Kingdom Nius Bilong Olgeta Man
1 Long Epril 24 yumi kirap long tilim Kingdom Nius, na long olgeta hap dispela nius i bin kirapim tingting bilong ol man i save tingting planti long ol samting i kamap long graun! Ol tok bilong dispela nius i stret long dispela taim nau i sot pinis. Ol pablisa long olgeta kongrigesen i givim bel tru long helpim dispela wok; ol i laik bai planti tausen manmeri i ken kisim dispela nius. Olsem wanem? Yu laik insait tru long dispela wok?
2 Mipela i salim pinis planti Kingdom Nius i go long olgeta wan wan kongrigesen—50 samting bilong olgeta wan wan pablisa na 250 bilong olgeta wan wan painia. Yu bin tilim hamas? Sapos yu no bin mekim bikpela wok tumas olsem pastaim yu gat tingting long mekim, yu bin tingim sampela samting yu ken mekim na bai yu inap mekim sampela wok moa taim dispela wok i no pinis yet long Me 14? Yu ting yu inap mekim wok painia haptaim? O yu inap bung wantaim grup na autim tok namel long wik, olsem long apinun samting?
3 Ol elda bai skelim gut wok kongrigesen i bin mekim bilong inapim teritori bilong ol. Sapos kongrigesen i no inap wokim olgeta hap teritori bilong ol, ol elda i ken askim sampela kongrigesen klostu long helpim ol. Sapos yumi givim bel tru na ol kongrigesen i wok gut wantaim, bai yumi inap pinisim dispela wok.
4 Ating yu bin kisim bikpela amamas moa yet, long wanem, planti brata sista, na ol nupela pablisa na ol yangpela tu, ol i insait long dispela wok. Mipela laik bai dispela amamas i ken stap yet na kirapim olgeta brata sista long go bek lukim ol man i bin putim gut yau. Wok Kingdom i bin kirapim yumi long raitim gut ol samting long notbuk, olsem nem na atres bilong man i laik harim tok. Laspela hap bilong mun Me em i gutpela taim bilong mekim ol gobek na kirapim ol nupela stadi.
5 Yumi ken tok wanem taim yumi mekim gobek? Yu ken tok: “Taim mi bin kam lukim yu, yu kisim wanpela nius na ating yu bin kaunim na tingim ol tok bilong en. Ol tok bilong dispela nius i bin kirapim planti man long toktok long en, long wanem, dispela nius i stori long ol hevi i painim yumi olgeta long nau.” Kamapim sampela tok i stap long pes 2, na nau kamapim askim: “Yu ting yumi mas mekim wanem na bai yumi redi long ol samting i kamap bihain?” Larim man i bekim tok. Sapos em i amamas long harim tok, stori long sampela narapela tok i stap long pes 2-4 bilong Kingdom Nius, na tokim em yu laik stadi wantaim em long Baibel o yu ken tilim ol nupela magasin.
6 Sapos yu autim tok long teritori bilong narapela kongrigesen, hap pepa yu raitim nem bilong ol man i laik harim tok, givim long kongrigesen i lukautim dispela teritori na bai ol pablisa i ken go bek lukim ol. Na olsem tasol, sapos narapela i askim yu long go bek lukim sampela man, kwiktaim yu mas mekim.
7 Dispela bikpela wok bilong tilim Kingdom Nius i bin kirapim yumi olgeta long mekim sampela wok moa bilong autim tok bilong Kingdom. Yumi ken bilip olsem planti gutpela samting bai kamap long dispela wok; ol man long olgeta hap bai save gut moa long nem bilong Jehova na long ol samting em i laik mekim. (Ais 12:4, 5) Sapos yumi mekim bikpela wok, bai yumi kisim bikpela amamas.—Sng 126:3.