Autim Gutpela Tok—Long Buk Stap Oltaim
1 Tok bilong Krais Jisas “i save givim laip i stap gut oltaim oltaim.” (Jo 6:68) Em i kisim dispela tok long husat? Em i beten long Jehova na i tok olsem: “Olgeta tok yu givim mi, em mi givim pinis long ol.” (Jo 17:8) Tok Jisas i kisim long Papa bilong em, em i givim long ol disaipel bilong em, em tok ol sinman i mas kisim bambai ol inap kamap pren bilong Jehova na kisim laip i stap oltaim.
2 Jisas i save ol disaipel bilong em bai autim dispela bikpela tok em i bin givim long ol—bai ol i no pasim maus, nogat. Long nau, inap olsem 4 milion manmeri i save long ol samting bilong helpim man long kisim “laip bilong i stap gut oltaim.” (Jo 17:3) Ol tu i gat wok long givim dispela gutpela save long ol narapela, em save i kam long God Jehova bilong helpim man long abrusim bagarap na i stap laip.
3 Tru tumas, buk Stap Oltaim em i wanpela gutpela samting yumi ken mekim wok long en bilong helpim man long kisim tok “i save givim laip i stap gut oltaim oltaim.” Tasol bilong helpim man long save, buk hia i gat ol gutpela tok i stap insait, yumi mas soim em olsem wanem ol skripsa yumi bin kamapim long em i stret wantaim ol tok bilong buk. Olsem wanem? Yu yet yu bin mekim olsem?
OL TOK PIKSA I STRET
4 Kaunim Jon 17:17, na yu ken tok: “Dispela tok i kamapim klia, Krais Jisas i bilip olsem Tok bilong God em i tru. Tasol long nau planti man i gat tupela tingting long tok bilong Baibel—em i tru o nogat. Ating yu tu i gat sampela askim olsem, a? [Larim man i bekim tok.] Mi bin lukim sampela gutpela tok bilong bekim dispela askim, na mi ting em bai helpim yu tu. [Kaunim paragraf 21 long pes 53.]” Orait nau yu ken stori liklik olsem: Tok bilong Baibel i stret wantaim ol save ol man bilong saiens i kisim, na stori bilong Baibel long ol samting i bin kamap bipo em i stret, na tu, Baibel i kolim stret ol samting i mas kamap bihain. Bilong pinisim tok, yu ken kamapim sampela tok i stap long pes 54 na 55, o long paragraf 28 long pes 56. Orait nau tilim buk.
5 O taim yu kamapim pinis Jon 17:17, yu ken mekim tok olsem: “Samting i tru i mas i gat as na yumi ken save em i tru, a? Olsem: Sapos Baibel i tok yumi inap i stap laip oltaim, i stret yumi kamapim askim olsem: ‘I gat as tru na yumi ken bilipim dispela tok o nogat?’ Sampela man i bin tok: ‘Yumi ol man inap i stap oltaim oltaim.’ Mi laik soim sampela tok long yu i stap long dispela buk.” Nau kaunim paragraf 4 long pes 7. Stori liklik olsem i bikpela samting long man i mas kisim sampela save moa long Baibel, na nau tilim buk. Yu ken kamapim sampela narapela tok long buk Stap Oltaim sapos yu pilim olsem i stret moa long man bilong haus.
PASIN BILONG KIRAPIM STADI TAIM YU AUTIM TOK LONG MAN LONG NAMBA WAN TAIM
6 Olsem wanem? Taim yu autim tok long man long namba wan taim, yu bin traim pasin bilong kirapim Baibel-stadi? Sampela pablisa, taim ol i tilim buk Stap Oltaim, ol i soim man bilong haus long pasin bilong mekim wok long dispela buk bilong kisim save, na ol i mekim sotpela stadi wantaim em. Planti taim ol inap stretim rot bilong stadi wantaim man long olgeta wik. Nau i gat planti man i laik kisim save long Baibel na ol i amamas long yumi inap helpim ol.
7 Taim yu autim tok long man long namba wan taim, yu ken mekim wanem bilong tokim man yu laik stadi wantaim em long Baibel? Taim yu tilim pinis buk, yu ken mekim tok olsem: “Ol i wokim dispela buk bilong kaunim na bilong helpim man long stadi gut long ol tok bilong Baibel. Daunbilo i gat ol askim i stret wantaim paragraf, na i gat sampela hap bilong Baibel ol i no bin kamapim tok bilong en. Bilong helpim ol man long kisim sampela save moa mipela i bin tokim ol, mipela laik stadi wantaim ol long Baibel—no gat pe long en. Sapos yu gat liklik hap taim mi laik stori liklik long pasin bilong mekim olsem.” Orait nau long pasin isi yu ken toktok wantaim man long sampela paragraf long namba wan sapta o long sampela hap em man bilong haus i gat bikpela laik long save long en.
8 Jehova bai blesim ol wok yumi mekim bilong helpim narapela long kisim save, em save bilong helpim man long abrusim bagarap na i stap laip.
[Ol Askim]
1. Jisas i givim wanem samting long ol disaipel bilong em?
2. Ol man i save long ol samting em inap helpim man long kisim “laip bilong i stap gut oltaim,” ol i mas mekim wanem?
3. Yumi ken mekim wanem bilong helpim man long laikim buk Stap Oltaim?
4, 5. Taim yumi autim tok, yumi ken tok wanem long ol man inap i stap oltaim oltaim?
6. Taim yumi tilim buk Stap Oltaim, gutpela sapos yumi mekim wanem?
7. Taim yu autim tok long man long namba wan taim, yu ken mekim wanem bilong kirapim stadi wantaim em?