“Olsem Wanem Mi Inap Painim Taim?”
1 Planti bilong yumi i save mekim dispela tok, long wanem, yumi gat planti samting bilong mekim. Ol man i tok, taim em i wanpela samting i dia tumas long yumi, na tu, em i samting i save pinis hariap. Olsem na olsem wanem yumi inap painim hap taim bilong mekim ol bikpela samting, olsem ritim na stadi long Tok Bilong God?—Fl. 1:10.
2 Bilong yumi gat taim bilong mekim ol samting, i no olsem yumi mas traim painim sampela hap taim moa, nogat; yumi mas skelim yumi laik mekim wanem ol samting long dispela hap taim yumi gat. Yumi olgeta i gat 168 aua long olgeta wik, na yumi lusim inap 100 aua bilong slip na mekim wok. Olsem na yumi ken mekim wanem bambai yumi inap mekim gutpela wok long ol aua i stap yet? Efesus 5:15-17 i tokim yumi long ‘yumi no ken wokabaut olsem man i no gat save. Yumi mas wokabaut olsem man i gat save, na bai yumi gat taim bilong mekim pasin bilong God.’ Dispela i soim olsem long olgeta taim yumi mas painim rot long mekim ol samting Jehova i tok i bikpela samting.
3 Jisas i tok taim bilong yumi i wankain olsem taim bilong Noa. (Lu. 17:26, 27) Ol manmeri long taim bilong Noa i bisi long mekim ol wok samting bilong wan wan de. Tasol Noa i painim hap taim bilong wokim wanpela traipela sip na autim tok. (Hi. 11:7; 2 Pi. 2:5) Olsem wanem em inap mekim? Em i putim laik bilong God i stap namba wan na em i bihainim tok bilong em na “mekim olgeta samting olsem God i tokim em.”—Stt. 6:22.
4 Wanem Samting i Mas i Stap Namba Wan? Jisas i tok: “Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.” (Mt. 4:4) Long olgeta wik yumi kisim ‘kaikai bilong spirit long taim bikman i makim.’ (Lu. 12:42) Bilong mekim olsem, yumi mas i gat sediul bilong ritim na stadi na kisim gut olgeta dispela kaikai bilong spirit bambai em i ken helpim tru yumi. Yumi amamas tru long kaikai bilong spirit, olsem na yumi no ting dispela kaikai i olsem kaikai bilong haus kai samting na yumi kaikai hariap. Pasin bilong amamas tru long dispela gutpela kaikai i kirapim yumi long lusim hap taim bilong stadi na pilim tru ol samting bilong spirit.
5 Pasin bilong kisim kaikai bilong spirit i ken bringim yumi long laip oltaim. (Jo. 17:3) Em i mas i stap namba wan samting long ol narapela samting yumi mas mekim long olgeta de. Olsem wanem? Yumi inap painim hap taim bilong ritim Baibel long olgeta de na redim ol tok bilong ol miting Kristen? Yes, yumi inap mekim olsem. Na taim yumi kisim save na mekim laik bilong God yumi bai kisim ol samting i “gutpela tru.”—Sng. 19:7-11.