Mekim Tok Long Taim Stret
1 Olsem wanem? Yu save hatwok long autim tok bilong helpim ol man long kisim laip? Yu save ting olsem yu mas mekim sampela bikpela tok bambai ol man i pilim tru tok bilong yu? Taim Jisas i salim ol disaipel bilong em i go, em i tokim ol: “Yupela go na autim tok olsem, ‘Kingdom bilong heven em i kam klostu pinis.’ ” (Mt 10:7) Dispela tok i no hatwok long autim long ol man. Na i wankain tu long nau.
2 Planti taim yumi mas mekim liklik tok tasol bilong kirapim tok wantaim ol man. Taim Filip i bungim man Itiopia, em i askim em: “Ating yu save long as bilong dispela tok yu ritim, o nogat?” (Ap 8:30) Filip i mekim dispela tok long taim stret na tupela i toktok gut wantaim na gutpela samting i kamap!—Snd 25:11.
3 Yu ken mekim wankain pasin long taim yu autim tok. Olsem wanem yu inap mekim olsem? Yu ken skelim ol samting ol man i save tingting long en na kamapim ol tok i stret long dispela. Mekim wanpela askim na putim yau long bekim bilong en.
4 Sampela Askim: Bilong kirapim tok wantaim man, yu ken traim wanpela bilong ol dispela askim:
◼ “Yu save mekim Beten Bilong Bikpela long taim yu mekim lotu?” (Mt 6:9, 10) Kolim liklik hap bilong dispela beten, na tok: “Sampela man i save askim, ‘Wanem dispela nem bilong God em Jisas i tok yumi mas mekim holi?’ Na sampela i laik save, ‘Wanem dispela Kingdom, Jisas i tok yumi mas beten long en?’ Olsem wanem? Yu bin painim sampela gutpela bekim long ol dispela askim?”
◼ “Sampela taim yu bin tingting: ‘I gat wanem as bilong i stap bilong yumi?’ ” Tokim man, bilong save long dispela yumi mas kisim save long God.—Sav 12:13; Jo 17:3.
◼ “Yu ting i dai inap pinis?” Kamapim tok bilong Aisaia 25:8 na KTH 21:4 bilong bekim gut dispela askim.
◼ “Yu ting i gat rot bilong pinisim ol bikpela hevi i kamap long graun?” Stori olsem God i skulim yumi long “laikim ol [narapela].”—Mt 22:39.
◼ “Yu ting wanpela taim sampela samting i stap long ples antap bai pundaun na bagarapim graun bilong yumi?” Stori long tok promis bilong Baibel olsem graun bai i stap oltaim oltaim.—Sng 104:5.
5 Taim yu autim gutnius, kamapim ol tok i no hatwok tumas, tok stret long ol man, na mekim long gutpela pasin. Maski yu autim liklik “tok” tasol bilong tok i tru long ol man, Jehova bai blesim wok bilong yu.