Mekim Nogut Long Ol Man Bilong Narapela Lotu—Bilong Wanem?
YU TING i stret ol man i mekim nogut long ol manmeri i gat narapela lotu? Ating nogat. Sapos ol samting ol lotu i mekim i no bagarapim ol narapela bai yu orait long ol, a? Tasol pasin bilong mekim nogut long ol manmeri i gat narapela lotu i bin kirap long bipo yet, na i stap yet long nau. Olsem: Long Yurop na long sampela narapela hap bilong graun ol man i no bin larim ol Witnes Bilong Jehova i stap fri long ol samting bilong lotu na ol i mekim nogut tru long ol insait long 50 yia i go pinis.
Insait long dispela hap taim, tupela hatpela gavman i stretim rot bilong ol man i mekim nogut tru long ol Witnes Bilong Jehova, na ol i bin mekim olsem inap planti yia. Ol samting i bin painim ol Witnes i lainim yumi long wanem samting long pasin bilong mekim nogut long ol manmeri i gat narapela lotu? Na yumi inap lainim wanem samting long pasin bilong ol Witnes taim ol man i mekim nogut long ol?
“Ol i No Bilong Dispela Graun”
Ol Witnes Bilong Jehova i strong long bihainim ol lo, na ol i stap bel isi, na ol i save bihainim stretpela pasin. Ol i no save birua long ol gavman o pait long ol, na ol i no save kirapim ol narapela long mekim nogut long ol, long wanem, ol i laik kisim nem olsem man i dai bilong holimpas bilip. Ol dispela Kristen i no save insait long wok politik. Dispela i stret wantaim tok bilong Jisas: “[Ol lain bilong mi] ol i no bilong dispela graun, olsem mi yet mi no bilong dispela graun.” (Jon 17:16) Planti gavman i save olsem ol Witnes i no save insait long wok politik. Tasol ol hatpela gavman i no daun long tok bilong Baibel, olsem ol Kristen i no bilong dispela graun.
Long wanpela kibung long Yunivesiti Bilong Heidelberg, Jemani, long Novemba 2000, ol i kamapim as bilong dispela samting. Nem bilong dispela kibung em, “Ol i Daunim Ol na Strong Long Ol: Ol Witnes Bilong Jehova Aninit Long Gavman Nesenel Soselis na Gavman Komiunis.” Saveman Clemens Vollnhals bilong wanpela lain (Hannah-Arendt-Institute for Research Into Totalitarianism) i tok: “Ol hatpela gavman ol i no mekim wok politik tasol, nogat. Ol i strong long ol man i mas aninit olgeta long gavman.”
Ol Kristen tru i no inap “aninit olgeta” long ol gavman bilong ol man, long wanem, ol i bin tok promis olsem ol bai stap gut long God Jehova wanpela tasol. Ol Witnes i stap aninit long ol hatpela gavman ol i kisim save olsem sampela lo bilong gavman i pait wantaim bilip bilong ol. Ol i bin mekim wanem long taim dispela samting i kamap? Planti taim ol Witnes Bilong Jehova i bin bihainim wanpela stiatok ol disaipel bilong Krais Jisas i bin mekim, ol i bin tok: “Mipela i mas bihainim tok bilong God tasol. Mipela i no ken bihainim tok bilong ol man.”—Aposel 5:29.
Planti tausen Witnes ol i bin stap gut long bilip bilong ol na ol i no insait long wok politik, maski ol man i mekim nogut tru long ol. Olsem wanem ol i bin karim dispela hevi? Wanem samting i givim strong long ol bilong karim ol dispela hevi? Orait larim ol yet i bekim ol dispela askim. Na yumi ken tingim ol samting yumi olgeta, ol Witnes na ol man i no Witnes, i ken lain long ol samting i painim ol.
[Rait long pes 4]
Inap planti yia tupela hatpela gavman bilong Jemani i bin mekim nogut tru long ol Witnes Bilong Jehova
[Rait long pes 4]
“Ol hatpela gavman ol i no mekim wok politik tasol, nogat. Ol i strong long ol man i mas aninit olgeta long gavman.”—Saveman Clemens Vollnhals
[Piksa long pes 4]
Famili Kusserow i no laik lusim bilip, olsem na gavman i no larim ol long i stap fri
[Piksa long pes 4]
Ol i bin kilim i dai Johannes Harms long wanpela kalabus bilong ol Natsi, long wanem, em i bin holimpas bilip bilong em