi, na bilong mekim gut bel bilong em, na tokim em olsem dispela hevi em i bilong sotpela taim tasol na mipela bai stap amamas wantaim gen.

Namba bilong mipela ol Witnes i stap long kalabus i wok long i go antap taim planti brata moa i kam long kalabus. Mi wok long ofis, olsem na mi kirap mekim pasin pren long wanpela bikman bilong haus kalabus. Em i save rispektim ol Witnes, olsem na mi strongim bel na askim em sapos mipela inap kisim sampela buk na nius bilong Baibel long ofis bilong mipela long Atens. Em i tok: “Yupela i no inap long mekim olsem, tasol yupela i ken tokim ol lain bilong yupela long Atens long putim ol buk na nius insait long sutkes bilong yupela, ol i mas raitim nem bilong mi long en na salim i kam long mi.” Man! Mi kirap nogut tru! Sampela de bihain taim mipela i wok long rausim ol kago long bot, wanpela plisman i salut long bikman bilong haus kalabus na i tokim em olsem: “Bikman, kago bilong yu i kam pinis.” Na bikman bilong haus kalabus i askim em olsem: “Em wanem kago?” Mi stap klostu na mi harim toktok bilong tupela, olsem na mi tok isi long bikman olsem: “Ating em kago bilong mipela ol i salim long nem bilong yu, olsem yu bin tok.” Dispela em wanpela rot Jehova i mekim wok long en bilong mipela i ken kisim kaikai bilong spirit.

Wanpela Gutpela Blesing—⁠Na Planti Hevi Moa

Klostu long pinis bilong yia 1950 mi pinis long kalabus. Mi go bek long haus​—⁠mi sik, na skin i kamap yelo, na mi bun nating tru, na mi no save famili bilong mi bai amamas long lukim mi o nogat. Mi amamas tru long lukim gen meri na ol pikinini bilong mi! Mi kirap nogut olsem Frosini i no birua moa long mi. Ol dispela pas mi bin salim long em taim mi stap long kalabus i bin helpim em. Frosini i pilim tru pasin bilong mi long sanap strong na i no les kwik. Bihain liklik, mi toktok gut wantaim em na stretim ol hevi samting i bin stap namel long mitupela. Em i orait long stadi na em i kirap bilip long Jehova na ol tok promis bilong em. Wanpela samting i mekim mi amamas tru, em long yia 1952 taim mi baptaisim meri bilong mi bilong kamapim klia em i bin dediket long Jehova!

Long 1955 mipela i kirap long tilim wanpela liklik buk i go long olgeta pris, nem bilong en, Christendom or Christianity​​—⁠Which One Is “the Light of the World”? Polis i kisim mi na sampela narapela brata sista na sanapim mipela long kot. I gat planti kot i kamap long ol Witnes Bilong Jehova, olsem na kot i mas makim wanpela de bilong harim olgeta kot. Long dispela de, olgeta man i save mekim wok bilong kot long dispela provins ol i kam i stap, na haus kot i pulap tru long ol pris. Bisop i wok long wokabaut i go i kam insait long haus kot. Wanpela pris i kotim mi na tok mi traim pulim ol man long lusim bilip bilong ol. Na Jas i askim em olsem: “Olsem wanem? Bilip bilong yu i no strong olsem na sapos yu ritim wanpela buklet dispela bai mekim yu lusim lotu bilong yu na kisim bilip bilong ol, a?” Dispela tok bilong jas i mekim na pris i no gat tok long bekim. Ol i rausim kot bilong mi, tasol kot i makim sampela brata long kalabus inap sikspela mun.

Long ol yia bihain, planti taim ol i holim mipela, na ol i mekim planti kot long mipela. Dispela i mekim na ol loya bilong mipela i bisi tru. Ol i kisim mi i go long kot inap 17 taim olgeta. Maski ol man i birua long mipela, long olgeta taim mipela i mekim yet wok autim tok. Mipela i amamas long ol traim i painim mipela, na ol traim i strongim tru bilip bilong mipela.​—⁠Jems 1:​2, 3.

Nupela Wok na Ol Traim

Long 1957 mipela go sindaun long Atens. I no longtaim na ol i makim mi long mekim wok long wanpela nupela kongrigesen. Pasin bilong meri bilong mi long givim bel tru long helpim mi i mekim na mipela i no tingting long kisim planti samting bilong skin, nambawan bikpela samting long mipela em ol wok bilong spirit. Long dispela rot mipela inap lusim bikpela haptaim bilong mipela long mekim wok autim tok. Long ol yia i go pinis, planti taim ol i bin askim mipela long mekim wok long ol narapela narapela kongrigesen em ol i sot long sampela helpim.

Long 1963 pikinini man bilong mi i kisim 21 krismas na em i mas bihainim tok bilong gavman long rejista long ami. Ol Witnes em gavman i singautim ol long insait long ami ol i no laik insait long pait, olsem na ol man i paitim ol, tok bilas long ol, na semim ol. Pikinini bilong mi tu i kisim dispela kain hevi. Olsem na mi givim dispela blanket mi bin yusim long Makrónisos, dispela blanket i bilong strongim em long bihainim pasin bilong ol narapela long bipo i bin stap gut long God. Ol i kotim ol dispela brata em gavman i bin singautim na planti taim kot bilong ami i makim ol bilong kalabus inap 2-pela i go 4-pela yia. Taim ol i pinis long kalabus, gavman i save singautim ol gen na ol i kot gen. Mi wanpela wokman bilong lotu, olsem na mi inap go long sampela haus kalabus na mi inap lukim pikinini man bilong mi inap wan wan taim na ol narapela Witnes i stap gut long God. Pikinini bilong mi i stap long kalabus winim 6-pela yia.

Jehova i Helpim Mipela

Bihain long gavman long Grik i tok orait long ol man i stap fri long lotu, mi kisim gutpela wok long mekim wok painia salim long ailan Rhodes. Long 1986 ol i sot long ol brata long Sitía, Krit, em dispela hap mi bin kirapim wok Kristen bilong mi. Mi amamas long go bek gen na mekim wok wantaim ol gutpela wanbilip bilong mi em mi bin save long ol taim mi yangpela yet.

Mi namba wan long famili bilong mipela, olsem na mi amamas long lukim olsem 70  wanblut bilong mi ol i stap gut long wok bilong Jehova. Na dispela namba i wok long i go antap yet. Sampela ol i mekim wok olsem elda, na kongrigesen sevent, na painia, na wasman raun, na mekim wok long Betel. Winim 58 yia, ol hevi i traim tru bilip bilong mi. Mi gat 93  krismas long nau, na taim mi tingting i go bek long ol samting bilong bipo, mi no bel hevi olsem mi bin mekim wok bilong God. Em i bin givim mi strong long bihainim singaut bilong em olsem: “Pikinini, yu mas harim gut tok bilong mi na amamas long lukim pasin bilong mi.”​—⁠Sindaun 23:⁠26.

[Ol Futnot]

[Blok long pes 27]

Makrónisos—Em Wanpela Ailan Ol Man i Pret Nogut Tru Long En

Ailan Makrónisos em i ples i drai na i stap nating, na inap 10-pela yia, kirap long 1947 i go inap long 1957 winim 100,000 kalabusman i bin stap long en. Namel long ol dispela kalabusman i gat planti Witnes Bilong Jehova em ol tu i bin i stap long dispela kalabus, long wanem, ol i no laik insait long pait. Planti taim ol lain i kirapim ol man long putim ol Witnes long kalabus em ol bikman bilong lotu Otodoks, ol i sutim tok giaman olsem ol Witnes i Komiunis.

Wanpela buk ensaiklopedia bilong Grik (Papyros Larousse Britannica) i stori long pasin ol i mekim wok long en bilong “stretim ol kalabusman” long Makrónisos, na em i tok: ‘Ol i save givim bikpela pen nogut tru long ol . . . na sindaun bilong ol i nogut tru, . . . na ol soldia i mekim nogut tru long ol kalabusman. . . . Kantri Grik i mas sem long dispela pasin.’

Ol i tokim sampela Witnes olsem sapos ol i no lusim bilip bilong ol, ol bai i no inap larim ol i lusim kalabus. Tasol maski i olsem, ol Witnes i no lusim bilip bilong ol. Na tu, sampela man i stap long kalabus long wok politik bilong ol, ol i kisim tok i tru, long wanem, ol i bin bungim ol Witnes.

[Piksa long pes 27]

Minos Kokkinakis, (namba tri long han sut) na mi (namba foa long han kais), mipela stap long ailan Makrónisos

[Piksa long pes 29]

Mi wok wantaim wanpela wanbilip long Sitía, Krit, em hap we mi bin mekim ol wok long taim mi yangpela