Yu Inap Insait Gen Long Wok Painia?
1 Insait long 5-pela yia i go pinis, sampela tausen painia oltaim ol i bin lusim wok painia. Olsem wanem? Yu wanpela bilong ol? Sapos olsem, ating i gat gutpela as na yu bin lusim dispela wok. Ating wanpela hevi i bin kamap em yu no inap stretim. Tasol dispela samting i mekim na yu lusim wok painia, em i stap yet o olsem wanem? Sapos sik i bin kisim yu o yu sot long mani o yu bin mekim sampela wok bilong famili na yu lusim wok painia, olsem wanem? Ol dispela hevi i pinis? Yu inap stretim sampela samting na bai yu inap kisim gen ol blesing bilong wok painia? Yu bin tingting long putim gen aplikesen?
2 Yu save pinis olsem sapos yu laik mekim gut wok painia, yu mas stretim gut ol samting na bihainim gutpela sedyul. Tru, painia i no gat bikpela hap taim bilong kisim malolo na painim gutpela amamas, tasol ating malolo bilong liklik hap taim tasol inap helpim em, winim malolo bilong longpela taim. (Snd 19:17; Ap 20:35) Sapos yu mekim bikpela wok autim tok, dispela bai lukautim yu na bai pasin bilong ol man bilong graun long tingim ol yet tasol na slek long mekim ol samting bai i no inap pulim yu. Jehova i tok promis olsem sapos yu redi long lusim sampela samting bilong yu yet na yu putim ol samting bilong Kingdom i stap namba wan, em bai givim planti gutpela samting bilong spirit long yu. Sapos yu givim bel olgeta long mekim wok bilong Jehova, bai yu stap belgut na amamas tru.—Snd 10:22; Kl 3:23, 24.
3 Olsem wanem? Wok painia i bilong sampela tasol? Nogat. Olgeta Kristen i dediket pinis long bihainim laik bilong Jehova, sapos i no gat samting bilong pasim ol long mekim wok painia, orait, ol i mas tingting gut, ol inap mekim wok painia o olsem wanem.—Mk 12:30.
4 Sapos skin i no strong o ol wok Baibel i tokim yumi long mekim i pasim yumi long mekim wok painia long nau, yu ken bilip olsem Jehova i save long dispela samting na em i tingim yu. Em bai givim gutpela pe long yu sapos yu stap gut long ol samting yu inap mekim. (1 Ko 4:2; 2 Ko 8:12) Tasol sapos nau em gutpela taim long yu ken mekim gen wok painia, go lukim wasman siaman na em i ken givim wanpela aplikesen long yu.
5 Famili Bilong Yu Inap Helpim Yu? Ating yu lusim wok painia, long wanem, yu gat sampela wok bilong famili yu mas mekim. Tasol olsem wanem? Nau ol narapela bilong famili inap helpim yu long mekim dispela wok na bai yu inap mekim gen wok painia? Ating sampela inap mekim gen wok painia sapos ol narapela i helpim ol long mekim ol wok ol i mas mekim.
6 Sapos famili i wok gut wantaim na redi long mekim sampela wok moa, ating bai yu inap. Ating ol i ken helpim yu long mani o yu ken kalap long ka bilong ol, na tu ol i ken makim taim na wok wantaim yu long autim tok long olgeta wik samting. Ating i gat sampela narapela rot tu bilong helpim yu. Sapos ol wok na sindaun bilong yu i mekim na yu no inap kisim gen dispela gutpela wok, ating famili i ken helpim narapela long famili long mekim wok painia.
7 Gutpela sapos famili olgeta i toktok wantaim long dispela samting. Sapos olgeta i wok gut wantaim, ating wanpela bilong ol inap mekim wok painia. Sapos wanpela long famili i kirap mekim wok painia, ating famili olgeta bai pilim olsem ol tu ol i insait long dispela wok. Gutpela pasin ol i mekim bai helpim wok autim tok bilong Kingdom i go bikpela long teritori bilong ol, na helpim famili long pas gut wantaim long ol samting bilong spirit.—Lu 6:38; Fl 2:2-4.
[Ol Askim]
1. (a) Kolim sampela samting i mekim na sampela i bin lusim wok painia? (b) Sapos sampela senis i kamap long i stap bilong ol, bai ol inap mekim wanem?
2. (a) Sapos yu laik mekim gut wok painia, yu mas mekim wanem? (b) Wok painia bai lukautim yumi olsem wanem? (c) Wok painia bai helpim yumi olsem wanem?
3. Husat i mas tingting long mekim wok painia?
4. Sapos sik o sampela wok Baibel i tok yu mas mekim i pasim yu long mekim wok painia long nau, yu mas kisim wanem tingting long dispela samting?
5. Husat moa inap helpim yu long mekim gen wok painia?
6. Famili i ken mekim wanem bilong helpim wanpela bilong ol long mekim wok painia?
7. Sapos famili inap painim rot bilong helpim wanpela bilong ol long mekim wok painia, bai ol i kisim wanem ol blesing?