Hau Yu Ken Plenim Weding i Givim Ona Long Jehova

1-2. Jehova i gat wanem tingting long ol weding?

OLSEM WANEM? Yu engeij na klostu yu bai marit? Sapos olsem, orait mipela i tok amamas long yu! Ating yu wok long mekim plen long weding bilong yu. Jehova i laik bai marit bilong yu i kamap gut. Na em i laik bai yu amamas long wedinga de bilong yu na stap amamas olsem wanpela marit long bihain tu.—Prov. 5:18; Sol. 3:11.

² I stret long yu givim ona long Jehova long weding bilong yu. Wai na yumi tok olsem? Na hau yu ken mekim olsem? Ol i raitim dispela atikol bilong helpim ol man na meri em ol i gat tingting long marit na ol i wok long plenim weding bilong ol. Tasol ol stiatok bilong en i stret long helpim yumi olgeta long onarim Jehova sapos yumi bai go long wanpela weding o sapos tupela husat i laik marit i askim yumi long lukim ol plen ol i mekim bilong weding bilong ol.

WAI NA YU MAS GIVIM ONA LONG JEHOVA?

3. Taim tupela man na meri Kristen i plenim weding bilong ol, ol i mas tingim wanem samting, na bilong wanem?

³ Man na meri Kristen husat i plenim weding bilong ol, ol i mas mekim ol samting i stret wantaim ol stiatok bilong Jehova i stap long Baibel. Bilong wanem? Long wanem, Jehova em i As bilong marit. Em i bin kamapim fes weding taim em i wokim Iv na givim long Adam bilong maritim. (Stt. 1:28; 2:24) Olsem na tingting bilong God i mas i stap olsem nambawan samting long tingting bilong man na meri husat i wok long plenim weding bilong ol.

4. I gat wanem ol risen na man na meri i laik marit i mas givim ona long Jehova long weding de bilong ol?

⁴ Nambawan risen na yu mas bihainim tingting bilong Jehova long weding de bilong yu em olsem: Em i Papa bilong yu long heven na gutpela Pren bilong yu. (Hib. 12:9) Na yu laik pas gut wantaim em inap oltaim oltaim. Yu no laik bai wanpela samting i kamap long dispela de o long narapela de we i bagarapim bel bilong Pren bilong yu. (Sng. 25:14) Taim yu skelim olgeta samting Jehova i bin mekim long yu na em bai mekim bilong helpim yu, ating yu bai wanbel long tok olsem i stret long yu mas givim ona long em long weding de bilong yu.—Sng. 116:12.

HAU YU KEN GIVIM ONA LONG JEHOVA?

5. Olsem wanem Baibel inap helpim tupela man na meri long plenim weding bilong ol?

⁵ Baibel i no givim lista bilong ol lo em ol Kristen i ken bihainim bilong mekim weding bilong ol o mekim ol bung bilong kaikai i kamap bihain long weding. I gat narapela narapela pasin em wan wan i laik bihainim, i gat ol kastam, na ol i laikim ol stail em ol yet i tingim. Ol man i lotu tru long God ol i save rispektim ol lo em gavman i putim long sait bilong marit. (Mat. 22:21) Maski i olsem, ol weding em ol i mekim we i bihainim ol stiatok bilong Baibel, dispela i save givim ona long Jehova na mekim em i amamas. So yu mas tingim wanem ol stiatok?

6. Bilong wanem man na meri i laik marit i mas bihainim ol lo bilong gavman long sait bilong marit?

⁶ Bihainim ol lo bilong gavman. (Rom 13:​1, 2) Long planti kantri, man na meri i laik marit i mas bihainim ol lo gavman i putim long sait bilong marit paslain long ol i marit. Tupela yet i mas painimaut long ol dispela lo long hap ol i stap long en. Sapos yupela i gat ol askim long hau long mekim olsem, orait askim ol elda long helpim yupela.b

7. Weding i mas kamap olsem wanem kain bung, na bilong wanem?

⁷ Mekim weding i kamap gutpela na i gat pasin rispek long en. (1 Kor. 10:​31, 32) Wok strong na bai weding bilong yupela i kamapim ol pasin bilong holi spirit bilong God na i no pasin bilong ol man bilong dispela graun. (Gal. 5:​19-26) Na olsem Baibel i tok, man em i het bilong famili, olsem na em wok bilong em long mekim ol samting na bai weding i ken kamap olsem taim bilong amamas na i gat pasin rispek long en. Wanem samting i ken helpim em long mekim olsem? Tok bilong Baibel em wanpela brata i mekim long weding bilong ol we i kamapim pasin laikim, pasin bilong tingim ol narapela, na pasin rispek, dispela i save helpim olgeta long odiens long kliagut olsem marit em presen i kam long God. Olgeta long odiens bai kisim helpim long dispela tok na luksave olsem marit em i wanpela bikpela samting. Em as na planti man na meri Kristen i laik marit, ol i save makim Haus Kingdom olsem ples bilong mekim weding bilong ol. Sapos yu laik yusim Haus Kingdom, orait yu mas raitim wanpela pas na salim i go long ol elda sampela haptaim paslain long weding bilong yu.

8. Yu ken mekim wanem long weding risepsen bilong yu na bai dispela i givim ona long Jehova? (Rom 13:13)

⁸ Ritim Rom 13:13. Sapos yu laik mekim weding risepsen bilong yu, orait yu ken mekim wanem na bai dispela bung i no ken kamapim tingting na pasin bilong ol man bilong dispela graun? Tok Grik em ol i tanim olsem “ol pati i gat planti pairap,” i makim ol bung we ol man i dring planti na ol i pilaim ol musik i go inap long biknait tru. (Lukim stadi nout “wild parties,” long Rom 13:13 long Study Bible.) Sapos yu laik tilim alkohol long ol man i kam long bung, orait was gut na bai ol man i no ken dring planti na spak.c Sapos i gat musik, orait putim volium long mak we ol man i ken toktok long narapela narapela na ol i no gat wok long toktok strong. Taim yu makim ol singsing, skelim gut na bai ol musik na ol tok bilong en i no ken pundaunim ol narapela.

9. Tupela i laik marit i ken was gut long wanem ol tok na ol amamas i kamap long risepsen bilong ol?

⁹ Olsem wanem? Sampela bai mekim sampela sotpela tok, soim sampela piksa, ol vidio, o ol narapela samting bilong amamas long en long risepsen bilong yupela? Ol dispela samting i ken mekim dispela de i kamap spesel moa. Tasol skelim gut na bai ol dispela samting i kamap i ken strongim ol narapela. (Fili. 4:8) Askim yu yet: ‘Ol dispela samting bai soim rispek long ol narapela? Em bai rispektim arensmen bilong marit?’ Na bikpela samting moa, askim yu yet: ‘Ol dispela samting bai onarim Jehova?’ Sampela taim, ol tok pilai ol i gutpela samting, tasol sakim ol tok pilai we i no stret, em ol tok pilai we i kirapim ol narapela long tingim maritpasin. (Efe. 5:3) Na sapos ol wanfamili na ol pren i laik mekim sampela sotpela tok, orait ol i mas kliagut na rispektim tingting bilong yutupela.

10. Olsem wanem tupela man na meri i laik marit i ken bihainim gutpela tingting taim ol i plenim weding bilong ol? (1 Jon 2:​15-17)

¹⁰ Bihainim gutpela tingting na abrusim olkain bilas pasin. (Ritim 1 Jon 2:​15-17.) Jehova i save amamas taim ol wokman bilong em i painim ol rot bilong givim ona long em, na ol i no traim long givim biknem long ol yet. So ol Kristen em ol i bihainim gutpela tingting, ol bai abrusim pasin bilong tromoi planti mani na “pasin bilong hambak long mani kago.” Wanem gutpela samting inap kamap sapos weding bilong yu i no gat olkain bilas pasin long en? Ating weding bilong yu bai kamap wankain olsem weding bilong Mike, em wanpela brata long Nowe. Em i tok: “Mipela i no gat planti dinau na mipela i mekim yet wok painia. Weding bilong mipela i bin simpol, tasol em i nais tru na mipela i gat planti naispela memori long en.” Tabitha, em wanpela sista long India, em i tok: “Mipela i abrusim pasin bilong tingting planti long planti samting. Weding bilong mipela i no gat planti bilas pasin long en, olsem na mipela i no lusim bikpela haptaim long plenim ol samting na i no gat planti samting em mipela i no wanbel long en.”

11. Olsem wanem man na meri i laik marit i ken bihainim gutpela tingting long bilas ol i werim? (Lukim tu ol piksa.)

¹¹ Yu makim pinis wanem samting yu bai werim? Ating yu makim pinis klos yu laik werim na yu laik luk nais tru long dispela de. Long taim bilong Baibel, man na meri bilong marit i save tingim tru ol samting ol bai werim long de bilong marit. (Ais. 61:10) Em tru olsem ol samting yu werim long weding de bilong yu ating em bai i no wankain long ol samting yu save werim long ol narapela taim, tasol ol samting yu werim i mas soim pasin rispek na gutpela tingting. (1 Tim. 2:9) No ken larim klos o ol narapela samting bilong skin i stap olsem nambawan bikpela samting long weding de bilong yu.—1 Pita 3:​3, 4.

12. Wai na tupela husat i laik marit i mas sakim ol kastam em Baibel i no as bilong en long hap bilong ol?

¹² Sakim ol kastam em Baibel i no as bilong en. (Rev. 18:4) Planti weding em ol man i mekim long nau i gat ol samting bilong lotu giaman, ol spirit nogut, na ol kastam we Baibel i no orait long en. Jehova i givim tok lukaut long yumi olsem yumi mas stap longwe long ol kain samting i no klin. (2 Kor. 6:​14-17) Sapos i gat sampela kastam o pasin long hap bilong yu we yu gat tupela tingting long en, orait mekim gut wok painimaut long as tru bilong ol na skelim ol stiatok bilong Baibel bilong helpim yu long mekim disisen long wanem ol samting i ken kamap long weding bilong yu.

13. Olsem wanem man na meri i laik marit i ken bihainim tingting bilong Jehova long ol presen ol i kisim?

¹³ Olsem wanem? Em pasin bilong ol manmeri long hap bilong yu long givim presen long tupela nupela marit? Sindaun bilong ol manmeri i narapela narapela, olsem na ol presen ol i givim bai i no wankain. Baibel i kirapim ol Kristen long givim samting long ol narapela na ol i save kisim amamas long mekim olsem. (Prov. 11:25; Apo. 20:35) Tasol yumi no laik bai ol gest bilong yumi i pilim olsem ol i mas givim presen long yumi o yumi no amamas long ol presen ol i givim we i no gat bikpela pe bilong en. Yumi bihainim pasin bilong Jehova, olsem na yumi holim stretpela tingting long ol presen ol narapela i givim taim yumi larim ol i givim ol samting we i stret long sindaun bilong ol na bel i kirapim ol long givim.—2 Kor. 9:7.

ABRUSIM NA DAUNIM OL HATWOK

14. Sampela em ol i laik marit, ol i bungim wanem ol hatwok?

¹⁴ Yu inap bungim ol hatwok taim yu laik plenim weding we i bringim ona long Jehova. Olsem, yu inap pilim hatwok long plenim wanpela simpol weding. Charlie, em i bilong Solomon Ailan, em i tok: “Mipela i hatwok tru long makim husat lain bai mipela invaitim long risepsen. Mipela i gat planti pren na long kalsa bilong mipela, olgeta lain i laik olsem mipela i mas invaitim ol!” Tabitha, em yumi stori pinis long em, em i tok: “Long hap mi stap long en, ol manmeri i save mekim ol bikpela weding risepsen. Sampela haptaim i lus paslain long papamama bilong mipela i ekseptim disisen bilong mipela long invaitim 100 manmeri tasol i kam long risepsen bilong mipela.” Sarah, em i bilong India, em i tok: “Sampela manmeri i save tingim biknem bilong ol long komiuniti na hamas mani ol i gat. Ol kasen bilong mi i bin mekim bikpela weding tru, olsem na mi pilim presa long mekim weding bilong mi i bikpela moa winim bilong ol.” Wanem samting inap helpim yu long daunim ol dispela hatwok na ol narapela hatwok?

15. Wai na em i bikpela samting long yu mas beten paslain long yu plenim weding bilong yu?

¹⁵ Beten planti taim long weding plen bilong yu. Yu ken beten na tokim Jehova long ol hatwok yu bungim na ol filings bilong yu. (Fili. 4:​6, 7 na lukim stadi nout “in everything”) Yu ken askim em long helpim yu long mekim ol gutpela disisen, stap bel isi taim yu tingting planti, na long strongim bel taim yu mas mekim olsem. (1 Pita 5:7) Pasin bilong yu long trastim Jehova bai kamap strong moa taim yu lukim em i helpim yu. Tabitha, em yumi stori pinis long em, em i tok: “Mi na man mi laik maritim, mitupela i tingting planti olsem nogut mipela i no wanbel wantaim narapela narapela, na tu, mipela i no wanbel wantaim ol famili bilong mitupela. Olsem na long olgeta taim mitupela i laik stori long ol weding plen bilong mitupela, mipela i save beten paslain long mipela i mekim olsem. Mipela i pilim tru olsem Jehova i helpim mipela, na mipela i stap bel isi taim mipela i mekim ol plen bilong mipela.”

16-17. Olsem wanem pasin bilong toktok gut inap helpim yu taim yu wok long plenim weding bilong yu?

¹⁶ Toktok gut na kamapim klia ol samting yu tingting long en. (Prov. 15:22) Olsem man na meri i laik marit, yutupela bai mekim planti disisen long ol samting bilong weding bilong yutupela. Olsem, makim det, hamas mani yutupela bai tromoi, na hamas manmeri yupela bai invaitim, na planti narapela samting. Paslain long yupela i mekim wanpela disisen, skelim gen ol tingting yutupela i gat na ol stiatok bilong Baibel we i stret long disisen yutupela i laik mekim na ol edvais em ol narapela strongpela Kristen i givim. Taim yutupela i kamapim ol samting em yupela wan wan i laikim, orait mekim long gutpela pasin, tingim gut tingting bilong narapela narapela, na redi long senisim tingting. Sapos ol wanfamili bilong yutupela, olsem papamama i askim yupela long mekim sampela samting, orait traim bihainim tingting bilong ol. Dispela em spesel bung bilong ol tu. Sapos yutupela i no inap bihainim tingting bilong ol, orait stori gut wantaim ol long dispela. (Kol. 4:6) Tokaut klia long ol wanfamili olsem nambawan samting long dispela bung em olsem ol manmeri i kam long bung i ken amamas na bung i ken givim ona long Jehova.

¹⁷ Planti taim em bai hatwok long toktok wantaim papamama long ol disisen bilong yutupela, moa yet taim ol i no stap long tok i tru, tasol yupela i ken helpim ol long kliagut long tingting bilong yupela. Santhosh, em wanpela brata long India, em i tok: “Ol famili bilong mipela i laik bai mipela i bihainim sampela kastam bilong lotu Hindu. Mi na meri mi bai maritim i lusim longpela haptaim long stori gut long papamama bilong mipela long ol disisen mipela i mekim. Mipela i mekim sampela senis na bai i stret long laik bilong ol na dispela i stret wantaim tingting bilong Jehova tu. Olsem, mipela i senisim menu bilong kaikai long risepsen bilong mipela i go long samting em ol i amamas long en, na mipela i wokim disisen olsem mipela i no inap larim ol man i singsing o danis bikos papamama bilong mipela i no lain long ol dispela samting.”

18. Wanem samting i ken helpim yu na bai ol samting long weding de bilong yu i ken kamap gut? (1 Korin 14:40) (Lukim tu piksa.)

¹⁸ Plenim gut ol samting. Taim yu skelim gut na oganaisim gut ol samting, yu no inap pilim presa tumas long weding de bilong yu. (Ritim 1 Korin 14:40.) Wayne, em wanpela brata long Taiwan, em i tok: “Sampela de paslain long weding de bilong mipela, mipela i mekim liklik miting wantaim ol lain husat i laik volantia long helpim mipela. Mipela i stori long ol arensmen mipela i mekim na mekim prektis long sampela samting bai kamap long de bilong weding na bai ol samting i ron gut.” Long de bilong weding, yu ken rispektim ol gest bilong yu taim yu mekim ol samting long taim stret.

19. Wanem samting i ken helpim yu long kontrolim gut ol samting i kamap long weding risepsen bilong yu?

¹⁹ Yu inap abrusim planti hevi taim yu plenim gut ol samting. (Prov. 22:3) Olsem, sapos yu stap long hap we planti manmeri em yu no singautim, ol i save kam long weding risepsen, orait skelim gut wanem samting yu ken mekim na bai dispela samting i no ken kamap. Tokim ol narapela wanfamili em ol i no Witnes long tingting bilong yu na risen na yu no inap bihainim sampela kastam bilong weding. Yu ken soim ol dispela atikol, “What Happens at a Wedding of Jehovah’s Witnesses?” long jw.org. Bilong kontrolim gut ol samting i kamap, yu ken makim wanpela brata i gat strongpela bilip long stap olsem “man bilong bosim kaikai” long weding risepsen bilong yu. (Jon 2:8) Taim yu kamapim klia ol weding plen bilong yu long em, em inap helpim yu long mekim gut ol samting na bai weding bilong yu i kamap olsem bung i gat rispek long en na i ron gut.

20. Man na meri i laik marit i mas tingim wanem samting long weding bilong ol?

²⁰ Yu inap pilim bikpela presa taim yu skelim olgeta samting yu plenim long weding de bilong yu. Tasol tingim olsem, weding de bilong yu bai kamap long wanpela de tasol. Em fes de we yu na poroman yu laik maritim, yutupela bai kirap long mekim wok bilong Jehova wantaim olsem wanpela marit. Traim bes long mekim weding bilong yu i simpol na i gat pasin rispek long en. Trastim Jehova. Em bai stiaim yutupela na yupela i ken oganaisim gut weding bilong yutupela, na ol yia bihain taim yupela i tingim gen weding de bilong yupela, yutupela bai i gat ol gutpela memori, na yupela i no inap rigret long wanpela samting.—Sng. 37:​3, 4.