Bai Yu Autim Tok Long Kain Kain Taim na Ples Long Mun Disemba na Janueri?
1 Taim yumi mekim wok bilong yumi long olgeta de, yumi save makim taim bilong autim tok bilong Jehova long ol manmeri. Yumi save makim taim bilong go long ol haus na autim tok, na mekim ol gobek na Baibel-stadi. Tasol i gat planti ol narapela taim tu na yumi inap autim tok i tru—em yumi save kolim olsem ‘autim tok long kain kain taim na ples.’
2 Sampela pablisa i painim planti rot bilong autim tok olsem. Gutpela sapos yumi olgeta i redi long autim tok long ol man long taim yumi go i kam long ol kibung, o go limlimbur long ples samting, o go lukim ol wanblut. Olsem wanem? Sapos rot i op, yu bai autim tok long kain taim olsem?
3 Redi Gut Pastaim: Pasin bilong redi gut na tingting pastaim inap helpim yumi long autim gut tok long kain kain taim na ples. Yumi gat kain kain buk bilong helpim yumi long mekim olsem. Na yumi gat ol Wastaua na Kirap!, na ol liklik nius em het-tok bilong ol i gutpela bilong kirapim tingting bilong man. Na yumi gat ol buklet i gat planti piksa long en na i gutpela bilong helpim ol man i gat ol narapela kain sindaun na lotu. Na tu, yumi gat ol buk i gat 192 pes long en, ol i stori long ol samting ol man long nau ol i laik save long en. Yu amamas long tilim wanem ol buk? Gutpela sapos famili wantaim i tingim dispela samting. Orait nau mekim traim wantaim wanpela long famili bilong yu ol tok yu laik mekim taim rot i op.
4 Taim Yu Limlimbur i Stap: Taim yu go limlimbur long wanpela hap, em gutpela taim bilong autim tok long kain kain taim na ples. Olsem wanem? Bai yu kisim balus o PMV samting i go long wanpela hap? Sapos yu mekim olsem, orait kisim Baibel na wanpela buk samting i go wantaim yu. Taim yu sindaun long PMV samting na kaunim ol dispela buk, em nau, ating rot bai op bilong autim tok wantaim man i sindaun klostu long yu. Sapos yu raun long ka, tingim ol tok yu ken autim long man yu bungim long ples bilong kisim bensin o long haus kaikai o long taim yu stap long wanpela haus pasindia. Gutpela sapos yu holim sampela liklik nius bilong givim long man i harim tok. Sapos ol i sanapim PMV long wanpela hap bilong kisim liklik malolo na dispela hap i gat ol naispela diwai samting, orait, ating yu inap kirapim tok olsem: “Sapos olgeta hap bilong graun i olsem dispela naispela hap, bai i gutpela tru, a?” O sapos yu stap long wanpela naispela nambis o gaden samting, orait, yu ken kamapim wankain askim bilong kirapim tok.
5 Long Kibung Distrik: Taim yumi go long kibung distrik bai yumi gat rot bilong autim tok. Ol brata i stap long haus pasindia i bin autim tok long ol wokboi bilong haus pasindia, na planti bilong ol i amamas long harim tok. Na ol brata i bin autim tok long ol man ol i bin bungim ol taim ol i wokabaut long rot o wetim PMV. Long taim bilong kibung, gutpela sapos yumi pasim liklik kat bilong kibung distrik long klos bilong yumi, na taim yumi go long haus kaikai o stua, ating sampela i lukim dispela kat bai ol i laik save, kat hia i toksave long wanem samting. Em nau, ating bai yu gat rot long autim tok.
6 Long mun Disemba o Janueri samting, ating sampela bilong yumi bai kisim liklik malolo samting, tasol nogut yumi lusim tingting long painim rot bilong autim tok long kain kain taim na ples. Dispela rot bilong autim tok i save kamapim gutpela kaikai, na yumi olgeta wokboi bilong Jehova i mas insait long dispela wok. Olsem Jisas, pasin bilong laikim ol narapela man i mas kirapim yumi long autim tok long kain kain taim na ples!—Mt 5:14-16.