Askim

◼ Yumi mas stadi long wanem buk wantaim ol nupela man paslain long ol i kisim baptais?

Paslain long man i dediket long Jehova na kisim baptais, em i mas kisim stretpela save. (Jo 17:3) Em bai kisim dispela save taim em i stadi long buklet God i Laik Yumi Mas Mekim Wanem? na buk Save i Bringim Man Long Laip Oltaim. Planti taim ol i mas stadi pastaim long buklet Yumi Mas Mekim Wanem? Tasol sapos ol i kirap stadi pastaim long buk Save, orait ol i mas stadi long buklet Yumi Mas Mekim Wanem? bihain long ol i pinisim buk. Bilong wanem ol i mas mekim olsem?

Buklet Yumi Mas Mekim Wanem? i kamapim ol bikpela tok bilong Baibel. Sapos sumatin i stadi long en pastaim, dispela bai givim tingting long em long ol bikpela samting em i mas mekim bilong amamasim Jehova. Sapos em i stadi long en bihain, dispela em gutpela rivyu bilong ol samting em i lain pinis long en long buk Save. Maski sumatin i stadi long en pastaim o bihain, kirapim em long kaunim ol skripsa i helpim ol dispela tok, na tingim tingim long bel. Stori tu long ol piksa, long wanem, ol piksa i helpim yumi tru long skulim ol man.​—⁠Lukim Wastaua, Janueri 15, 1997, p. 16, 17.

Taim Baibel-stadi i pinisim stadi long buk na buklet, ating em inap bekim ol askim ol elda bai mekim wantaim em bilong em i ken redi long kisim baptais. Sapos olsem, i no gat wok moa long stadi wantaim em long narapela buk, tasol brata o sista i stadi wantaim em i mas tingim gut em na helpim em long kamap strong.​—⁠Lukim Wastaua, Janueri 15, 1996, p. 14, 17.