Olsem Wanem Wanpela Bagarap i Senisim i Stap Bilong Mi

STORI BILONG STANLEY OMBEVA

Long 1982, wanpela ka i spit tru i bamim mi. Ol dokta i stretim mi na i no longtaim na mi mekim gen ol wok bilong mi long olgeta de, maski sampela taim mi kisim pen, long wanem, wanpela liklik raunpela bun namel long nek na bros i lus. Tasol inap 15 yia bihain, wanpela bikpela hevi i traim tru bilip bilong mi.

PASLAIN na bihain long taim mi kisim dispela bagarap, mi gat bikpela strong. Mi mekim planti eksasais, olsem long wiken mi ran inap 10 i go 13 kilomita, pilai skwas, na mekim ol strongpela wok bilong skin. Mi helpim wok bilong sanapim ol Haus Kingdom bilong ol Witnes Bilong Jehova na wanpela bikpela Haus Kibung long Nairobi, Kenya, em hap mi sindaun long en.

Bihain, long 1997, planti taim mi kisim pen long bros na pen i go strong moa. Ol dokta i kisim save olsem wanpela liklik bun long baksait i lus na i sutim ol rop wailis long bun bilong baksait bilong mi. As bilong dispela hevi em dispela eksiden i bin painim mi, olsem pastaim mi stori long en.

Paslain long sik bilong mi i go bikpela, mi bin kisim wanpela wok olsem man bilong salim ol samting. Dispela wok i givim tu helt insurens long famili bilong mi. I luk olsem mi inap kisim planti gutpela samting long wok mani bilong mi. Tasol long Jun 1998, kirap long bros i go daun long ol lek bilong mi i olsem i dai. Isi isi skin bilong mi i go nogut moa.

I no longtaim bihain na ol i rausim mi long wok mani, na mi lus long olgeta gutpela helpim mi bin kisim long wok. Long dispela taim tupela pikinini meri bilong mipela, em Sylvia na Wilhelmina, ol i gat 13 na 10 krismas. Orait, nau mi no gat wok mani moa, olsem na mipela i gat mani tasol em meri bilong mi, Joyce, i kisim long pinis bilong mun. Mipela i tingim dispela nupela sindaun, na mipela i senisim i stap bilong mipela na i no tromoi mani nating long ol samting i no helpim tru mipela. Mipela i gat ol samting mipela i mas i gat.

Bel Hevi

Mi mas tokaut stret olsem, taim mi kisim save long sik bilong mi, mi kisim tingting olsem ol samting i nogut tasol, mi tingim mi yet tasol, na ol kain kain samting i bin skrapim bel bilong mi. Sampela taim mi kros na bel nogut, na mi no amamas long olgeta liklik liklik samting. Long olgeta taim i olsem mi laik kisim bikpela bel hevi. Olgeta long famili i kisim hevi long dispela. Meri bilong mi na ol pikinini meri bilong mipela ol i kisim hatwok tru long dispela na ol i no save gut long ol inap mekim wanem.

Long dispela taim mi ting i stret mi pilim olsem. Skin bilong mi i go patpela hariap. Na mi gat bikpela hevi long ol rop bilong pekpek na mi no inap bosim gut pispis. Mi bin sem nogut tru long dispela. Planti taim mi wanpela i go long wanpela hap, na mi krai nogut tru. Sampela taim mi kros nogut tru. Mi save olsem mi no mekim gutpela pasin bilong karim dispela hevi bilong mi.

Mi wanpela elda long wanpela kongrigesen Kristen bilong ol Witnes Bilong Jehova, olsem na planti taim mi bin givim tok kaunsel long ol wanlotu Kristen bilong mi olsem i no stret long sutim asua long Jehova sapos kain kain hevi i painim yumi. Tasol maski i olsem, nau mi askim mi yet​—⁠na i no wanpela taim tasol​—⁠‘Olsem wanem na Jehova i larim dispela hevi i painim mi?’ Tru mi bin mekim wok long sampela skripsa olsem 1 Korin 10:​13 bilong strongim ol narapela, tasol mi pilim olsem dispela hevi i painim mi i winim strong bilong mi!

Hatwok Tru

I hatwok long painim ol dokta samting bilong helpim mi. Long wanpela de tasol mi bin go long wanpela fisioterapis, wanpela kairoprekta, na wanpela akupanksaris. Sampela taim ol i helpim mi liklik inap sotpela taim. Na tu, mi bin go lukim planti dokta, olsem dokta bilong katim man em bun bilong em i bagarap na dokta i katim man i gat hevi long ol rop wailis. Olgeta i wanbel long wanpela samting: Ol i mas katim mi bambai pen bilong mi i ken go daun liklik na bilong rausim dispela liklik raunpela bun i lus. Mi bilip long ol tok bilong Baibel, olsem na mi tokim ol dispela dokta mi no ken kisim blut maski wanem hevi bai kamap.​​—⁠Aposel 15:​28, 29.

Namba wan dokta bilong katim man i tok em bai katim na opim baksait bilong mi. Em i tokim mi olsem sampela hevi inap kamap long dispela rot. Tasol dispela dokta i no tok promis olsem em bai i no mekim wok long blut. Mi no go bek moa long em.

Namba tu dokta i tok em bai katim mi long hap bilong nek bilong stretim ol bun bilong baksait. Dispela pasin bilong katim man em i toktok long en i krai nogut tru long yau bilong mi. Dokta i orait long mi no laik kisim blut, tasol em i laik katim mi kwiktaim na em i no stori gut long ol samting em bai mekim. Mi no go bek long em tu.

Tasol long rot bilong sampela Witnes Bilong Jehova i wok wantaim Hospital Lieson Komiti long hap bilong mipela, mi painim wanpela dokta i amamas long wok wantaim mi. Namba tri dokta i tok long katim mi long klostu wankain rot olsem dispela namba tu dokta i laik mekim; olsem em i mas katim skin bilong mi long nek. Em i tok, i no gat planti hevi inap kamap long dispela rot.

Taim dokta i soim mi long wanem hap em i laik katim mi, mi pret nogut tru. Em i mas katim mi long ol hap bilong bodi olsem klok na waitlewa, em ol samting i bikpela samting tru, na dispela i pretim mi. Bai mi abrusim bagarap long dispela operesen? Dispela kain tingting i no helpim mi long lusim pasin bilong mi long pret.

Long Novemba 25, 1998, ol dokta i katim mi inap 4-pela aua long wanpela haus sik long Nairobi, na operesen i kamap gutpela. Dokta i rausim tu wanpela hap bilong wanpela bun long hip (pelvic bone). Ol i sapim dispela hap bilong bun na skruim long bun i no stap gut wantaim wanpela plet ain samting. Dispela i helpim mi. Tasol em i no pinisim olgeta hevi bilong mi. Mi gat planti pen yet taim mi wokabaut. Na nau tu planti taim i olsem skin bilong mi i dai.

Gutpela Tingting

Olsem mi tok pinis, inap longpela taim mi bin tingting planti na mi bel nogut long sik bilong mi. Tasol planti dokta na nes i tok amamas long mi, long wanem, mi stap bel isi na mi gat pasin bilong tingting strong olsem ol gutpela samting bai kamap. Bilong wanem ol i ting olsem? Ol i lukim olsem, maski mi gat bikpela pen, mi toktok yet long ol long bilip bilong mi long God.

Maski sampela taim mi kros na bel nogut long hevi bilong mi, mi pas strong yet wantaim Jehova. Long olgeta taim em i helpim mi long karim olgeta hevi bilong mi​​—⁠em i helpim mi gut tru, sampela taim mi pilim sem long dispela. Mi pasim tok strong long ritim na tingim tingim long bel sampela skripsa mi save ol inap mekim gut bel bilong mi. Sampela bilong ol i olsem:

KTH 21:4: “[God] bai i mekim drai wara i stap long ai bilong . . .  ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.” Taim mi tingim tok promis bilong Baibel olsem long nupela taim aiwara na pen bai pinis olgeta, dispela i strongim bel bilong mi.

Hibru 6:​10: “God em i no man nogut, na bai em i lusim tingting long ol gutpela wok yupela i bin mekim. Nogat.” Maski mi gat hevi long skin, mi save olsem Jehova i tingim ol wok bilong em mi save mekim.

Jems 1:​13: “Sapos samting i kirapim bel bilong wanpela man na i pulim em long mekim sin, em i no ken tok, ‘God i pulim mi long mekim dispela pasin.’ Nogat. Sin i no inap pulim God, na God i no save pulim man long mekim sin.” Man, dispela tok i tru olgeta! Tru, Jehova i larim pen na hevi i painim mi, tasol em i no as bilong dispela samting.

Filipai 4:​6, 7: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” Beten i helpim mi long stap bel isi, na dispela i helpim mi long karim hevi bilong mi long gutpela pasin.

Mi bin mekim wok long ol dispela skripsa bilong strongim ol narapela i gat hevi​​—⁠na em i helpim tru ol! Tasol mi kisim save olsem, long dispela taim mi no bin pilim tru bikpela insait bilong en. Mi mas kisim bikpela sik pastaim bilong save long pasin daun na lain long pasin bilong bilip na wetim Jehova.

Ol Narapela Helpim

Planti man i tok ol brata sista Kristen ol i stap olsem strongpela pos bilong helpim yumi long taim bilong hevi. Tasol em i isi tru long yumi no pilim tumas gutpela helpim ol brata Kristen i save givim long yumi! Tru, ol i no inap mekim planti samting bilong helpim yumi, tasol long olgeta taim ol i redi long helpim yumi. Dispela samting i kamap tru long mi. Planti taim ol i stap klostu long bet bilong mi long haus sik, na sampela taim long moningtaim tru. Na ol i laik helpim mi long baim ol dokta. Mi tenkyu tru long olgeta brata sista em ol i pilim hevi bilong mi na i kam helpim mi.

Long kongrigesen bilong mipela, ol Witnes i save olsem nau mi no inap mekim planti samting. Long nau mi mekim wok olsem wasman siaman na mi wok wantaim gutpela lain elda Kristen em ol i save helpim gut mi. I kam inap long nau mi no lusim liklik wok autim tok. Long taim mi bin karim bikpela hevi tru, mi bin helpim tupela man long dediketim laip bilong ol long Jehova. Wanpela i mekim wok nau olsem kongrigesen sevent long wanpela kongrigesen bilong ol Witnes Bilong Jehova long Nairobi.

Mi hatwok yet long painim ol tok bilong tok tenkyu long meri bilong mi, em i bin helpim mi long dispela taim bilong bikpela hevi. Em i no les, maski mi gat pasin bilong belhat, na pasin bilong kros nating na amamas nating, na tingting kranki, na bel hevi bilong mi. Taim mi krai na mi gat pen, em i helpim mi na strongim mi. Inap long nau mi kirap nogut long pasin bilong em long sanap strong na i no larim ol hevi i daunim em. Em i stap tru olsem wanpela “gutpela pren . . . long olgeta taim.”​​—⁠Sindaun 17:⁠17.

Ol pikinini meri bilong mi i lain long karim hevi bilong mi. Ol i mekim olgeta samting ol inap long mekim bilong helpim mi. Ol i save long ol samting mi sot long en na ol i save helpim mi kwiktaim, na ol i save mekim ol samting bambai mi ken stap gut taim mama bilong ol i no stap. Sylvia i kamap olsem “stik wokabaut” bilong mi, na em i helpim mi long wokabaut insait long haus sapos mi no strong tumas.

Olsem wanem long Mina, em laspela pikinini bilong mipela? Mi tingim yet wanpela taim mi pundaun insait long haus na mi no inap sanap gen. Em wanpela tasol i stap long haus. Em i mekim wok long olgeta strong bilong em na em i apim mi na isi isi em i bringim mi i go long rum bilong mi. Inap long nau em i no save long wanem rot em i bin mekim olsem. Dispela samting em i mekim i stap strong yet long tingting bilong mi.

Pasin bilong karim dispela bagarap long skin em i winim olgeta narapela hevi mi bin karim long i stap bilong mi. Em wanpela hevi mi mas karim yet. I no gat narapela samting i bin traim bilip bilong mi olsem dispela hevi. Mi bin kisim bikpela save moa long pasin daun, kisim stretpela tingting, na pilim hevi bilong ol narapela. Mi bilip strong long Jehova na dispela i bin helpim mi long karim dispela hevi.

Mi kisim save long tok tru bilong tok bilong aposel Pol, em i tok: “Gutpela samting tru i stap . . . insait long ol samting nating i no gat strong, olsem ol gutpela mani samting i stap insait long ol sospen graun. Em bilong olgeta man i ken save, dispela bikpela strong ol i lukim em i strong bilong God. Em i no strong bilong mipela.” (2 Korin 4:⁠7) Tok promis bilong God long “nupela skai na nupela graun” i strongim tru mi. (2 Pita 3:​13) Mi beten askim Jehova long karim mi i go long dispela nupela taim, long wanem, mi no strong tumas na mi inap mekim liklik samting tasol long strong bilong mi.

[Ol Piksa long pes 30]

Wok Kristen wantaim famili i helpim mi long stap strong na karim hevi