Skul Bilong Baibel i Strongim Bilip
“EM I gutpela samting tru long lusim 5-pela mun long putim gut yau long tingting bilong Man Bilong Wokim yumi na lain long kisim wankain tingting olsem em long ol samting!” Em tok wanpela sumatin bilong namba 122 klas bilong Wastaua Baibel Skul Bilong Gileat i mekim long taim bilong gretiuesen. Mas 10, 2007, em wanpela de ol 56 sumatin bilong dispela klas bai tingim inap longpela taim bihain, em ol i redi nau long kirap mekim wok long 26 kantri ol i bin makim ol long mekim wok misineri long en.
Theodore Jaracz, em wanpela bilong lain Gavening Bodi, i mekim tok amamas long ol 6,205 i bung, na bihain em i tok: “Mipela i bilip olsem dispela gretiuesen program yupela i kam long en bai strongim bilip na pasin bilong yupela long pas gut wantaim God.” Em i kolim nem bilong fopela brata em ol bai mekim tok bilong Baibel bilong strongim bel bilong ol sumatin na helpim ol long mekim gut wok misineri bilong ol.
Tok Bilong Kirapim Ol Long Strongim Bilip Bilong Ol Narapela
Leon Weaver, wanpela memba bilong Brens Komiti Bilong Yunaitet Stets, i mekim dispela tok “Wok Yet Long Mekim Gutpela Wok.” Em i kirapim tingting bilong ol sumatin long tingim olsem olgeta wan wan i bin lusim inap olsem 13 yia long fultaim sevis, ol i bin helpim wok bilong lainim ol man long tok bilong Baibel i save strongim bilip. Em i tok: “Em i gutpela wok tru, long wanem, em i save helpim ol man long kisim laip, na bikpela samting moa dispela wok i givim biknem long Papa bilong yumi long heven, em Jehova.” Brata Weaver i kirapim ol sumatin long wok yet long “bihainim pasin bilong Holi Spirit” na “no ken les long mekim gutpela pasin.”—Galesia 6:8, 9.
David Splane, em wanpela bilong lain Gavening Bodi, i givim gutpela tok i stret long ol taim em i mekim dispela tok “Kirap Hariap Long Mekim Gutpela Pasin.” Brata Splane i strongim ol misineri long kirap hariap long mekim gut wok long ol kantri ol i makim ol long mekim wok misineri long en, na bilong mekim olsem ol i mas bihainim ol dispela pasin: “Holim stretpela tingting long ol samting. No ken hariap long kisim tingting kranki. Mekim gutpela pasin pren. No ken skelim skelim pasin bilong ol narapela. Mekim pasin daun na soim rispek long ol brata asples.” Na em i tok moa olsem: ‘Taim yupela i lusim balus, kirap hariap long mekim gutpela pasin na Jehova bai blesim wok yupela i mekim bilong “bringim gutpela tok” long ol manmeri.’—Aisaia 52:7.
Tisa bilong Skul Gileat, em Lawrence Bowen, i mekim dispela tok “Bai Yupela i Kisim Wanpela Gutpela Samting Tru.” Brata Bowen i kirapim ol sumatin long tingim olsem taim ol i bin kirapim Skul Gileat long taim bilong Wol Woa 2, ol i bilip tru olsem ol tok profet bilong Jehova long Baibel bai kamap tru. (Hibru 11:1; KTH 17:8) Kirap long dispela taim na i kam inap long nau, Skul Gileat i mekim na ol sumatin i gat rot long strongim bilip bilong ol. Strongpela bilip i kirapim lain i winim skul long i go na givim bel olgeta long autim tok i tru.
Narapela tisa bilong Skul Gileat, em Mark Noumair, i mekim tok “Yupela i Kirapim Mi Long Tingim Wanpela Man.” Em i kirapim ol long tingim pasin bilong profet Elisa, husat i bin kamapim klia pasin bilong bilip na strongpela bel long mekim wok bilong em. Brata Noumair i kisim tok long 1 King 19:21, na em i tok: “Elisa i redi long mekim ol senis long sindaun bilong em, em i putim ol samting bilong em yet i stap nambatu, na em i tokaut long ol samting Jehova i tingting pinis long mekim.” Em i mekim tok amamas long ol sumatin long ol tu i bin kamapim wankain pasin, na em i strongim ol long mekim yet dispela pasin long ol nupela hap ol bai mekim wok misineri long en.
Bilip i Kamapim Pasin Bilong i No Pret Long Tokaut
Taim ol sumatin i wok long strongim bilip bilong ol yet long taim bilong skul, ol i amamas long autim gutnius long ol narapela long ol wiken. Dispela i mekim na ol i kisim sampela gutpela ekspiriens em ol i stori na mekim soim long ol, long hap bilong program em Wallace Liverance, em narapela tisa bilong Skul Gileat i bin lukautim. Nem bilong tok em “Yumi Bilip Olsem na Yumi Tokaut,” i kamapim tok bilong aposel Pol i stap long 2 Korin 4:13.
Bihain long dispela tok, Daniel Barnes na Charles Woody, em ol memba bilong famili Betel, i mekim inteviu wantaim sampela i mekim yet wok misineri na sampela em ol i bin mekim wok misineri long bipo. Ol dispela inteviu i kamapim klia olsem Jehova i save lukautim na blesim ol lain i stap gut long wok bilong em. (Sindaun 10:22; 1 Pita 5:7) Wanpela misineri i tok: “Mi na meri bilong mi i lukim tru olsem Jehova i lukautim mipela long rot bilong skul mipela i kisim long Gileat. Dispela i strongim tru bilip bilong mipela. Bilip em i bikpela samting, long wanem, olgeta wokman bilong God—ol misineri tu—bai bungim ol traim, hevi na wari.”
Strongim Yet Pasin Bilong Skul Long Baibel i Save Strongim Bilip
Bilong pinisim gretiuesen program, Samuel Herd, em wanpela bilong lain Gavening Bodi, i mekim tok “Wok Yet Long Strongim Ol Brata Bilong Yupela.” Wanem as bilong dispela skul ol sumatin i bin kisim? Brata Herd i tok: “As na yupela i kisim dispela skul em bilong lainim yupela long mekim wok long maus bilong yupela bilong litimapim nem bilong Jehova, skulim ol man long tok i tru bilong em long ol hap yupela bai mekim wok misineri long en, na bilong strongim bilip bilong ol brata bilong yupela.” Tasol em i tokim ol sumatin long tingim olsem, maus inap kamapim tu ol tok i no strongim narapela. (Sindaun 18:21; Jems 3:8-10) Em i strongim ol sumatin long bihainim pasin bilong Jisas taim ol i mekim wok long maus bilong ol. Wanpela taim ol disaipel i harim tok bilong Jisas na ol i tok: ‘Tru tumas, taim em i givim toktok long mitupela, na i autim as tingting bilong buk bilong God long mitupela, bel bilong mitupela i bin kirap tru.’ (Luk 24:32) Brata Herd i tok: “Sapos yupela i mekim ol gutpela tok, dispela bai strongim tru bel bilong ol brata na sista long hap yupela bai mekim wok misineri long en.”
Orait nau, ol lain i grediuet i kisim ol setifiket bilong ol. Wanpela sumatin i ritim wanpela pas em klas i bin raitim bilong tok tenkyu. Dispela pas i tok: “Mipela i pilim olsem mipela i gat bikpela wok tru bilong yusim save mipela i bin kisim bilong stap gut long wok bilong mipela olsem misineri. Mipela i redi long go long olgeta hap bilong graun, na mipela i beten olsem wok mipela i mekim bai litimapim tru nem bilong Nambawan Bikpela Tisa bilong yumi, God Jehova.” Olgeta i kam bung i wanbel na paitim han. Tru tumas, dispela program bilong gretiuesen i strongim tru bilip bilong olgeta manmeri i bung.
[Rait long pes 17]
“Sapos yupela i mekim ol gutpela tok, dispela bai strongim tru bel bilong ol brata na sista long hap yupela bai mekim wok misineri long en”
[Blok long pes 15]
OL SAMTING BILONG OL SUMATIN
Hamas kantri ol i kam long en: 9
Hamas kantri ol bai go long en: 26
Hamas sumatin: 56
Krismas bilong ol, averes: 33.4
Hamas yia long tok i tru, averes: 16.8
Hamas yia long wok painia, averes: 13
[Piksa long pes 16]
Klas Namba 122 Bilong Wastaua Baibel Skul Bilong Gileat
Nem bilong ol bratasista i stap daunbilo. Namba wan lain i sanap paslain, na namba 9 lain i sanap baksait tru. Taim yu ritim nem bilong ol na lukim pes bilong ol, kirap long han kais na go long han sut.
(1) Howitt, R.; Smith, P.; Martinez, A.; Pozzobon, S.; Kitamura, Y.; Laud, C. (2) Fiedler, I.; Beasley, K.; Matkovich, C.; Bell, D.; Lippincott, W. (3) Sites, W.; Andersen, A.; Toevs, L.; Fusano, G.; Rodríguez, C.; Yoo, J. (4) Sobomehin, M.; Thomas, L.; Gasson, S.; Dauba, V.; Bertaud, A.; Winn, C.; Dobrowolski, M. (5) Yoo, J.; Dauba, J.; Mixer, H.; Newton, M.; Rodríguez, F.; Mixer, N. (6) Laud, M.; Lippincott, K.; Martinez, R.; Haub, A.; Schamp, R.; Pozzobon, L.; Toevs, S. (7) Howitt, S.; Kitamura, U.; Newton, D.; Haub, J.; Sites, J.; Thomas, D. (8) Sobomehin, L.; Matkovich, J.; Fusano, B.; Winn, J.; Schamp, J.; Andersen, D.; Dobrowolski, J. (9) Fiedler, P.; Bell, E.; Beasley, B.; Smith, B.; Bertaud, P.; Gasson, M.