Yumi Laik Kamapim Wanem Samting?
1 Bilong wanem yumi save mekim ol Baibel-stadi? Bilong givim save long ol man, bilong mekim sindaun bilong ol i kamap gutpela moa, o bilong ol i ken wet long kisim gutpela samting long bihain? Nogat. Nambawan bikpela samting yumi laik kamapim em ol disaipel bilong Jisas Krais! (Mt. 28:19; Ap. 14:21) Olsem na ol man yumi stadi wantaim ol, ol i mas bung wantaim kongrigesen. Sapos ol i ting oganaisesen Kristen em i bikpela samting, ol bai kamap strong long ol samting bilong spirit.
2 Rot Bilong Kamapim Ol Disaipel: Taim stadi i nupela yet, oltaim kirapim em long kam long ol miting bilong kongrigesen. (Hi. 10:24, 25) Tokim em long olsem wanem ol miting bai strongim bilip bilong em, stiaim em long mekim laik bilong God, na em bai inap stap wantaim ol gutpela poroman em ol tu i laik litimapim nem bilong Jehova. (Sng. 27:13; 32:8; 35:18) Taim yu kamapim olsem yu amamas na laikim tru kongrigesen na ol miting, dispela bai kirapim laik bilong em long kam long ol miting.
3 Ol nupela i mas save oganaisesen bilong Jehova em i wanpela bikpela lain brata i stap long olgeta hap. Sapos inap, soim ol video Jehovah’s Witnesses—The Organization Behind the Name na Our Whole Association of Brothers. Helpim ol long save olsem, bilong kamapim laik bilong em, Jehova i save mekim wok long planti milion man i dediket pinis na i stap long olgeta hap. Tokim ol dispela nupela man olsem mipela i laik bai ol tu i kam na lotu long God.—Ais. 2:2, 3.
4 Yumi kisim bikpela amamas tru taim wanpela sumatin bilong Baibel i kamap disaipel tru bilong Jisas. Dispela em samting yumi laik kamapim!—3 Jo. 4.