ROT BILONG LUSIM PASIN BILONG HEITIM NARAPELA

2 | No Ken Bekim Rong

Tok Bilong Baibel:

“No ken bekim pasin nogut long man i mekim pasin nogut long yupela. . . . Yupela i mas mekim olgeta samting yupela inap mekim bilong i stap wanbel wantaim olgeta man, . . . yupela i no ken bekim rong man i mekim long yupela, nogat. . . . Rait Holi i tok: ‘Jehova i tok, “Bekim rong, em wok bilong mi; bai mi bekim.”’”—ROM 12:17-19.

Mining Bilong En:

Tru, em nomol long yumi belhat taim wanpela i rongim yumi, tasol God i no orait long pasin bilong bekim rong. Em i tokim yumi long wet bikos klostu nau em bai stretim bek ol pasin i no stret ol man i mekim.—Buk Song 37:7, 10.

Samting Yu Ken Mekim:

Taim ol man i no gutpela olgeta i bekim rong, dispela i save mekim pasin bilong heitim narapela i go bikpela moa. Olsem na sapos wanpela i mekim tok i bagarapim bel bilong yu o mekim nogut long yu, no ken bekim rong. Traim long kontrolim filings bilong yu na mekim ol samting long pasin isi. Sampela taim i gutpela moa long lusim tingting long hevi i kamap. (Provep 19:11) Na sampela taim, i stret long tokaut long hevi i kamap. Olsem, sapos ol raskol i mekim nogut long yu, i stret yu go ripotim dispela long polis o lain i gat namba long stretim kain hevi.

Pasin bilong bekim rong i save mekim hevi i go bikpela

Tasol olsem wanem sapos yu no gat rot long stretim hevi long pasin isi? O olsem wanem sapos yu mekim pinis olgeta samting bilong stretim hevi long pasin isi? No ken bekim rong. Sapos yu bekim rong hevi bai go bikpela. Tasol sapos yu no bekim rong, yu bai helpim long daunim pasin bilong heitim narapela. Yu ken lain long trastim rot God i putim bilong stretim hevi. “Yu mas bilip long em na em bai helpim yu.”—Buk Song 37:3-5.

Ekspiriens—ADRIÁN

Daunim Pasin Bilong Bekim Rong

Taim Adrián i tineja, em i gat pasin bilong pait na heitim tru ol narapela na em i laik bekim rong long ol man i mekim nogut long em. Em i tok: “Planti taim mi pait long gan wantaim ol narapela. Sampela taim, mi save kisim bikpela bagarap long bodi na mi lusim planti blut, tasol ol i larim mi i stap long strit na bai mi ken i dai.”

Adrián i kirap stadi long Baibel taim em i gat 16 krismas. Em i tok: “Taim mi wok long stadi long Baibel, mi luksave olsem mi mas senisim ol pasin bilong mi.” Em i mas lusim pasin bilong heitim ol narapela na pait na bagarapim ol narapela. Em i pilim tru tok em i bin lainim long Rom 12:17-19 long no ken bekim rong. Em i tok: “Mi luksave olsem long taim stret Jehova i makim, em bai pinisim ol pasin nogut. Dispela i strongim mi, na isi isi mi daunim pasin bilong pait.”

Wanpela apinun, wanpela geng bipo Adrián i save pait wantaim ol i bungim em na ol i paitim em. Lida bilong ol i singaut bikmaus olsem: “Bekim pait!” Adrián i tok mi gat strongpela tingting long bekim pait.” Tasol em i no bekim pait, em i mekim sotpela beten long Jehova na lusim dispela hap na go.

Adrián i tok moa: “Long neks de mi bungim lida bilong dispela geng, em wanpela tasol i stap. Mi belhat na mi laik bekim pait, tasol mi mekim gen sotpela beten long Jehova na askim em long helpim mi long bosim gut bel. Mi kirap nogut taim dispela mangi i kam long mi na tok: ‘Fogivim mi long samting mi mekim long asde nait. Mi mas tokaut olsem, mi laik kamap wankain olsem yu. Mi laik stadi long Baibel.’ Mi amamas olsem mi bin bosim belhat bilong mi! Na gutpela samting i kamap, mitupela wantaim i stadi long Baibel.”