Baibel New World Translation i Helpim Ol Man i Laik Painim Kingdom
1 Aisaia i tok profet olsem, wanpela taim bai kamap na “ol blakpela klaut na bikpela tudak i karamapim olgeta arapela lain manmeri bilong graun.” (Ais 60:2) Truim bilong en i kamap pinis long dispela taim bilong yumi. Yumi “ol man i save bihainim pasin bilong lait,” yumi gat gutpela wok bilong givim lait long tingting bilong ol man i stap long teritori bilong yumi. (Lu 16:8) Long mun Novemba, bai yumi tilim Baibel New World Translation of the Holy Scriptures, na long dispela rot bai yumi inap helpim ol man i gat gutpela bel long “lusim tudak . . . i kam insait long lait bilong em, em lait i gutpela moa yet.”—1 Pi 2:9.
2 Baibel i givim lait long tingting na bel bilong ol man i save kaunim tok bilong Baibel na bihainim tok bilong en. Sampela bikman bilong gavman samting ol tu i save, tok bilong Baibel i win tru long helpim ol man. Olsem na ol stretpela lo bilong Baibel i as bilong planti stretpela lo ol gavman samting i bin kamapim, na taim gavman o kot samting i pasim tok long wanpela bikpela samting, planti taim ol stretpela lo bilong Baibel i stiaim tingting bilong ol. Na Baibel i gat gutpela tok long en bilong bosim gut wokabaut bilong yumi long nau, na em i stori tu long ol samting yumi mas mekim bambai yumi inap abrusim bagarap i laik kamap na kisim laip oltaim long nupela taim i gat stretpela pasin long en.—Jo 17:3.
BAIBEL NEW WORLD TRANSLATION INAP HELPIM GUT YUMI
3 Baibel New World Translation i gat strong long helpim ol man i gat pasin kain olsem sipsip long lainim tok i tru. Ol man bilong wokim dispela Baibel, ol i putim bek nem bilong God long Olpela na Nupela Testamen. Tasol ol i rausim ol tok ol man yet i bin skruim long tok bilong Baibel, olsem 1 Jon 5:7. Na ol i tanim stret ol tok ol man i no bin tanim gut long sampela Baibel long wanem ol i laik helpim bilip giaman bilong ol, olsem tok bilong God Triwan. Ol man bilong tanim tok bilong Baibel New World Translation, ol i tanim stret long ol tok ples ol i bin raitim Baibel pastaim long en i go long tok Inglis na bai ol tok bilong en i klia, na man i kaunim em inap kisim gut.
4 Ol man i givim bel tru long painim Kingdom bilong God, na ol i save gut long tok Inglis, gutpela sapos ol i gat Baibel New World Translation na ol i kaunim, long wanem, dispela bai helpim tru ol. Bai yumi tilim Baibel New World Translation wantaim buk Wanbel, long K4.30. Sapos kongrigesen i no holim dispela buk, orait yumi ken tilim Baibel wantaim wanpela buklet, long K3.80. Redim gut ol tok yu laik mekim bilong tilim ol dispela samting.
OL SAMTING BILONG HELPIM YUMI
5 Buk Reasoning long pes 10 i kolim sampela gutpela pasin bilong kirapim tok, na taim yumi laik tilim Baibel yumi ken mekim wok long ol dispela tok. Na pes 58-68 na 276-280 i kamapim sampela tok yumi ken mekim taim man bilong haus i kamapim tingting bilong em long wanpela samting, em man i no gat bikpela save tumas long Tok bilong God. Sapos yumi lusim sampela hap taim bilong redim ol tok bai yumi mekim taim yumi autim tok, orait, bai dispela i helpim yumi yet wantaim ol man yumi toktok wantaim ol.—1 Ti 4:13, 15, 16.
6 Yu no ken ting i hatwok tumas long tilim Baibel. Tok klia na mekim liklik tok tasol, olsem: “Dispela Baibel mi holim i kamapim klia ol tok na sapos yu save long kaunim tok Inglis bai yu inap kisim gut ol tok bilong en.” Nau yu ken stori long olsem wanem tok bilong God long Baibel inap helpim ol sapos ol i kisim save long en. O yu ken mekim narapela tok, olsem: “Ol man i save baim planti planti Baibel, winim ol narapela buk, na ol i putim i stap long haus bilong ol, tasol planti ol i no save kaunim, a? Tru, tok bilong sampela Baibel long tok Inglis i hatwok long kisim gut. Tasol sapos yu save long tok Inglis na yu kisim wanpela Baibel long tok Inglis bilong nau, ating dispela inap kirapim yu long kaunim ol tok bilong en.”
7 Olsem na yumi ken tenkyu long Jehova, em i “mekim bel bilong [yumi] i lait moa yet. . . . na [yumi] save long bikpela lait na strong bilong God.” (2 Ko 4:6) Olsem na gutpela sapos yumi wok strong long mun Novemba long tilim Baibel New World Translation na bai yumi inap helpim ol narapela man long kisim ol gutpela tok bilong en.