Graun i Gat “Sik Fiva” i Gat Rot Bilong Stretim?

GRAUN i soim sain bilong sik​—tempresa bilong en i wok long i go antap. Olsem: Long Alaska long hap saut bilong Aktik Sekel i gat wanpela ples ol i kolim Newtok. Graun em dispela ples i sindaun antap long en, em i ais, tasol dispela ais i wok long tanim i kamap wara. Frank, em man i save stap long hap, em i tok: “Mi no laik i stap moa long ples ais. Nau dispela ples em graun malumalum tasol.” Wok painimaut i soim olsem insait long 10-pela yia, ating wara bai rausim dispela ples i go.

Lain IPCC (Intergovernmental Panel on Climate Change) i tok “ples i wok long kamap hat moa.” Weda i wok long senis na dispela i bin kamapim taim nogut, olsem taim bilong bikpela san na no gat wara, bikpela ren, san i hat nogut tru, na ol saiklon long olgeta hap bilong graun. Wanem samting bai kamap long graun bilong yumi? I gat rot bilong stretim ol dispela hevi?

Glasim Sik Bilong Graun

Graun i olsem wanpela sikman i slip long haus sik, na ol saientis bilong skelim weda i wok long glasim ol senis i kamap long en. Ol satelait i skelim ol bikpela ais long maunten i wok long i go liklik, ol weda stesen i rekodim hamas ren i pundaun, na ol masin i save trip antap long solwara i skelim tempresa bilong solwara, na ol balus i skelim ol ges i stap long win antap. Ol i putim olgeta dispela ripot long ol kompiuta. Ol i laik skelim weda bambai ol inap tokaut long wanem samting bai kamap 20 o 30 yia bihain, o sampela handet yia bihain.

Ol i luksave long wanem samting? Sampela i ting olsem ol smok na ges nogut bilong ol faktori i pulap long win bilong antap. Nius Time i tok, insait long yia 2006 tasol, kabon daioksait em graun i save rausim i go long win antap “i winim mak bilong 32 bilion ton.” Olsem banis bilong grinhaus i save holim hat bilong san, ol dispela ges i save holim hat bilong graun na dispela i mekim na graun i wok long kamap hat moa. Wanem samting bai kamap long bihain? Lain IPCC i tok, sapos ol faktori i wok yet long kamapim ol ges nogut long wankain mak olsem nau, dispela bai kamapim ‘planti senis long weda,’ na ating ol dispela senis bai nogut moa winim ol senis i kamap pinis. Planti i tok, rot bilong stretim dispela hevi em long daunim mak bilong kabon daioksait. Tasol maski ol i daunim mak bilong dispela ges nogut, ol kompiuta i soim olsem ‘i go inap planti handet yia graun bai wok yet long kamap hat na mak bilong solwara bai wok yet long i go antap.’

Bai Yumi Painim Bekim We?

Tru tumas, i gat kain kain samting i insait long wok bilong tokaut long weda. Wanpela buk (Earth Observatory) long Intenet, i askim olsem: “Graun i wok long kamap hat moa na wanem samting bai kamap long ol klaut? Ol klaut i save holim hat bilong graun, ol inap mekim graun i kamap hat moa. Olsem wanem? Ol dispela klaut bai kamap planti moa winim ol klaut em ol i save pasim lait bilong san?” Wanem bekim bilong en? “Long nau ol saientis i no save long bekim bilong ol dispela askim.”

Tasol Baibel i kamapim klia olsem, God Jehova em Man bilong “wokim heven na graun,” na tu, “ol klaut long skai.” (Stat 14:19; Sindaun 8:28) Em i tok long em yet olsem, em i givim “savetingting long ol klaut.” Yes, Jehova i save gut long ol samting em ol saientis i no save long en.​—Jop 38:​36, NW.

Inap olsem 2,700 yia i go pinis, God i bin stori long ol samting bilong ples antap olsem: “Ren i save pundaun long skai, em i no save go bek nating antap long skai. Nogat. Em i save givim wara long graun.” (Aisaia 55:10) Dispela tok i stori gut long raun bilong wara! Wara long ol klaut i save pundaun olsem ren, na i save “givim wara long graun.” Hat bilong san i pulim wara i ‘go bek antap long skai’ bambai em i ken mekim wankain wok gen. Baibel i stori klia long planti samting bilong graun inap planti handet yia paslain long ol narapela buk i stori long ol dispela samting. Ating dispela i strongim bilip bilong yu long Man Bilong Wokim olgeta samting na long samting em inap tru long mekim, a? Olsem na bilong save long rot bilong stretim hevi bilong dispela graun, i gutpela yumi go long Man bilong ‘wokim win’ na ‘papa bilong ren,’ em Man i save gut long ol samting i stap long planet bilong yumi na ol i save wok olsem wanem.​—Amos 4:13; Jop 38:28.

I Gat As na God i Wokim Graun

Maski ol man i gat kain kain tingting long wanem samting bai painim planet bilong yumi bihain, wanpela samting i klia tru i olsem: Graun bilong yumi i narakain tru long ol narapela planet. I gat kain kain samting i stap laip long en. Olsem wanem na graun inap mekim olsem? Ol saientis i kamapim sampela as. Graun i gat planti wara; na em i sindaun long mak stret longwe long san; na graun i gat ol kain kain ges em ol i miks wantaim na i stret, na i gat bikpela ges oksijen tu.

Ating bai yu kirap nogut long save olsem Buk Stat long Baibel i toktok long ol dispela samting long stori bilong God i wokim graun. Olsem: Stat 1:10 i tok olsem God i bungim wara long wanpela hap na “em i kolim ‘Solwara’ ”​—em wanpela samting i soim olsem graun i gat planti wara. Tok i stap long Stat 1:​3, i tok olsem: “God i tok olsem, ‘Lait i mas kamap.’ ” Planet bilong yumi i no stap klostu tumas long san, olsem na wara bilong en i no drai, tasol sapos em i stap klostu tru long san, olgeta wara bilong en bai pinis nating.

Stat 1:​6, 7 i tok olsem God i wokim wanpela “banis,” o skai. Orait Stat sapta 1 ves 11 na 12 i tok God i mekim kamap gras na ol diwai samting. Ol dispela samting i soim olsem i gat ges oksijen i stap, em bihain ol man na ol animal bai pulim na ol i stap laip.

Bai yumi ken tok wanem long ol dispela samting yumi skelim? Taim God i wokim graun​—graun i gat planti wara long en, na i sindaun long mak stret longwe long san, na i gat ol kain kain ges i miks wantaim na i stret​—i gat as na em i wokim. Baibel i tok: “[God] i no wokim graun bilong i stap nating. Nogat. Em i bin wokim bilong olgeta samting i ken i stap long en.” (Aisaia 45:18) Song 115:16 i tok: “Heven em i ples bilong God tasol, na em i givim graun long yumi manmeri.” Tru tumas, God i wokim graun bilong ol man i ken i stap long en.

Olsem Baibel i tok, God i bin wokim namba wan man na meri na em i putim tupela long gaden Iden, em wanpela paradais. Ol i mas “lukautim dispela gaden.” (Stat 2:15) Na tu, God i bin tokim ol: “Yupela i mas kamap planti na i go sindaun long olgeta hap bilong graun na bosim olgeta samting i stap long en.” (Stat 1:28) Tingim gutpela samting bai painim ol bihain! Ol bai surikim dispela Paradais i go long olgeta hap bilong graun na ol bai stap oltaim oltaim long en. Man! Em gutpela samting tru bai kamap bihain!

Tasol sori tru, ol i no harim tok bilong God na bihainim. Namba wan man na meri i laik bosim wokabaut bilong ol yet, em pasin planti manmeri i bihainim yet i kam inap long nau. (Stat 3:​1-6) Wanem samting i kamap? Ol man i no lukautim graun, nogat, ol i wok long “bagarapim graun” winim long bipo. (KTH 11:18) Tasol yumi ken belgut olsem laik bilong God long dispela graun i no senis. Baibel i tokim yumi: “[God i] bin putim dispela graun i stap long ples bilong en, na graun i stap strong olgeta. Em i no inap surik liklik. Nogat tru.” (Song 104:5) Na long Bikpela Tok Long Maunten, Jisas yet i tok promis olsem: “Ol manmeri i save daunim nem bilong ol yet, em ol i ken amamas. Bai God i givim olgeta graun long ol.” (Matyu 5:5) Laik bilong God long dispela graun bai i kamap tru olsem wanem?

Wanpela Gutpela Taim i Wetim Yumi

Wanpela presiden bilong Amerika long bipo i tok “Weda i senis, na dispela em wanpela hevi long olgeta hap bilong graun.” Ating bai yu wanbel olsem i mas i gat samting bilong stretim hevi bilong graun. Jisas Krais i tok i gat wanpela rot bilong stretim dispela samting​—Kingdom Bilong God tasol inap stretim. Em i tokim ol disaipel bilong em long beten olsem: “Kingdom bilong yu i mas i kam.” (Matyu 6:​9, 10) Olsem tok profet bilong Baibel i kamapim, dispela Kingdom bilong heven em wanpela gavman i bosim olgeta hap bilong graun, na klostu nau em bai ‘bagarapim ol arapela kingdom [em ol gavman bilong nau].’ (Daniel 2:44) Na tu, em bai “bagarapim ol man i bin bagarapim graun.” (KTH 11:18) Olsem na yumi ken save, ol man husat i mekim nabaut long ol samting bilong graun na ol i no mekim gutpela wok long en, ol i gat asua na ol bai bagarap.

Tasol wanem samting bai painim graun bilong yumi i wok long bagarap? Taim Jisas i stap long graun, em i bin wokim mirakel na bosim win na solwara samting. Em i tok tasol na strongpela win i dai. (Mak 4:​35-​41) Jisas i mekim wok long heven olsem “Bikpela bilong olgeta bikman, na . . . King bilong olgeta king,” na em bai yusim bikpela strong bilong em long bosim graun wantaim win, ren, san na solwara samting. (KTH 17:14) Jisas i stori long taim em i mekim wok bos, em taim bilong mekim “olgeta samting i kamap nupela.” (Matyu 19:28) Narapela Baibel i tanim dispela tok olsem “ol samting i kamap nupela gen.” (King Jems Nupela Testamen) Jisas bai mekim ol samting i kamap nupela gen, olsem mekim ol samting bilong graun i kamap nupela gen wankain olsem long gaden Iden. Paradais bai kamap bek. (Luk 23:​43, King Jems Nupela Testamen) “Sik fiva” bilong graun bai pinis​—long rot bilong Kingdom Bilong God.

Wok bos bilong Kingdom inap helpim yu long nau. Long wanem rot? Jisas i tok profet: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim.” (Matyu 24:14) Long rot bilong autim tok, planti milion manmeri i putim yau long dispela gutnius na ol i wok long senisim pasin bilong ol. Ol i lusim kalabus bilong ol samting inap bagarapim laip bilong ol. Sindaun bilong famili i kamap gutpela. Pasin laikim i daunim pasin bilong bel nogut long ol man bilong narapela lain. Tru tumas, Kingdom Bilong God i mekim ol samting em ol gavman bilong ol man i no inap mekim. Em i bungim pinis klostu 7 milion manmeri long 235 kantri long i stap wanbel na i stap olsem brata brata! Tru tumas, ol i stap olsem ol manmeri i stap aninit long Kingdom Bilong God, na dispela i redim ol long i stap oltaim long Paradais bai kamap long dispela graun.

Gutpela samting bai kamap long dispela graun bihain. Na wankain samting tu i ken kamap long i stap bilong yu long bihain!

[Piksa long pes 27]

Baibel i stori long raun bilong wara planti handet yia paslain long ol narapela buk i stori long en

[Piksa long pes 28]

Jisas “i krosim win, na i tokim wara olsem, ‘Inap nau. Yu pinis!’ Na win i dai, na wara i no mekim nais liklik”

[Piksa long pes 29]

Taim Paradais i kamap bek, “sik fiva” bilong graun bai pinis

[Piksa Kredit Lain long pes 26]

Godo-Foto