Tingim Ol Narapela—Namba Wan Hap
1 Yumi amamas long lukim lain bilong Jehova i go bikpela na ol kongrigesen i kamap planti. Long sampela hap, olsem ol biktaun, tupela o tripela kongrigesen i mas bung long wanpela Haus Kingdom. Dispela i mekim na olgeta brata sista i bung long wanpela Haus Kingdom ol i mas tingim gut ol brata bilong ol.
2 Ol kongrigesen wan wan i mas tingim ol brata i kam long Haus Kingdom bihain long ol. Taim miting i pinis, ol i mas stretim gut Haus Kingdom, olsem: lainim gut ol sia, putim ol buk samting bilong tilim i go bek long bokis samting bilong en, na sapos samting bilong ol brata i stap nabaut insait long Haus Kingdom, putim i stap long wanpela hap. Ol i mas stretim gut rum toilet na ples bilong wasim han, na i mas i gat sampela sop i stap, na laplap o pepa bilong klinim han, na toilet-pepa. Ol i mas rausim ol pipia long baket samting bilong en.
3 Taim narapela miting i save kirap kwiktaim bihain long narapela, ol brata sista i bung pastaim ol i mas lusim Haus Kingdom hariap. Sapos ol i bung bung long hap bilong kam insait na toktok i stap, ating dispela inap pasim rot bilong ol brata i laik stretim ol samting bilong miting i kamap bihain. Ating i no gat bikpela hap spes bilong putim ka, olsem na gutpela sapos ol brata i gat ka ol i bihainim pasin sori na lusim Haus Kingdom hariap bambai ol brata i kam long miting bihain i gat spes bilong putim ka bilong ol. Tasol ol brata i kam long miting bihain, nogut ol i kam paslain tumas na pasim rot bilong ol man i laik lusim Haus Kingdom, na planti ka tumas i pulap long hap bilong putim ka.
4 Taim tupela o tripela kongrigesen i bung long wanpela Haus Kingdom, ol i mas wok gut wantaim long stretim rot bilong klinim Haus Kingdom long olgeta wik. Ating ol kongrigesen wan wan i gat taim bilong ol long klinim Haus Kingdom. Long taim bilong kongrigesen bilong yu, kongrigesen i mas klinim gut na mekim kwiktaim; nogut ol narapela kongrigesen i gat tok.
5 Sampela taim ol kongrigesen wan wan i mas senisim taim bilong miting bilong ol, olsem taim wasman sekit i kam lukim ol. Sapos kongrigesen i laik mekim wok long Haus Kingdom long taim narapela kongrigesen i mekim miting bilong ol, orait pastaim tru ol elda i mas toksave long ol narapela kongrigesen na bai kwiktaim ol i ken toksave long ol pablisa bilong ol. Na tu, sapos ol elda i orait long ol brata i mekim sampela wok long Haus Kingdom, olsem mekim Skul Bilong Wok Painia, miting bilong ol elda bilong sekit, tok bilong marit, orait, ol i mas toksave long ol narapela kongrigesen, na ating long wasman sekit tu, na bai ol i no ken mekim sampela wok long Haus Kingdom long wankain taim.
6 I gat sampela kongrigesen i save bung long wanpela Haus Kingdom na ol i bilong ol narapela narapela sekit. Olsem na taim wasman sekit i laik kam lukim kongrigesen, em i mas toksave long narapela wasman sekit long sedyul bilong em. Sapos tupela wasman sekit i makim wankain taim bilong lukim kongrigesen bilong ol, ating dispela inap kamapim sampela hevi na ol i mas hariap senisim sedyul bilong ol taim ol i kamap pinis.
7 Sapos yumi sori long ol narapela na tingim gut ol, na yumi toktok gut wantaim, na wok gut wantaim na stretim gut ol samting pastaim, dispela bai helpim ol kongrigesen long pas gut wantaim na “bihainim stret ol gutpela pasin bilong lotu.”—1 Ko 14:40.