Kisimgut Tok Bilong Baibel—Em Wanpela Amamas Yu Inap Kisim
BAIBEL i gat ol gutpela tok i tru bilong God. Em i tokim yumi long as na yumi stap, na as bilong ol pen na hevi bilong ol man, na i stap bilong ol man long bihain. Em i skulim yumi long rot bilong stap amamas, kisim ol gutpela pren, na stretim ol hevi. Na bikpela samting moa, yumi kisim save long Man Bilong Wokim yumi na Papa bilong yumi long heven, em Jehova. Dispela kain save i givim amamas long yumi na i stap bilong yumi i gat as tru bilong en.
Baibel i tok pasin bilong kisim save long God i olsem yumi kisim kaikai. Jisas i tok: “Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.” (Matyu 4:4; Hibru 5:12-14) Long olgeta de yumi mas kisim gutpela kaikai na bai yumi ken i stap laip, na olsem tasol yumi mas ritim Tok Bilong God long olgeta de na bai ol tok promis bilong God long laip i stap oltaim em inap helpim yumi.
Yumi save amamas long kaikai, long wanem, God i bin wokim yumi olsem, na tu, yumi mas kaikai bilong pinisim hangre. Tasol i gat narapela samting yumi mas kisim bilong i stap amamas. Jisas i tok: “Ol manmeri i save, ol i stap rabis tru long ol samting bilong God, em ol i ken amamas.” (Matyu 5:3) Taim yumi kisimgut ol tok bilong Baibel, dispela em inapim yumi long ol samting bilong spirit, olsem na yumi stap amamas.
Tru, sampela i hatwok long kisimgut tok bilong Baibel. Olsem: Ating yu mas kisim helpim bilong kisimgut ol ves bilong Baibel i stori long sampela pasin yu no kliagut long en o ol ves i mekim ol tok piksa samting. Na i gat ol tok profet ol i mekim long sampela kain tok piksa, na bilong kliagut long ol yu mas lukim sampela ves moa i toktok long dispela samting. (Daniel 7:1-7; KTH 13:1, 2) Tasol maski i olsem, yu inap kisimgut ol tok bilong Baibel. Olsem wanem yu ken save tru long dispela?
Wanpela Amamas Olgeta Inap Kisim
Baibel em i Tok Bilong God. Long Baibel God i kamapim laik bilong em long yumi. Yu ting God bai givim yumi wanpela buk em yumi no inap kisimgut tok bilong en, o ol saveman tasol inap kisimgut? Nogat. Jehova i no inap mekim olsem. Krais Jisas i tok: “Sapos pikinini bilong wanpela bilong yupela em i askim papa long givim wanpela pis long em, ating papa bai i givim em wanpela snek nogut, a? Nogat. Na sapos pikinini i askim papa long givim em wanpela kiau, ating papa bai i givim em wanpela binatang nogut, a? Em tu nogat. Yupela papa . . . i save tumas long givim ol gutpela samting long ol pikinini bilong yupela. Olsem na yupela i ken save tru, Papa bilong yupela i stap long heven em bai i amamas long givim Holi Spirit long ol man i askim em.” (Luk 11:11-13) Em nau, yu ken bilip tru olsem yu inap kisimgut ol tok bilong Baibel, na sapos yu gat gutpela bel na yu askim God, em bai helpim yu. Ol pikinini tu inap kisimgut na pilim tru ol tok bilong Baibel!—2 Timoti 3:15.
Tru, yumi mas taitim bun bilong kisimgut tok bilong Baibel, tasol sapos yumi mekim olsem, dispela inap strongim tru bel bilong yumi. Taim Jisas i kirap bek pinis, em i kamap long tupela disaipel na i stori long tupela long ol tok profet bilong Baibel. Luk i tok: “Em i stat long tok bilong Moses na bilong olgeta profet, na em i skulim tupela long as bilong olgeta hap bilong buk bilong God i toktok long em yet.” Orait wanem samting i kamap? Long dispela nait tupela disaipel hia i tingim ol samting ol i bin lainim, na tupela i toktok namel long ol yet olsem: “Tru tumas, taim mitupela i wokabaut long rot, na em i givim toktok long mitupela, na em i autim as tingting bilong buk bilong God long mitupela, bel bilong mitupela i bin kirap tru.” (Luk 24:13-32) Tupela i kisim amamas long kliagut long Tok Bilong God, long wanem, em i strongim bilip bilong ol long ol tok promis bilong God na ol inap tingim ol gutpela samting bai kamap bihain.
Wok bilong kisimgut Tok Bilong God i no wanpela wok i gat hevi, nogat; em i save kirapim tingting bilong yumi na i helpim yumi, na yumi kisim amamas long en olsem long taim yumi kisim gutpela kaikai. Tasol yu mas mekim wanem bilong kisimgut tok bilong Baibel? Stori i kamap bihain long dispela bai soim yu long olsem wanem yu ken amamas long “save gut long God.”—Sindaun 2:1-5.
[Piksa long pes 4]
Olsem wanpela gutpela papa, Jehova i save givim holi spirit long yumi bambai yumi ken kisimgut tok bilong Baibel