Ol Yangpela i Laik Save . . .
Mi Ken Mekim Wanem Bilong Kamap Strong Long Spirit?
“Taim mi go long lotu, tingting bilong mi i save paul. Mi no save klia long ol samting ol pris pasto i laik toktok long en, olsem na mi lusim olgeta. Mi no ting bai yumi mas i stap long wanpela lotu samting bilong bilip long God.”—Carrie, em i gat 17 krismas, em i tok olsem.
OL LOTU i mekim wanem na ol yangpela i save les long i go lotu? Long wanpela ripot bilong George Gallup, ol yangpela i tok olsem: ‘Ol tok ol pris pasto i mekim i no save kirapim man.’ ‘Ol i no save lainim ol man long kisim save long God o long kisim save long Baibel.’ ‘Olgeta taim ol i save singaut long mani tasol.’ ‘Olsem na lotu i no helpim ol yangpela man na meri long kamap strong long samting bilong spirit.’
Olsem wanem? Yu laik “ran strong long dispela gutpela resis na bai yu kisim laip i stap gut oltaim oltaim?” (1 Timoti 6:12) Yu laik bai ol narapela i ken litimapim nem bilong yu olsem yu wanpela Kristen i bikpela pinis, na yu inap long lukautim sampela wok samting? Na yu laik kisim bikpela wok Kristen moa na kamap wanpela “wanwok bilong God” long helpim ol narapela long kisim laip i stap oltaim? (1 Korin 3:9) Orait yu mas wok long kamap strong long samting bilong spirit! Taim yu bung wantaim ol Witnes Bilong Jehova, bai yu amamas moa na i winim amamas bilong ol yangpela bilong ol lotu bilong dispela graun ol i kolim Kristen. Bai yu kam long ol miting long wanpela Haus Kingdom; long ol dispela miting ol i save kamapim ol bikpela tok bilong Baibel. Taim papamama i mekim famili-stadi wantaim yu, dispela i kamapim ples klia olsem ol i laikim yu tru. Na oltaim yu poromanim ol manmeri ol i wok strong long bihainim ol lo bilong Baibel long i stap bilong ol. Maski yu kamap strong inap pinis long samting bilong spirit, i gat sampela samting moa yu mas mekim. Olsem aposel Pol i tok, “[yu] mas wok strong tru.” (2 Pita 1:5) Nau yumi ken skelim dispela samting.
Amamas long Kisim Save long Baibel
Jisas i tok: “Ol man i save, ol i stap rabis tru long ol samting bilong God, em ol i ken amamas.” (Matyu 5:3) Olsem wanpela man em i stap rabis tru na em i laik kisim kaikai bilong skin, olsem tasol yu mas laik long kisim kaikai bilong spirit. Jisas i tok: “Na laip bilong i stap gut oltaim em i olsem: Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais.”—Jon 17:3.
Planti yangpela long nau i no save wok strong long painim ol samting bilong spirit. Wanpela buk (The Psychology of Adolescence) i tok long planti yangpela manmeri olsem: ‘Save bilong ol long bilip bilong lotu bilong ol i liklik tumas, tasol ating ol i tingting long lotu na ol i gat bikpela laik long lotu samting.’ Ol i mekim wanpela ripot bilong ol yangpela na ol i givim wan handet askim long ol long Baibel. Planti yangpela ol inap bekim 17 askim tasol. Na long narapela ripot, insait long 10-pela 10-pela yangpela manmeri 7-pela bilong ol i no inap kolim nem bilong 4-pela hap bilong Baibel ol i kolim Gutnius.
Olsem wanem long yu yet? Yu save lusim bikpela hap taim long mekim stadi long Baibel? Yu inap kamapim long ples klia sampela bilip giaman olsem God Triwan, na man i gat tewel? Yu inap kamapim sampela tok bilong Baibel i tok promis long ol gutpela samting bai kamap bihain na sampela man inap i stap laip oltaim long heven, na sampela man inap i stap laip oltaim long graun? Yu inap stori gut olsem long nau yumi stap long “las de,” kirap long 1914 i kam inap nau? (2 Timoti 3:1-5) O ating yu laik bai wanpela i ken helpim yu long kisim save long ol as tok bilong Baibel?—Hibru 5:12.
Sapos i olsem, yu mas “laikim tumas long kisim gutpela susu i kam long God, na i no gat samting nogut i stap long en. Em dispela kain susu i save helpim spirit bilong yupela i kamap bikpela na strongpela long nupela laip God i givim long yupela.” (1 Pita 2:2) Pastaim yu yet yu mas kirap na wok strong long kisim save long Baibel, em Tok Bilong God. Taim yu wok long kisim dispela save, dispela bai kirapim yu long tingim ol samting bilong spirit em i bikpela samting.
Tupela Tingting
Keven em i gat 19 krismas tasol, na em i tok: “Mi no save mi stap olsem wanem long ol samting bilong lotu. Tingting bilong mi i paul olgeta long dispela samting.” Na planti yangpela moa long ol lotu ol i kolim Kristen ol tu i pilim dispela samting. Yu ting dispela kain tingting i ken pasim yu na yu no ken mekim stadi long Baibel na yu no ken kamap bikpela long ol samting bilong spirit?
Yu bilip tru olsem ol lo bilong Baibel em i bikpela samting na yu mas bihainim ol dispela lo bambai yu ken i stap gutpela? O yu pilim olsem yu “mangal long ol samting bilong ol dispela bikhetman”? (Buk Song 73:3) Yu pilim long bel bilong yu olsem nau yumi stap long pinis bilong dispela taim nogut, o yu tingting long kisim wanpela bikpela wok mani bilong helpim i stap bilong yu long dispela laspela taim? Yu bilip tru olsem spirit bilong God i kamapim ol Tok bilong Baibel? O sampela taim yu ting ol tok bilong saiens i tru na i kamapim olsem ol tok bilong Baibel i giaman? Sapos yu gat tupela tingting olsem, orait tingim tok bilong Baibel long Jems 1:6 i tok olsem: “Tasol dispela man i mas bilip tru na i beten long God. Em i no ken lusim bilip liklik na i ting olsem, ‘Ating God bai i givim dispela long mi, o nogat?’ Long wanem, man i gat tupela tingting, em i olsem solwara win i sakim na i kirap nabaut.” Tu, man i gat tupela tingting em i kain olsem wanpela sip i gat planti liklik hul long en. Taim ol bikpela hul i kamap, em nau bai sip i go daun insait long solwara.
Sapos long wan wan taim yu gat ol kain kain tingting olsem i kamap long bel bilong yu, dispela i makim olsem bilip bilong yu i laik “dai,” o olsem wanem? Nogat, a? I no olsem. Sapos yu gat kain tingting olsem, yu mas wok strong long lusim. I kain olsem yu gat tupela tingting long baim ol nupela klos—ating bai yu skelim laplap bilong en i gutpela o nogat, na ol i bin samapim gut o nogat, na tu bai yu skelim pe bilong en pastaim, na bihain yu tingting long baim, a? Olsem tasol, bilong rausim kain tingting i no stret, yu mas skelim gut tok bilong Baibel o yu ken toktok wantaim wanpela Kristen em i bikpela long ol samting bilong spirit. Baibel i tok: “Man i gat gutpela tingting i save wok strong long kisim save long olkain samting.”—Sindaun 15:14.
Makim Ol Samting Bilong Spirit i Stap Nambawan
Aposel Pol em i tokim yangpela man Timoti: “Oltaim yu mas lukautim gut ol dispela wok bilong yu. Yu mas wok hat long mekim olgeta dispela wok i kamap gut, na bai olgeta manmeri i lukim pasin bilong yu yet i kamap gutpela tru.” Pol em i no putim bikpela hevi long Timoti na em i no putim bikpela mak i antap tumas, na bai Timoti i hatwok long winim dispela mak. Nogat. Em i putim ol mak Timoti inap winim, olsem: “Yu mas mekim ol gutpela pasin tasol, bai ol Kristen i ken lukim pasin bilong yu na bihainim. Yu mas mekim gutpela pasin long tok bilong yu na long wokabaut bilong yu na long pasin bilong laikim tru ol arapela na long pasin bilong bilip na long pasin bilong i stap klin tru long ai bilong God.”—1 Timoti 4:12-15.
Taim yu laik putim ol mak yu laik winim, yu mas tingim ol mak yu inap winim, olsem Timoti i bin mekim. I olsem taim yu laik lain long kukim kaikai. Yu no ken ting olsem bai yu kamap nambawan gutpela kuk long wanpela de tasol! Yu no inap. Tasol yu inap mekim taim yu lain na isi isi yu wok long kisim save long ol liklik samting yu mas mekim—ating pastaim bai yu mas lain long redim ol sayor samting na bihain yu inap long kukim ol abus samting, na wokim gutpela sup samting, o wokim kek samting. Olsem na yu mas mekim wankain pasin long winim ol samting yu makim pinis long mekim bilong helpim yu long kamap strong long spirit. Dispela bai helpim yu long save yu kamap strong long spirit o nogat. Taim yu winim wanpela mak, dispela bai kirapim yu moa yet. Na em bai i strongim yu long winim ol narapela mak yu putim pinis.
Winim Ol Mak Yu Putim
Nau yumi ken skelim sampela samting yu inap winim. Olsem wanem, yu kaunim pinis olgeta hap bilong Baibel? Tru, i gat planti liklik hap bilong Baibel, olsem na yu inap makim wanem hap bilong Baibel yu laik kirap long kaunim pastaim, na long dispela rot yu inap kaunim olgeta hap bilong Baibel. (Long Amerika olgeta wanpela wanpela man i save kaikai olsem 630 kilogram kaikai insait long wanpela yia. Tasol husat em inap long kisim dispela skel long wanpela de tasol? Nogat wanpela, a?) Ol manmeri long Beria “ol i gutpela lain manmeri” long wanem olgeta de ol i save kaunim na skelim ol tok i stap long buk bilong God. (Aposel 17:11) Sapos yu makim 15 minit tasol long olgeta wan wan de bilong kaunim Baibel—na maski long lusim dispela hap taim bilong harim ol singsing long redio samting—em nau, long pinis bilong wanpela yia yu kaunim pinis olgeta hap bilong Baibel.
Ating yu laik mekim olsem tu long ol nupela Wastaua na Kirap! i save kamap long olgeta mun. I gat planti gutpela tok i stap long ol dispela nius bilong helpim yu long kamap strong long ol samting bilong spirit. Na sapos yu no kirap long mekim olsem, orait nau yu mas putim olsem wanpela mak yu laik winim na yu ken tingting tu long i go insait long wok autim tok wantaim ol Witnes Bilong Jehova olsem wanpela pablisa i no baptais yet. Olsem na bai yu insait long wok bilong autim tok long ol wan wan haus, na long pinis bilong olgeta mun bai yu putim ripot bilong yu. Bilong yu ken mekim dispela wok, yu ken askim papamama o ol elda long kongrigesen bilong helpim yu.
Wanem ol narapela samting bilong spirit yu inap mekim? Yu ken wok long kisim tingting olsem bilong man i bikpela pinis. (Hibru 5:14) Bihainim ol pasin em spirit holi i save kamapim. (Galesia 5:22, 23) Wok strong long lain long mekim gutpela beten. (Filipai 4:6) Yu mas daun long papamama. (Efesus 6:1) Na yu mas redi long bekim tok long ol man i gat askim long bilip bilong yu. (1 Pita 3:15) Ol dispela samting i no hatwok tumas long mekim na yu inap winim tru ol dispela mak!
Nogut yu tingim ol mak yu laik winim na yu no mekim wanpela samting bilong winim. Yu mas kirap na mekim na yu no ken lusim! Wanpela praim-minista bilong Inglan long bipo, em Benjamin Disraeli, i tok: “Sapos yu bilip strong tru long mekim wanpela samting na yu bihainim bai wok bilong yu i karim gutpela kaikai.” Olsem na yu mas laik long kisim ol kaikai bilong spirit. Tingim gut ol samting bilong spirit yu laik mekim na wok strong long winim dispela mak. Long dispela rot yu bai kamap strong long samting bilong spirit.
[Piksa long pes 17]
Sapos yu makim liklik hap taim bilong kaunim Baibel long olgeta de, em wanpela rot bilong helpim yu long kamap strong long spirit