Wok Yet Long Mekim Tok Tru
1 Ol aposel i tok: ‘Mipela i mas autim tok long olgeta samting mipela i bin lukim na harim.’ (Ap 4:20) Long nau yumi tu i mas wok long autim tok tru. Wok bilong tilim Wastaua na Kirap! em i gutpela rot bilong painim ol man i laik harim tok, tasol sapos yumi laik helpim ol long kisim sampela save moa long tok i tru, yumi mas go bek lukim ol.
2 Taim yu go bek lukim man i kisim “Kirap!” bilong Epril 8 i stori long “Taim i No Gat Pait Moa,” yu ken traim kirapim stadi olsem:
◼ “Taim mi bin kam lukim yu, yumi toktok long ol bikpela pait na ol samting ol lotu i mekim na ol i insait long pait. Olsem wanem? Yu save ol dispela samting i makim olsem yumi stap long taim bilong las de? [Soim buk Save long man. Kaunim paragraf wan bilong sapta 11, na stori long blok long pes 102.] Dispela buk i stori long dispela samting, na i stori tu long 18 ol narapela tok i stap hia long lista. [Soim pes 3.] Mi laik soim yu olsem wanem dispela buk i ken helpim yu long kisim save long ol dispela bikpela tok bilong Baibel.” Tokim em, pe bilong buk em K1.50, na sapos yu inap, kirapim stadi long pes 6.
3 Sapos yu bin stori wantaim ol man long “I Gat Wanem As na Ol Lotu Giaman i Mas Pinis,” taim yu mekim gobek, yu ken tok olsem:
◼ “Taim yu kaunim pinis dispela stori, ating yu kisim save olsem olgeta lotu i no wankain. I gat lotu tru na i gat lotu giaman i stap. Olsem na yumi gat dispela askim: God i laikim lotu bilong husat? Jisas i bekim dispela askim, na buk hia i stori long en.” Opim buk Save long sapta 5, na kaunim paragraf 4, na Jon 4:23, 24 tu. Orait nau kamapim askim, “Yu laik stadi long Baibel, no gat pe?” Sapos man i orait long dispela samting na em i kisim buk long K1.50, opim buk long sapta wan na kirapim stadi.
4 Taim yu go bek lukim man yu ken tok stret yu laik stadi wantaim em, olsem:
◼ “Mipela i save tilim ol nius bilong mipela long olgeta hap bilong graun bilong helpim ol man long kisim save long ol tok bilong Baibel. Sapos ol man i amamas long ol samting ol i lainim, mipela i save askim ol long stadi wantaim mipela long Baibel, no gat pe. [Soim blok long em i stap long baksait bilong Wastaua, ‘Yu Laik Bai Wanpela i Kam Lukim Yu?’] Mipela i save mekim wok long dispela buk, Save i Bringim Man Long Laip Oltaim. Sapos yu laik kisim dispela buk, em K1.50 tasol. Mi laik stori liklik na soim yu long pasin bilong mekim stadi.”
5 Sapos yumi wok long mekim tok tru, yumi ken save, sampela bai harim na bihainim dispela tok.—Mk 4:20.