Wok Bilong Painim Ol Man i Mekim Narapela Tokples
1. Bilong wanem ol i makim ol teritori bilong kongrigesen i stret long tokples ol i mekim?
1 Long Pentikos 33 C. E., taim ol disaipel bilong Jisas i kisim holi spirit, “ol i stat long mekim kain kain tokples” bilong ol man i kam long olgeta kantri. (Apo. 2:4) Dispela i mekim na 3,000 manmeri i kisim baptais. I luk olsem planti bilong ol inap mekim wanpela tokples, ating tokples Hibru o tokples Grik. Maski i olsem, Jehova i laik bai ol i harim tok bilong Kingdom long tokples bilong ol yet. Taim ol man i harim gutnius long tokples bilong ol yet, ol bai pilim tru long bel. Olsem na long nau, ol teritori we i gat man bilong planti tokples, ol i makim ol dispela teritori bilong ol kongrigesen i mekim ol dispela tokples. (Oganaisesen p. 107, par. 2-3) Ol grup bilong narapela tokples i no gat teritori bilong ol yet, tasol ol i save autim tok long ol teritori bilong kongrigesen i lukautim ol na teritori bilong ol narapela kongrigesen.
2. (a) Wanem hap i gat wok long painim ol man i mekim planti tokples? (b) Olsem wanem ol kongrigesen i ken wok wantaim long ol teritori i gat ol man bilong planti tokples? (c) Sapos yumi bungim wanpela man i save mekim narapela tokples na em i gat laik long harim tok, yumi ken mekim wanem?
2 Sapos yu stap long ples we olgeta man i mekim wanpela tokples, yu inap autim tok long ol. Tasol sapos yu stap long biktaun i gat ol man bilong planti tokples, pasin bilong autim tok long kain hap olsem i narapela kain. Ol narapela kongrigesen i save mekim ol narapela tokples, ol tu bai autim tok long seim teritori olsem kongrigesen bilong yu. Tru, ol narapela kongrigesen bai toksave long kongrigesen bilong yu taim ol i bungim man i mekim tokples bilong yupela, tasol em wok bilong kongrigesen o grup bilong yu long painim ol man i mekim tokples bilong yupela. (Lukim blok “Helpim Narapela Narapela.”) Olsem wanem yupela i ken mekim olsem?
3. Kongrigesen o grup i mas tingim wanem ol samting taim ol i painim ol man? Hamas aua ol i ken lusim bilong mekim dispela wok?
3 Stretim Rot Bilong Painim Ol Man: Olgeta wan wan teritori we i gat ol man bilong planti tokples, ol dispela teritori bai i no wankain, olsem na haptaim yumi lusim bilong painim ol bai i no wankain. Olsem, hamas man i save mekim dispela tokples? Na i gat hamas pablisa i stap long dispela hap? Kongrigesen i save long wanem hap ol man i mekim tokples bilong en i stap long en? Tru kongrigesen i ken painim ol man i mekim tokples bilong kongrigesen long olgeta teritori, tasol ol bai lusim bikpela haptaim moa long ol hap we i gat planti man i stap long en na long ol narapela teritori i no longwe tumas. Olsem na em i bikpela samting long kongrigesen i stretim gut rot long painim ol man i mekim tokples bilong kongrigesen na bai dispela i opim rot bilong planti man i ken kisim save long nem bilong Jehova.—Rom 10:13, 14.
4. (a) Olsem wanem yupela i ken stretim rot bilong painim ol man i mekim narapela tokples? (b) Yupela i ken mekim wanem bilong painim ol man i mekim tokples bilong yupela?
4 Ol elda, moa yet ol wasman autim tok i mas stretim gut ol teritori, na bai ol kongrigesen i ken autim tok long teritori bilong ol yet tasol. (1 Kor. 9:26) Ol elda bilong kongrigesen i lukautim wanpela grup bilong narapela tokples, ol i ken makim wanpela elda o kongrigesen sevan insait long dispela grup long lukautim grup. Planti kongrigesen na grup i mekim wok long telefon buk na Intenet long painim ol nem bilong ol man long tokples bilong ol. Na ol i save ring long ol dispela namba o ol i save go long ples we ol dispela man i stap long en. Ol elda bilong kongrigesen i lukautim wanpela grup bilong narapela tokples, ol i ken stretim rot bilong kongrigesen olgeta i wok wantaim dispela grup sampela taim long painim ol man i mekim tokples bilong dispela grup.—Lukim blok “Olsem Wanem Yu Ken Painim Ol Man i Mekim Tokples Bilong Yu.”
5. (a) Wanem sampela samting ol pablisa i ken mekim bilong painim ol man? (b) Yumi ken tok wanem long ol man yumi bungim?
5 Yumi mas i gat stretpela tingting taim yumi mekim dispela wok. Dispela wok bilong painim ol man i mekim tokples bilong yumi em hap bilong wok autim tok, olsem na yumi mas bilas gut. Planti i luksave olsem taim ol i mekim traim ol tok ol bai autim na ol i mekim dispela tokples long taim ol i raun painim ol man, dispela i helpim ol long givim bel na mekim gut dispela tokples. Yumi ken raitim long ripot hamas aua yumi lusim bilong painim ol man, tasol yumi no ken raitim hamas aua yumi lusim bilong redim ol mep bilong teritori na lista bilong ol nem na atres samting. Taim yumi bungim wanpela i save mekim tokples bilong yumi, yumi mas autim gutnius long em na bihain toksave long wasman bilong autim tok o wanpela em i makim bilong lukautim ol teritori. Yumi ken mekim olsem maski man i harim tok o nogat. Tru wok bilong painim ol man i bikpela samting, tasol yumi mas insait tu long ol narapela wok bilong autim tok.—Lukim blok “Tok Yu Ken Mekim.”
6. Wok bilong painim ol yaupas i gat wanem hatwok bilong en?
6 Wok Bilong Painim Ol Yaupas: Wok bilong painim ol yaupas i gat hatwok bilong en, na tu, yu mas taitim bun long mekim na no ken givap. I hatwok long luksave sapos man i yaupas o nogat, long wanem, ol i gat wankain nem, bilas, na lukluk bilong ol i olsem yumi. Na tu, famili na pren bilong yaupas i no inap tokim pablisa long wanem ol i laik was long em na hevi i no ken painim em. Nau bai yumi stori long sampela rot inap helpim yumi long painim ol yaupas em ol dispela tok i gutpela tu bilong helpim ol pablisa i painim ol man bilong narapela tokples.
7. (a) Yu ken mekim wanem bilong painim ol yaupas long ol haus? (b) Yumi ken mekim wanem na bai man bilong haus i no ken tingting planti long as na yumi wok long painim ol yaupas?
7 Ol tokples Sain kongrigesen na grup i bin bungim ol yaupas long ol haus. Ating yu ken askim man bilong haus sapos em i save long wanpela i stap klostu long haus bilong em, o wanwok, o wanskul i mekim wok long tokples sain. Ating man bilong haus i gat wanpela long famili bilong em i yaupas. Yu mas save olsem sampela bai tingting planti long wanem as na yu laik bungim wanpela yaupas. Tasol yu ken mekim em i stap bel isi long rot bilong mekim gutpela pasin, na stori gut long as na yu kam painim ol yaupas. Sampela pablisa i bin mekim wok long Baibel o ol DVD taim ol i wok long painim ol yaupas. Na ol i tokim man bilong haus olsem ol i laik stori wantaim ol yaupas long ol gutpela samting em Baibel i tok promis long en. Sapos man bilong haus i gat tupela tingting, orait yu ken givim atres o telefon namba bilong yu o pepa bilong singautim yaupas long kam long miting.
8. Olsem wanem wanpela kongrigesen i stap klostu long tokples Sain kongrigesen o grup i ken helpim ol?
8 Ol tokples Sain kongrigesen o grup i ken makim wanpela o tupela de namel long yia na singautim wanpela kongrigesen i stap klostu long ol long kam na wok wantaim ol long painim ol yaupas. Long bung bilong autim tok ol i ken stori long olsem wanem ol bai mekim dispela wok na ol i ken mekim tu wanpela soim. Long ol grup bilong autim tok, ol i ken makim olgeta wan wan pablisa i save long tokples sain long wok wantaim ol narapela pablisa.
9. Yumi ken mekim wanem bilong painim ol yaupas long ol hap we ol i save bung long en o ol hap we ol i save kisim amamas o long ol ples we ol i save go bilong kisim helpim?
9 Yumi ken painim ol yaupas long ol hap we ol i save go bung o ol hap we ol i save kisim amamas o long ol ples we ol i save go bilong kisim helpim. Ol pablisa i mas pasim bilas i stret long ol dispela hap ol i go long en. I gutpela moa long toktok wantaim wanpela o tupela yaupas na i no gutpela long bungim olgeta wantaim na toktok long ol. Sapos ol i amamas long harim tok, orait yumi ken askim ol long atres bilong ol.
10. Olsem wanem ol pablisa i ken painim ol yaupas long ol bisnis teritori?
10 Narapela rot bilong painim ol yaupas em yumi ken redim ol mep bilong ol bisnis teritori na yumi ken go long ol dispela hap long taim i stret long mekim. Yu ken wokim wanpela mep i soim sampela petrol stesin. Long narapela mep yu ken makim ol haus kaikai, liklik stua, restron, hotel, na ol narapela bisnis. Sapos olgeta wan wan mep i soim wankain ol bisnis, orait ol pablisa i ken bihainim wankain pasin bilong painim ol yaupas na bai ol i lain gut long mekim dispela wok. Olsem: Bai i gat ol yaupas i go slip long hotel, olsem na yumi ken stori liklik long wok bilong yumi long man i wok long risepsen bilong hotel, na givim em wanpela envelop i gat DVD bilong tokples sain na pepa bilong singautim ol yaupas i kam long ol miting, na bai em i ken givim long ol yaupas. (Yumi ken lusim tu buklet Harim Tok Bilong God.) Long sampela ples bisnis yumi ken askim sapos i gat sampela wokman ol i yaupas o sampela kastama i save long wokim tokples sain. Sapos i gat skul bilong ol yaupas long teritori, yumi ken givim sampela DVD bilong tokples sain na bai ol i ken putim long laibreri bilong ol.
11. Bilong wanem wok bilong painim ol man i mekim narapela tokples em i bikpela hap bilong wok autim tok?
11 Wanpela Bikpela Wok: Wok bilong painim ol man i mekim tokples bilong yu i gat hatwok bilong en. Na tu, ol man i save muv long wanpela ples i go long narapela ples, olsem na i hatwok long save hamas manmeri i save mekim tokples bilong yu ol i stap long wanpela teritori. Maski i olsem, wok bilong painim ol man i mekim tokples bilong yu em i bikpela hap bilong wok autim tok. Jehova em man i givim yumi wok bilong autim tok, em i no man bilong tingim wanpela lain tasol, nogat. (Apo. 10:34) “Laik bilong em i olsem, em i laik kisim bek olgeta kain man na em i laik bai ol i kisim stretpela save long tok i tru.” (1 Tim. 2:3, 4) Olsem na yumi mas wok wantaim Jehova na ol narapela bratasista long painim ol man bilong olgeta tokples em “bel bilong ol i stretpela na i gutpela.”—Luk 8:15.
[Blok long pes 5]
Helpim Narapela Narapela
Sapos kongrigesen o grup i laik bai ol narapela kongrigesen i helpim ol long painim ol man i mekim tokples bilong ol, orait wasman autim tok bai salim toksave i go long ol narapela kongrigesen i stap klostu long ol. I gutpela long dispela wasman autim tok i toksave tasol long ol kongrigesen i stap klostu long ol o ol kongrigesen we teritori bilong ol i gat planti man i save mekim tokples bilong dispela kongrigesen. Ol elda bilong ol dispela kongrigesen i ken toksave long ol pablisa bilong ol olsem sapos ol i bungim wanpela man i mekim tokples bilong dispela narapela kongrigesen, orait ol i mas raitim atres bilong em na givim long wasman autim tok na em bai givim long dispela kongrigesen o grup. Ol wasman autim tok bilong ol dispela kongrigesen i mas stretim gut ol teritori na bai ol inap painim ol man i save mekim tokples bilong dispela narapela kongrigesen, na ol i ken stiaim ol man i gat laik long harim tok long i go long ol kongrigesen o ol grup i mekim tokples bilong ol.
Sapos ol pablisa i bungim wanpela man i gat laik long harim tok tasol em i gat narapela tokples (o wanpela yaupas), ol i mas pulimapim fom Plis Go Lukim (S-43-MP) na givim long seketeri bilong kongrigesen. Dispela bai opim rot long man i ken kisim save long God.—Lukim km 11/11 p. 5.
[Blok long pes 6]
Olsem Wanem Yu Ken Painim Ol Man i Mekim Tokples Bilong Yu
• Yu ken askim ol narapela, olsem ol Baibel sumatin, ol wanblut, ol wanwok na ol narapela.
• Sekim telefon buk bilong painim ol nem bilong ol man long tokples.
• Painim ol man long ol ples olsem laibreri, ol gavman ofis, na ol skul.
• Sekim ol niuspepa long lukim ol toksave bilong sampela bung bai kamap em ol man i mekim tokples bilong yu i redim.
• Go lukim ol stua na ol bisnis i save helpim lain i mekim tokples bilong yu.
• Yu ken kisim tok orait long putim ol buk na nius insait long stua, o laibreri bilong ol yunivesiti, o ples bilong kisim balus, em ol hap we ol man i save mekim tokples bilong yu i save go long en.
• Yu ken sekim telefon buk i gat atres bilong ol kampani o sekim long Intenet.
[Blok long pes 7]
Tok Yu Ken Mekim
Sapos long gutpela pasin yu toktok wantaim man, dispela bai mekim na em i no pret long toktok wantaim yu. Taim yu bungim man namba 1 taim, i gutpela long soim em ol buk na nius long tokples bilong em.
Taim yu tok gude pinis long man, yu ken tok: “Mipela i wok long painim ol man i mekim tokples ․․․․․ bambai mipela i ken toktok wantaim ol long ol gutpela tok promis bilong Baibel. Yu save long sampela mipela i ken toktok wantaim ol?”
Taim yumi wok long painim ol yaupas, yumi ken tok: “Gude. Mi laik soim yu wanpela samting? [Mekim wok long wanpela DVD pleia na soim DVD bilong tokples sain.] Na tu, mipela i gat ol narapela DVD i stap bilong helpim ol yaupas long kisim ol samting ol i nidim bilong pas gut wantaim God. Yu save long wanpela yaupas i save mekim tokples sain?” Sapos yu nogat DVD pleia, yu ken tok olsem: “Gude, yu save long wanpela yaupas em i save mekim tokples sain?” Sapos man bilong haus i no inap tingim wanpela, orait yumi ken askim em sapos em i save long sampela yaupas long ples wok, o skul, o ol lain i stap klostu long em.