Jehova i Save Givim Strong
1 Yumi lain bilong Jehova i bin kisim wok bilong autim gutnius, na yumi mas “wokabaut stret.” (1 Pi 2:12; Mt 24:14) Tasol yumi stap long taim nogut na yumi save mekim pasin kranki, olsem na yumi no inap mekim dispela wok long strong bilong yumi yet. (2 Ti 3:1-5) Yumi amamas yumi ken askim Jehova long helpim yumi!
2 Aposel Pol i bin sanap strong na karim planti hevi. (2 Ko 11:23-27) Wanem samting i bin helpim em long karim ol dispela hevi na pinisim wok bilong em? Jehova i bin givim “bikpela strong” long em. (2 Ko 4:7) Pol i tok: “[God] i save strongim mi, na long strong bilong em mi inap mekim olgeta samting.” (Fl 4:13) Jehova bai helpim yumi tu olsem. Yumi mas mekim wanem na bai em i ken helpim yumi?
3 Beten Oltaim: Jisas i tok yumi mas ‘wok long askim, na wok long painim samting, na wok long paitim dua,’ na no ken les. (Lu 11:5-10) Sapos yumi wok strong long beten oltaim, Jehova bai save, yumi tingting tru long dispela samting yumi beten long en na yumi laik tru bai Jehova i ken helpim yumi. (Sng 55:17; 88:1, 13; Ro 1:9-11) Pol i save pasin bilong beten oltaim em i bikpela samting, olsem na em i kirapim yumi long “beten oltaim.” (1 Te 5:17) Beten em i wanpela bikpela rot bilong Jehova i ken helpim yumi.
4 Larim Jehova i Soim Rot Long Yumi: Jehova i save bosim yumi long gutpela pasin sori, na taim yumi aninit long em na bihainim ol lo bilong em long ol bikpela samting na ol liklik samting, dispela i helpim yumi. Jehova i bosim lain bilong em long graun long rot bilong “wokboi i gat gutpela tingting.” (Mt 24:45-47) Bilong Jehova i ken mekim gut long yumi, yumi mas wok gut wantaim dispela oganaisesen em lain wokboi i mekim wok long en. (Skelim wantaim Hibru 13:17.) Sapos yumi stap gut long Jehova na redi long mekim wok bilong em, em bai givim strong long yumi long taim stret.—Hi 4:16.
5 Stap Klostu Long Ol Brata: Pasin bilong laikim tru narapela em mak bilong ol disaipel tru bilong Jisas. (Jo 13:34, 35) Pasin na tingting bilong yumi i narapela narapela kain, olsem na hevi inap kamap namel long yumi. Yumi mas marimari long ol narapela na lusim rong bilong ol. (Ef 4:32) Long dispela rot yumi inap stap klostu long ol brata spirit bilong yumi, na taim yumi lukim ol i sanap strong long ol traim, dispela i strongim yumi. Yumi save “ol arapela manmeri bilong God, ol i stap long olgeta hap bilong graun, ol tu i save karim wankain pen olsem [yumi],” olsem na long strong yumi kisim long God yumi inap karim ol wankain hevi.—1 Pi 5:9.
6 Stadi Oltaim: Sapos yumi strongim tingting na bel bilong yumi long ol samting bilong spirit, dispela bai helpim yumi long sakim Satan. (1 Pi 5:8) Na sapos yumi yet i stadi oltaim, dispela bai helpim yumi long kisim sampela save moa long God. Dispela save bai helpim yumi taim hevi i painim yumi. Pol i tok, yumi mas “save long as bilong tok tru” bambai God i ken kisim bek yumi. (1 Ti 2:3, 4) Bikpela samting i olsem: Oltaim yumi mas kisim kaikai bilong spirit.
7 Olgeta samting bilong helpim yumi long stap strong, yumi inap kisim long rot bilong kongrigesen Kristen. Sapos yumi givim bel long helpim ol wok bilong kongrigesen, dispela bai helpim yumi long “wokabaut na [yumi] no inap les.”—Ais 40:29-31.