Long Pasin Sori Helpim Ol Man i Laik Harim Tok
1 Taim ensel bilong Jehova i stiaim disaipel Filip i go lukim man bilong Itiopia i laikim ol tok i tru i stap long Tok Bilong God, long pasin sori Filip i helpim em long kisim as bilong ol tok em i kaunim. (Ap 8:26-39) Olsem wanem? Yumi wok strong long i go helpim ol man i laik harim tok? Yumi mas mekim olsem, long wanem, wok bilong kamapim ol disaipel i insait long dispela wok Jisas i bin givim long yumi. (Mt 28:19, 20) Yumi ken mekim wanem bilong helpim ol?
2 Makim hap taim long olgeta wik bilong mekim ol gobek. Stretim rot bilong i go bek lukim ol man i laik harim tok, na wok long stori moa long ol tok bilong Baibel yu bin toktok wantaim man long en long namba wan taim yu bin lukim em. Tingting long kirapim Baibel-stadi. Go bek oltaim na tokim man long kisim ol nupela Wastaua na Kirap!
3 Sapos namba wan taim yu lukim man yu bin toktok long olsem wanem Baibel inap helpim yumi (sapos yu save long tok Inglis, lukim pes 66 bilong buk “Reasoning”), orait, stori moa olsem:
◼ “Sampela man i ting ol tok bilong Baibel i no inap helpim gut ol man bilong nau. Yu ting olsem wanem? [Larim man i kamapim tingting bilong em.] Tasol sapos wanpela buk i givim gutpela tingting long yumi long rot bilong kamapim amamas insait long famili, ating dispela buk inap helpim tru yumi, a? [Larim man i bekim tok.] Tingting bilong ol man long ol samting famili i mas mekim i save senis, na i no bin helpim gut ol man. Tasol ol famili i bihainim tok bilong Baibel, ol i pas gut wantaim na i stap amamas.” Kaunim Kolosi 3:18-21. Tilim liklik nius I Gat Wanem As na Yu Inap Bilip Tru Long Baibel? na tokim man olsem yumi save stadi wantaim ol man long Baibel, no gat pe.
4 Bilong kirapim tok long man i dai pinis i stap olsem wanem, yu ken tok olsem:
◼ “I gat kain kain tingting long man i dai pinis i stap olsem wanem. Yu ting wanem samting i painim man taim em i dai pinis? [Larim man i bekim tok.] Planti lotu i skulim ol man olsem taim yumi dai, tewel bilong yumi i stap laip yet olsem spirit samting. Planti man i kirap nogut taim ol i save long Baibel i tok wanem long dispela samting. [Kaunim Saveman 9:5.] Tru, ol man i dai pinis ol i no save long wanpela samting, tasol God i no lusim tingting long ol, nogat. God i tok promis long kirapim bek ol na bai ol inap stap laip taim Kingdom bilong em i bosim graun.” Opim buk Stap Oltaim long pes 162 na stori long ol skripsa na piksa. Stretim rot bilong go bek lukim em, na bai yu inap kirapim Baibel-stadi.
5 Sapos yu laik stori moa long tingting bilong ol Kristen long ol lain i insait long pait, yu ken tok olsem:
◼ “Sampela i save ting olsem, pasin bilong pait em tasol i rot bilong stretim ol hevi. Wanem tingting bilong yu? [Larim man i bekim tok.] Baibel i kamapim klia olsem, God i laik bai olgeta manmeri i stap wanbel wantaim. [Kaunim Rom 12:17, 18.] Dispela samting bai kamap tru taim Kingdom bilong God i bosim graun.” Opim buklet Tru God i Save Tingim Yumi? long pes 25-26 na stori liklik. Tokim man yu laik kam bek lukim em na bai yu ken stori olsem bilong wanem Jisas i lainim yumi long beten long God olsem: “Mipela i mas bihainim laik bilong yu long graun olsem ol i save bihainim long heven.”—Mt 6:10.
6 Man bilong Itiopia i toksave olsem em wanpela i no inap kisim gut as bilong ol tok sapos i no gat man bilong helpim em. (Ap 8:31) Long pasin sori Filip i helpim em long ol samting em i no save long en. Sapos yumi helpim ol man olsem Filip i bin mekim, yumi tu bai kamapim klia olsem yumi sori tru long ol narapela.