Ol Rabisman i Kamap Rabis Moa Yet
“Sapos planti manmeri bilong wanpela kantri i stap rabis na tarangu, yumi save, ol lain bilong dispela kantri i no inap i stap gutpela na amamas.”
WANPELA saveman, Adam Smith, em i bin mekim dispela tok inap 200 yia samting i go pinis. Planti i bilip olsem dispela tok tru em i bin mekim i kamap ples klia moa yet nau long taim bilong yumi. Ol maniman i gat planti mani moa yet, na ol rabisman i stap rabis moa yet. Long kantri Filipin, sapos yumi brukim ol manmeri i go long 3-pela lain, orait wanpela lain olgeta i save kisim liklik mani tasol long olgeta de, aninit long wan dola, bilong baim kaikai samting, tasol long ol kantri i gat planti mani liklik, ol man i wok mani ol i save kisim wan dola insait long sampela minit tasol. Wanpela ripot bilong Yunaitet Nesen (Human Development Report 2002) i tok, “inap 5 pesen bilong ol bikpela maniman tru long graun ol i save kisim bikpela pe moa, winim 5 pesen bilong ol rabisman tru inap 114 taim.”
Sampela ol i gat gutpela sindaun liklik, tasol planti milion ol i stap long ol skwota setelmen na ol i save painim ples bilong sanapim ol liklik pipia haus na sindaun long en. Tasol sampela i no gat haus; ol i mas slip long rot, na ol i gat ol hap katon o plastik tasol bilong slip antap long en. Planti bilong ol i hatwok tru long painim liklik kaikai—ol i save mumutim ol pipia kaikai long ol dram pipia, o ol i mas karim ol hevipela samting o bungim ol botol o tin o pepa samting ol man i bin tromoi na ol i pulimapim long liklik wilbaro na salim bilong kisim liklik toea long en.
Dispela pasin olsem i gat ol maniman tru na i gat ol lain rabisman tu, i no stap tasol long ol kantri i no gat planti wok bisnis long en, nogat; tasol olsem Wol Beng i tok, “long olgeta kantri i gat ‘ol hap em ol rabisman i save sindaun long en.’ ” Long ol kantri olsem Banglades na long Amerika tu, maski i gat ol maniman tru i stap, i gat ol lain tu em ol i hatwok tru long painim liklik kaikai o ples slip. Wanpela nius (The New York Times) i kamapim wanpela ripot bilong 2001 (U.S. Census Bureau) i makim olsem, long Amerika ol maniman i wok long kamap maniman moa yet, na ol rabisman i wok long kamap rabis moa yet. Dispela ripot i tok: “Long yia i go pinis, ol bikpela maniman tru long kantri ol i kisim 50 pesen bilong olgeta mani ol man i kisim long wok. . . . Ol man i stap rabis tru ol i kisim 5 pesen tasol.” Dispela pasin i stap tu long planti ol narapela kantri na i nogut moa long sampela hap. Wanpela ripot bilong Wol Beng i soim olsem 57 pesen bilong ol lain bilong graun ol i save kisim mani i aninit long 2 dola long olgeta wan wan de bilong baim kaikai samting.
Na yumi ken tingim narapela samting tu, olsem: Long 2002, planti milion manmeri ol i tingting planti long sampela ripot i kamap long sampela man i holim bikpela wok olsem maneja bilong kampani, em ol i kamap maniman long rot bilong trik o paulim mani o kain pasin olsem. Maski ol i no brukim lo tru tru, planti manmeri i pilim olsem ol dispela bikpela man bilong kampani “ol i wok long kamap maniman moa moa yet na ol i no tingim ol narapela man.” (Nius Fortune) Taim ol man i tingim ol kain samting olsem i wok long kamap long graun, sampela man i tingting planti olsem i no stret long sampela man i kisim bikpela mani moa yet, inap olsem planti handet milion kina, tasol planti planti manmeri ol i stap rabis.
Pasin Bilong Stap Rabis Em Bai Stap Oltaim?
Tasol i no olsem i no gat wanpela man i wok strong long stretim dispela hevi bilong ol rabisman, nogat. Sampela lain bilong gavman na ol narapela lain bilong helpim ol rabisman ol i bin wok strong long senisim dispela pasin. Tasol dispela hevi i stap yet. Wanpela ripot (Human Development Report 2002) i tok “long nau planti kantri i stap rabis moa yet, winim 10, 20, o 30 yia i go pinis,” maski ol i traim kain kain rot bilong stretim dispela hevi.
Tasol yu ting ol rabisman i no inap wetim gutpela samting i kamap long bihain? Orait, mipela i laik bai yu ritim stori i kamap bihain long dispela, na bai yu ken skelim sampela gutpela tingting inap helpim ol rabisman nau long dispela taim stret na yu ken skelim sampela samting bilong stretim dispela hevi, em ol samting ating yu no bin tingim.