Jehova Bai Bekim Ol Beten Bilong Mi?

1-2. Wai na yumi inap pilim olsem Jehova i no bekim ol beten bilong yumi?

“YU MAS amamas long Jehova, na em bai givim yu ol samting yu laikim tru.” (Sng. 37:4) Em naispela promis tru, a? Tasol yu ting yumi mas ekspektim Jehova long givim yumi olgeta samting yumi nidim long dispela taim stret? Wai na yumi ken givim dispela askim long yumi yet? Skelim ol dispela stori. Wanpela singel sista i beten long em i ken go long Skul Bilong Ol Kingdom Evanselis. Tasol sampela yia i lus, na ol i no singautim em yet long i go long skul. Wanpela yangpela brata i gat bikpela sik i beten askim Jehova long helpim em long kamap orait bambai em i ken mekim bikpela wok moa long kongrigesen. Tasol sik bilong em i no pinis hariap. Ol papamama Kristen i beten olsem pikinini bilong ol i mas stap yet insait long tok i tru. Tasol pikinini bilong ol i stop long lotuim Jehova.

² Ating yu tu i bin beten askim Jehova long sampela samting, tasol yu no kisim yet. Dispela i mekim na yu inap kisim tingting olsem Jehova i bekim beten bilong sampela, tasol em i no bekim beten bilong yu. O yu inap kisim tingting olsem ating yu bin mekim wanpela rong. Wanpela sista nem bilong em Janiceb i pilim olsem. Em na man bilong em, tupela i beten bikos ol i gat laik long mekim wok long Betel. Em i tok: “Mi bilip tru olsem ol bai singautim mipela i go hariap long Betel.” Tasol planti mun na yia i go na ol i no singautim tupela long go long Betel. Janice i tok: “Mi wari na tingting planti. Mi tingting olsem mi bin mekim wanem samting na Jehova i no amamas long mi. Mi beten na tokim Jehova stret olsem mi laik go long Betel. Wai na em i no bekim beten bilong mi?”

3. Bai yumi stori long wanem samting long dispela atikol?

³ Sampela taim yumi inap tingting olsem Jehova i save harim ol beten bilong yumi o nogat. Sampela bilipman long bipo tu i holim wankain tingting. (Jop 30:20; Sng. 22:2; Hab. 1:2) Wanem samting i ken strongim yu long bilip tru olsem Jehova bai bekim ol beten bilong yu? (Sng. 65:2) Bilong helpim yumi long bekim dispela askim, pastaim yumi mas kisim bekim bilong ol dispela askim: (1) Yumi laik bai Jehova i mekim wanem? (2) Jehova i laik bai yumi mekim wanem? (3) Wai na yumi mas senisim sampela samting yumi beten long en?

YUMI LAIK BAI JEHOVA I MEKIM WANEM?

4. Olsem Jeremaia 29:12 i kamapim, Jehova i promis long mekim wanem?

⁴ Jehova i promis long harim ol beten bilong yumi. (Ritim Jeremaia 29:12.) God bilong yumi i laikim tru ol gutpela wokman bilong em, so oltaim em bai putim yau long ol beten bilong ol. (Sng. 10:17; 37:28) Tasol dispela i no makim olsem oltaim em bai givim yumi ol samting yumi beten na askim long en. Sampela samting yumi beten na askim long en em yumi mas wet inap long nupela taim bilong kisim bekim bilong en.

5. Jehova i save tingim wanem samting taim em i putim yau long ol beten bilong yumi? Stori long dispela.

⁵ Jehova i tingim hau beten bilong yumi i stret wantaim samting em i tingting pinis long mekim. (Ais. 55:​8, 9) Wanpela hap bilong ol samting em i tingting pinis long mekim em long pulapim graun wantaim ol manmeri em ol i stap amamas na stap wanbel aninit long wok bos bilong em. Tasol Satan i tok olsem ol manmeri bai stap gut sapos ol i bosim ol yet. (Stt. 3:​1-5) Jehova i larim ol manmeri i bosim ol yet bambai em i ken kamapim klia olsem tok bilong Satan em i giaman. Tasol wok bos bilong ol manmeri i kamapim planti hevi em yumi lukim long nau. (Ekl. 8:9) Yumi kliagut olsem Jehova i no inap rausim olgeta dispela hevi long nau yet. Sapos God i bin mekim olsem, sampela inap kisim tingting olsem wok bos bilong ol man i kamapim gutpela samting na inap pinisim hevi bilong ol manmeri.

6. Wai na yumi ken bilip tru olsem oltaim Jehova bai mekim gutpela pasin na pasin i fea?

⁶ Jehova inap bekim ol wankain beten long narapela narapela rot. Taim King Hesekia i bin sik nogut tru, em i beten askim Jehova long helpim em long kamap orait. Na Jehova i bekim beten bilong em na mekim em i kamap orait. (2 Kin. 20:​1-6) Tasol taim aposel Pol i beten strong na askim Jehova long rausim “wanpela nil i sutim skin” bilong em, ating em wanpela sik, Jehova i no rausim dispela hevi long em. (2 Kor. 12:​7-9) Tingim tu stori bilong aposel Jems na aposel Pita. King Herot i laik kilim tupela wantaim i dai. Olsem na kongrigesen i beten long helpim Pita na ating ol i beten tu long Jems. Sori tru, ol i kilim Jems i dai, tasol ensel i kam na helpim Pita long lusim kalabus. (Apo. 12:​1-11) Ating yumi inap tingting olsem, ‘Wai na Jehova i helpim Pita na em i no helpim Jems?’ Baibel i no stori long dispela samting.c Yumi ken save tru olsem “oltaim [Jehova] i save mekim pasin i fea.” (Lo 32:4) Na yumi save tru olsem Jehova i laikim Pita na Jems wantaim. (Rev. 21:14) Sampela taim, Jehova i no inap bekim ol beten bilong yumi long ol rot yumi ting long en. Tasol yumi bilip tru olsem oltaim Jehova bai bekim ol beten bilong yumi long gutpela pasin na pasin i fea, olsem na yumi no gat tupela tingting long wanem rot Jehova i makim bilong bekim ol beten bilong yumi.—Jop 33:13.

7. Yumi mas traim long abrusim wanem kain pasin, na bilong wanem?

⁷ Yumi mas traim long abrusim pasin bilong skelim ol samting i kamap long sindaun bilong yumi wantaim ol narapela. Olsem, ating yumi askim Jehova long helpim yumi long wanpela rot stret, tasol em i no bekim beten bilong yumi. Bihain yumi kisim save olsem wanpela narapela i mekim wankain askim long beten bilong em na i luk olsem Jehova i bekim beten bilong em. Wanpela sista nem bilong em Anna i gat kain ekspiriens olsem. Em i beten olsem man bilong em Matthew i ken kamap orait long sik kensa. Long wankain taim, tupela lapun sista Kristen tu i gat sik kensa. So Anna i beten strong tru bilong helpim Matthew na tupela sista. Tupela sista i kamap orait, tasol Matthew i dai. Pastaim Anna i kisim tingting olsem ating tupela sista i kamap orait bikos Jehova i helpim ol. Sapos olsem, wai na Jehova i no bekim beten bilong em olsem man bilong em i mas kamap orait? Tru tumas, yumi no inap save long risen na tupela sista i kamap orait. Tasol samting yumi save em olsem Jehova i tingting pinis long pinisim olgeta pen na hevi bilong yumi na em i gat laik tru long kirapim bek ol pren bilong em i dai pinis.—Jop 14:15.

8. (a) Olsem Aisaia 43:2 i kamapim, long wanem rot Jehova i sapotim yumi? (b) Olsem wanem beten i ken helpim yumi taim yumi karim ol hevi? (Lukim vidio Beten i Helpim Mipela Long Karim Hevi.)

⁸ Oltaim Jehova bai sapotim yumi. Jehova em gutpela Papa bilong yumi i gat pasin laikim, olsem na em i no laik long lukim yumi karim ol pen na hevi. (Ais. 63:9) Maski i olsem, em i no inap pasim olgeta dispela hevi long painim yumi, em ol i olsem wara i tait na paia i lait. (Ritim Aisaia 43:2.) Tasol em i promis long helpim yumi long winim ol dispela hevi. Na em i no inap larim ol hevi bilong yumi i bagarapim pasin pren bilong yumi wantaim em. Na tu, Jehova bai givim yumi holi spirit bilong em i gat bikpela strong bilong helpim yumi long sanap strong na karim hevi. (Luk 11:13; Fili. 4:13) Long dispela rot, yumi ken bilip tru olsem oltaim yumi bai kisim ol samting yumi nidim bilong helpim yumi long sanap strong na stap gut yet long em.d

JEHOVA I LAIK BAI YUMI MEKIM WANEM?

9. Olsem Jems 1: 6, 7 i kamapim, wai na yumi mas bilip tru olsem Jehova bai helpim yumi?

⁹ Jehova i laik yumi mas trastim em. (Hib. 11:6) Sampela taim yumi inap pilim olsem ol hevi bilong yumi i bikpela tumas olsem wanpela banis i go antap tru. Na ating yumi inap kisim tupela tingting olsem tru tru Jehova bai helpim yumi o nogat. Tasol Baibel i strongim yumi olsem God inap givim strong long yumi na yumi ken “kalapim banis.” (Sng. 18:29) So yumi no ken i gat tupela tingting, nogat, yumi mas bilip strong na beten na trastim tru Jehova olsem em bai bekim ol beten bilong yumi.—Ritim Jems 1:​6, 7.

10. Hau yumi ken mekim samting i stret wantaim beten bilong yumi? Stori long dispela.

¹⁰ Jehova i laik bai yumi mekim samting i stret wantaim ol beten bilong yumi. Olsem, wanpela brata inap beten askim Jehova long helpim em long kisim de-of long wok bilong em bambai em i ken go long wanpela kibung rijinel. Jehova inap bekim beten bilong em olsem wanem? Em inap helpim brata long kisim pasin bilong strongim bel na bai em i ken go lukim bos bilong em. Tasol brata yet i mas go lukim bos bilong em na askim em long dispela samting. Ating em i mas askim planti taim. Na ating brata i ken redi long senisim de bilong wok wantaim narapela wanwok. Na sapos inap, em i ken redi long kisim de-of na bos i ken katim pe bilong em long dispela de.

11. Wai na yumi mas beten planti taim na tokim God long ol wari bilong yumi?

¹¹ Jehova i laik yumi mas beten planti taim na tokim em long ol wari bilong yumi. (1 Tes. 5:17) Long tok Jisas i mekim, em i soim olsem God i no inap bekim sampela beten bilong yumi long taim yumi ting long en. (Luk 11:9) So no ken givap! Beten strong na beten planti taim. (Luk 18:​1-7) Taim yumi beten planti taim long wanpela samting, yumi soim Jehova olsem samting yumi askim em long en em i bikpela samting long yumi. Na yumi soim tu olsem yumi bilip long strong bilong em long helpim yumi.

WAI NA YUMI MAS SENISIM SAMPELA SAMTING YUMI BETEN LONG EN?

12. (a) Yumi mas givim wanem askim long yumi yet long sait bilong beten, na bilong wanem? (b) Yumi ken mekim wanem bilong soim olsem beten bilong yumi i soim rispek long Jehova? (Lukim blok “Ol Beten Bilong Mi i Soim Rispek Long Jehova?”)

¹² Sapos yumi no kisim samting yumi beten na askim long en, i gutpela yumi givim dispela 3-pela askim long yumi yet. Namba 1 askim, ‘Mi beten long rait samting?’ Planti taim yumi save ting olsem yumi save long samting i gutpela bilong helpim yumi. Tasol ating samting yumi beten na askim long en i no inap helpim yumi. Sapos yumi beten na tokim God long wanpela hevi, ating i gat wanpela gutpela rot bilong stretim dispela hevi na i no dispela rot yumi beten na askim God long en. Na ating sampela samting yumi askim long en i no stret wantaim laik bilong Jehova. (1 Jon 5:14) Olsem, tingim beten bilong dispela papamama em yumi kolim long antap. Ol i askim Jehova olsem pikinini bilong ol i mas stap yet insait long tok i tru. I luk olsem em gutpela samting ol i askim long en. Tasol Jehova i no inap subim yumi long lotuim em. Em i laik bai yumi olgeta—na ol pikinini bilong yumi tu—i mas makim olsem yumi laik lotuim em. (Lo 10:​12, 13; 30:​19, 20) So i gutpela long dispela papamama i beten askim Jehova long helpim ol long putim tok i go daun long bel bilong pikinini bilong ol na bai dispela i ken kirapim em long laikim Jehova na kamap pren bilong Em.—Prov. 22:6; Efe. 6:4.

13. Olsem Hibru 4:16 i kamapim, long wanem taim Jehova bai helpim yumi? Stori long dispela.

¹³ Namba 2 askim em, ‘Dispela em taim Jehova i makim bilong bekim beten bilong mi?’ Yumi inap pilim olsem yumi laik kisim hariap bekim bilong ol beten bilong yumi. Tasol Jehova i save long taim stret bilong helpim yumi. (Ritim Hibru 4:16.) Taim yumi no kisim hariap samting em yumi askim long en, dispela inap mekim yumi kisim tingting olsem bekim bilong Jehova em, ‘Nogat.’ Tasol ating bekim bilong God em, ‘I no yet.’ Olsem, tingim dispela yangpela brata husat i beten long God i mas oraitim em long sik bilong em. Sapos Jehova i wokim mirakel na oraitim em, Satan bai tok dispela brata i mekim yet wok bilong Jehova bikos Jehova i bin oraitim em. (Jop 1:​9-11; 2:4) Na tu, Jehova i makim pinis taim bilong stretim olgeta kain sik. (Ais. 33:24; Rev. 21:​3, 4) Na paslain long dispela taim i kamap, yumi no ken ting olsem Jehova bai wokim mirakel na oraitim ol sik bilong yumi. So brata i ken askim Jehova long givim em strong na bel isi bambai em i ken sanap strong na karim hevi bilong sik bilong em na mekim yet wok bilong God.—Sng. 29:11.

14. Yu inap kisim wanem skul long stori bilong Janice?

¹⁴ Tingim stori bilong Janice husat i bin beten bilong em i ken mekim wok long Betel. Inap 5-pela yia i go pinis na em i kliagut long hau Jehova i bekim beten bilong em. Em i tok: “Jehova i yusim dispela haptaim long skulim mi na helpim mi long kisim ol gutpela pasin. Pasin bilong mi long trastim em i mas kamap strong moa. Mi mas mekim pasin bilong mekim ol pesenel stadi i kamap gutpela moa. Na mi mas kisim pasin bilong stap belgut, maski mi mekim wanem wok bilong Jehova.” Bihain ol i singautim Janice na man bilong em long mekim wok sekit. Janice i tingting i go bek, na em i tok: “Jehova i bekim ol beten bilong mi, tasol i no long rot mi ting long en. Sampela haptaim i lus na mi luksave long gutpela samting i kamap long bekim God i givim long beten bilong mi, tasol mi amamas tru olsem mi inap pilim pasin laikim na gutpela pasin bilong em.”

15. Wai na sampela taim yumi no ken askim long wanpela samting stret long beten bilong yumi? (Lukim tu ol piksa.)

¹⁵ Namba 3 askim em, ‘Wai na mi no ken beten long wanpela samting stret?’ Sampela taim em gutpela long beten long wanpela samting stret, tasol sampela taim yumi no ken kolim stret wanpela samting long beten bambai yumi ken luksave long laik bilong Jehova long yumi. Tingim stori bilong dispela singel sista husat i bin beten bambai em i ken go long Skul Bilong Ol Kingdom Evanselis. Em i laik go long dispela skul bambai em i ken go autim tok long hap i sot long ol pablisa. So long haptaim em i wok long beten long go long skul, long wankain taim em i ken beten askim Jehova long helpim em long luksave long ol rot i op bilong em i ken mekim bikpela wok moa bilong autim tok. (Apo. 16:​9, 10) Bihain em i ken mekim samting i stret wantaim beten bilong em long rot bilong askim wasman sekit sapos wanpela kongrigesen i stap klostu i nidim sampela moa painia. O em i ken raitim pas long brens ofis na askim long wanem sampela hap i nidim sampela moa pablisa bilong Kingdom.e

16. Yumi ken bilip tru long wanem samting?

¹⁶ Olsem yumi kisim save pinis, yumi ken bilip tru olsem Jehova bai bekim ol beten bilong yumi long gutpela pasin na pasin i fea. (Sng. 4:3; Ais. 30:18) Sampela taim yumi no inap kisim bekim em yumi gat laik long en. Tasol oltaim Jehova bai harim ol beten bilong yumi. Em i laikim yumi tru. Na em i no inap tru long givim baksait long yumi. (Sng. 9:10) So “oltaim [yumi] mas trastim em” na kamapim olgeta tingting na bel bilong yumi long em long rot bilong beten.—Sng. 62:8.