Helpim Ol Narapela Long Tingting Long Kisim Laip Oltaim
1 Maski ol man i bin wok strong long painim rot bilong helpim ol man bambai ol no ken i go lapun hariap na skruim sampela yia moa long laip bilong ol, ol i no inap abrusim pasin bilong i go lapun na indai. Yumi amamas tru, long wanem, Baibel i kamapim klia bilong wanem ol man i save go lapun na i dai, na tu, em i kamapim klia olsem wanem ol man bai i no ken i go lapun moa na bai i no gat indai moa. Buk Save i Bringim Man Long Laip Oltaim i stori gut long ol dispela tok i tru. Dispela buk i bekim gut ol askim long i stap na indai bilong ol man, na stiaim tingting bilong man i go long taim Paradais bai kamap bek.
2 Long mun Mas bai yumi tilim buk Save na tingting strong long kirapim ol Baibel-stadi. (Mt 28:19, 20) Na bai yumi mekim gobek long olgeta man i bin amamas long harim tok bilong Kingdom. Long dispela rot, yumi inap kirapim ol narapela long tingting long kisim laip oltaim. (Ta 1:2) Bilong mekim olsem, ating ol tok i stap daunbilo inap helpim yu.
3 Taim yu go lukim man long namba wan taim, ating yu ken mekim dispela askim:
◼ “Olsem wanem? Sampela taim yu bin tingting olsem: Bilong wanem ol manmeri i gat laik long i stap longpela taim moa? [Larim man i bekim tok.] Ol Budis, ol Kristen, ol Hindu, ol Muslim, na ol narapela, olgeta i tingting long i stap laip long narapela hap bihain long ol i dai.” Opim buk Save long sapta 6, “Bilong Wanem Yumi Go Lapun na Yumi Dai?,” na kaunim paragraf 3. Stori gut long ol skripsa i stap long paragraf. Kamapim tupela askim i stap long pinis bilong paragraf na askim man, em i laik save long bekim bilong ol. Sapos em i gat laik, stori long ol tok bilong sampela paragraf moa. Yu kirapim pinis wanpela stadi! Sapos nogat, tilim buk long K1.50 na stretim rot bilong go bek. Gutpela sapos yu mekim wanpela o tupela de bihain na stori long ol bekim bilong tupela askim.
4 Taim yu go bek bilong lukim man i bin kisim buk “Save,” yu ken tok olsem:
◼ “Mi kam bek lukim yu bilong mitupela i ken stori long tupela askim long indai, em yumi no bin kisim bekim bilong ol.” Kamapim gen tupela askim long man. Nau yu ken stori long ol tok i stap long sapta 6, aninit long het-tok “Wanpela Laik Nogut.” Sapos inap, yu ken mekim stadi i go o kamapim askim i stap long pinis bilong paragraf 7 bambai yupela inap stori long en long narapela taim. Makim stret wanpela taim bilong yu go bek. Givim em wanpela pepa bilong singautim ol man i kam long ol miting, na stori liklik long olsem wanem mipela i save mekim ol miting. Long gutpela pasin, singautim em long kam.
5 Taim yu autim tok long ol haus o long kain kain taim na ples, yu inap kirapim tok olsem:
◼ “Olsem wanem? Sampela taim yu bin tingting olsem: Wanem samting bai painim dispela graun na yumi ol manmeri long bihain? [Larim man i bekim tok.] Baibel i kolim wanpela tok tasol bilong makim ol samting bai kamap long bihain—Paradais! Baibel i tok, long pastaim tru God i bin wokim wanpela hap bilong graun i kamap gutpela ples paradais na em i putim tupela man na meri em i bin wokim long dispela ples. Ol i mas kamap planti na i go i stap long olgeta hap bilong graun, na isi isi olgeta hap i ken kamap Paradais. Lukim dispela tok i stori long dispela ples.” Opim buk Save long pes 8, na kaunim paragraf 9, aninit long liklik het-tok “I Stap Bilong Ol Man Long Paradais.” Nau stori long ol tok bilong paragraf 10, na kaunim Aisaia 55:10, 11. Tokim man, yu laik kam bek na stori moa long sindaun bilong ol man long nupela Paradais na stori wantaim em long ol tok bilong paragraf 11-16. O tilim buk na kirapim man long em yet i ken kaunim, na stretim rot bilong bung gen na stori wantaim em.
6 Sapos yu no bin kirapim stadi long namba wan taim, orait yu ken traim long mekim olsem taim yu go bek. Yu ken tok olsem:
◼ “Olsem yumi bin stori long bipo, God i laik bai dispela graun olgeta i kamap Paradais. Dispela i kamapim wanpela askim olsem, Bai yumi gat wanem kain sindaun long Paradais? ” Opim buk Save long sapta 1, na mekim stadi long paragraf 11-16, aninit long liklik het-tok “I Stap Bilong Ol Man Long Paradais i Kamap Bek.” Bihain soim em piksa i stap long pes 4, 5, na askim man sapos em i laik i stap long kain gutpela ples olsem. Nau kaunim namba wan sentens bilong paragraf 17 long pes 10. Sapos inap, yu ken stadi i go moa o yu ken tok olsem taim yu kam bek yu bai stori long ol samting man i mas mekim bilong i stap long dispela Paradais bai kamap bek. Givim em wanpela pepa bilong singautim ol man i kam long ol miting, na stori long taim bilong ol miting, na long gutpela pasin singautim man long i kam long Haus Kingdom.
7 Buk Save em gutpela tul tru bilong tokaut long ol narapela long laip oltaim em God i bin tok promis long en. Taim yu mekim Baibel-stadi wantaim ol manmeri, dispela inap helpim ol long wetim dispela gutpela samting tru em God i as bilong en na “em i no save giaman.”