Ol Man i Askim
Tru Bikpela Tait Long Taim Bilong Noa i Bin Karamapim Graun Olgeta?
Bikpela Tait long taim bilong Noa i bin kamap winim 4,000 yia i go pinis. Olsem na ol man i bin lukim dispela Bikpela Tait, i no gat wanpela i stap laip yet nau long graun na bai em ken stori long yumi long ol samting i bin kamap. Tasol i gat wanpela rait i stori long dispela bikpela bagarap na dispela rait i tok tait wara i bin karamapim ol bikpela maunten long dispela taim.
Dispela olpela rait i tok: “Tait i wok long kamap yet inap long 40 de . . . Na wara i kam antap moa moa yet na i karamapim olgeta bikpela maunten. Bihain wara i winim olgeta maunten na i go antap moa inap long 7-pela mita.”—Stat 7:17-20.
Ating sampela man bai i ting dispela stori bilong wara i karamapim graun olgeta, em i wanpela tok nating o wanpela stori ol i bilasim tasol tok bilong en. Tasol nogat tru! Wara i karamapim yet bikpela hap bilong graun long nau. Solwara i karamapim olsem 71 pesen bilong graun. Olsem na i stret yumi ken tok dispela wara i bin karamapim graun i stap yet long taim bilong yumi. Na sapos ol bikpela hap ais na ol ais long hap not na hap saut bilong graun i tanim i kamap wara, mak bilong solwara bai i go antap tru na karamapim ol bikpela siti olsem New York na Tokyo.
Ol saveman i skelim graun long hap not-wes bilong Yunaitet Stets, ol i bilip olsem long bipo i gat planti olsem 100 bikpela tait wara i bin karamapim dispela hap. Wanpela bilong ol dispela tait i bin karamapim dispela hap, em i go antap inap 600 mita, na i ron spit inap 105 kilomita long wanpela aua—wara inap 2,000 kubik kilomita na hevi bilong en i winim 2 trilion ton. Ol kain wok painimaut olsem i bin kirapim sampela arapela saientis long bilip olsem tru tru tait wara inap karamapim graun olgeta.
Ol manmeri husat i bilip olsem Baibel em i Tok Bilong God, ol i bilip olsem stori bilong tait wara i karamapim graun olgeta em i no wanpela tok nating. Em samting tru tru i bin kamap. Jisas i tokim God: “Tok bilong yu i tru olgeta.” (Jon 17:17) Aposel Pol i tok laik bilong God em olsem: “Em i laik kisim bek olgeta manmeri, bai ol i ken save long as bilong tok tru.” (1 Timoti 2:3, 4) Olsem wanem Pol inap tokim ol disaipel bilong Jisas long God na ol samting God i tingting pinis long kamapim sapos Baibel i gat ol tok nating?
Jisas i bilip olsem Bikpela Tait i bin kamap na em i bilip tu olsem dispela wara i bin karamapim graun olgeta. Long bikpela tok profet bilong em long ol samting bai kamap long taim em i kam i stap na long pinis bilong ol pasin bilong dispela graun, em i tok ol samting i kamap bai i wankain olsem long taim bilong Noa. (Matyu 24:37-39) Aposel Pita tu i stori long Bikpela Tait long taim bilong Noa. “Na bihain God i tok na em i mekim wara i kamap gen na bikpela tait i karamapim dispela graun, na graun i bagarap olgeta.”—2 Pita 3:6.
Sapos stori bilong Noa na Bikpela Tait em i stori nating tasol, orait ol tok lukaut bilong Pita na Jisas i go long ol man i stap long taim bilong las de, ol dispela tok bai i no gat as bilong en. Dispela stori i stap olsem tok lukaut, tasol sapos em i no tru, orait dispela inap paulim tingting bilong ol man long ol tok lukaut bilong Baibel na ol i no was i stap bilong abrusim dispela bagarap bai kamap em i bikpela moa winim bagarap bilong Bikpela Tait long taim bilong Noa.—2 Pita 3:1-7.
God i tok long pasin bilong em long marimari long ol manmeri bilong em, na i tok: “Long taim bilong Noa mi bin promis olsem bai mi no inap bagarapim graun gen long bikpela tait. Na nau bai mi mekim wankain promis. Mi tok tru tumas bai mi no belhat gen long yu na krosim yu na mekim save long yu.” Olsem Bikpela Tait long taim bilong Noa i bin karamapim graun olgeta, olsem tasol gutpela-pasin-sori bilong God bai stap wantaim ol manmeri i bilip long em.—Aisaia 54:9.