Helpim Ol Man Long Tingim Baibel i Gutpela Samting Tru
1 Wanpela samting yumi laik mekim taim yumi autim gutnius bilong Kingdom long ol man, em yumi laik helpim ol man i gat gutpela bel long pilim tru Tok bilong God na ol i tingim dispela save tasol em i samting tru. (Fl 3:8) Tok bilong ol buk na magasin bilong yumi i kam long Baibel na ol i bikpela samting bilong helpim yumi long autim tok bilong Kingdom i go long olgeta hap. Yumi ken tingim buk Stap Oltaim, em i bin helpim planti handet tausen manmeri long mekim wok bilong Jehova, long wanem, ol i bin lainim tok i tru bilong Baibel long rot bilong dispela buk.
2 Taim yumi autim tok yumi no laik tilim tasol ol buk na magasin samting long ol man. Yumi mas autim long gutpela pasin na ol man bai amamas long harim, na yumi mas harim gut ol tok man bilong haus i mekim, na yumi mas redi long “toktok wantaim ol long ol tok i stap long buk bilong God.”—Ap 17:2.
3 Mas Mekim Olsem Wanem? Kirap bilong tok inap opim rot na man bilong haus i ken kamapim tingting bilong em long Baibel na ol hevi i kamap long nau.
Yu ken mekim tok olsem:
◼ “Mipela i kam bilong toktok long as bilong ol hevi i kamap long graun. Long nau planti man i no tingim moa God na ol lo bilong em long Baibel. Dispela i mekim na ol man i no tingim gut ol narapela man. Yu tu yu bin lukim dispela samting i kamap? [Larim man i bekim tok. Yu ken kolim wanpela samting i bin kamap.] Lukim dispela tok long 2 Timoti 3:1-5 i tok wanem long tingting bilong ol man. Yu ting ol man long nau i wankain olsem, o nogat? [Kaunim; larim man i bekim tok.] Yu ting i gat as na yumi ken bilip olsem gutpela samting bai kamap bihain?” Nau yu ken soim piksa long em i stap long pes 12 na 13 bilong buk Stap Oltaim. Sapos ol i no kisim buk yu ken tilim liklik nius Gutpela Sindaun Long Nupela Taim.
4 Sapos wanpela papa o mama i kam long dua, yumi ken kirapim tok olsem:
◼ “Mipela i wok long toktok wantaim ol man i laik save olsem wanem yumi ken stretim ol hevi bilong famili. Yumi save wok strong long stretim, tasol sapos i gat samting bilong helpim yumi long stretim ol dispela hevi, bai yumi amamas long save long dispela, a? [Larim man i bekim tok.] Long Kolosi 3:12-14 Baibel i mekim sampela gutpela tok bilong helpim yumi. [Kaunim.] Olsem na yumi mas mekim wanem samting na famili bilong yumi bai stap gut? Lukim dispela tok i stap long dispela buk long sapta i gat het-tok olsem ‘Bilong Helpim Famili Long i Stap Amamas.’ ” Kaunim paragraf 3 long pes 238 bilong buk Stap Oltaim. Sapos man i gat wok o em i no amamas tumas long harim, tilim wanpela nupela magasin i stori long samting bilong famili o liklik nius Amamas Wantaim Famili Bilong Yu.
5 Yumi no ken lusim tingting long wok yumi mas mekim long autim gut tok bilong Kingdom. (Mt 24:14) Sapos yumi mekim gut wok long Baibel na ol gutpela buk na magasin, yumi ken save Jehova bai blesim yumi long dispela bikpela taim yumi stap long en.—Ga 6:9.
[Ol Askim]
1. Wanem samting yumi laik mekim taim yumi autim gutnius long ol man?
2. Yumi mas autim tok long wanem kain pasin?