Redi Long Givim Yumi Yet
1 Ol lain bilong Jehova bai redi long givim ol yet bilong mekim wok; i olsem ol i redi hariap long mekim wok. (Sng 110:3, NW) Tru tumas, dispela tok profet i kamap tru namel long lain brata bilong yumi long olgeta hap bilong graun. Yumi mekim wok autim tok na kamapim ol disaipel, na tu, i gat planti narapela wok yumi ken mekim bilong givim yumi yet long helpim ol narapela.
2 Sampela Rot Bilong Givim Yumi Yet: Ating yumi mas helpim sampela long kongrigesen long go long ol miting. I gutpela sapos yu tokim ol bai yu kisim ol i go wantaim yu. Ating sampela i gat sik o ol i lapun o ol i slip long haus sik. Olsem wanem? Yu inap go lukim ol o painim sampela rot bilong helpim ol? Ating wanpela brata o sista o wanpela famili i mas kisim sampela tok bilong strongim ol. Yu bin tingting long singautim ol kain brata olsem long i kam na sindaun long famili-stadi bilong yu long wan wan taim? Ating wanpela painia o pablisa i laik bai wanpela i poroman wantaim em long wok autim tok. Yu ken tokim em yu laik wok wantaim em. Dispela em sampela rot yumi ken givim yumi yet bilong mekim gutpela pasin long ol wanbilip bilong yumi.—Ga 6:10.
3 Ol brata i ken kamapim klia olsem ol i redi long givim ol yet long mekim ol wok insait long oganaisesen bilong Jehova taim ol i wok strong long winim ol mak bilong kamap elda o wokman. (1 Ti 3:2-10, 12, 13; Ta 1:5-9) Yumi sot tru long ol strongpela brata i gat laik long i go pas long wok autim tok na skulim ol man na lukautim ol kongrigesen.—1 Ti 3:1.
4 Ating sampela bilong yumi i ken redi long mekim bikpela wok moa bilong Jehova, na bilong mekim olsem sampela taim yumi ken insait long wok painia haptaim. Na sapos yumi stretim gut sampela samting long sedyul bilong yumi, ating yumi inap mekim wok painia haptaim long olgeta mun, o ating yumi inap mekim wok painia oltaim. Olsem wanem? Yu inap go long wanpela hap i no gat planti man bilong mekim wok? Sapos olsem, gutpela sapos yu toktok wantaim wasman sekit long tingting bilong yu. Olsem wanem? Yu redi long wok long Betel o helpim wok bilong sanapim ol Haus Kingdom? Yumi amamas tru long ol brata sista i bin givim ol yet bilong mekim ol dispela wok, na ol i bin kisim planti blesing!—Lu 6:38.
5 Long rot bilong spirit bilong em, Jehova i stiaim ol lain bilong em long mekim wanpela bikpela wok long graun! Sapos long rot bilong oganaisesen bilong em, Jehova i singautim yumi long mekim sampela wok moa bilong Kingdom, gutpela yumi ken askim yumi yet olsem, ‘Mi redi yet long givim mi yet bilong mekim wok bilong em?’ Pasin bilong givim bel long God bai kirapim yumi long beten na skelim bel na sindaun bilong yumi bambai yumi ken mekim wok bilong God inap tru long skel bilong yumi. Long dispela rot bai yumi mekim bel bilong Jehova i amamas tru!—Sef 3:17.