MAHUNGU LAMANENE HI KU YA HI LUKA

1 Vanhu vo tala va ringete ku hlengeleta ni ku tsala timhaka leti hinkwerhu hi ti tshembaka,+ 2 leti hi runguleriweke tona hi timbhoni+ ni vachumayeri va Rito ra Xikwembu+ ku sukela eku sunguleni, 3 na mina ndzi teke xiboho xa ku ku tsalela tona hi ku landzelelana ka tona, wena muchaviseki Teyofilo,+ hikwalaho ka leswi ndzi lavisiseke timhaka leti hinkwato ku sukela eku sunguleni hi vukheta, 4 leswaku u ta wu twisisa kahle ntiyiso wa timhaka leti u dyondzisiweke tona.+

5 Hi nkarhi wa ku fuma ka Heroda,*+ hosi ya le Yudiya, a ku ri ni muprista loyi a a vuriwa Zakariya, loyi a a ri xirho xa ntlawa wa vaprista lowu a wu vuriwa Abiya.+ Nsati wakwe a a ri Elizabeta ntukulu wa Aroni. 6 Havambirhi a va lulamile emahlweni ka Xikwembu, a va landzela swileriso hinkwaswo ni milawu ya Yehovha.* 7 Kambe a va nga ri na n’wana hikuva Elizabeta a a ri mhika naswona se a va dyuharile.

8 Zakariya a a ri muprista eka ntlawa wa vona+ emahlweni ka Xikwembu, 9 hi ku landza matirhelo* ya ntirho wa vuprista, ku fike nkarhi wa yena wa ku nyikela murhi wo nun’hwela+ etempeleni ya Yehovha.*+ 10 A ku ri ni vanhu vo tala ehandle lava a va ri eku khongeleni loko ku nyikeriwa murhi wo nun’hwela. 11 Ku humelela ntsumi ya Yehovha* eka yena, yi yima etlhelweni ra xinene ra altari ya murhi wo nun’hwela. 12 Hiloko Zakariya a karhateka hikwalaho ka leswi a a swi vona, a sungula ku chava. 13 Kambe ntsumi yi ku eka yena: “U nga chavi Zakariya, hikuva xikombelo xa wena xi twiwile, nsati wa wena Elizabeta u ta ku velekela n’wana, kutani u ta n’wi thya vito ra Yohane.+ 14 U ta tsaka swinene u tlhela u khana naswona vo tala va ta tsaka loko a velekiwa,+ 15 hikuva u ta xiximeka emahlweni ka Yehovha.*+ Kambe a nga fanelanga ku nwa vhinyo kumbe swakunwa leswi nga ni xihoko,+ u ta va ni moya lowo kwetsima a ha ri ekhwirini ra mana wakwe,*+ 16 u ta pfuna vana vo tala va Israyele ku tlhelela eka Yehovha* Xikwembu xa vona.+ 17 Xikwembu xi ta rhumela n’wana wa wena emahlweni ka xona hi moya ni matimba ya Eliya,+ leswaku a ta cinca timbilu ta vatatana ti fana ni ta vana,+ ni ku pfuna lava nga yingisiki ku endla leswinene hi vutlhari, a endla leswaku vanhu va lunghekela ku tirhela Yehovha.”*+

18 Hiloko Zakariya a byela ntsumi a ku: “Xana mhaka leyi yi ta endlekisa ku yini? Hikuva ndzi dyuharile naswona nsati wa mina na yena i mukhegula.” 19 Ntsumi yi n’wi hlamula yi ku: “Hi mina Gabriyele,+ loyi a yimaka emahlweni ka Xikwembu,+ naswona ndzi rhumiwe leswaku ndzi ta ku byela mahungu lawa lamanene. 20 Kambe a wu nge he swi koti ku vulavula ku fikela siku leri swilo leswi swi nga ta endleka ha rona, hikuva a wu ma tshembanga marito ya mina, lama nga ta hetiseka hi nkarhi lowu vekiweke.” 21 Hi nkarhi wolowo vanhu a va ha rindzele Zakariya, naswona va sungule ku hlamala hi leswi a a hlwela ku huma etempeleni. 22 Loko a huma a a nga ha swi koti ku vulavula na vona, a hundzuke mbheveve. A a vulavula na vona hi ku kombetela hi mavoko ntsena, hiloko va swi twisisa leswaku u vone singita* etempeleni. 23 Loko masiku ya ntirho wa yena ma herile, a muka.

24 Endzhaku ka masikunyana Elizabeta nsati wakwe a tika, hiloko a nga humi emutini wakwe ku ringana tin’hweti ta ntlhanu, a ku: 25 “Yehovha* u ndzi katekisile hakunene. U vone xiyimo xa mina, ivi a ndzi susa tingana exikarhi ka vanhu.”+

26 Hi n’hweti ya yena ya vutsevu, Xikwembu xi rhume ntsumi Gabriyele+ eGaleliya emutini lowu vuriwaka Nazareta, 27 yi ya eka nhwana+ loyi a a tshembisane ku tekana ni wanuna loyi a vuriwaka Yosefa wa ndyangu wa Davhida, vito ra nhwana loyi a ku ri Mariya.+ 28 Ntsumi yi fika eka Mariya yi ku: “Xewani, wena loyi a katekisiweke swinene, Yehovha* u na wena.” 29 Kambe a karhateka swinene hi leswi a swi tweke, a tivutisa leswaku i maxewetelo ya muxaka muni lawa. 30 Hiloko ntsumi yi ku: “U nga chavi Mariya, hikuva Xikwembu xi ku katekisile. 31 Vona, u ta tika, u veleka n’wana wa jaha+ kutani u ta n’wi thya vito ra Yesu.+ 32 N’wana loyi u ta xiximeka swinene+ naswona u ta vuriwa N’wana wa La Nga Le Henhlahenhla+ naswona Yehovha* Xikwembu u ta n’wi nyika xiluvelo xa Davhida tata wakwe,+ 33 u ta va Hosi ya ndyangu wa Yakobo hilaha ku nga heriki, Mfumo wakwe wu ta fuma hilaha ku nga heriki.”+

34 Kambe Mariya a vutisa ntsumi, a ku: “Xana leswi swi ta endlekisa ku yini, hikuva a ndzi si tshama ndzi etlela ni wanuna?”+ 35 Ntsumi yi n’wi hlamula yi ku: “Moya lowo kwetsima wu ta va ehenhla ka wena,+ naswona matimba ya La Nge Henhlahenhla ma ta ku funengeta. Hikwalaho ka sweswo, n’wana yoloye u ta kwetsima,+ u ta vuriwa N’wana wa Xikwembu.+ 36 Yingisa, Elizabeta xaka ra wena na yena u tike n’wana wa jaha hambileswi a dyuhaleke naswona vanhu a va vula leswaku a nga veleki, leyi i n’hweti ya yena ya vutsevu; 37 hikuva Xikwembu a xi tsandziwi hi nchumu.”+ 38 Mariya a ku: “Ndzi nandza wa Yehovha!* A swi endleke hilaha u vuleke hakona.” Kutani ntsumi yi famba.

39 Endzhaku ka sweswo hiloko Mariya a suka hi ku hatlisa a ya etikweni ra tintshava, emutini wa Yuda, 40 a fika a nghena ekaya ka Zakariya a xeweta Elizabeta. 41 Loko Elizabeta a twa rito ra Mariya, ricece leri nga ekhwirini rakwe ri tshukatshuka, hiloko Elizabeta a tala hi moya lowo kwetsima, 42 kutani a huwelela a ku: “U katekile exikarhi ka vavasati, naswona Xikwembu a xi katekise n’wana loyi a nga ekhwirini ra wena! 43 Ndzo va mani ku va ndzi endzeriwa hi mana wa Hosi yanga? 44 Loko ndzi twa rito ra wena loko u ndzi xeweta, ricece leri nga ekhwirini ra mina ri tsakile. 45 Nakambe wa tsaka loyi a tshembeke timhaka leti, hikuva swilo hinkwaswo leswi a byeriweke swona hi Yehovha* swi ta endleka.”

46 Kutani Mariya a ku: “Ndzi dzunisa Yehovha,*+ 47 naswona mbilu ya mina ya tsaka swinene hikwalaho ka Muponisi wa mina+ ku nga Xikwembu, 48 hikuva xi langute vusiwana bya mina nandza wa xona.+ Ku sukela sweswi vanhu hinkwavo va ta ndzi vula la tsakeke,+ 49 hikuva Xikwembu xa matimba hinkwawo xi ndzi endlele leswinene, vito ra xona ra kwetsima,+ 50 naswona xi ta va komba tintswalo hinkwavo lava xi chavaka hilaha ku nga heriki.+ 51 Hinkwaswo ka swona xi swi endle hi voko ra xona ra matimba; kasi lava nga ni manyunyu xi va hangalasile.+ 52 Xi wise vavanuna lava nga ni matimba eswiluvelweni,+ xi tlakusa lava titsongahataka;+ 53 lava nga ni ndlala xi va phamele swilo leswinene+ va xurha kasi lava fuweke xi va tlherise va nga ri na nchumu. 54 Xi pfune Israyele nandza wa xona leswaku a tsundzuka musa wa xona+ 55 hilaha xi byeleke vakokwa wa hina, Abrahama ni vana* vakwe+ hilaha ku nga heriki.” 56 Mariya a tshama na yena kwalomu ka tin’hweti tinharhu, kutani a muka.

57 Hiloko ku fika nkarhi wa leswaku Elizabeta a veleka, kutani a veleka n’wana wa jaha. 58 Loko vaakelani ni maxaka yakwe va twa leswaku Yehovha* u n’wi katekisile, va tsaka na yena.+ 59 Hi siku ra vunhungu va ta ku ta yimbisa n’wana,+ naswona a va lava ku n’wi thya vito ra tata wakwe, Zakariya. 60 Kambe mana wakwe a ku: “A swi nge vi tano, vito rakwe ku ta va Yohane.” 61 Hiloko va ku: “A ku na munhu emaxakeni ya wena loyi a vitaniwaka hi vito leri.” 62 Kutani va ya vutisa tata wakwe hi ku n’wi vulavurisa hi mavoko leswaku u lava a thyiwa vito rihi. 63 Hiloko a kombela ribye ra xiphepherhele a tsala eka rona a ku: “Vito rakwe i Yohane.”+ Kutani hinkwavo va hlamala. 64 Loko a heta ku endla sweswo hiloko nomu wakwe wu pfuleka ni ririmi rakwe ri tshunxeka, a sungula ku vulavula,+ a dzunisa Xikwembu. 65 Kutani hinkwavo lava tshamaka endhawini yoleyo va sungula ku chava, va vulavula hi mhaka leyi etikweni hinkwaro ra Yudiya leri nga ni tintshava. 66 Hinkwavo lava swi tweke va tivutisa va ku: “Xana n’wana loyi u ta va yini?” Hikuva Yehovha* a a n’wi seketela hakunene.

67 Hiloko Zakariya tata wakwe a tala hi moya lowo kwetsima, a profeta a ku: 68 “A ku dzunisiwe Yehovha* Xikwembu xa Israyele,+ hikuva u twele vanhu vakwe vusiwana kutani a va ponisa.+ 69 U hi nyike muponisi loyi a nga ni matimba+ loyi a humaka endyangwini wa Davhida nandza wakwe,+ 70 hilaha a vulavuleke hakona hi ku tirhisa vaprofeta va yena vo kwetsima va khale,+ 71 mayelana ni ku ponisiwa ka hina eka valala va hina ni le mavokweni ya hinkwavo lava hi vengaka;+ 72 u ta hi komba musa hilaha a tshembiseke vakokwa wa hina hakona ni ku tsundzuka ntwanano wakwe wo kwetsima,+ 73 ku nga xitshembiso lexi a xi endleke eka Abrahama kokwa wa hina,+ 74 leswaku hi ta n’wi gandzela handle ko chava, endzhaku ka loko a hi ponisile emavokweni ya valala va hina 75 leswaku hi ta tshembeka eka yena hi endla leswi lulameke vutomi bya hina hinkwabyo. 76 Kambe loko ku ri wena n’wananga, u ta vuriwa muprofeta wa Xikwembu Lexi Nge Henhlahenhla, hikuva Yehovha* u ta rhuma wena ku sungula leswaku u ya lunghisa tindlela takwe,+ 77 leswaku a ta dyondzisa vanhu vakwe hi ku ponisiwa swin’we ni ku rivaleriwa ka swidyoho swa vona,+ 78 hikwalaho ka ntwelavusiwana wa Xikwembu xa hina. Hi ta vona ku vonakala loku humaka etilweni ku voninga ku kota nhlikanhi, 79 ku voningela lava tshamaka emunyameni ni le ndzhutini wa rifu,+ ni ku hi komba leswi hi nga swi endlaka leswaku hi va ni ku rhula.”

80 Yohane a kula a tlhela a va ni matimba naswona u tshame emananga ku fikela siku leri a humeleleke ha rona eka Vaisrayele.

2 Emasikwini wolawo Khezari Awugusto a lerisa vaaki va misava hinkwayo leswaku va ya tsarisiwa. 2 (Loku a ku ri ku tsarisiwa ko sungula hi nkarhi lowu Kwirino a a ri ndhunankulu ya le Siriya.) 3 Vanhu hinkwavo va ya va ya tsarisiwa laha va tswaleriweke kona. 4 Yosefa+ na yena a suka eGaleliya, emutini wa Nazareta, a ya eYudiya, emutini wa Davhida lowu vuriwaka Betlehema,+ hikwalaho ka leswi a a ri xirho xa ndyangu wa Davhida. 5 U yile a ya tsarisiwa swin’we na Mariya, loyi a a tekane na yena+ hilaha a tshembiseke hakona naswona a a ri kusuhi ni ku veleka.+ 6 Loko va ri kwalaho, nkarhi wa yena wa ku veleka wu fika. 7 Kutani a veleka n’wana wa jaha, mativula yakwe,+ a n’wi phutsela hi malapi ivi a n’wi lata exidyelweni,+ hikuva ndhawu ya vaendzi a yi tele.

8 Endhawini yoleyo a ku ri ni varisi lava a va tshama ehandle ka muti, va rindza mintlhambi ya vona nivusiku. 9 Hi xitshuketa, ntsumi ya Yehovha* yi yima emahlweni ka vona, va voningeriwa hi ku vangama ka Yehovha* kutani va sungula ku chava swinene. 10 Kambe ntsumi yi ku eka vona: “Mi nga chavi, yingisani, ndzi mi byela mahungu lamanene lama nga ta tisa ntsako lowukulu eka vanhu hinkwavo. 11 Hikuva namuntlha mi velekeriwe muponisi+ emutini wa Davhida,+ loyi a nga Kreste Hosi.+ 12 Xikombiso xa n’wina hi lexi: Mi ta kuma n’wana a phutseriwe hi malapi, a latiwe exidyelweni.” 13 Hi ku hatlisa ku humelela tintsumi tin’wana to tala ti yima ni ntsumi leyi,+ ti dzunisa Xikwembu ti ku: 14 “Dzunisani Xikwembu lexi nga ematilweni, naswona lava xi va rhandzaka emisaveni va ta va ni ku rhula.”

15 Loko tintsumi ti tlhelele etilweni, varisi va sungula ku kanerisana va ku: “A hi yeni eBetlehema, hi ya vona leswi nga endleka hilaha Yehovha* a hi tiviseke hakona.” 16 Hiloko va hatlisa va ya kona kutani va kuma Mariya, Yosefa ni n’wana a latiwe exidyelweni. 17 Loko va swi vonisa xisweswo, va byela vanhu leswi ntsumi yi va byeleke swona hi n’wana loyi. 18 Hinkwavo lava va swi tweke va hlamala ku twa leswi vuriwaka hi varisi, 19 kambe Mariya a hlayisa marito lawa hinkwawo, a anakanyisisa hi leswi ma vulaka swona.+ 20 Kutani varisi va tlhelela laha mintlhambi ya vona a yi ri kona, va ri karhi va vangamisa ni ku dzunisa Xikwembu hikwalaho ka hinkwaswo leswi va swi tweke ni ku swi vona, hilaha va byeriweke hakona.

21 Endzhaku ka masiku ya nhungu, hi nkarhi wa leswaku a yimbisiwa,+ u thyiwe vito ra Yesu, ku nga vito leri vuriweke hi ntsumi, mana wakwe a nga si tika.+

22 Nakambe, loko ku fika nkarhi wa ku basisiwa hi ku landza Nawu wa Muxe,+ va n’wi yise eYerusalema leswaku va ta n’wi nyikela eka Yehovha,* 23 hilaha swi tsariweke hakona eNawini wa Yehovha:* “N’wana un’wana ni un’wana wa xinuna loyi a nga mativula u fanele ku nyikeriwa eka Yehovha.”*+ 24 Va humesa magandzelo ku ya hi leswi vuriweke eNawini wa Yehovha:* “magugurhwana* mambirhi kumbe swituvana swimbirhi.”+

25 A ku ri ni wanuna loyi a a vuriwa Simiyoni eYerusalema, a a lulamile naswona a a chava Xikwembu, a a rindzele nkarhi lowu Vaisrayele va nga ta chaveleriwa ha wona+ naswona a a ri ni moya lowo kwetsima. 26 Nakambe Xikwembu a xi n’wi byerile hi ku tirhisa moya lowo kwetsima leswaku a nge fi a nga si vona Kreste wa Yehovha.* 27 Moya lowo kwetsima wu n’wi yisa etempeleni, hi nkarhi lowu vatswari va Yesu a va te na Yesu ku ta endla leswi Nawu a wu lava swona,+ 28 a tlakula n’wana a dzunisa Xikwembu, a ku: 29 “Wena, Hosi Leyi Tlakukeke, tshika nandza wa wena a fa hi ku rhula+ hilaha u vuleke hakona, 30 hikuva se ndzi vone loyi u nga ta n’wi tirhisa ku ponisa+ 31 loyi u n’wi nyikeleke leswaku a ta voniwa hi vanhu hinkwavo,+ 32 hi yena ku vonakala+ loku nga ta susa munyama ematihlweni ya vamatiko,+ vanhu va wena ku nga Vaisrayele va ta dzunisiwa hikwalaho ka yena.” 33 Kutani tata wakwe ni mana wakwe va hlamarisiwa hi leswi a swi vuriwa hi yena. 34 Simiyoni a va katekisa a tlhela a byela Mariya mana wa n’wana a ku: “Waswivo! N’wana loyi u hlawuriwe ku wisa+ ni ku pfuxa vo tala eIsrayele+ ni ku va xikombiso lexi nga ta landzuriwa+ 35 (kambe wena u ta tlhaviwa hi tlhari ro leha),+ leswaku ku ta paluxiwa leswi nga etimbilwini ta vanhu.”

36 A ku ri na Ana n’wana wa Fanuwele, wa nyimba ya Axere, loyi a ri muprofeta wa xisati. Wansati loyi a a dyuharile, kasi endzhaku ka loko va tekanile ni nuna wakwe va tshame malembe ya nkombo, 37 se a a ri noni leyi nga ni malembe ya 84. A a nga kali etempeleni, a a endla ntirho wo kwetsima vusiku ni nhlikanhi a ri karhi a titsona swakudya, a tlhela a khongela. 38 Hi nkarhi wolowo u tile a sungula ku khensa Xikwembu ni ku vulavula hi n’wana eka hinkwavo lava a va rindzele ku ponisiwa ka Yerusalema.+

39 Loko va endle hinkwaswo hi ku ya hi Nawu wa Yehovha,*+ va tlhelela eGaleliya emutini wa ka vona wa Nazareta.+ 40 Kutani n’wana a kula a va ni matimba ni vutlhari, naswona Xikwembu a xi n’wi rhandza.+

41 Vatswari va yena a va tolovele ku ya eYerusalema lembe ni lembe enkhubyeni wa Paseka.+ 42 Kutani loko a ri ni malembe ya 12, va ya eYerusalema hilaha a va tolovele ku endla hakona.+ 43 Loko nkhuvo wu herile va tlhelela ekaya, kambe Yesu a sala eYerusalema naswona vatswari vakwe a va swi lemukanga. 44 Leswi a va ehleketa leswaku a a ri exikarhi ka ntlawa lowu a va muka na wona, va fambe siku hinkwaro kutani va sungula ku famba va n’wi lava exikarhi ka maxaka ni lava a va tolovelane na vona. 45 Kambe loko va nga n’wi kumi, va tlhelele eYerusalema va ya n’wi lava kona. 46 Va n’wi kuma etempeleni endzhaku ka masiku manharhu a tshame exikarhi ka vadyondzisi, a ri ku va yingiseleni ni ku va vutisa swivutiso. 47 Hinkwavo lava a va n’wi yingiserile a va ri eku hlamaleni hikwalaho ka ku twisisa kakwe ni tinhlamulo takwe.+ 48 Loko vatswari vakwe va n’wi vona va hlamarile, mana wakwe a ku: “N’wananga, hikwalaho ka yini u hi endle leswi? Mina ni tata wa wena hi fambe hi ku lava hinkwako.” 49 Kambe a va hlamula, a ku: “Hikwalaho ka yini mi fambe mi ndzi lava? Xana a mi nga swi tivi leswaku ndzi fanele ku va endlwini ya Tatana?”+ 50 Kambe a va swi twisisanga leswi a a va byela swona.

51 Hiloko a muka na vona eNazareta, naswona a ya emahlweni a va yingisa.+ Kasi mana wakwe u swi hlayise hi vukheta leswi a swi vuleke.+ 52 Kutani Yesu a ya a kula, a tlhela a va ni vutlhari, a rhandziwa hi Xikwembu ni vanhu.

3 Hi lembe ra vu-15 ra ku fuma ka Tiberiyo Khezari, loko Pontiyo Pilato a ri ndhunankulu ya le Yudiya, Heroda*+ a ri ndhuna ya muganga wa Galeliya, Filipi makwavo a ri ndhuna ya muganga wa tiko ra Ituriya na Trakonita naswona Lisaniya a ri ndhuna ya muganga wa Abilene, 2 emasikwini ya muprista lonkulu Anasi na Kayafasi,+ Xikwembu xi vulavule na Yohane+ n’wana wa Zakariya emananga.+

3 Kutani a ya etikweni hinkwaro ekusuhi na Yordani, a chumayela vanhu leswaku va hundzuka va khuvuriwa leswaku va ta rivaleriwa swidyoho,+ 4 hilaha swi tsariweke hakona ebukwini ya muprofeta Esaya loko a ku: “Rito ra loyi a huwelelaka emananga ri ri: ‘Lunghisani ndlela ya Yehovha!* Basisani tindlela takwe.+ 5 Minkova hinkwayo yi fanele yi seleteriwa, tintshava hinkwato ni swintshabyana swi levheriwa; tindlela leti gombonyokeke ti fanele ti ololoka, tindlela leti nga ni swigodi ti lunghisiwa; 6 kutani vanhu hinkwavo va ta vona ndlela leyi Xikwembu xi ponisaka ha yona.’”+

7 Hiloko a byela mintshungu leyi a yi ya eka yena leswaku yi ta khuvuriwa a ku: “N’wina vana va timhiri,* i mani la nga mi lemukisa leswaku mi balekela vukarhi bya siku ra Xikwembu?+ 8 Hikwalaho, mitirho ya n’wina a yi kombise leswaku mi hundzukile. Mi nga tibyeli mi ku, ‘Tata wa hina i Abrahama.’ Ndza mi byela, Xikwembu xi nga vumbela Abrahama vana hi maribye lawa. 9 Hakunene xihloka se xi lunghekele ku tsema timitsu ta mirhi. Kutani murhi wun’wana ni wun’wana lowu nga humesiki mihandzu leyinene wu ta tsemiwa wu hoxiwa endzilweni.”+

10 Kutani mitshungu yi n’wi vutisa yi ku: “Hi fanele hi endla yini?” 11 A yi hlamula a ku: “Loyi a nga ni tinguvu timbirhi a a nyike loyi a nga riki na nchumu, ni loyi a nga ni swakudya a a nyike loyi a nga riki na swona.”+ 12 Ni valuvisi* va tile va ta khuvuriwa,+ kutani va ku eka yena: “Mudyondzisi, hi fanele hi endla yini?” 13 A ku eka vona: “Mi nga hakerisi vanhu xibalo xo tlula mpimo lowu vekiweke.”+ 14 Masocha na wona ma n’wi vutisa ma ku: “Hi fanele hi endla yini?” Kutani a ku eka wona: “Mi nga karhati munhu kumbe ku hehla hambi ku ri mani hi mavunwa,+ kambe mi eneriseka hi leswi mi nyikiwaka swona.”*

15 Leswi vanhu a va langutele Kreste, loko va vona Yohane va tivutisa va ku, “Xana a nga va a ri Kreste?”+ 16 Yohane a va hlamula a ku: “Mina ndzi mi khuvula hi mati, kambe wa ta loyi a ndzi tlulaka hi matimba naswona a ndzi faneleki ku tshunxa tintambhu ta maphaxani yakwe.+ U ta mi khuvula hi moya lowo kwetsima ni hi ndzilo.+ 17 U khome rihlelo rakwe ro peperha leswaku a basisa xivuya* xakwe hinkwaxo ni ku hlengeleta koroni exitlatini xakwe, kambe muhungu* u ta wu hisa hi ndzilo lowu nga timekiki.”

18 A tlhela a va khutaza hi tindlela to tala ni ku ya emahlweni a chumayela vanhu mahungu lamanene. 19 Kambe hikwalaho ka leswi Heroda ndhuna ya muganga a tshinyiweke hi Yohane mayelana na Herodiya nsati wa makwavo ni hikwalaho ka swiendlo swo homboloka leswi a swi endleke, 20 Heroda u lo tlhela a endla mhaka yin’wana yo biha: A pfalela Yohane ekhotsweni.+

21 Kutani loko vanhu hinkwavo va khuvuriwa, Yesu na yena a khuvuriwa.+ Loko a ri karhi a khongela, hiloko matilo ma pfuleka,+ 22 moya lowo kwetsima wu xikela ehenhla ka yena ku fana ni tuva, hiloko ku twala rito ri huma etilweni ri ku: “U N’wana wa mina loyi ndzi n’wi rhandzaka; ndzi ku amukerile.”+

4 Kutani Yesu a suka eYordani, a tele hi moya lowo kwetsima, hiloko moya wa Xikwembu wu n’wi yisa emananga+ 2 ku ringana masiku ya 40, a ri karhi a ringiwa hi Diyavulosi.+ A nga dyanga nchumu emasikwini wolawo, kutani loko ma herile, a khomiwa hi ndlala. 3 Diyavulosi a ku eka yena: “Loko u ri n’wana wa Xikwembu, byela ribye leri ri hundzuka xinkwa.” 4 Kambe Yesu a n’wi hlamula a ku: “Ku tsariwile, ‘Munhu a nga fanelanga a hanya hi xinkwa ntsena.’”+

5 Kutani a famba na yena entshaveni a n’wi komba mifumo hinkwayo ya misava, hi ku copeta ka tihlo.+ 6 Diyavulosi a ku eka yena: “Ndzi ta ku nyika mifumo leyi hinkwayo ni ku vangama ka yona, hikuva ndzi nyikiwe yona+ naswona ndzi yi nyika un’wana ni un’wana loyi ndzi rhandzaka ku n’wi nyika yona. 7 Hikwalaho, loko wo khinsama u ndzi gandzela, ndzi ta ku nyika yona hinkwayo.” 8 Yesu a ku eka yena: “Ku tsariwile, ‘U fanele u gandzela Yehovha* Xikwembu xa wena u tirhela yena ntsena.’”+

9 Hiloko a famba na yena eYerusalema kutani a n’wi yimisa ehenhla* ka tempele kutani a ku eka yena: “Loko u ri n’wana wa Xikwembu, tilahlele ehansi,+ 10 hikuva ku tsariwile, ‘Xi ta lerisa tintsumi ta xona mayelana na wena leswaku ti ku sirhelela,’ 11 kutani, ‘Ti ta ku khawulela hi mavoko ya tona leswaku nenge wa wena wu nga bi ribye.’”+ 12 Yesu a n’wi hlamula a ku: “Ku tsariwile, ‘U nga tshuki u ringa+ Yehovha* Xikwembu xa wena.’” 13 Loko Diyavulosi a heta ku n’wi ringa, hiloko a n’wi sukela a yimela nkarhi wun’wana leswaku a ta tlhela a n’wi ringa.+

14 Kutani Yesu a tlhelela eGaleliya+ a ri ni moya wa Xikwembu. Vanhu lava a va tshama kwalaho a va vulavula leswinene ha yena etikweni hinkwaro. 15 A tlhela a sungula ku dyondzisa emasinagogeni ya vona naswona vanhu hinkwavo a va n’wi xixima.

16 Hiloko a ya eNazareta+ laha a kuleleke kona, a nghena esinagogeni+ a fika a yima a hlaya Matsalwa, hilaha a a tolovele ku endla hakona hi siku ra Savata. 17 Kutani a nyikiwa buku leyi songiwaka ya muprofeta Esaya, a yi pfula a kuma laha ku tsariweke leswi: 18 “Moya wa Yehovha* wu le henhla ka mina, hikuva u ndzi hlawule ku twarisa mahungu lamanene eka swisiwana. U ndzi rhume ku ya byela mahlonga leswaku ma ta tshunxiwa, ku endla leswaku lava feke matihlo va tlhela va vona, ku tshunxa lava xanisekaka+ 19 ni ku chumayela lembe leri Yehovha* a nga ta kombisa tintswalo ha rona.”+ 20 Hiloko a teka buku leyi songiwaka a yi pfala kutani a yi tlherisela eka nandza, ivi a tshama ehansi; hinkwavo lava a va ri esinagogeni a va n’wi langutile. 21 Kutani a ku: “Namuntlha tsalwa leri ma ha ku ri twaka ri hetisekile.”+

22 Hinkwavo va sungula ku vulavula leswinene ha yena ni ku hlamarisiwa hi leswi a a swi vula,+ va ku: “Xana loyi a hi n’wana wa Yosefa?”+ 23 Hiloko a va hlamula a ku: “Ndza swi tiva leswaku mi ta lava ku xi tirhisa eka mina xivuriso lexi nge, ‘Dokodela,* tihanyise. Swilo leswi hi tweke leswaku u swi endlile eKapernawume+ swi endle ni kwala tikweni ra rikwenu.’” 24 A tlhela a ku: “Ndzi tiyisile ndzi ri eka n’wina, a ku na muprofeta loyi a amukeriwaka etikweni ra rikwavo.+ 25 Ntiyiso hi leswaku: A ku ri ni tinoni to tala eIsrayele emasikwini ya Eliya loko matilo ma pfariwe malembe manharhu ni tin’hweti ta tsevu lerova ku va ni ndlala leyikulu etikweni hinkwaro.+ 26 Kambe Eliya a nga rhumiwanga eka vavasati volavo, u rhumiwe eka noni ya le Sarepta etikweni ra Sidoni.+ 27 Nakambe, a ku ri ni vanhu vo tala lava nga ni nhlokonho eIsrayele hi nkarhi wa muprofeta Elixa; kambe ku hanyisiwe Namani wa le Siriya ntsena.”+ 28 Kutani hinkwavo lava a va n’wi yingiserile esinagogeni va hlundzuka,+ 29 hiloko va n’wi humesela ehandle ka muti, va n’wi yisa entshaveni laha muti wa vona a wu akiwe kona leswaku va ta n’wi cukumetela ehansi. 30 Kambe a chupuka a tsemakanya hi le xikarhi ka vona a tifambela.+

31 Hiloko a rhelela a ya eKapernawume, le Galeliya. A fika a va dyondzisa hi siku ra Savata,+ 32 kutani va hlamarisiwa hi madyondziselo yakwe,+ hikuva leswi a a va dyondzisa swona a swi huma eka Xikwembu. 33 A ku ri ni wanuna loyi a a ri ni dimona esinagogeni, a huwelela a ku:+ 34 “Hi ku dyohele yini, wena Yesu wa le Nazareta?+ Xana u tele ku ta hi lovisa? Ndzi ku tiva kahle, u Mukwetsimi wa Xikwembu.”+ 35 Kambe Yesu a ri tshinya, a ku: “Miyela u huma eka yena.” Hiloko dimona ri n’wi tlatlalata ehansi kutani ri huma ri nga n’wi vavisanga. 36 Loko va vona sweswo, hinkwavo va hlamala, va ku: “I mavulavulelo ya muxaka muni lawa? Hikuva u ni matimba yo hlongola ni madimona!” 37 Kutani mitirho yakwe leyinene yi tiviwa etikweni hinkwaro.

38 Loko a suka esinagogeni, u ye ekaya ka Simoni. Mana wa nsati wa Simoni a a vabya, miri wa yena a wu hisa ngopfu, hiloko va kombela Yesu leswaku a n’wi hanyisa.+ 39 Kutani Yesu a ya laha a a etlele kona a fika a n’wi hanyisa. Hiloko a pfuka a sungula ku va lunghisela swakudya.

40 Kambe loko dyambu ri ya eku peleni, va n’wi tisela vanhu lava a va ri ni mavabyi yo hambanahambana. A va hanyisa hi ku va tlhandleka mavoko.+ 41 Madimona a ma huma eka vo tala ma ri karhi ma huwelela ma ku: “U N’wana wa Xikwembu.”+ Kambe a a ma tshinya, a nga ma pfumeleli leswaku ma vulavula,+ hikuva a ma n’wi tiva leswaku i Kreste.+

42 Hambiswiritano, loko dyambu ri xa a famba a ya enhoveni.+ Kambe mintshungu yi sungula ku famba yi n’wi lava kukondza yi fika laha a a ri kona, hiloko yi ringeta ku n’wi sivela leswaku a nga fambi. 43 Kambe a ku: “Ndzi fanele ku chumayela mahungu lamanene ya Mfumo wa Xikwembu ni le mitini yin’wana, hikuva ndzi tele sweswo.”+ 44 Hiloko a ya emahlweni a chumayela emasinagogeni ya le Yudiya.

5 Siku rin’wana Yesu a a yime etlhelo ka tiva ra Genesareta* a ri karhi a dyondzisa rito ra Xikwembu naswona ntshungu a wu n’wi manyetela.+ 2 Hiloko a vona swikepe swimbirhi swi yimisiwe eribuweni ra tiva, vini va swona lava nga vaphasi va tihlampfi a va humile va ri karhi va hlantswa tinete ta vona.+ 3 A khandziya xikepe lexi a xi ri xa Simoni, kutani a n’wi kombela leswaku a xi nghenisanyana etiveni. Hiloko a tshama ehansi a sungula ku dyondzisa mintshungu a ri exikepeni. 4 Loko a heta ku dyondzisa, a byela Simoni a ku: “Yanani laha ku nga enta, mi peta tinete ta n’wina mi ta phasa.” 5 Kambe Simoni a hlamula a ku: “Mudyondzisi, hi tirhe vusiku hinkwabyo kambe a hi phasanga nchumu,+ kambe ndzi ta peta hikwalaho ka leswi u vulaka tano.” 6 Va endle tano, hiloko va phasa tihlampfi to tala ngopfu lerova tinete ta vona ti sungula ku handzuka.+ 7 Hiloko va vitana lava a va ri exikepeni lexin’wana leswaku va ta va pfuna, va tile kutani va tata swikepe haswimbirhi hi tihlampfi lerova swi sungula ku mbombomela. 8 Loko Simoni Petro a vona sweswo, a khinsama emahlweni ka Yesu, a ku: “Suka eka mina Hosi, hikuva ndzi mudyohi.” 9 U vule sweswo hi leswi yena ni lava a a ri na vona va hlamarisiweke hi tihlampfi leti va ti phaseke. 10 Yakobo na Yohane vana va Zebediya,+ lava a va phasa swin’we na Simoni, na vona va titwe tano. Kambe Yesu a byela Simoni a ku: “U nga chavi. Ku sukela sweswi u ta phasa vanhu va ri karhi va hanya.”+ 11 Hiloko va tlutisa swikepe swi tlhelela eribuweni, ivi va tshika hinkwaswo va n’wi landzela.+

12 Siku rin’wana loko a ri emutini wun’wana, ku humelele wanuna loyi a a ri ni nhlokonho yo chavisa! Kuteloko a vona Yesu, a khinsama emahlweni ka yena a n’wi kombela a ku: “Hosi loko u swi lava, u nga ndzi basisa.”*+ 13 Kutani a tshambuluta voko rakwe a n’wi khumba a ku: “Ndza swi lava! Basisiwa.” Hiloko nhlokonho yi nyamalala hi nkarhi wolowo.+ 14 A lerisa wanuna loyi leswaku a nga byeli munhu mhaka leyi, a tlhela a ku: “Kambe famba u ya tikombisa eka muprista, u endla gandzelo mayelana ni ku basisiwa ka wena hilaha Muxe a leriseke hakona,+ leswaku byi va vumbhoni eka vaprista.”+ 15 Yesu a sungula ku duma swinene lerova mintshungu yi ta eka yena yi ta n’wi yingisela ni ku horisiwa mavabyi.+ 16 Hambiswiritano, a a tala ku ya etindhawini leti nga riki na munhu leswaku a ya khongela.

17 Siku rin’wana loko a ri karhi a dyondzisa, Vafarisi ni vadyondzisi va Nawu lava a va huma eGaleliya, Yudiya na Yerusalema a va tshame kwalaho; naswona Yehovha* a a n’wi nyike matimba leswaku a hanyisa ha wona.+ 18 Hiloko ku ta vavanuna lava a va rhwale wanuna la omeke swirho, naswona a va lava ndlela ya ku n’wi nghenisa va ya n’wi veka emahlweni ka Yesu.+ 19 Kambe a va yi kumanga ndlela yo n’wi nghenisa hikwalaho ka ntshungu, hiloko va khandziya ehenhla ka lwangu, va ri hahlula kutani va ehlisa sangu leri munhu loyi a omeke swirho a a etlele eka rona, va n’wi veka emahlweni ka Yesu. 20 Loko a vona ripfumelo ra vona a ku: “Nandzuwe, swidyoho swa wena swi rivaleriwile.”+ 21 Hiloko vatsari ni Vafarisi va sungula ku vutisana, va ku: “Xana i mani munhu loyi, loyi a rhukanaka Xikwembu? A nga kona loyi a nga rivalelaka swidyoho handle ka xona.”+ 22 Kambe Yesu hi ku tiva leswi nga emiehleketweni ya vona, a va hlamula a ku: “I yini leswi mi swi ehleketaka etimbilwini ta n’wina? 23 I yini lexi olovaka, xana i ku vula u ku, ‘Swidyoho swa wena swi rivaleriwile,’ kumbe i ku vula u ku, ‘Pfuka u famba’? 24 Kambe ku endlela leswaku mi swi tiva leswaku N’wana wa munhu u ni matimba yo rivalela swidyoho emisaveni,” a byela munhu loyi a omeke swirho a ku: “Ndzi ri eka wena, Pfuka, teka sangu ra wena, u muka.”+ 25 Hiloko a pfuka va n’wi langutile, a teka sangu rakwe a muka a ri karhi a dzunisa Xikwembu. 26 Kutani vanhu hinkwavo va hlamala, va sungula ku dzunisa Xikwembu. Va hlamale va kala va ku: “Namuntlha hi vone swilo swo hlamarisa!”

27 Endzhaku ka sweswo a huma, kutani a vona muluvisi* la vuriwaka Levhi a tshame ehofisini ya xibalo, hiloko a ku eka yena: “Vana mulandzeri wa mina.”+ 28 Hiloko a suka a yima a siya hinkwaswo a landzela Yesu. 29 Kutani Levhi a endlela Yesu nkhuvo lowukulu endlwini yakwe, naswona a ku ri ni valuvisi vo tala ni van’wana lava a va dya na vona.+ 30 Loko Vafarisi ni vatsari va vona sweswo, va sungula ku gungulela vadyondzisiwa vakwe, va ku: “Hikwalaho ka yini mi dya ni ku nwa ni valuvisi ni vadyohi?”+ 31 Yesu a ku eka vona: “Vanhu lava hanyeke kahle a va lavi dokodela,* kambe u laviwa hi lava vabyaka.+ 32 Ndzi tele ku ta vitana vadyohi leswaku va hundzuka, ku nga ri vanhu lava lulameke.”+

33 Hiloko va ku: “Vadyondzisiwa va Yohane va titsona swakudya nkarhi na nkarhi ni ku khongela, naswona vadyondzisiwa va Vafarisi va endla tano, kambe va wena va dya va tlhela va nwa.”+ 34 Yesu a va hlamula a ku: “Xana mi nga sindzisa vanghana va muteki ku titsona swakudya loko muteki a ha ri na vona? 35 Kambe nkarhi wa ta lowu muteki+ a nga ta va a nga ha ri kona;* kutani va ta titsona swakudya emasikwini wolawo.”+

36 A tlhela a va byela xifaniso a ku: “A nga kona munhu loyi a nga tsemaka xilapana eka xiambalo lexintshwa kutani a xi rhungelela eka xiambalo xa khale. Loko o endla tano, xilapana lexintshwa xi ta endla leswaku xiambalo xa khale xi nyanya ku handzuka, naswona a xi nge fani ni xiambalo xa khale.+ 37 Nakambe, a nga kona munhu loyi a chelaka vhinyo leyintshwa emaguleni ya khale. Loko o yi chela, vhinyo leyintshwa yi ta boxa magula wolawo, naswona yi ta halaka kutani ma onhaka. 38 Kambe vhinyo leyintshwa yi fanele yi cheriwa emaguleni lamantshwa. 39 A nga kona loyi loko a nwe vhinyo ya khale a lavaka leyintshwa hikuva u ri, ‘Leya khale ya nandziha.’”

6 Yesu a tsemakanya masimu ya koroni hi savata, kutani vadyondzisiwa vakwe va tshova koroni+ va yi swoswa hi mavoko va dya.+ 2 Hiloko Vafarisi van’wana va ku eka yena: “Hikwalaho ka yini mi endla swilo leswi nawu wu nga pfumeliki leswaku swi endliwa hi Savata?”+ 3 Kambe Yesu a va hlamula a ku: “Xana a mi si tshama mi hlaya leswi Davhida a swi endleke loko a khomiwe hi ndlala ni vavanuna lava a a ri na vona?+ 4 Ndlela leyi a ngheneke ha yona endlwini ya Xikwembu kutani a nyikiwa swinkwa swa magandzelo* a dya, a tlhela a swi nyika vavanuna lava a a ri na vona, leswi a ku nga ri na munhu loyi a pfumeleriweke ku swi dya handle ka vaprista ntsena.”+ 5 Kutani Yesu a ku eka vona: “N’wana wa munhu i Hosi ya Savata.”+

6 Hi savata+ yin’wana, Yesu a nghena esinagogeni a sungula ku dyondzisa. Naswona a ku ri ni wanuna loyi a a lamale voko ra xinene.+ 7 Vatsari ni Vafarisi a va n’wi langutisisile leswaku va vona loko a ta n’wi hanyisa hi Savata, va ta kuma xo n’wi hehla ha xona. 8 Kambe yena a a swi tiva leswi a va swi anakanya,+ hiloko a byela munhu loyi a lamaleke voko a ku: “Tana u ta yima laha xikarhi.” Hiloko wanuna yoloye a yima exikarhi. 9 Kutani Yesu a ku eka vona: “Ndza mi vutisa, Xana swa pfumeleriwa ku endla leswinene kumbe leswo biha hi Savata, ku ponisa vutomi kumbe ku dlaya?”+ 10 Endzhaku ko va languta hinkwavo a byela wanuna yoloye a ku: “Ololoxa voko ra wena.” Hiloko a endla tano, kutani voko rakwe ri ololoka. 11 Kambe va hlundzuka ngopfu, va sungula ku kanerisana hi leswi va nga n’wi endlaka swona Yesu.

12 Siku rin’wana a ya entshaveni a ya khongela,+ naswona u khongele vusiku hinkwabyo eka Xikwembu.+ 13 Loko ri xa a vitana vadyondzisiwa vakwe, kutani a hlawula va 12 exikarhi ka vona, lava a nga tlhela a va vitana vaapostola,+ ku nga: 14 Simoni, loyi a n’wi thyeke Petro na Andriya makwavo, Yakobo, Yohane, Filipi,+ Bartolomi, 15 Matewu, Tomasi,+ Yakobo n’wana wa Alfiya, Simoni loyi a a tiviwa hi ku “gingiriteka,” 16 Yudasi n’wana wa Yakobo na Yudasi Iskariyota loyi a nga n’wi xavisa.

17 Kutani a xika na vona entshaveni a fika endhawini leyi nga rivala laha a ku ri ni ntshungu lowukulu wa vadyondzisiwa vakwe ni vanhu vo tala lava a va huma eYudiya, eYerusalema ni le tikweni leri nga ekusuhi ni lwandle ra le Tiri na Sidoni, lava teke ku ta n’wi yingisela ni ku hanyisiwa. 18 Hambi ku ri lava a va xanisiwa hi madimona a va hanyisiwa. 19 Ntshungu hinkwawo a wu lava ku n’wi khumba, hikuva matimba a ma huma eka yena+ kutani wu hola.

20 Hiloko a languta vadyondzisiwa vakwe, a ku:

“Ma tsaka n’wina swisiwana, hikuva Mfumo wa Xikwembu i wa n’wina.+

21 “Ma tsaka n’wina lava nga ni ndlala, hikuva mi ta xurha.+

“Ma tsaka n’wina lava rilaka, hikuva mi ta hleka.+

22 “Tsakani loko vanhu va mi venga,+ va mi hlongola,+ va mi rhukana ni ku mi vula vanhu vo homboloka hikwalaho ka N’wana wa munhu. 23 Tsakani mi ba ni mikulungwana hi siku rero, hikuva hakelo ya n’wina i yikulu etilweni, hikuva sweswo hi leswi vakokwa wa vona a va tolovele ku swi endla eka vaprofeta.+

24 “Khombo eka n’wina swifumi,+ hikuva se mi yi kumile hakelo ya n’wina.+

25 “Khombo eka n’wina lava xurheke, hikuva mi ta va ni ndlala.

“Khombo eka n’wina lava hlekaka, hikuva mi ta rila mi kolola.+

26 “Mi ni khombo loko vanhu va vulavula leswinene hi n’wina,+ hikuva vakokwa wa vona va endle tano eka vaprofeta va mavunwa.

27 “Ndzi ri eka n’wina lava yingiseke: Yanani emahlweni mi rhandza valala va n’wina, mi endla leswinene eka lava va mi vengaka,+ 28 mi katekisa lava mi rhukanaka, mi khongelela lava mi sandzaka.+ 29 Loyi a ku baka rhama, n’wi nyike ni lerin’wana; naswona loyi a ku tekelaka xiambalo xa le handle n’wi nyike ni lexa le ndzeni.+ 30 Loyi a kombelaka n’wi nyike,+ naswona loyi a ku tekelaka swo karhi u nga n’wi londzi.

31 “Nakambe, leswi mi lavaka van’wana va mi endlela swona na n’wina va endleleni swona.+

32 “Loko mi rhandza lava mi rhandzaka, xana mi vuyeriwa hi yini? Hikuva hambi vadyohi va rhandza lava va va rhandzaka.+ 33 Loko mi endla leswinene eka lava mi endlelaka leswinene ntsena, xana mi vuyeriwa hi yini? Hambi vadyohi va endla sweswo. 34 Loko mi lomba* lava mi tshembaka leswaku va ta mi tlherisela, xana mi vuyeriwa hi yini?+ Hambi vadyohi va lomba vadyohi van’wana hi ku tiva leswaku va ta va hakela. 35 Kambe yanani emahlweni mi rhandza valala va n’wina, mi endla leswinene, mi lombisa handle ko langutela hakelo;+ kutani hakelo ya n’wina yi ta va yikulu, naswona mi ta va vana va Xikwembu Lexi Nge Henhlahenhla, hikuva xi ni musa eka lava nga khensiki ni lavo homboloka.+ 36 Mi nga tshiki ku va ni tintswalo, tanihi leswi Tata wa n’wina a nga ni tintswalo.+

37 “Ku tlula kwalaho, tshikani ku avanyisa van’wana kutani na n’wina a mi nge avanyisiwi;+ tshikani ku gweva leswaku mi nga gweviwi. Mi nga tshiki ku rivalela van’wana leswaku na n’wina mi ta rivaleriwa.+ 38 Hanyani hi ku nyika, kutani na n’wina mi ta nyikiwa.+ Mi ta cheleriwa swi tala emikwameni ya n’wina swi tlhela swi gandliwa, swi hlunguhliwa swi tlhela swi khapakhapa. Hikuva xipimo lexi mi pimaka ha xona, va ta mi pimela ha xona.”

39 Hiloko a tlhela a va byela xifaniso, a ku: “Xana munhu loyi a feke matihlo a nga fambisa munhu un’wana loyi a feke matihlo? Xana a va nge weli emugodini havambirhi?+ 40 Xichudeni a xi n’wi tluli mudyondzisi wa xona, kambe loyi a dyondzisiwaka kahle u ta fana ni mudyondzisi wakwe. 41 Kutani hikwalaho ka yini u languta xilavi lexi nga etihlweni ra makwenu, kambe u nga yi voni mhandzi leyi nga etihlweni ra wena?+ 42 U nga vurisa ku yini eka makwenu u ku, ‘Makwerhu, ndzi pfumelele ndzi susa xilavi lexi nga etihlweni ra wena,’ kasi wena a wu yi voni mhandzi leyi nga etihlweni ra wena? Mukanganyisi! Rhanga u susa mhandzi leyi nga etihlweni ra wena, kutani u ta swi kota kahle ku susa xilavi lexi nga etihlweni ra makwenu.

43 “Hikuva a ku na murhi lowunene lowu nga humesaka mihandzu yo bola, naswona a ku na murhi lowu nga riki wunene lowu nga humesaka mihandzu leyinene.+ 44 Hikuva murhi wun’wana ni wun’wana wu tiviwa hi mihandzu ya wona.+ Hi xikombiso, vanhu a va nge khi makuwa emitweni, naswona a va nge tsemi madiriva exihlahleni xa mitwa. 45 Munhu lonene u humesa leswinene exumeni xakwe lexinene, kambe lowo homboloka u humesa leswi hombolokeke exumeni xakwe xo homboloka; hikuva nomu wakwe wu vulavula leswi taleke embilwini.+

46 “Kutani, hikwalaho ka yini mi ndzi vitana ‘Hosi,’ kambe mi nga swi endli leswi ndzi swi vulaka?+ 47 Loyi a taka eka mina, a twa marito ya mina a tlhela a endla leswi ndzi swi vulaka, ndzi ta mi byela leswaku u fana na mani:+ 48 U fana ni wanuna loyi loko a aka yindlu, a celeke a ya ehansi swinene kutani a veka masungulo ehenhla ka ribye. Hikwalaho loko ku va ni ndhambi, nambu wu ba yindlu yoleyo kambe a wu swi kotanga ku yi ninginisa hikuva a yi akiwe kahle.+ 49 Kasi loyi a twaka marito ya mina kambe a nga endli leswi ndzi swi vulaka,+ u fana ni wanuna loyi a akeke yindlu leyi nga riki na masungulo. Kutani loko yi biwa hi mati ya nambu yi hatla yi wa yi onhaka swinene.”

7 Loko a heta ku vulavula ni vanhu, a nghena eKapernawume. 2 A ku ri ni ndhuna yin’wana ya masocha, leyi a yi ri ni nandza loyi a yi n’wi rhandza, naswona a a vabya swinene a ri kusuhi ni ku fa.+ 3 Loko yi twa hi ta Yesu, yi rhumela vakulukumba van’wana va Vayuda eka yena va ya n’wi kombela leswaku a ta hanyisa nandza wa yona. 4 Va fika eka Yesu va n’wi xavelela, va ku: “I munhu lonene, hi kombela u n’wi pfuna, 5 hikuva u rhandza rixaka ra hina naswona u hi akele ni sinagoga.” 6 Hiloko Yesu a famba na vona. Kambe loko a nga si fika endlwini, ndhuna ya masocha se a yi rhume vanghana va yona va ya n’wi byela va ku: “Nkulukumba, u nga tikarhati, hikuva a swi ndzi faneli ku va u nghena endlwini ya mina.+ 7 Hi yona mhaka leyi ndzi nga tivona ndzi nga faneleki ku ta eka wena. Kambe vula rito, kutani u endla leswaku nandza wa mina a hola. 8 Hikuva na mina ndzi wanuna loyi a nga ni vulawuri, ndzi ni masocha lama nga ehansi ka mina, naswona loko ndzi byela socha ndzi ku, ‘Famba,’ ra famba, kasi loko ndzi byela rin’wana ndzi ku, ‘Tana,’ ra ta, niloko ndzi byela nandza wa mina ndzi ku, ‘Endla leswi,’ wa swi endla.” 9 Loko Yesu a twa swilo leswi, a hlamala kutani a hundzuluka a vulavula ni ntshungu lowu a wu n’wi landzela, a ku: “Ndza mi byela, hambi eIsrayele a ndzi ri kumanga ripfumelo ro fana ni leri.”+ 10 Loko lava a va rhumiwile va tlhelela endlwini, va kume nandza a hanyile.+

11 Endzhakunyana ka sweswo a ya emutini lowu vuriwaka Nayini ni vadyondzisiwa vakwe, a landzeriwa hi ntshungu. 12 Loko a fika ekusuhi ni gede ya muti, a hlangana ni vanhu lava a va ya eku lahleni ka mufi, mufi a a ri n’wana la nga yexe eka mana wakwe.+ Kasi mana wakwe a a ri noni. A a heleketiwa hi ntshungu. 13 Loko Hosi yi n’wi vona, yi n’wi twela vusiwana,+ kutani yi ku eka yena: “Tshika ku rila.”+ 14 Hiloko yi tshinela yi khumba rihlaka,* kutani lava rhwaleke mufi va yima. Kutani yi ku: “Jaha, ndzi ri eka wena, pfuka!”+ 15 Jaha ri pfuka ri tshama kutani ri sungula ku vulavula, hiloko Yesu a ri nyika mana wa rona.+ 16 Vanhu hinkwavo va sungula ku chava va dzunisa Xikwembu, va ku: “Hi ni muprofeta loyi a nga ni matimba,”+ naswona, “Xikwembu xi tsundzuke vanhu va xona.”+ 17 Mitirho yakwe leyinene yi tiveka etikweni hinkwaro ra Yudiya ni le tindhawini leti nga ekusuhi na rona.

18 Vadyondzisiwa va Yohane va n’wi vikela timhaka leti hinkwato.+ 19 Kutani Yohane a vitana vadyondzisiwa vakwe vambirhi, a va rhuma eka Hosi leswaku va yi vutisa va ku: “Xana hi wena Loyi a Taka+ kumbe hi fanele ku langutela un’wana?” 20 Loko vavanuna volavo va fika eka yena, va ku: “Yohane Mukhuvuri u hi rhume ku ta ku vutisa hi ku, ‘Xana hi wena Loyi a Taka kumbe hi fanele ku langutela un’wana?’” 21 Hi nkarhi wolowo a hanyisa vavabyi vo tala,+ lava a va ri ni madimona ni lava a va ri ni mavabyi yo chavisa, a tlhela a pfula ni matihlo ya lava a va nga voni. 22 Yesu a va hlamula a ku: “Fambani mi ya vikela Yohane leswi mi swi voneke ni ku swi twa: Lava a va fe mahlo se va vona,+ lava a va nga koti ku famba se va famba, lava a va ri ni nhlokonho va horile, lava a va fe tindleve se va twa,+ kasi vafi va pfuxiwa ni swisiwana swi byeriwa mahungu lamanene.+ 23 Wa tsaka loyi a nga kumiki nchumu lexi n’wi khunguvanyisaka eka mina.”+

24 Loko lava a va rhumiwe hi Yohane va fambile, Yesu a sungula ku vulavula ni mintshungu mayelana na Yohane a ku: “Xana a mi yele ku ya vona yini emananga? Ku ya vona rihlanga leri biwaka hi moya?+ 25 Xana a mi ya vona yini? Wanuna loyi a ambaleke swiambalo swo durha?+ Phela lava ambalaka swiambalo swo durha va tlhela va hanya emafurheni va le tindlwini ta tihosi. 26 Kahlekahle a mi ya vona yini? Muprofeta? Hakunene ndza mi byela, i wa nkoka swinene ku tlula ni muprofeta.+ 27 Loyi hi yena loyi ku tsariweke mayelana na yena va ku: ‘Waswivo! Ndzi rhuma nandza wa mina emahlweni ka wena, loyi a nga ta ku lunghisela ndlela u nga si fika.’+ 28 Ndza mi byela, eka vanhu hinkwavo lava tshameke va hanya a nga kona lonkulu eka Yohane, kambe lontsongo eMfun’weni wa Xikwembu i nkulu eka yena.”+ 29 (Loko vanhu hinkwavo ni valuvisi* va twa leswi, va vula leswaku Xikwembu xi lulamile, hikuva a va khuvuriwe hi nkhuvulo wa Yohane.+ 30 Kambe Vafarisi ni lava a va tiva Nawu va honise nkongomiso wa Xikwembu mayelana na vona,+ tanihi leswi a va nga khuvuriwanga hi Yohane.)

31 “Hikwalaho, xana vanhu lava ndzi nga va fanisa na mani, xana va fana na mani?+ 32 Va fana ni vana lava tshameke emakete, lava huwelelanaka va ku: ‘Hi mi chayele xitiringo, kambe a mi cinanga; hi yimbelele risimu ra xirilo, kambe a mi rilanga.’ 33 Hilaha ku fanaka, Yohane Mukhuvuri u tile a nga dyi xinkwa hambi ku ri ku nwa vhinyo,+ kambe n’wina mi te: ‘U ni dimona.’ 34 N’wana wa munhu u tile a dya ni ku nwa, kambe n’wina mi ri: ‘Vonani! I munhu wa makolo naswona u rhandza vhinyo, i munghana wa valuvisi ni vadyohi!’+ 35 Hambiswiritano, vutlhari byi tikomba byi lulamile hi vana va byona hinkwavo.”+

36 Mufarisi un’wana a a tshamela ku n’wi kombela leswaku a ta dya na yena. Hiloko a nghena endlwini ya Mufarisi yoloye a tshama etafuleni. 37 Kutani wansati loyi a a tiviwa emutini leswaku i mudyohi, a twa leswaku Yesu a a ri eku dyeni endlwini ya Mufarisi, hiloko a ta ni xikutsu xa alabasta xa mafurha yo nun’hwela.+ 38 A fika a khinsama emilengeni yakwe, kutani a sungula ku rila, mihloti yakwe yi tsakamisa milenge ya Yesu, wansati yoloye a yi sula hi misisi yakwe. A tlhela a tswontswa milenge ya yena, a yi tota mafurha yo nun’hwela. 39 Loko Mufarisi loyi a a rhambe Yesu a vona leswi endliweke hi wansati loyi, a vulavula hi mbilu a ku: “Loko wanuna loyi a a ri muprofeta hakunene, a a ta swi tiva leswaku i wansati wa muxaka muni loyi a n’wi khumbaka. A a ta swi tiva leswaku i mudyohi.”+ 40 Kambe Yesu a ku: “Simoni, ku ni leswi ndzi lavaka ku ku byela swona.” Yena a ku: “Mudyondzisi, ndzi byele!”

41 “A ku ri ni vavanuna vambirhi lava a va kolota munhu loyi a lombisaka mali; un’we a a kolota tidenari* ta 500, loyi un’wana a a kolota ta 50. 42 Havambirhi a va swi kotanga ku n’wi hakela, kutani mulombisi a sula swikweleti swa vona. Hikwalaho, i mani exikarhi ka vona loyi a nga ta n’wi rhandza ngopfu?” 43 Simoni a hlamula a ku: “Ndzi ehleketa leswaku hi loyi a a n’wi kolota mali yo tala.” Yesu a ku: “U tiyisile.” 44 Hiloko a languta wansati kutani a ku eka Simoni: “Xana wa n’wi vona wansati loyi? Loko ndzi nghena endlwini ya wena; a wu ndzi nyikanga mati yo hlamba milenge. Kambe wansati loyi u tsakamise milenge ya mina hi mihloti yakwe a yi sula hi misisi yakwe. 45 A wu ndzi tswontswanga, kambe wansati loyi u tswontswe milenge ya mina ku sukela loko ndzi nghene endlwini ya wena. 46 A wu ndzi chelanga mafurha enhlokweni, kambe wansati loyi u chele milenge ya mina hi mafurha yo nun’hwela. 47 Hikwalaho ka leswi, ndza ku byela, swidyoho swa yena swi rivaleriwile hambileswi swi nga tala,+ hikuva u kombise rirhandzu lerikulu. Kambe loyi a rivaleriwaka leswitsongo, u rhandza katsongo.” 48 Hiloko a byela wansati a ku: “Swidyoho swa wena swi rivaleriwile.”+ 49 Lava a va tshame etafuleni na yena va sungula ku vulavurisana va ku: “Xana i mani wanuna loyi, loyi a kotaka ku rivalela ni swidyoho?”+ 50 Hiloko a byela wansati a ku: “Ripfumelo ra wena ri ku ponisile;+ famba hi ku rhula.”

8 Endzhakunyana ka sweswo Yesu a famba hi miti ni swimitana, a chumayela mahungu lamanene ya Mfumo wa Xikwembu.+ Lava 12 a va ri na yena, 2 swin’we ni vavasati van’wana lava humesiweke madimona va tlhela va hanyisiwa eka mavabyi ya vona, a ku ri na: Mariya loyi a vuriwaka Magadala, loyi ku humesiweke madimona ya nkombo eka yena; 3 Yowana+ nsati wa Khuza, wanuna loyi a a ri ndhuna endlwini ya Heroda; Suzana; ni vavasati van’wana vo tala lava a va tirhisa swilo swa vona ku pfuna Yesu ni vaapostola vakwe.+

4 Kuteloko ntshungu lowukulu ku katsa ni lava a va n’wi landzelela loko a suka emutini wun’wana ni wun’wana va hlengeletana, Yesu a sungula ku va dyondzisa hi ku tirhisa xifaniso+ a ku: 5 “Muhaxi u humile a ya haxa mbewu yakwe. Loko a ri karhi a haxa, yin’wana yi wela etlhelo ka ndlela yi kandziyeriwa kutani yi dyiwa hi swinyenyana.+ 6 Yin’wana yi wela ehenhla ka ribye lerikulu, loko yi mirile, yi oma hikwalaho ka ku pfumala ndzhongo.+ 7 Yin’wana yi wela exikarhi ka mitwa, kutani mitwa leyi kuleke na yona yi yi phasaphasa.+ 8 Kambe yin’wana yi wela emisaveni leyinene, loko yi mirile, yi tswala mihandzu, yi tswala 100 ku tlula leswi a swi byariwile.”+ Loko a heta ku vula sweswo, a tlhela a ku: “Loyi a nga ni tindleve ta ku yingisa, a a yingise.”+

9 Hiloko vadyondzisiwa vakwe va n’wi vutisa leswi xifaniso lexi xi vulaka swona.+ 10 A ku: “N’wina mi nyikiwe ku twisisa swihundla swo kwetsima swa Mfumo wa Xikwembu kambe lavan’wana hinkwavo va dyondzisiwa hi ku tirhisa swifaniso+ hikuva hambiloko va languta, a va voni nchumu hambiloko va yingisela, a va wu kumi mongo wa mhaka.+ 11 Nhlamuselo ya xifaniso lexi hi leyi: Mbewu i rito ra Xikwembu.+ 12 Leyi haxiweke etlhelo ka ndlela i vanhu lava tweke rito, kambe Diyavulosi a ta kutani a teka rito leri nga etimbilwini ta vona leswaku va nga vi na ripfumelo va ta kota ku ponisiwa.+ 13 Leyi nga eribyeni i vanhu lava loko va twa rito, va ri amukelaka hi ntsako, kambe a va na timitsu. Va pfumela swa nkarhinyana, kambe loko va ringiwa va tshika.+ 14 Loko ku ri leyi weleke exikarhi ka mitwa, hi lava twaka rito kambe hikwalaho ko karhateka hi vutomi, rifuwo+ ni ku hlongorisa ntsako,+ va phaseka hi ku helela va nga veki mihandzu.+ 15 Loko ku ri leyi weleke emisaveni leyinene, hi lava endzhaku ko twa rito hi timbilu letinene,+ va ri hlayisaka kutani va veka mihandzu hi ku tiyisela.+

16 “A nga kona loyi loko a lumeke rivoni a ri funengetaka hi xibya kumbe a ri veka ehansi ka mubedo, kambe u ri veka ehenhla ka xo tlhandleka rivoni, leswaku lava nghenaka ri ta va voningela.+ 17 Hikuva a ku na nchumu lowu fihliweke lowu nga ta ka wu nga paluxiwi naswona a ku na nchumu lowu tumbetiweke, lowu nga ta ka wu nga tiviwi ni ku humela erivaleni.+ 18 Hikwalaho, xiyani ndlela leyi mi yingisaka ha yona, hikuva loyi a nga ni swo karhi, u ta nyikiwa swo tala,+ kambe loyi a nga riki na nchumu, u ta tekeriwa ni leswi a ehleketaka leswaku u na swona.”+

19 Kutani mana wakwe ni vamakwavo+ va ta eka yena, kambe a va nga swi koti ku fika laha a ri kona hikwalaho ka ntshungu.+ 20 Hiloko va n’wi vikela va ku: “Mana wa wena ni vamakwenu va yime hala handle va lava ku ku vona.” 21 A va hlamula a ku: “Mana wa mina ni vamakwerhu hi lava twaka rito ra Xikwembu va tlhela va endla leswi ri swi vulaka.”+

22 Siku rin’wana Yesu ni vadyondzisiwa vakwe va khandziya xikepe, kutani a ku eka vona: “A hi tluteleni eka tlhelo lerin’wana ra tiva.” Hiloko va sungula ku tluta.+ 23 Kambe loko va ri karhi va tluta, a khomiwa hi vurhongo. Kutani ku va ni xidzedze etiveni, xikepe xa vona xi sungula ku tala hi mati xi lava ni ku mbombomela.+ 24 Hiloko va ya n’wi pfuxa, va ku: “Mudyondzisi, Mudyondzisi, ha lova!” Hiloko a pfuka a tshinya moya ni magandlati lama kariheke, kutani swi miyela ku va ni ku rhula.+ 25 Kutani a ku: “Hikwalaho ka yini mi nga ri na ripfumelo?” Kambe va sungula ku chava va tlhela va hlamala, kutani va vulavula va ri voxe va ku: “Kahlekahle i mani munhu loyi? Hikuva u kota ni ku vulavula ni moya ni mati, naswona swa n’wi yingisa.”+

26 Hiloko va fika eribuweni ra tiko ra Vagerasa,+ leri nga entsungeni wa Galeliya. 27 Loko Yesu a chika exikepeni a hlanganisiwa hi wanuna loyi a nga ni madimona loyi a a huma emutini. A ku hundze nkarhi wo leha a nga ambali nchumu naswona a nga tshami ekaya, a a tshama exikarhi ka masirha.+ 28 Loko a vona Yesu, a sungula ku huwelela a tlhela a khinsama emahlweni ka yena, a ku: “Xana ndzi ku dyohele yini wena Yesu, N’wana wa Xikwembu Lexi Nge Henhlahenhla? Ndza ku kombela, u nga ndzi xanisi.”+ 29 (Hikuva Yesu a a ri karhi a lerisa moya lowu nga basangiki leswaku wu huma eka munhu loyi. A wu n’wi hlasela ko tala,+ naswona a a tshamela ku bohiwa hi tinketana ni tinsimbhi a tlhela a rindziwa, kambe a a ti tsema ivi dimona ri n’wi yisa enhoveni.) 30 Yesu a n’wi vutisa a ku: “Hi wena mani?” Yena a ku: “Ndzi Vandla,” hikuva a a ngheniwe hi madimona yo tala. 31 Kutani ma n’wi kombela leswaku a nga ma lerisi ku ya ekheleni ro enta.+ 32 A ku ri ni ntlhambi lowukulu wa tinguluve+ lowu a wu ri eku dyeni entshaveni, hiloko ma n’wi kombela leswaku a ma pfumelela ku nghena eka tona, kutani a ma pfumelela.+ 33 Hiloko madimona ma huma eka wanuna loyi ma nghena etingulubyeni, kutani ntlhambi wolowo wu tsutsuma wu ya wela etiveni wu nwela. 34 Loko varisi va vona leswi endlekeke, va tsutsuma va ya vika emutini ni le ndhawini leyi nga le kusuhi ni muti wolowo.

35 Hiloko vanhu va ya vona leswi endlekeke. Loko va fika eka Yesu va kuma munhu loyi madimona ma humeke eka yena, a ambarile naswona a hanye kahle emianakanyweni, a tshame hi le milengeni ya Yesu, hiloko va sungula ku chava. 36 Lava swi voneke va va rungulela ndlela leyi munhu loyi a a ri ni madimona a hanyisiweke ha yona. 37 Kutani vanhu vo tala lava humaka emugangeni wa Vagerasa va kombela Yesu leswaku a suka emugangeni wa vona, hikuva a va chava swinene. Hiloko a khandziya xikepe a famba. 38 Hambiswiritano, wanuna loyi a a ri ni madimona a kombela ku famba na yena, kambe Yesu a n’wi tlherisa a ku:+ 39 “Muka u ya rungulela vanhu leswi Xikwembu xi ku endleleke swona.” Hiloko a famba, a ya byela muti hinkwawo leswi Yesu a n’wi endleleke swona.

40 Loko Yesu a vuya, ntshungu wu n’wi amukela hi musa hikuva a wu n’wi languterile.+ 41 Hiloko ku ta wanuna loyi a vuriwaka Yayiro loyi a a ri ndhuna ya sinagoga. Kutani a fika a khinsama emilengeni ya Yesu a n’wi kombela leswaku a ya endlwini yakwe,+ 42 hikuva n’wana wakwe loyi a nga yexe wa nhwanyana, wa malembe ya kwalomu ka 12 a a ri kusuhi ni ku fa.

Loko Yesu a ri karhi a famba mintshungu a yi n’wi manyetela. 43 A ku ri ni wansati loyi a a ri ni malembe ya 12 a khomiwe hi vuvabyi byo khuluka ngati,+ naswona a ku na munhu loyi a koteke ku n’wi tshungula.+ 44 Hiloko a ta hi le ndzhaku a fika a khumba makumu ya xiambalo xakwe,+ kutani ngati yi nga ha humi. 45 Yesu a ku: “Ndzi khumbe hi mani?” Loko hinkwavo va landzula, Petro a ku: “Mudyondzisi, mintshungu yi le ku ku manyeteleni.”+ 46 Kambe Yesu a ku: “Ku ni loyi a nga ndzi khumba, hikuva ndzi twe matimba+ ma huma eka mina.” 47 Loko wansati a xiya leswaku u voniwile, a ta a ri karhi a rhurhumela a fika a khinsama emahlweni ka yena, kutani a hlamusela emahlweni ka vanhu hinkwavo xivangelo xa ku n’wi khumba ni ndlela leyi a horisiweke ha yona hi ku hatlisa. 48 Kambe Yesu a ku eka yena: “N’wananga, ripfumelo ra wena ri ku hanyisile. Famba hi ku rhula.”+

49 Loko a ha vulavula, ku ta munhu loyi a humaka ekaya ka ndhuna ya sinagoga, a fika a ku: “N’wana wa wena u file; u nga ha n’wi karhati Mudyondzisi.”+ 50 Loko Yesu a twa sweswo, a ku: “U nga chavi, vana ni ripfumelo, n’wana wa wena u ta hanya.”+ 51 Loko a fika a nga pfumelelanga munhu a nghena endlwini handle ka Petro, Yohane, Yakobo ni vatswari va nhwanyana loyi. 52 Kambe vanhu a va ri eku rileni va tlhela va tiba swifuva hikwalaho ka gome. Kutani Yesu a ku: “Tshikani ku rila,+ hikuva n’wana loyi a nga fanga kambe u lo etlela.”+ 53 Hiloko va sungula ku n’wi hleka, hikuva a va swi tiva leswaku u file. 54 Kambe a n’wi khoma hi voko a ku: “N’wananga, pfuka!”+ 55 Hiloko moya*+ wakwe wu vuya, a pfuka hi nkarhi wolowo,+ kutani Yesu a va byela leswaku va n’wi nyika swakudya. 56 Vatswari vakwe a va nga tikoti hi ku tsaka, kutani a va lerisa leswaku va nga byeli munhu leswi endlekeke.+

9 Hiloko a vitana lava 12 a va nyika matimba leswaku va hlongola madimona+ hinkwawo ni ku horisa mavabyi.+ 2 A va rhuma leswaku va ya chumayela hi Mfumo wa Xikwembu ni ku hanyisa lava vabyaka, 3 a va lerisa a ku: “Mi nga rhwali nchumu hambi ku ri nhonga, nkwama wa swakudya, xinkwa kumbe mali;* naswona mi nga teki swiambalo swo cinca.+ 4 Kambe emutini lowu mi nga ta nghena eka wona, tshamani kona kukondza mi suka endhawini yoleyo.+ 5 Laha va nga mi amukeliki, loko mi huma emutini wolowo phumunhani ritshuri emilengeni ya n’wina leswaku byi va vumbhoni eka vona.”+ 6 Hiloko va famba hi miti va chumayela mahungu lamanene ni ku hanyisa lava vabyaka.+

7 Loko Heroda* ndhuna ya muganga a twa hi ta leswi Yesu a a swi endla, a pfilunganyeka ngopfu hikuva van’wana a va vula leswaku Yohane u pfuxiwile eku feni,+ 8 kambe van’wana va vula leswaku Eliya u pfukile, van’wanyana a va vula leswaku un’wana wa vaprofeta va khale u pfukile.+ 9 Heroda a ku: “Yohane ndzi n’wi tseme nhloko.+ Kutani i mani loyi a endlaka swilo leswi?” A a lava ku n’wi vona.+

10 Loko vaapostola va vuya, va rungulela Yesu hinkwaswo leswi va swi endleke.+ Hiloko a va teka a famba na vona va ri voxe va ya emutini lowu vuriwaka Betsayida.+ 11 Kambe loko mintshungu yi swi twa yi n’wi landzela. Kutani a yi amukela hi mandla mambirhi, a sungula ku yi dyondzisa hi Mfumo wa Xikwembu ni ku hanyisa lava vabyaka.+ 12 Dyambu a ri sungula ku pela. Hiloko lava 12 va ya eka Yesu va ku: “Byela ntshungu lowu wu ya eswimitanini leswi nga ekusuhi leswaku wu ta kuma swakudya ni ndhawu yo etlela, hikuva laha hi nga kona hi le nhoveni.”+ 13 Kambe Yesu a ku eka vona: “N’wina va nyikeni swakudya.”+ Va n’wi hlamula va ku: “Ho va ni swinkwa swa ntlhanu ni tihlampfi timbirhi ntsena, handle ka loko ho ya xavela vanhu lava hinkwavo swakudya.” 14 A ku ri ni vavanuna va kwalomu ka 5 000. Hiloko Yesu a byela vadyondzisiwa vakwe a ku: “Va byeleni va tshama hi mitlawa ya 50.” 15 Hiloko va byela ntshungu hinkwawo leswaku wu tshama ehansi. 16 A teka swinkwa swa ntlhanu ni tihlampfi timbirhi, a languta etilweni kutani a khongela. Hiloko a phema swinkwa ni tihlampfi a nyika vadyondzisiwa vakwe leswaku va phamela ntshungu. 17 Hinkwavo va dya va xurha, kutani va hlengeleta leswi nga sala, swi tata tibasikiti ta 12.+

18 Endzhaku ka sweswo, loko a ri karhi a khongela a ri swakwe, vadyondzisiwa vakwe va ta eka yena, hiloko a va vutisa, a ku: “Xana mitshungu yi ri hi mina mani?”+ 19 Va n’wi hlamula va ku: “Van’wana va ri hi wena Yohane Mukhuvuri, van’wana va ri hi wena Eliya, kasi van’wanyana va ri u un’wana wa vaprofeta va khale loyi a pfukeke eku feni.”+ 20 A ku eka vona: “Kambe n’wina mi ri hi mina mani?” Petro a n’wi hlamula a ku: “Hi wena Kreste loyi a rhumiweke hi Xikwembu.”+ 21 Hiloko a va tshinya ni ku va lerisa leswaku va nga byeli munhu mhaka leyi,+ 22 kambe a ku: “N’wana wa munhu u fanele a xanisiwa swinene ni ku vengiwa hi vakulukumba, vaprista lavakulu ni vatsari, a dlayiwa+ kutani a pfuxiwa hi siku ra vunharhu.”+

23 A tlhela a ku eka vona hinkwavo: “Loyi a lavaka ku ndzi landzela, a a titshike+ kutani a rhwala mhandzi yakwe ya nxaniso* siku ni siku a ndzi landzela nkarhi hinkwawo.+ 24 Hikuva loyi a lavaka ku ponisa vutomi byakwe u ta lahlekeriwa hi byona, kambe loyi a lahlekeriwaka hi vutomi byakwe hikwalaho ka mina u ta tlhela a byi kuma.+ 25 Xana swi pfuna yini ku va munhu a kuma swilo swa misava leyi hinkwaswo kambe a tivavisa kumbe a lahlekeriwa hi vutomi byakwe?+ 26 Hikuva loyi a khomiwaka hi tingana hikwalaho ka mina ni leswi ndzi swi vulaka, N’wana wa munhu na yena u ta khomiwa hi tingana ha yena loko a ta hi ku vangama ka yena ni ka Tata wakwe ni ka tintsumi to kwetsima.+ 27 Kambe ndzi mi byela ntiyiso, ku ni van’wana lava yimeke laha lava nga ta ka va nga fi va nga si vona Mfumo wa Xikwembu.”+

28 Endzhaku ka masiku ya kwalomu ka nhungu loko Yesu a vule marito lawa, a teka Petro, Yohane na Yakobo a khandziya na vona ntshava a ya khongela.+ 29 Loko a ha khongela, xikandza xakwe xi hundzuka naswona swiambalo swakwe swi sungula ku vangama, swi basa swi ku paa! 30 A ku ri ni vavanuna vambirhi lava a va vulavula na yena; ku nga Muxe na Eliya. 31 A va vangama swinene, kutani va sungula ku vulavula hi ku tlhandluka ka yena loku a ku ta humelela ku nga ri khale eYerusalema.+ 32 Petro ni lava a a ri na vona a va khomiwe hi vurhongo, kambe loko va pfuka, va vone ku vangama kakwe+ swin’we ni vavanuna vambirhi lava a a yime na vona. 33 Kuteloko vavanuna lava va ri karhi va famba, Petro a byela Yesu a ku: “Mudyondzisi, swa tsakisa ku va laha. Hi pfumelele hi dzima mitsonga* yinharhu, wun’we wu va wa wena, wun’wana wu va wa Muxe, wun’wanyana wu va wa Eliya.” A a nga swi tivi leswaku u ta ku yini. 34 Kambe loko a ri karhi a va byela swilo leswi, ku humelela papa ri va funengeta. Loko va ri epapeni, va sungula ku chava. 35 Kutani ku twala rito+ ri huma epapeni, ri ku: “Loyi i N’wananga, loyi ndzi n’wi hlawuleke.+ N’wi yingiseni.”+ 36 Loko rito ra ha vulavula, va vona Yesu a sale a ri yexe. Hiloko va miyela naswona a va byelanga munhu swilo leswi va swi voneke ku ringana nkarhi wo karhi.+

37 Hi siku leri landzelaka, loko va fika ehansi ka ntshava, a hlanganisiwa hi ntshungu.+ 38 Kutani wanuna un’wana a huwelela a ri exikarhi ka ntshungu, a ku: “Mudyondzisi, ndzi kombela u pfuna* n’wana wa mina, wo va yexe.+ 39 Dimona ri n’wi lahlela ehansi, ivi a huwelela kutani ri n’wi rhurhumerisa a tlhutlha khuvi naswona ri n’wi tshika endzhaku ka loko ri n’wi vavisile. 40 Ndzi kombele vadyondzisiwa va wena leswaku va ri hlongola kambe va tsandzekile.” 41 Hiloko Yesu a ku: “N’wina xitukulwana lexi nga riki na ripfumelo no homboloka,+ xana ndzi fanele ndzi mi tiyiselela ni ku mi lehisela mbilu ku fikela rini? Tisa n’wana wa wena haleni.”+ 42 Kambe loko mufana a tshinela eka Yesu, dimona ri n’wi lahlela ehansi ri tlhela ri n’wi rhurhumerisa. Hambiswiritano, Yesu a tshinya moya lowu nga basangiki a tlhela a hanyisa mufana ivi a n’wi nyika tata wakwe. 43 Kutani vanhu hinkwavo va hlamala hi ku vona matimba lamakulu ya Xikwembu.

Loko hinkwavo va ha hlamarisiwe hi swilo hinkwaswo leswi a a swi endla, hiloko a byela vadyondzisiwa vakwe a ku: 44 “Ndzi yingiseleni mi tlhela mi tsundzuka marito ya mina, hikuva N’wana wa munhu u ta xavisiwa.”+ 45 Kambe a va nga swi twisisi leswi a a swi vula. Kahlekahle a va tumbeteriwe swona leswaku va nga swi twisisi naswona a va chava ku n’wi vutisa.

46 Hiloko va sungula ku phikizana hi leswaku i mani lonkulu eka vona.+ 47 Hi ku tiva leswi a va swi anakanya, Yesu a teka n’wana a n’wi yimisa etlhelo ka yena 48 kutani a ku eka vona: “Loyi a amukelaka n’wana loyi hikwalaho ka vito ra mina wa ndzi amukela na mina; naswona loyi a ndzi amukelaka u amukela ni Loyi a ndzi rhumeke.+ Hikuva loyi a tikhomaka tanihi lontsongo exikarhi ka n’wina hinkwenu hi yena lonkulu.”+

49 Yohane a n’wi hlamula a ku: “Mudyondzisi, hi vone munhu un’wana a hlongola madimona hi vito ra wena naswona hi ringete ku n’wi tshikisa, hikuva a a nga fambi na hina.”+ 50 Kambe Yesu a ku eka yena: “Mi nga n’wi siveli, hikuva loyi a nga mi kanetiki u yima na n’wina.”

51 Kutani loko masiku ya leswaku a tlhandlukela etilweni+ ma ri ekusuhi, a ya eYerusalema. 52 Loko a ri endleleni a rhuma van’wana va vadyondzisiwa vakwe. Va famba va ya eximutanini xa Vasamariya leswaku va ya n’wi lunghisela kona. 53 Kambe a va n’wi amukelanga+ hikuva a a tiyimisele ku ya eYerusalema. 54 Loko mudyondzisiwa Yakobo na Yohane+ va vona leswi va ku: “Hosi, xana u lava hi vitana ndzilo wu huma hi le tilweni wu va herisa?”+ 55 Hiloko a va languta ivi a va tshinya. 56 Kutani va ya eximutanini xin’wana.

57 Loko va ha ri endleleni, un’wana a ku eka yena: “Ndzi ta ku landzela hinkwako laha u yaka kona.” 58 Kambe Yesu a ku eka yena: “Timhungubye ti ni micele ni swinyenyana swi ni swisaka, kambe N’wana wa munhu a nga na ndhawu yo veka nhloko yakwe.”+ 59 Hiloko Yesu a byela un’wana a ku: “Vana mulandzeri wa mina.” Wanuna yoloye a ku: “Hosi, ndzi pfumelele ndzi rhanga hi ku ya lahla tatana.”+ 60 Kambe Yesu a ku eka yena: “Tshika vafi+ va lahla vafi va vona, wena famba u ya chumayela hi Mfumo wa Xikwembu etindhawini hinkwato.”+ 61 Un’wana a ku: “Hosi, ndzi ta ku landzela kambe ndzi pfumelele ndzi rhanga hi ku ya lela vandyangu wa mina.” 62 Yesu a ku: “Loyi a rimaka kutani a khoma puluhu ivi a languta leswi nga endzhaku+ a nga faneriwi hi ku nghena eMfun’weni wa Xikwembu.”+

10 Endzhaku ka swilo leswi, Hosi yi hlawula vanhu van’wana va 70, yi va rhuma va famba hi vambirhimbirhi+ va yi rhangela, va ya emitini ni le tindhawini leti a yi ta ya eka tona. 2 Kutani yi ku eka vona: “Ntshovelo i wukulu kambe vatirhi a va talanga. Hikwalaho, kombelani N’wini wa ntshovelo a rhumela vatirhi entshovelweni wakwe.+ 3 Fambani. Vonani! Ndza mi rhuma ku fana ni swinyimpfana exikarhi ka timhisi.+ 4 Mi nga teki xipachi, kumbe nkwama wa swakudya, kumbe maphaxani+ naswona mi nga xeweti munhu endleleni. 5 Loko mi nghena emutini, rhangani mi ku: ‘Ku rhula a ku ve emutini lowu.’+ 6 Loko ku ri ni lava rhandzaka ku rhula, a va ve ni ku rhula loku mi va kombelelaka kona. Kambe loko va nga ri kona, ku ta vuyela eka n’wina. 7 Kutani tshamani endlwini yoleyo,+ mi dya ni ku nwa leswi va mi nyikaka swona,+ hikuva mutirhi u faneriwa hi hakelo yakwe.+ Mi nga suki endlwini yoleyo.

8 “Nakambe, loko mi nghena emutini ivi va mi amukela, dyanani leswi va mi nyikaka swona, 9 mi hanyisa lava vabyaka eka wona, mi tlhela mi va byela mi ku: ‘Mfumo wa Xikwembu wu le kusuhi.’+ 10 Kambe loko mi nghena emutini ivi va nga mi amukeli, humani mi ya etindleleni ta muti wolowo kutani mi ku: 11 ‘Ritshuri ra muti lowu leri nga emilengeni ya hina hi ri phumunhela eka n’wina.+ Kambe tivani leswaku Mfumo wa Xikwembu wu tshinele.’ 12 Ndza mi byela leswaku muti wolowo wu ta xupuriwa swinene hi siku rero ku tlula tiko ra Sodoma.+

13 “Khombo eka wena Korazini! Khombo eka wena Betsayida, hikuva loko masingita lama endliweke eka wena a ma endliwe eTiri ni le Sidoni, vanhu va kona a va ta va va hundzuke khale swinene va ambala swiambalo swo khwaxa va tshama enkumeni.+ 14 Hikwalaho, mi ta xupuriwa swinene hi siku ra vuavanyisi ku tlula miti ya Tiri na Sidoni. 15 Na wena Kapernawume, xana u ta tlakuseriwa etilweni? U ta ya eSirheni!*

16 “Loyi a mi yingisaka wa ndzi yingisa.+ Loyi a nga mi yingisiki a nga ndzi yingisi. Ku tlula kwalaho, loyi a nga ndzi yingisiki a nga n’wi yingisi ni Loyi a ndzi rhumeke.”+

17 Kutani lava 70 va vuya va tsakile, va ku: “Hosi, hambi ku ri madimona ma hi yingisa loko hi tirhisa vito ra wena.”+ 18 Kutani Yesu a ku eka vona: “Ndzi vona Sathana a wile+ hi le tilweni ku fana ni rihati. 19 Vonani! Ndzi mi nyike matimba ya ku kandziyela tinyoka ni swipame ni matimba yo hlula nala+ naswona a ku na nchumu lexi nga ta mi vavisa. 20 Hambiswiritano, mi nga tsaki hikwalaho ka leswi madimona ma mi yingisaka, kambe tsakani hikwalaho ka leswi mavito ya n’wina ma tsariweke etilweni.”+ 21 Hi nkarhi wolowo moya lowo kwetsima wu n’wi endla a tsaka kutani a ku: “Tatana, Hosi ya tilo ni misava, ndza ku dzunisa emahlweni ka vanhu lava, hikuva swilo leswi u swi fihlele lavo tlhariha ni lavo dyondzeka,+ u swi paluxela swihlangi. Tatana, u endle tano hikuva i ku rhandza ka wena.+ 22 Tatana u ndzi nyike swilo hinkwaswo naswona a nga kona loyi a tivaka N’wana handle ka Tatana naswona a nga kona loyi a tivaka Tatana handle ka N’wana,+ ni loyi N’wana a rhandzaka ku n’wi paluxa eka yena.”+

23 Hiloko a vulavula ni vadyondzisiwa va ri voxe, a ku: “Va tsaka vanhu lava matihlo ya vona ma vonaka swilo leswi mi swi vonaka.+ 24 Hikuva ndza mi byela, vaprofeta vo tala ni tihosi a va swi navela ku vona swilo leswi mi swi vonaka kambe a va swi vonanga,+ hambi ku ri ku twa swilo leswi mi swi twaka kambe a va swi twanga.”

25 Kutani wanuna un’wana loyi a a tiva Nawu a suka a yima leswaku a n’wi ringa, a ku: “Mudyondzisi, ndzi fanele ndzi endla yini leswaku ndzi kuma vutomi lebyi nga heriki?”+ 26 Yesu a n’wi hlamula a ku: “Nawu wu ri yini? Xana u hlayisa ku yini?” 27 A n’wi hlamula a ku: “‘U fanele u rhandza Yehovha* Xikwembu xa wena hi mbilu ya wena hinkwayo, hi vutomi bya wena hinkwabyo, hi matimba ya wena hinkwawo ni hi mianakanyo ya wena hinkwayo,’+ ni ‘ku rhandza warikwenu hi ndlela leyi u tirhandzaka ha yona.’”+ 28 Yesu a ku: “U hlamule kahle; yana emahlweni u endla tano kutani u ta kuma vutomi.”+

29 Kambe hi ku lava ku tiendla lonene,+ wanuna loyi a vutisa Yesu a ku: “Kahlekahle i mani warikwerhu?” 30 Yesu a hlamula a ku: “Wanuna un’wana a a rhelela a suka eYerusalema a ya eYeriko, kutani a hlangana ni swigevenga swi n’wi ba swi tlhela swi n’wi tekela swilo swa yena, hiloko swi baleka swi n’wi siya a ri kusuhi ni ku fa. 31 Kutani swi hatlana ni leswaku muprista un’wana a a famba hi ndlela yoleyo, kambe loko a n’wi vona, a n’wi hundza hi le tlhelweni. 32 Hi ndlela leyi fanaka, ku te Mulevhi, a n’wi vona kambe na yena a hundza hi le tlhelo. 33 Hiloko ku humelela Musamariya+ un’wana, loko a n’wi vona, a n’wi twela vusiwana. 34 Kutani a bohelela timbanga takwe, a ti chela mafurha ni vhinyo. A tlhela a n’wi khandziyisa xifuwo xakwe, a n’wi yisa endlwini ya vaendzi a n’wi khathalela. 35 Hi siku leri landzelaka a nyika n’wini wa yindlu ya vaendzi tidenari* timbirhi, a tlhela a ku: ‘N’wi khathalele naswona loko ko laveka mali yo tlula leyi, ndzi ta ku hakela loko ndzi vuya.’ 36 I mani eka lavanharhu loyi u vonaka a ri warikwavo+ eka munhu loyi a hlaseriweke hi swigevenga?” 37 A n’wi hlamula a ku: “Hi loyi a n’wi kombeke tintswalo.”+ Kutani Yesu a ku: “Famba u ya endla tano na wena.”+

38 Loko va ri karhi va famba, a nghena eximutanini xin’wana. Kutani wansati un’wana loyi a vuriwaka Marta+ a n’wi amukela endlwini yakwe. 39 Marta a a ri ni makwavo wa xisati loyi a vuriwaka Mariya, loyi a a tshame hi le milengeni ya Hosi a yingisa leswi a yi swi vula. 40 Kasi Marta, a a khomekile hi mitirho yo tala. Hiloko a ya eka Yesu a fika a ku: “Hosi, xana a wu na mhaka ni leswi makwerhu a nga ndzi pfuniki? N’wi byele a ta ndzi pfuna.” 41 Hosi yi n’wi hlamula yi ku: “Marta, Marta, u vilela ni ku karhateka hi swilo swo tala. 42 Ku laveka swilo switsongo kumbe xin’we ntsena. Loko ku ri Mariya, u hlawule leswinene+ naswona a nge tekeriwi swona.”

11 Enkarhini lowu, Yesu a a ri endhawini yin’wana a ri karhi a khongela, loko a heta, un’wana wa vadyondzisiwa vakwe a ku eka yena: “Hosi, hi dyondzise ndlela yo khongela, hilaha Yohane a dyondziseke vadyondzisiwa vakwe hakona.”

2 Hiloko a ku eka vona: “Loko mi khongela, vulani mi ku: ‘Tatana, vito ra wena a ri kwetsimisiwe.+ Mfumo wa wena a wu te.+ 3 Hi nyike xinkwa xa hina xa siku ni siku hi ku ya hi swilaveko swa hina.+ 4 Hi rivalele swidyoho swa hina,+ hikuva na hina ha va rivalela hinkwavo lava hi dyohelaka;+ u nga hi tshiki hi nghena endzingweni.’”+

5 A tlhela a ku: “A hi nge un’wana wa n’wina u ni munghana, kutani a ya eka yena nivusiku a fika a ku, ‘Munghana, ndzi lombe swinkwa swinharhu, 6 hikuva ndza ha ku endzeriwa hi un’wana wa vanghana va mina naswona ndzi hava swo n’wi nyika swona.’ 7 Munghana wakwe a n’wi hlamula a ri endzeni ka yindlu a ku: ‘Tshika ku ndzi karhata. Nyangwa se wu khiyiwile naswona mina ni vana va mina se hi etlele. A ndzi nge swi koti ku pfuka ndzi ku nyika swo karhi.’ 8 Ndza mi byela, u ta pfuka a n’wi nyika leswi a swi lavaka ku nga ri hileswi a nga munghana wakwe, kambe hikwalaho ka ku phikelela kakwe.+ 9 Hikwalaho ndzi ri eka n’wina, yanani emahlweni mi kombela,+ mi ta nyikiwa; yanani emahlweni mi lava, mi ta swi kuma; yanani emahlweni mi gongondza, mi ta pfuleriwa.+ 10 Hikuva loyi a kombelaka u ta nyikiwa,+ loyi a lavaka u ta swi kuma naswona loyi a gongondzaka u ta pfuleriwa. 11 Xana u kona tatana loyi loko n’wana wakwe a kombela nhlampfi, a nga n’wi nyikaka nyoka ematshan’weni ya nhlampfi?+ 12 Kumbe loko a kombela tandza, a nga n’wi nyikaka xipamu? 13 Hikwalaho, loko n’wina hambileswi mi nga vadyohi mi kota ku nyika vana va n’wina tinyiko letinene, xana Tata wa n’wina loyi a nge matilweni a nge va nyiki moya lowo kwetsima hilaha ku tlurisaka lava n’wi kombelaka?”+

14 Endzhakunyana a hlongola dimona eka munhu loyi a ri n’wi endle mbheveve.+ Loko dimona ri humile, munhu yoloye a sungula ku vulavula, hiloko mintshungu yi hlamala.+ 15 Kambe van’wana va ku: “U hlongola madimona hi Belzebule* hosi ya madimona.”+ 16 Van’wana va sungula ku n’wi sindzisa leswaku a va endlela singita+ leri humaka etilweni hi xikongomelo xo n’wi ringa. 17 Hi ku tiva leswi a va swi anakanya,+ a ku eka vona: “Mfumo wun’wana ni wun’wana lowu avaneke wa wa naswona ndyangu lowu avaneke a wu tiyi. 18 Hilaha ku fanaka, loko Sathana na yena a avanile, xana mfumo wakwe wu ta tiyisa ku yini ke? Hikuva mi ri ndzi hlongola madimona hi Belzebule. 19 Loko ndzi hlongola madimona hi Belzebule, xana vana va n’wina va ma hlongola hi mani? Hi yona mhaka leyi va nga ta mi avanyisa. 20 Kambe loko ku ri leswaku ndzi hlongola madimona hi matimba ya Xikwembu,*+ Mfumo wa Xikwembu se wu mi hundzile.+ 21 Loko wanuna wa matimba, la hlomeke kahle a rindza yindlu yakwe, u kota ku sirhelela nhundzu yakwe. 22 Kambe loko munhu un’wana loyi a nga ni matimba ku n’wi tlula a fika a lwa na yena a n’wi hlula, u ta teka matlhari yakwe hinkwawo lawa a a tshemba wona, a tlhela a avela van’wana nhundzu leyi a yi tekeke eka yena. 23 Loyi a nga yimiki na mina u lwa na mina naswona loyi a nga hlengeletiki na mina wa hangalasa.+

24 “Loko moya lowu nga basangiki wu huma eka munhu, wu ya emananga wu famba wu lava ndhawu yo wisela eka yona, kambe loko wu nga yi kumi wu ri, ‘Ndzi ta tlhelela endlwini ya mina leyi ndzi humeke eka yona.’+ 25 Loko wu fika wu kuma yi kukuriwile yi basa yi tlhela yi sasekisiwa. 26 Hiloko wu famba wu ya landza mimoya yin’wana ya nkombo leyi hombolokeke ngopfu ku tlula wona, loko yi nghenile endzeni, yi namba yi tshama kona. Kutani xiyimo xa munhu yoloye xi nyanya ku biha ku tlula eku sunguleni.”

27 Loko a ha vulavula, wansati un’wana loyi a a ri exikarhi ka ntshungu a ku: “Wa tsaka wansati loyi a ku velekeke a tlhela a ku mamisa!”+ 28 Kambe yena a ku: “Va tsaka lava twaka rito ra Xikwembu va tlhela va endla leswi ri swi vulaka!”+

29 Kuteloko mitshungu yi hlengeletanile, a ku: “Xitukulwana lexi i xitukulwana xo homboloka; xi lava singita, kambe a ku na singita leri xi nga ta ri vona handle ka singita ra Yonasi.+ 30 Leswi Yonasi+ a veke singita eka Vaninivha, ni N’wana wa munhu u ta va singita eka xitukulwana lexi. 31 Hosi ya xisati ya le dzongeni+ yi ta pfuxiwa swin’we ni vanhu va xitukulwana lexi loko ku avanyisiwa naswona yi ta xi gweva, hikuva yi tile yi huma hi le kule swinene ku ta twa vutlhari bya Solomoni. Kambe vonani, laha ku ni munhu wa nkoka ku tlula Solomoni.+ 32 Vavanuna va le Ninivha va ta pfuxiwa swin’we ni xitukulwana lexi hi nkarhi wa ku avanyisiwa naswona va ta xi gweva, hikuva va hundzukile eka leswi Yonasi a swi chumayeleke.+ Kambe vonani, laha ku ni munhu wa nkoka ku tlula Yonasi. 33 Loko munhu a lumeke rivoni a nga ri veki endhawini leyi tumbeleke kumbe ehansi ka basikiti,* kambe u ri veka ehenhla ka xo tlhandleka rivoni,+ leswaku lava nghenaka ri ta va voningela. 34 Rivoni ra miri i tihlo ra wena. Loko tihlo ra wena ri basile, miri wa wena hinkwawo wu ta vangama; kambe loko ri hombolokile, miri wa wena wu va munyama.+ 35 Hikwalaho, tiyiseka leswaku ku vonakala loku nga eka wena a hi munyama. 36 Kutani loko miri wa wena hinkwawo wu vangama ku nga ri na xiphemu lexi nga ni munyama, wu ta vangama ku fana ni loko wu voningeriwa hi rivoni.”

37 Loko a heta ku vula leswi, Mufarisi un’wana a n’wi kombela leswaku a ya dya na yena. Hiloko a nghena endlwini a ya tshama etafuleni. 38 Hambiswiritano, Mufarisi a hlamala loko a vona leswaku u dye a nga hlambanga* mavoko.+ 39 Kambe Hosi yi ku eka yena: “N’wina Vafarisi, mi basisa xinwelo ni ndyelo ehandle, kambe endzeni mi tele makwanga ni vuhomboloki.+ 40 N’wina vanhu lava nga anakanyiki! Loyi a endleke swa le handle xana a nga endlanga ni swa le ndzeni? 41 Loko u lava ku nyika swisiwana tinyiko,* swi nyike swi huma embilwini kutani u ta va loyi a baseke eka swilo hinkwaswo. 42 Khombo eka n’wina Vafarisi, hikuva mi nyikela vukhume bya musuzwana,* mbowa ni swimilana swin’wana leswi byariwaka,*+ kambe mi honisa vululami ni ku rhandza Xikwembu! Swilo leswi a mi boheka ku swi endla, kambe a mi nga fanelanga ku honisa leswin’wana.+ 43 Khombo eka n’wina Vafarisi, hikuva mi rhandza switulu swa le mahlweni emasinagogeni ni ku xewetiwa etimakete!+ 44 Mi ni khombo, hikuva mi fana ni masirha lama nga ha vonakiki,+ lawa vanhu va fambaka ehenhla ka wona va nga swi tivi!”

45 Un’wana wa lava tivaka Nawu a n’wi hlamula a ku: “Mudyondzisi, loko u vula sweswo na hina wa hi rhukana.” 46 Kutani a ku: “Mi ni khombo na n’wina vativi va Nawu, hikuva mi rhwexa vanhu mindzhwalo yo tika, kambe n’wina a mi yi khumbi hambi ku ri hi ritiho!+

47 “Mi ni khombo hikuva mi aka masirha ya vaprofeta, kambe va dlayiwe hi vakokwa wa n’wina!+ 48 Mi timbhoni ta mitirho ya vakokwa wa n’wina naswona mi pfumelelana na vona, hikuva va dlaye vaprofeta+ kambe n’wina mi aka masirha ya vona. 49 Hikwalaho ka vutlhari bya xona, Xikwembu xi te: ‘Ndzi ta va rhumela vaprofeta ni vaapostola, naswona va ta va dlaya va tlhela va xanisa van’wana va vona, 50 leswaku ngati ya vaprofeta hinkwavo leyi halatiweke hi mpfhuka misava yi va kona yi ta laviwa eka xitukulwana lexi,+ 51 ku sukela engatini ya Avele+ ku ya fika engatini ya Zakariya, loyi a dlayiweke exikarhi ka altari ni tempele.’+ Ndzi mi byela ntiyiso, xitukulwana lexi xi ta xupuriwa hikwalaho ka ngati ya vona.    

52 “Khombo eka n’wina vativi va Nawu, hikuva mi teke xikhiya lexi pfulelaka vanhu ku tiva Xikwembu. N’wina a mi ngheni naswona mi sivela lava lavaka ku nghena!”+

53 Loko a huma kona, vatsari ni Vafarisi va sungula ku n’wi tikisela swinene ni ku n’wi vutisa swivutiso swo tala, 54 va n’wi rhiya, leswaku va ta n’wi phasa hi leswi a swi vulaka.+

12 Hi nkarhi wolowo ntshungu wu hlengeletanile, lerova vanhu va sungula ni ku kandziyelana, kambe a rhanga hi ku dyondzisa vadyondzisiwa vakwe a ku: “Tivoneleni eka comela xa Vafarisi, ku nga vukanganyisi.+ 2 Kambe a ku na nchumu lowu tumbetiweke lowu nga ta ka wu nga paluxiwi, naswona a ku na xihundla lexi nga ta ka xi nga tiviwi.+ 3 Hikwalaho, leswi mi swi vulaka emunyameni, swi ta twiwa eku vonakaleni naswona leswi mi hlevetelaka ha swona exihundleni, swi ta chumayeriwa ehenhla ka tiyindlu. 4 Ku tlula kwalaho, ndza mi byela n’wina vanghana va mina,+ mi nga va chavi lava dlayaka miri kambe va tsandzeka ku endla swo tlula sweswo.+ 5 Kambe ndzi ta mi byela loyi mi faneleke ku n’wi chava: Chavani Loyi a dlayaka a tlhela a va ni matimba yo hoxa eGehena.*+ Ndza mi byela, Yoloye n’wi chaveni.+ 6 Xana swindzingiri swa ntlhanu a swi xavisiwi hi tisente* timbirhi? Kambe Xikwembu a xi rivali hambi ku ri xin’we xa swona.+ 7 Hambi ku ri misisi ya tinhloko ta n’wina yi hlayiwile hinkwayo.+ Mi nga chavi; mi va nkoka ku tlula swindzingiri swo tala.+

8 “Ndza mi byela, loyi a vulaka leswaku wa ndzi tiva emahlweni ka vanhu,+ N’wana wa munhu u ta vula leswaku wa n’wi tiva emahlweni ka tintsumi ta Xikwembu.+ 9 Kambe loyi a ndzi landzulaka emahlweni ka vanhu, na yena u ta landzuriwa emahlweni ka tintsumi ta Xikwembu.+ 10 Loyi a solaka N’wana wa munhu u ta rivaleriwa, kambe loyi a rhukanaka moya lowo kwetsima a nge rivaleriwi.+ 11 Loko va mi yisa emahlweni ka tinhlengeletano ta tiko,* eka vatirhela mfumo ni valawuri, mi nga vileli hi leswi mi nga ta swi vula kumbe ndlela leyi mi nga ta swi vula ha yona, loko mi tihlamulela eka lava mi hehlaka,+ 12 hikuva moya lowo kwetsima wu ta mi dyondzisa hi nkarhi wolowo leswi mi faneleke ku swi vula.”+

13 Hiloko un’wana exikarhi ka ntshungu a ku eka yena: “Mudyondzisi, byela makwerhu a ndzi avela rifuwo leri siyiweke hi tatana.” 14 Yesu a ku eka yena: “Munhu ndziwena, i mani loyi a nga ndzi veka ku va muavanyisi kumbe ku mi avela rifuwo ra n’wina?” 15 Hiloko a byela vanhu a ku: “Tshamani mi pfule matihlo, mi tivonela eka mixaka hinkwayo ya makwanga,+ hikuva hambiloko munhu a ri ni swilo swo tala, vutomi byakwe a byi humi eka swona.”+ 16 Kutani a va byela xifaniso, a ku: “Nsimu ya wanuna un’wana la fumeke a yi humesa swakudya swo tala. 17 Hiloko a sungula ku anakanya, a ku, ‘Leswi ndzi nga ha riki na ndhawu yo veka leswi ndzi swi tshoveleke, ndzi nga endla yini?’ 18 Kutani a ku, ‘Ndzi ta endla leswi:+ Ndzi ta hirimuxa switlati swa mina ndzi aka leswikulu, kutani ndzi ta veka mavele ni nhundzu ya mina hinkwayo kwalaho, 19 ndzi ku: “Ndzi ni swilo swo tala leswinene leswi nga ta tshama malembe yo tala; ndzi ta wisa, ndzi dya, ndzi nwa, ndzi tiphina.”’ 20 Kambe Xikwembu xi ku eka yena, ‘Wena loyi a nga anakanyiki, va lava ku ku dlaya vusiku bya namuntlha. I mani loyi a nga ta sala a kuma swilo hinkwaswo leswi u swi hlengeleteke?’+ 21 Swi tano hi munhu loyi a tihlengeletelaka xuma kambe a nga fuwanga eka Xikwembu.”+

22 Hiloko a byela vadyondzisiwa vakwe, a ku: “Hi yona mhaka ndzi nge, tshikani ku vilela hi vutomi bya n’wina ni hi leswi mi nga ta swi dya, kumbe ku vilela hi mimiri ya n’wina leswaku mi ta ambala yini.+ 23 Hikuva vutomi i bya nkoka ku tlula swakudya ni miri i wa nkoka ku tlula swiambalo. 24 Anakanyani hi mawukuwuku:* A ma byali mbewu kumbe ku tshovela; a ma na dulu kumbe xitlati; kambe Xikwembu xa ma wundla.+ Xana a mi va nkoka ku tlula swinyenyana?+ 25 I mani eka n’wina loyi a nga engetelaka nkarhinyana eka vutomi byakwe hikwalaho ko vilela? 26 Hikokwalaho, loko mi tsandzeka ku endla sweswo, hikwalaho ka yini mi vilela hi swilo leswin’wana?+ 27 Anakanyani hi ndlela leyi makhon’wa* ma kulaka ha yona: A ma tirhi naswona a ma rhungi swiambalo; kambe ndza mi byela leswaku hambi ku ri Solomoni eku vangameni kakwe hinkwako, a nga ambalanga ku fana na wona.+ 28 Kutani loko Xikwembu xi swi ambexa hi ndlela leyi swimilana swa nhova, leswi nga kona namuntlha ivi mundzuku swi hoxiwa exitikweni, xana xi nga tsandza hi yini ku mi ambexa hilaha ku tlurisaka, n’wina lava nga ni ripfumelo leritsongo? 29 Kutani tshikani ku vilela hi leswi mi nga ta dya swona ni leswi mi nga ta nwa swona, naswona tshikani ku tshama mi ri karhi mi vilela;+ 30 hikuva leswi hinkwaswo i swilo leswi vanhu vamatiko va swi lavaka ngopfu, kambe Tata wa n’wina wa swi tiva leswaku ma swi lava swilo leswi.+ 31 Ku ri na sweswo, yanani emahlweni mi lava Mfumo wa yena, kutani swilo leswin’wana mi ta nyikiwa swona.+

32 “Mi nga chavi n’wina va ntlhambinyana,+ hikuva Tata wa n’wina u tsakele ku mi nyika Mfumo.+ 33 Xavisani nhundzu ya n’wina mi nyika swisiwana tinyiko.*+ Tiendleleni swipachi leswi nga hlakariki, ku nga xuma lexi nga heriki ematilweni,+ laha khamba ri nga tshineliki ni nsumba yi nga onhiki. 34 Hikuva laha xuma xa n’wina xi nga kona ni timbilu ta n’wina ti ta va kona.

35 “Ambalani mi lungheka,+ mi lumeka ni timboni ta n’wina,+ 36 mi fanele ku fana ni vavanuna lava rindzeleke n’wini wa vona leswaku a vuya+ emucatweni,+ kutani loko a fika a gongondza va hatla va n’wi pfulela. 37 Ma tsaka malandza lawa loko n’wini wa wona a fika a nga ta ma kuma ma rindzile! Ndzi tiyisile ndzi ri eka n’wina, u ta ambala fasikoti a byela malandza leswaku ma tshama etafuleni kutani a ma phamela. 38 Ma ta tsaka loko a fika nivusiku* kumbe hi matakuxa* ivi a ma kuma ma rindzile! 39 Kambe tivani leswi, loko n’wini wa yindlu a a tiva nkarhi lowu khamba a ri ta fika ha wona, a a nga ta pfumela leswaku ri nghena endlwini yakwe.+ 40 Na n’wina, tshamani mi lunghekile, hikuva N’wana wa munhu u ta fika hi nkarhi lowu mi nga wu ehleketiki.”+

41 Kutani Petro a ku: “Hosi, xana u byela hina ntsena xifaniso lexi kumbe ni lavan’wana?” 42 Hosi yi ku: “Kahlekahle i mani nandza* wo tshembeka ni wo tlhariha, loyi n’wini wakwe a nga ta n’wi hlawula leswaku a khathalela malandza yakwe, a ma phamela swakudya leswi ringaneke hi nkarhi lowu faneleke?+ 43 Wa tsaka nandza yoloye, loyi loko n’wini wakwe a fika a nga ta n’wi kuma a endla tano! 44 Ndzi mi byela ntiyiso, u ta n’wi hlawula leswaku a hlayisa swilo swa yena hinkwaswo. 45 Kambe loko nandza yoloye o tibyela a ku, ‘N’wini wa mina wa hlwela ku vuya,’ kutani a sungula ku ba malandza ya xinuna ni ya xisati, a dya, a nwa a tlhela a dakwa,+ 46 n’wini wa nandza yoloye u ta ta hi siku leri a nga ri langutelangiki ni hi nkarhi lowu a nga wu tiviki, kutani u ta n’wi xupula hi ndlela ya tihanyi a n’wi veka endhawini yin’we ni lava nga tshembekiki. 47 Kutani nandza yoloye loyi a twisiseke leswi n’wini wakwe a lavaka swona kambe a nga lungheki kumbe ku endla leswi a komberiweke swona u ta biwa ngopfu.+ 48 Kambe loyi a nga twisisangiki ivi a endla swilo leswi lavaka leswaku a xupuriwa u ta biwa katsongo. Loyi a nyikiweke vutihlamuleri byo tala, ku ta languteriwa swo tala eka yena, kasi loyi a hlawuriweke ku hlayisa swilo swo tala ku ta languteriwa swo tala ngopfu eka yena.+

49 “Ndzi tele ku ta lumeka ndzilo emisaveni, kutani loko se wu lumekiwile ndzi nga endla yini swin’wana? 50 Ku ni nkhuvulo lowu ndzi faneleke ku khuvuriwa ha wona, naswona ndza karhateka ku kondza wu hetiseka!+ 51 Xana mi ehleketa leswaku ndzi tise ku rhula emisaveni? A swi tano, kambe ndzi tise ku avana.+ 52 Hikuva ku sukela sweswi ku ta va ni timholovo endyangwini. Loko ku ri ni vanhu va ntlhanu, vanharhu va ta holova na vambirhi naswona vambirhi a va nge twani ni lava vanharhu. 53 Va ta avana, tatana ni n’wana wakwe wa jaha ni n’wana wa jaha ni tata wakwe, manana ni n’wana wakwe wa nhwanyana ni n’wana wa nhwanyana ni mana wakwe, n’wingi ni nhlomi ya yena ni nhlomi ni n’wingi wa yona.”+

54 A byela mintshungu a ku: “Loko mi vona papa ri humelela hi le vupeladyambu, mi ri, ‘Xidzedze xi le ku teni,’ kutani swi va tano. 55 Loko mi vona moya wu huma hi le dzongeni, mi ri, ‘Ku ta va ni moya wo hisa,’ kutani swi va tano. 56 Vakanganyisi ndzin’wina, ma swi tiva ku hlamusela ta maxelo, kambe hikwalaho ka yini mi tsandzeka ku twisisa leswi endlekaka hi nkarhi lowu?+ 57 Hikwalaho ka yini mi nga swi twisisi leswi mi faneleke mi swi endla? 58 Hi xikombiso, loko u ya endhuneni ni loyi a ku mangalelaka, ringeta ku lulamisa timhaka na yena ma ha ri endleleni, leswaku a nga ku yisi eka muavanyisi, kutani muavanyisi a ku yisa eka mutirhi wa le hubyeni, ivi mutirhi yoloye a ku pfalela ekhotsweni.+ 59 Ndza ku byela, a wu nge humi kwalaho u nga si humesa sente* ya wena yo hetelela.”

13 Hi nkarhi wolowo a ku ri ni van’wana lava vikeleke Yesu hi ta Vagaleliya lava Pilato a va dlayeke loko va ri karhi va endla magandzelo. 2 Kutani a va hlamula a ku: “Xana mi anakanya leswaku leswi Vagaleliya lava, va humeleriweke hi khombo leri, a va dyohe ngopfu ku tlula Vagaleliya lavan’wana hinkwavo? 3 A swi tano; kambe loko mi nga hundzuki, na n’wina mi ta lovisiwa hinkwenu ku fana na vona.+ 4 Kumbe lava 18 lava weriweke hi xihondzo xa le Silowama, xi va dlaya, xana mi anakanya leswaku a va dyohe ngopfu ku tlula vanhu hinkwavo lava tshamaka eYerusalema? 5 A swi tano; kambe loko mi nga hundzuki na n’wina mi ta lovisiwa hinkwenu ku fana na vona.”

6 Hiloko a va byela xifaniso a ku: “Wanuna un’wana a a ri ni nkuwa lowu a wu byariwe ensin’wini yakwe ya madiriva, hiloko a ya lava mihandzu eka wona, kambe a nga kumanga nchumu.+ 7 Kutani a byela mutirhi a ku, ‘Se swi endla malembe manharhu ndzi ta lava mihandzu eka nkuwa lowu kambe a ndzi kumi nchumu. Wu tseme hikuva a wu pfuni nchumu!’ 8 A n’wi hlamula a ku, ‘N’wini wanga, wu tshike lembe leri, ndzi ta cela ematlhelweni ka wona ndzi chela manyoro. 9 Swi ta va swinene loko wo humesa mihandzu; kambe loko swi nga ri tano, wu tseme.’”+

10 Siku rin’wana Yesu a a ri eku dyondziseni esinagogeni hi Savata. 11 A ku ri ni wansati un’wana loyi a a ri ni dimona ku ringana malembe ya 18; a a tshama a govekile naswona a a nga swi koti ku ololoka. 12 Kuteloko Yesu a n’wi vona, a ku: “Wansati, u hanyisiwile.”+ 13 Hiloko a n’wi tlhandleka mavoko, kutani a ololoka hi nkarhi wolowo ivi a sungula ku dzunisa Xikwembu. 14 Kambe ndhuna ya sinagoga yi hlundzuka hileswi Yesu a hanyiseke wansati loyi hi Savata, kutani yi byela ntshungu yi ku: “Ku ni masiku ya tsevu lawa ntirho wu faneleke ku endliwa ha wona;+ tanani hi masiku wolawo leswaku mi ta hanyisiwa, ku nga ri hi siku ra Savata.”+ 15 Hambiswiritano, Hosi yi n’wi hlamula yi ku: “Vakanganyisi+ ndzin’wina, xana a mi yi tshunxi nkuzi kumbe mbhongolo exivaleni hi Savata leswaku mi ya yi nwisa mati?+ 16 Xana a swi nga fanelanga leswaku wansati loyi, loyi a nga ntukulu wa Abrahama, loyi Sathana a n’wi xaniseke malembe ya 18, a horisiwa hi siku ra Savata?” 17 Loko a heta ku vula sweswo, vakaneti vakwe hinkwavo va khomiwa hi tingana, kambe ntshungu hinkwawo wu tsaka hikwalaho ka swilo hinkwaswo leswi a swi endleke.+

18 Hiloko a ku: “Xana Mfumo wa Xikwembu wu fana na yini naswona ndzi nga wu fanisa na yini? 19 Wu fana ni ndzoho ya sinapi leyi munhu a yi tekeke a ya yi byala ensin’wini yakwe, kutani yi kula yi va murhi, ivi swinyenyana swi kuma ndhawu yo tshama emarhavini ya wona.”+

20 A tlhela a ku: “Xana Mfumo wa Xikwembu ndzi nga wu fanisa na yini? 21 Wu fana ni comela lexi wansati a xi tekeke a xi pfuva ni mimpimo yinharhu* ya mapa, kukondza mbila hinkwayo yi kukumuka.”+

22 Loko a ri endleleni yo ya eYerusalema a famba a nghena emitini ni le swimitanini a dyondzisa. 23 Wanuna un’wana a n’wi vutisa a ku: “Hosi, xana lava ponisiwaka i vatsongo?” A va hlamula a ku: 24 “Tikarhateni leswaku mi nghena hi nyangwa leyo lala,+ hikuva ndza mi byela, vo tala va ta swi navela ku nghena kambe va ta tsandzeka. 25 Loko n’wini wa yindlu a pfuka a khiya nyangwa, mi ta yima ehandle mi gongondza, mi ku, ‘Hosi, hi pfulele.’+ Kambe u ta mi hlamula a ku: ‘A ndzi ku tivi lomu mi humaka kona.’ 26 Kutani mi ta ku, ‘A hi dya hi tlhela hi nwa na wena, naswona u dyondzisile exikarhi ka muti wa hina.’+ 27 Kambe u ta ku eka n’wina, ‘A ndzi ku tivi lomu mi humaka kona. Sukani eka mina, n’wina hinkwenu vaendli va leswo homboloka!’ 28 Kwalaho hi laha mi nga ta rila mi tlhela mi getsela ni meno loko mi vona Abrahama, Isaka, Yakobo ni vaprofeta hinkwavo eMfun’weni wa Xikwembu, kambe n’wina mi cukumeteriwa ehandle.+ 29 Ku tlula kwalaho, vanhu va ta ta va huma hi le vuxeni ni le vupeladyambu ni le n’walungwini ni le dzongeni, va fika va tshama etafuleni eMfun’weni wa Xikwembu. 30 Vonani! Lavo hetelela va ta va vo sungula kasi lavo sungula va ta va vo hetelela.”+

31 Hi nkarhi wolowo Vafarisi van’wana va ta eka yena va fika va ku: “Famba hikuva Heroda u lava ku ku dlaya.” 32 A va hlamula a ku: “Fambani mi ya byela mhungubye yoleyo mi ku, ‘Namuntlha ni mundzuku ndzi ta hlongola madimona ndzi tlhela ndzi hanyisa lava vabyaka naswona hi siku ra vunharhu ndzi ta va ndzi hetile.’ 33 Nilokoswiritano, ndzi fanele ndzi famba ndzi ya eYerusalema namuntlha, mundzuku ni mundlwana, hikuva muprofeta u fanele a dlayeriwa eYerusalema.+ 34 Yerusalema, Yerusalema, mudlayi wa vaprofeta ni loyi a va khandlaka hi maribye lava rhumiweke eka yena,+ i ko tala ndzi lava ku hlengeleta vana va wena ku fana ni mbhaha loko wu hlengeleta swiciwana ehansi ka timpapa ta wona! Kambe a wu nga swi lavi.+ 35 Maswivo! Yindlu ya n’wina yi le kusuhi ni ku lovisiwa.+ Ndza mi byela, a mi nge he ndzi voni ku fikela loko mi ku: ‘U katekile loyi a taka hi vito ra Yehovha!’”*+

14 Siku rin’wana hi Savata, Yesu u ye endlwini ya murhangeri un’wana wa Vafarisi leswaku a ya dya swakudya, naswona lava a va ri endlwini yoleyo a va n’wi veke tihlo. 2 Kutani emahlweni ka yena a ku ri ni wanuna loyi a a ri ni vuvabyi bya ku pfimba mavoko ni milenge. 3 Hiloko Yesu a vutisa lava a va tiva Nawu ni Vafarisi, a ku: “Xana swa pfumeleriwa ku hanyisa munhu hi Savata kumbe a swi pfumeleriwi?”+ 4 Kambe a va n’wi hlamulanga. Hiloko a khoma wanuna yoloye, a n’wi hanyisa a n’wi tshika a famba. 5 Kutani a ku eka vona: “I mani eka n’wina loyi loko n’wana wakwe kumbe nkuzi yakwe yo wela exihlobyeni+ a nga ta ka a nga hatli a yi humesa hi siku ra Savata?”+ 6 A va n’wi hlamulanga.

7 Loko a xiya leswaku vanhu lava a va rhambiwile a va tihlawulela switulu leswi hlawulekeke,+ a va byela xifaniso, a ku: 8 “Loko u rhambiwile emucatweni, u nga tshami exitulwini lexi hlawulekeke.+ Swi nga ha endleka ku rhambiwe ni un’wana loyi a xiximekaka ngopfu ku tlula wena. 9 Kutani loyi a mi rhambeke u ta ta eka wena a ku, ‘Suka ku tshama munhu loyi.’ Hikwalaho u ta suka u ri ni tingana u ya tshama exitulwini xa le ndzhaku. 10 Kambe loko u rhambiwile, tshama exitulwini xa le ndzhaku, leswaku loko loyi a ku rhambeke a ta, a fika a ku, ‘Munghana, tana u ta tshama haleno mahlweni.’ Vaendzi lavan’wana va ta ku xixima.+ 11 Hikuva un’wana ni un’wana loyi a titlakusaka u ta tsongahatiwa kasi loyi a titsongahataka u ta tlakusiwa.”+

12 Endzhaku ka sweswo, Yesu a byela loyi a n’wi rhambeke a ku: “Loko u sweka swakudya swa dina kumbe swo lalela, u nga rhambi vanghana va wena kumbe vamakwenu kumbe maxaka ya wena kumbe vaakelani va wena lava fuweke. Na vona va nga tlhela va ku rhamba hikwalaho ka leswi u va rhambeke, yoleyo ku ta va ku ri hakelo ya wena. 13 Kambe loko u endla nkhuvo, rhamba swisiwana, lava lamaleke, lava khwitaka ni lava feke matihlo;+ 14 kutani u ta tsaka, hikuva vona a va na nchumu xo ku hakela ha xona. Kambe Xikwembu xi ta ku hakela loko xi pfuxa+ lava lulameke.”

15 Loko muendzi un’wana a twa sweswo, a ku eka yena: “Wa tsaka loyi a dyaka* eMfun’weni wa Xikwembu.”

16 Yesu a ku eka yena: “Wanuna un’wana a a endle nkhuvo lowukulu,+ ivi a rhamba vanhu vo tala. 17 U rhume nandza wakwe hi nkarhi wa nkhuvo leswaku a ya vitana lava rhambiweke a ku, ‘Tanani, hikuva swakudya se swi lunghile.’ 18 Kambe hinkwavo va sungula ku ala va vula swivangelo swo hambanahambana.+ Lowo sungula a ku, ‘Ndzi xave nsimu kutani ndzi fanele ndzi ya yi vona; ndzi khomele a ndzi nge swi koti.’ 19 Un’wana a ku, ‘Ndzi xave tihomu ta khume, ndzi lava ku ya ti vona; ndzi khomele a ndzi nge swi koti.’+ 20 Un’wanyana a ku, ‘Ndza ha ku teka nsati, hikwalaho a ndzi nge ti.’ 21 Kutani nandza a byela n’wini wakwe swilo leswi. Hiloko n’wini wa yindlu a kariha, a byela nandza wakwe a ku, ‘Hatlisa u ya eswitarateni leswikulu ni le swindlelanini swa muti, u ya vitana swisiwana, lava lamaleke, lava feke mahlo ni lava khwitaka.’ 22 Loko nandza a vuya a ku, ‘N’wini wanga, ndzi swi endlile leswi u ndzi leriseke swona, kambe ndhawu ya ha ri kona.’ 23 Kutani n’wini a byela nandza a ku, ‘Yana etindleleni ni le swindlelanini, u ya kombela lava u nga ta va kuma leswaku va ta, leswaku yindlu ya mina yi ta tala.+ 24 Hikuva ndza mi byela, lava rhambiweke a va nge dyi swakudya swa mina swo lalela.’”+

25 A ku ri ni mintshungu leyi a yi famba na Yesu, hiloko a hundzuluka a ku: 26 “Loko munhu a lava ku ndzi landzela kambe a nga vengi tata wakwe, mana wakwe, nsati wakwe, vana vakwe ni vamakwavo, hambi ku ri ku venga vutomi byakwe,+ a nge vi mudyondzisiwa wa mina.+ 27 Loyi a nga rhwaliki mhandzi yakwe ya nxaniso* a ndzi landzela a nge vi mudyondzisiwa wa mina.+ 28 Hi xikombiso, i mani eka n’wina loyi loko a lava ku aka yindlu* a nga rhangiki hi ku hlayela swilo hinkwaswo leswi lavekaka ku vona loko a ri ni mali leyi ringaneke ku yi heta? 29 Loko a nga endli tano, a nga ha sungula ku yi aka kambe a nga swi koti ku yi heta, kutani lava hlaleleke va ta sungula ku n’wi hleka, 30 va ku: ‘Munhu loyi u sungule ku aka kambe a nga swi kotanga ku heta.’ 31 Kumbe hi yihi hosi leyi loko yi ya lwa ni hosi yin’wana, yi nga rhangiki yi kanela ni van’wana ku vona loko yi ta swi kota ku lwa ni hosi leyi nga ni masocha ya 20 000 loko yona yi ri ni masocha ya 10 000? 32 Loko yi swi xiya leswaku a yi nge swi koti, yi rhuma vanhu eka hosi leyin’wana ya ha ri ekule leswaku va ya kombela ku rhula. 33 Hilaha ku fanaka, loyi a nga swi siyiki* swilo hinkwaswo leswi a nga na swona, a nge vi mudyondzisiwa wa mina.+

34 “Kahlekahle, munyu i wunene. Kambe loko munyu wu heleriwa hi matimba, wu nga lungiwa hi yini?+ 35 A wu nge cheriwi emisaveni kumbe wu endliwa manyoro. Vanhu va wu cukumeta. Loyi a nga ni tindleve ta ku yingisa, a a yingise.”+

15 Valuvisi* hinkwavo ni vadyohi a va ta eka Yesu va ta n’wi yingisela.+ 2 Kambe Vafarisi ni vatsari a va tshamela ku gungula va ku: “Munhu loyi i munghana wa vadyohi naswona u dya na vona.” 3 Hiloko a va byela xifaniso, a ku: 4 “I mani eka n’wina loyi loko a ri ni tinyimpfu ta 100, kutani a lahlekeriwa hi yin’we, a nga ta ka a nga siyi leta 99 enhoveni, a ya lava leyi lahlekeke kukondza a yi kuma?+ 5 Loko a yi kumile wa yi tlakula* kutani a tsaka. 6 Loko a fika ekaya a vitana vanghana ni vaakelani vakwe, a ku, ‘Tsakani na mina, hikuva ndzi kume nyimpfu ya mina leyi a yi lahlekile.’+ 7 Hilaha ku fanaka, ku ta va ni ntsako lowukulu swinene etilweni loko mudyohi un’we a hundzuka+ ku tlula lava 99 lava lulameke naswona swi nga laviki leswaku va hundzuka.

8 “Kumbe i mani wansati loyi a nga ni tidrakma* ta khume, loyi loko a lahlekeriwe hi drakma* yin’we, a nga lumekiki rivoni a kukula yindlu ya yena, a yi lava hi vukheta kukondza a yi kuma? 9 Kutani loko a yi kumile a vitana vanghana* ni vaakelani vakwe, a ku, ‘Tsakani na mina, hikuva ndzi kume drakma* ya mina leyi a yi ndzi lahlekerile.’ 10 Hilaha ku fanaka, ndza mi byela, tintsumi ta Xikwembu ta tsaka loko mudyohi un’we a hundzuka.”+

11 Kutani a ku: “A ku ri ni wanuna un’wana loyi a a ri ni vana vambirhi va majaha. 12 Hiloko lontsongo eka vona a byela tata wakwe a ku, ‘Tatana, ndzi avele rifuwo ra mina eka leswi u nga na swona.’ Kutani tata wa vona a va avela rifuwo rakwe. 13 Endzhaku ka masikunyana, lowa rikotse a hlengeleta swilo swakwe hinkwaswo a ya etikweni ra le kule, a fika a tlanga hi rifuwo rakwe hi ku hanya vutomi bya vusopfa. 14 Loko hinkwaswo leswi a a ri na swona swi herile, ku va ni ndlala leyikulu etikweni rero, kutani a sungula ku dlawa hi ndlala. 15 U kale a ya tirhela un’wana wa vaaki va tiko rero, kutani a n’wi nyika ntirho wo risa tinguluve emasin’wini yakwe.+ 16 A a navela ni ku dya swakudya* leswi a swi dyiwa hi tinguluve, hikuva a ku nga ri na munhu loyi a n’wi nyika swakudya.

17 “Loko a anakanyisise kahle, a ku, ‘Ku ni vanhu vo tala lava thoriweke hi tatana, va ni swakudya swo tala kambe mina ndza fa hi ndlala! 18 Ndzi ta tlhelela eka tatana, ndzi fika ndzi ku: “Tatana, ndzi dyohele Xikwembu etilweni swin’we na wena. 19 A swa ha ndzi faneli ku va n’wana wa wena. Ndzi endle un’wana wa vatirhi va wena.”’ 20 Hiloko a tlhelela eka tata wakwe. Loko a ha ri ekulenyana, tata wakwe a n’wi vona a n’wi twela vusiwana, a tsutsuma a n’wi hlanganisa a fika a n’wi angarha,* a n’wi tswontswa. 21 Hiloko a byela tata wakwe a ku, ‘Tatana, ndzi dyohele Xikwembu etilweni swin’we na wena.+ A swa ha ndzi faneli ku vuriwa n’wana wa wena.’ 22 Kambe tata wakwe a byela malandza yakwe a ku, ‘Hatlisani mi ta ni nguvu leyinene ku tlula hinkwato, mi n’wi ambexa yona, mi n’wi hoxa ni xingwavila evokweni ni maphaxani emilengeni. 23 Tisani ni xinkuzana xo nona, mi xi tlhava, hi dya hi tiphina, 24 hikuva n’wana loyi wa mina a a file kambe se wa hanya;+ a a lahlekile kutani u kumekile.’ Hiloko va sungula ku tiphina.

25 “N’wana wakwe lonkulu a a ri emasin’wini, loko a vuya a fika ekusuhi ni yindlu, a twa vuyimbeleri ni ku cina. 26 Hiloko a vitana un’wana wa malandza, a n’wi vutisa leswaku ku humelela yini. 27 Nandza a hlamula a ku, ‘Makwenu u vuyile, kutani tata wa wena u tlhave xinkuzana xo nona, hikuva u vuye a hanye kahle.’ 28 Hiloko a hlundzuka a ala ni ku nghena endlwini. Kutani tata wakwe a huma, a fika a n’wi khongotela. 29 Hiloko a hlamula tata wakwe a ku, ‘Ndzi ni malembe yo tala ndzi ri karhi ndzi ku tirhela, naswona ndza ku yingisa mikarhi hinkwayo, kambe a wu si tshama u ndzi nyika ximbutana leswaku ndzi tiphina ni vanghana va mina. 30 Kambe loko ku fika n’wana loyi wa wena, loyi a dyeke rifuwo ra wena ni tinghwavava, u n’wi tlhavele xinkuzana xo nona.’ 31 Kutani tata wakwe a ku, ‘N’wananga, a wu si tshama u famba u ndzi siya, naswona swilo hinkwaswo leswi nga swa mina i swa wena. 32 Swi fanerile ku va hi tiphina hi tsaka, hikuva makwenu a a file kambe se wa hanya; a a lahlekile kutani u kumekile.’”

16 Yesu a tlhela a byela vadyondzisiwa vakwe a ku: “A ku ri ni wanuna un’wana loyi a a fuwile, kutani a vikeriwa leswaku nandza* wakwe u tlanga hi nhundzu yakwe. 2 Hiloko a n’wi vitana a ku, ‘Ndzi twe mahungu yo biha hi wena. Tsala xiviko xa ndlela leyi u tirhiseke mali ya mina ha yona, hikuva ndzi lava ku ku hlongola.’ 3 Hiloko nandza a anakanya a ku, ‘Xana ndzi ta endla yini leswi n’wini wa mina a ndzi hlongolaka? A ndzi na matimba yo tirha ntirho wo cela naswona swi ndzi khomisa tingana ku kombela. 4 Ahaa! Ndza swi tiva leswi ndzi nga ta swi endla leswaku loko ndzi hlongoriwa entirhweni, vanhu va ta ndzi amukela emakaya ya vona.’ 5 Hiloko a vitana lava kolotaka n’wini wakwe, kutani a vutisa lowo sungula a ku, ‘Xana u n’wi kolota yini n’wini wanga?’ 6 A ku, ‘Tibati* ta 100 ta mafurha ya mutlhwari.’ A ku eka yena, ‘Hi lowu ntwanano lowu u wu sayineke, tshama ehansi u hatla u tsala 50.’ 7 Hiloko a vutisa un’wana a ku, ‘Wena ke, xana u kolota yini?’ A hlamula a ku, ‘Tikoro* ta 100 ta koroni.’ A ku eka yena, ‘Hi lowu ntwanano lowu u wu sayineke, wu teke u tsala 80.’ 8 Hambileswi nandza loyi a endleke swo biha, n’wini wakwe u n’wi bumabumerile hikuva leswi a swi endleke swi kombise leswaku u tlharihile; hikuva vanhu va misava leyi va tlharihile loko va tirhisana ni vanhu va rixaka ra vona ku tlula lava nga le ku vonakaleni.+

9 “Nakambe, ndza mi byela: Tiendleleni vanghana hi rifuwo leri nga lulamangiki,+ leswaku loko ri hela, va ta mi amukela eka vutshamo lebyi nga heriki.+ 10 Munhu loyi a tshembekaka eka leswitsongo u ta tshembeka ni le ka swo tala, naswona loyi a nga tshembekiki eka leswitsongo a nge tshembeki ni le ka swo tala. 11 Hikwalaho, loko mi nga tshembeki eka rifuwo leri nga lulamangiki, i mani loyi a nga ta mi khomisa rifuwo ra ntiyiso? 12 Loko mi nga tshembeki eka swilo swa van’wana, a nga kona loyi a nga ta mi nyika leswi faneleke swi va swa n’wina.+ 13 A ku na nandza loyi a nga tirhelaka tihosi timbirhi, hikuva u ta venga yin’wana a rhandza leyin’wana, kumbe u ta namarhela yin’wana kutani a yi langutela ehansi leyin’wana. A mi nge vi mahlonga ya Xikwembu ni ya Rifuwo.”+

14 Vafarisi lava a va rhandza mali, a va n’wi yingiserile, kutani va sungula ku n’wi poyila.+ 15 Hiloko Yesu a ku eka vona: “Mi tiendla lava lulameke emahlweni ka vanhu,+ kambe Xikwembu xi tiva timbilu ta n’wina.+ Hikuva leswi nga swa nkoka eka vanhu i swilo leswi nyenyetsaka eka Xikwembu.+

16 “Nawu ni Vaprofeta swi ve kona ku fika eka Yohane. Ku sukela kwalaho, ku chumayeriwa mahungu lamanene ya Mfumo wa Xikwembu, naswona vanhu hinkwavo va tikarhatela ku wu kuma.+ 17 Hambiloko matilo ni misava swo hundza, kambe ku hava xiphemu ni xin’we xa nhlanga ya Nawu lexi nga ta ka xi nga humeleli.+

18 “Loyi a tshikaka nsati wakwe a teka un’wana u endla vuoswi, naswona loyi a tekaka wansati loyi a tshikaneke ni nuna wakwe u endla vuoswi.+

19 “A ku ri ni wanuna un’wana loyi a a fuwile naswona a a ambala swiambalo swa phephulu* swo saseka ni swa lapi ra xiyimo xa le henhla, a a hanya emafurheni. 20 Kambe a ku ri ni xisiwana* lexi vito ra xona a ku ri Lazaro naswona miri wa xona a wu tele hi swilondza, a xi hamba xi vekiwa egedeni ya xifumi lexi, 21 a xi navela ku dya mahlanhla lawa a ma wa etafuleni ra xifumi. Ni timbyana a ti ta, ti fika ti nantswela swilondza swa xona. 22 Hi ku famba ka nkarhi xisiwana xi fa kutani tintsumi ti xi teka ti xi yisa eka Abrahama.*

“Ni xifumi na xona xi fa, ivi xi lahliwa. 23 Loko xifumi xi ri eSirheni* xi ri karhi xi xaniseka, xi vona Abrahama le kule na Lazaro etlhelo ka yena. 24 Hiloko xifumi xi huwelela xi ku, ‘Tatana Abrahama, ndzi twele vusiwana u rhuma Lazaro a peta ritiho rakwe ematini a ta timula ririmi ra mina, hikuva ndzi le ku tshweni hi malangavi lawa ya ndzilo.’ 25 Kambe Abrahama a ku, ‘N’wananga, tsundzuka leswaku u tiphinile hi vutomi hi nkarhi wa wena, kambe Lazaro a a xaniseka. Sweswi u le ku chaveleriweni, kambe wena u le maxangwini. 26 Handle ka sweswo, ku ni riwa lerikulu exikarhi ka hina na wena lerova a swi koteki ku ta eka wena naswona a wu nge swi koti ku ta haleno.’ 27 Kutani xifumi xi ku, ‘Loko swi ri tano, ndza ku kombela tatana leswaku u n’wi rhuma endlwini ya tatana, 28 hikuva ndzi ni vamakwerhu va ntlhanu, ndzi lava a ya va hlamusela kahle, leswaku na vona va nga tikumi va ri endhawini leyi ya nhlomulo.’ 29 Kambe Abrahama a ku, ‘Va na Muxe ni Vaprofeta; a va va yingise.’+ 30 Xifumi xi ku, ‘Tatana Abrahama, loko ko ya un’wana loyi a pfuxiweke eka lava feke va ta hundzuka.’ 31 Kambe Abrahama a ku, ‘Loko va nga yingisi Muxe+ ni Vaprofeta, a va nge n’wi yingisi ni munhu loyi a pfukeke eka vafi.’”

17 Kutani Yesu a byela vadyondzisiwa vakwe a ku: “Swikhunguvanyiso a swi papalateki. Kambe, khombo eka loyi a khunguvanyisaka van’wana! 2 A swi ta antswa swinene loko o tsimbiwa ribye ro sila enhan’wini a hoxiwa elwandle ku ri ni ku va a khunguvanyisa un’wana wa lavatsongo.+ 3 Tivoneleni. Loko makwenu a endla xidyoho n’wi tshinye,+ loko a hundzuka, n’wi rivalele.+ 4 Hambiloko o ku dyohela ka nkombo hi siku ivi a vuya eka wena ka nkombo a ku, ‘Ndzi rivalele,’ u fanele u n’wi rivalela.”+

5 Kutani vaapostola va byela Hosi va ku: “Hi nyike ripfumelo leri engetelekeke.”+ 6 Kutani Hosi yi ku: “Loko a mi ri ni ripfumelo leri ringanaka ni ndzoho ya sinapi, a mi ta byela murhi lowu wa murubeyila mi ku, ‘Simuka u ya mila elwandle,’ naswona a wu ta mi yingisa.+

7 “I mani eka n’wina loyi a nga ni nandza loyi a n’wi rimelaka masimu kumbe a n’wi riselaka swifuwo, kutani loko a vuya hi le masin’wini a nga ta n’wi byela a ku, ‘Tana hi ta dya swin’we’? 8 Xana a nge vuli a ku, ‘Ndzi lunghiselele swakudya leswi ndzi nga ta lalela ha swona, u ambala fasikoti u ndzi phamela kukondza ndzi heta ku dya ni ku nwa, endzhaku ka sweswo na wena u nga dya ni ku nwa’? 9 Xana u ta n’wi khensa nandza wakwe hikwalaho ka leswi a endleke ntirho wakwe? Doo! 10 Kutani na n’wina, loko mi endle mitirho hinkwayo leyi mi nyikiweke yona, vulani mi ku: ‘Hi malandza lama nga pfuniki nchumu. Leswi hi nga swi endla hi leswi a hi fanele ku swi endla.’”+

11 Kuteloko a ya eYerusalema, a hundza exikarhi ka Samariya na Galeliya. 12 Loko a nghena eximutanini xin’wana a hlanganisiwa hi vavanuna va khume lava nga ni nhlokonho, kambe a va yime ekulenyana.+ 13 Hiloko va huwelela va ku: “Yesu, Mudyondzisi, hi twele vusiwana!” 14 Kuteloko a va vona a ku: “Fambani mi ya voniwa hi vaprista.”+ Kutani loko va ri karhi va famba va hanyisiwa.+ 15 Loko un’wana wa vona a vona leswaku u hanyisiwile, hiloko a tlhela a ri karhi a dzunisa Xikwembu hi ntsako. 16 A khinsama emilengeni ya Yesu xikandza xakwe xi languta ehansi, a n’wi khensa. Wanuna loyi a a ri Musamariya.+ 17 Yesu a ku: “Xana a va hanyisiwanga va ri khume? Kutani xana lava kaye va kwihi? 18 Xana a ku na un’wana loyi a vuyeke a ta dzunisa Xikwembu handle ka wanuna loyi wa rixaka rin’wana?” 19 Kutani a ku eka yena: “Pfuka u famba; ripfumelo ra wena ri ku hanyisile.”+

20 Loko Vafarisi va n’wi vutisa leswaku Mfumo wa Xikwembu wu ta ta rini,+ a va hlamula a ku: “Loko Mfumo wa Xikwembu wu ta, vo tala a va nge wu xiyi; 21 naswona vanhu a va nge vuli va ku, ‘Vonani hi lowu,’ kumbe ‘Hi lowuya!’ Hikuva Mfumo wa Xikwembu wu le xikarhi ka n’wina.”+

22 Kutani a byela vadyondzisiwa vakwe a ku: “Ku ta fika nkarhi lowu mi nga ta navela ku va ni N’wana wa munhu, kambe a swi nge koteki. 23 Kutani vanhu va ta ku, ‘Vonani hi luya,’ kumbe, ‘Vonani hi loyi!’ Mi nga yi kumbe ku va landzelela.+ 24 Ku fana ni rihati leri hatimaka ku suka eka tlhelo rin’wana ra tilo ku ya eka tlhelo lerin’wana, swi ta va tano hi N’wana wa munhu+ hi nkarhi wolowo.+ 25 Hambiswiritano, u fanele a rhanga a langutana ni maxangu ni ku nyenyiwa hi xitukulwana lexi.+ 26 Ku tlula kwalaho, hilaha swi endlekeke hakona enkarhini wa Nowa,+ swi ta va tano ni hi nkarhi wa N’wana wa munhu:+ 27 A va dya, va nwa, vavanuna va teka, vavasati va tekiwa, ku fikela siku leri Nowa a ngheneke ha rona engalaveni,+ kutani Ndhambi yi fika yi va lovisa hinkwavo.+ 28 Hilaha ku fanaka, swi ve tano enkarhini wa Lota:+ a va dya, va nwa, va xava, va xavisa, va byala, va aka. 29 Kambe hi siku leri Lota a humeke ha rona eSodoma, ku ne ndzilo ni xivavula swi huma etilweni, swi va lovisa hinkwavo.+ 30 Swi ta va tano ni hi siku leri N’wana wa munhu a nga ta tikomba ha rona eka vanhu.+

31 “Hi siku rero munhu loyi a nga ehenhla ka yindlu, loyi nhundzu yakwe yi nga endlwini a nga xiki a ya yi teka, naswona loyi a nga emasin’wini, na yena a nga tlheleli ekaya. 32 Tsundzukani nsati wa Lota.+ 33 Loyi a lavaka ku ponisa vutomi byakwe byi ta n’wi lahlekela, kambe loyi byi n’wi lahlekelaka u ta tlhela a byi kuma.+ 34 Ndza mi byela, evusikwini byebyo vanhu vambirhi va ta va va etlele swin’we; un’wana u ta tekiwa kambe lowun’wana u ta siyiwa.+ 35 Ku ta va ni vavasati vambirhi lava silaka swin’we; un’wana u ta tekiwa kambe lowun’wana u ta siyiwa.” 36* —— 37 Hiloko va n’wi vutisa va ku: “Xana swi ta endleka kwihi, we Hosi?” A va hlamula a ku: “Laha ntsumbu wu nga kona, hi laha ni magama ma nga ta hlengeletana kona.”+

18 Kutani Yesu a va byela xifaniso mayelana ni nkoka wo khongela nkarhi hinkwawo va nga heli matimba,+ 2 a ku: “Emutini wun’wana a ku ri ni muavanyisi loyi a a nga xi chavi Xikwembu naswona a a nga va xiximi vanhu. 3 Nakambe a ku ri ni noni emutini wolowo leyi a yi tshamela ku ya eka yena, yi ku, ‘Ndzi tshembise leswaku mhaka ya mina ni loyi a nga ndzi mangalela yi ta ahluriwa kahle.’ 4 Ku hele nkarhi wo karhi a nga swi lavi ku pfuna noni leyi, kambe hi ku famba ka nkarhi a tibyela a ku, ‘Hambileswi ndzi nga xi chaviki Xikwembu kumbe ku xixima vanhu, 5 kambe, hikwalaho ka leswi noni leyi yi tshamelaka ku ndzi karhata, ndzi ta ahlula mhaka ya yona kahle, leswaku yi nga ha vuyi yi ta ndzi pandzisa nhloko.’”+ 6 Kutani Hosi yi ku: “Xana mi swi twile leswi muavanyisi a swi vuleke, hambileswi a nga lulamangiki? 7 Kutani, xana Xikwembu a xi nge endli leswaku lava xi va hlawuleke, ku nga lava va xi khongelaka vusiku ni nhlikanhi va avanyisiwa kahle,+ xi tlhela xi va lehisela mbilu?+ 8 Ndza mi byela, xi ta endla leswaku va hatla va avanyisiwa kahle. Nilokoswiritano, loko N’wana wa munhu a fika, xana u ta ri kuma ripfumelo ro tano emisaveni?”

9 A tlhela a hlamusela xifaniso eka van’wana lava a va tivona va lulamile naswona a va tekela van’wana ehansi, a ku: 10 “A ku ri ni vavanuna vambirhi lava yeke etempeleni ku ya khongela, un’wana a a ri Mufarisi kasi loyi un’wana a a ri muluvisi.* 11 Mufarisi a yima, a sungula ku khongela hi mbilu a ku, ‘Xikwembu xanga, ndza ku khensa hileswi ndzi nga faniki ni vanhu lavan’wana, lava nga ni makwanga, lava nga lulamangiki, vaoswi, hambi ku ri muluvisi loyi. 12 Ndzi titsona swakudya kambirhi hi vhiki; ndzi nyikela vukhume bya swilo hinkwaswo leswi ndzi swi kumaka.’+ 13 Kambe muluvisi a a yime ekule, a nga lavi ni ku languta ematilweni, kambe a tisola* a ku, ‘Xikwembu xanga, ndzi twele vusiwana hikuva ndzi mudyohi.’+ 14 Ndza mi byela, wanuna loyi u muke a a ri wo lulama swinene emahlweni ka Xikwembu ku tlula Mufarisi.+ Hikuva un’wana ni un’wana loyi a titlakusaka u ta khomisiwa tingana, kambe loyi a titsongahataka u ta tlakusiwa.”+

15 Kutani vanhu va n’wi tisela vana leswaku a va khumba, kambe loko vadyondzisiwa va swi vona va sungula ku holovela vanhu volavo.+ 16 Kambe Yesu a vitana vana va ta eka yena kutani a ku: “Tshikani vana va ta eka mina, mi nga va siveli, hikuva Mfumo wa Xikwembu i wa lava fanaka na vona.+ 17 Ndzi tiyisile ndzi ri eka n’wina, loyi a nga wu amukeliki Mfumo wa Xikwembu ku fana ni n’wana a nge ngheni eka wona.”+

18 Murhangeri un’wana a n’wi vutisa, a ku: “Mudyondzisi Lonene, ndzi fanele ndzi endla yini leswaku ndzi kuma vutomi lebyi nga heriki?”+ 19 Yesu a ku: “Hikwalaho ka yini u ndzi vula lonene? A ku na munhu lonene handle ka Xikwembu.+ 20 Wa yi tiva milawu leyi nge: ‘U nga tshuki u oswa,+ u nga tshuki u dlaya,+ u nga tshuki u yiva,+ u nga tshuki u nyikela vumbhoni bya mavunwa,+ xixima tata wa wena ni mana wa wena.’”+ 21 Hiloko a ku: “Milawu leyi hinkwayo ndzi yi yingisile ku sukela loko ndza ha ri muntshwa.” 22 Loko Yesu a twa sweswo, a ku eka yena, “Ku ni nchumu wun’we lowu seleke eka wena: Xavisa swilo hinkwaswo leswi u nga na swona, mali ya kona u yi nyika swisiwana, kutani u ta va ni xuma etilweni; ivi u ta, u va mulandzeri wa mina.”+ 23 Loko a twa sweswo, a va ni gome swinene, hikuva a a fuwe ngopfu.+

24 Yesu a n’wi languta kutani a ku: “Swi ta va tikela swinene lava nga ni mali ku nghena eMfun’weni wa Xikwembu!+ 25 Swi olova ngopfu ku va kamela yi hundza embhoveni wa neleta yo rhunga ku ri ni ku va munhu la fuweke a nghena eMfun’weni wa Xikwembu.”+ 26 Lava tweke sweswo va ku: “Xana u kona loyi a nga ta pona?”+ 27 A va hlamula a ku: “Leswi vanhu va nga kotiki ku swi endla, Xikwembu xa swi kota.”+ 28 Kambe Petro a ku: “Waswivo! Hi siye swilo swa hina hi ku landzela.”+ 29 Yesu a ku eka vona: “Ndzi tiyisile ndzi ri eka n’wina, a ku na munhu loyi a siyeke yindlu kumbe nsati kumbe vamakwavo va xinuna kumbe vatswari kumbe vana hikwalaho ka Mfumo wa Xikwembu+ 30 loyi a nga ta ka a nga kumi swo tala sweswi, kutani enkarhini lowu taka a kuma vutomi lebyi nga heriki.”+

31 Kutani a teka lava 12 a ya na vona etlhelo, a fika a ku: “Maswivo! Hi ya eYerusalema, naswona swilo hinkwaswo leswi tsariweke hi vaprofeta mayelana ni N’wana wa munhu swi ta hetiseka.+ 32 U ta nyiketiwa eka vamatiko,+ va ta endla xihlekiso hi yena, a rhukaniwa+ ni ku tshwuteriwa.+ 33 Loko se va n’wi bile va ta n’wi dlaya,+ kambe u ta pfuka hi siku ra vunharhu.”+ 34 Kambe, a va wu kumanga mongo wa swilo leswi hinkwaswo, a va twisisanga nchumu hikuva mhaka leyi a yi ri xihundla.

35 Loko Yesu a fika ekusuhi ni le Yeriko, a ku ri ni wanuna un’wana loyi a feke matihlo naswona a a tshame etlhelo ka ndlela a ri karhi a kombela.+ 36 Loko a twa ntshungu wu hundza hiloko a vutisa leswaku ku humelela yini. 37 Wu ku: “Ku hundza Yesu wa le Nazareta!” 38 Hiloko a huwelela, a ku: “Yesu, N’wana wa Davhida, ndzi twele vusiwana!” 39 Lava a va famba emahlweni va sungula ku n’wi holovela va n’wi byela leswaku a miyela, kambe a ya emahlweni a huwelela ngopfu a ku: “N’wana wa Davhida, ndzi twele vusiwana!” 40 Kutani Yesu a yima a lerisa leswaku va tisa wanuna loyi eka yena. Loko a fika, Yesu a n’wi vutisa a ku: 41 “U lava ndzi ku endlela yini?” Wanuna a ku: “Hosi, endla leswaku ndzi tlhela ndzi vona.” 42 Hiloko Yesu a ku: “Tlhela u vona; ripfumelo ra wena ri ku hanyisile.”+ 43 Kutani a sungula ku vona hi nkarhi wolowo, hiloko a landzela Yesu,+ a dzunisa Xikwembu. Loko vanhu va vona leswi endlekeke na vona va dzunisa Xikwembu.+

19 Kutani Yesu a nghena eYeriko a tsemakanya hi kona. 2 A ku ri ni wanuna loyi vito rakwe a ku ri Zakiya; a a ri ndhuna ya valuvisi,* naswona a a fuwile. 3 A a lava ku vona Yesu, kambe a a nga swi koti hikwalaho ka ntshungu hikuva a a komile. 4 Hiloko a tsutsuma a rhangelela, a fika a khandziya nkuwa leswaku a ta n’wi vona, hikuva Yesu a a ta hundza hi ndlela yoleyo. 5 Loko Yesu a fika kwalaho, a languta ensinyeni a ku: “Zakiya, hatlisa u xika hikuva namuntlha ndzi muendzi wa wena.” 6 Hiloko a hatla a xika a amukela muendzi wakwe hi ntsako. 7 Loko vanhu va vona sweswo, va sungula ku gungula, va ku: “U endzele wanuna loyi a nga mudyohi.”+ 8 Kambe Zakiya a yima, a byela Hosi a ku: “Hosi! Ndzi ta nyika swisiwana hafu ya swilo leswi ndzi nga na swona, naswona leswi ndzi nga tekela van’wana hi vukanganyisi ndzi ta va tlherisela swona ka mune.”+ 9 Kutani Yesu a ku: “Namuntlha Xikwembu xi ponise wanuna loyi ni ndyangu wakwe, hikuva na yena i n’wana wa Abrahama. 10 Hikuva N’wana wa munhu u tele ku ta lava ni ku ponisa lava lahlekeke.”+

11 Loko va ha yingisele timhaka leti, Yesu a tlhela a va byela xifaniso xin’wana, hikuva a a ri ekusuhi ni le Yerusalema naswona a va anakanya leswaku Mfumo wa Xikwembu a wu ta ta hi ku hatlisa.+ 12 Hiloko a ku: “Wanuna un’wana loyi a ri n’wana wa hosi u endzele etikweni ra le kule+ ku ya vekiwa ku va hosi naswona a a ta tlhela a vuya. 13 Kutani a vitana malandza yakwe ya khume a ma nyika timayina* ta khume, a ku, ‘Bindzulani ha tona ndzi kondza ndzi vuya.’+ 14 Kambe vaaki va tiko rakwe a va n’wi venga, hiloko va rhumela huvo ya vayimeri etikweni leri a yeke eka rona yi fika yi ku, ‘A hi swi lavi leswaku munhu loyi a va hosi ya hina.’

15 “Kutani loko a vuya endzhaku ko vekiwa ku va hosi, a vitana malandza lawa a ma nyikeke mali,* leswaku a ta kumisisa leswi ma swi bindzuleke.+ 16 Nandza wo sungula a fika a ku, ‘Hosi, mayina ya wena yi bindzule timayina ta khume.’+ 17 Kutani a ku eka yena, ‘U endle kahle, u nandza lonene! Leswi u tshembekeke eka leswitsongo, u ta fuma miti ya khume.’+ 18 Nandza wa vumbirhi a fika a ku, ‘Hosi, mayina ya wena yi bindzule timayina ta ntlhanu.’+ 19 Kutani a byela nandza loyi a ku, ‘Na wena, u ta fuma miti ya ntlhanu.’ 20 Hiloko ku fika nandza un’wana a ku, ‘Hosi, mayina ya wena hi leyi, a ndzi yi tumbetile ndzi yi phutsele hi lapi. 21 Ndza ku chava hikuva u munhu wo karhata; u teka leswi u nga swi vekangiki naswona u tshovela leswi u nga swi byalangiki.’+ 22 Kutani a ku, ‘Ndzi ta ku avanyisa hi leswi u swi vuleke, wena nandza wo homboloka. A wu swi tiva leswaku ndzi munhu wo karhata, ndzi teka leswi ndzi nga swi vekangiki ni ku tshovela leswi ndzi nga swi byalangiki.+ 23 Hikwalaho ka yini u nga vekanga mali* ya mina ebangi? Loko ndzi vuya a ndzi ta yi kuma yi ri ni ntswalo.’

24 “Hiloko a byela lava a va yime kwalaho a ku, ‘N’wi tekeleni mayina yoleyo, mi yi nyika loyi a nga ni timayina ta khume.’+ 25 Kambe vona va ku, ‘Hosi, u ni timayina ta khume!’ 26 ‘Ndzi ri eka n’wina, loyi a nga ni swo karhi, u ta nyikiwa swo tala kambe loyi a nga riki na nchumu, u ta tekeriwa ni leswi a nga na swona.+ 27 Ku tlula kwalaho, tisani valala va mina lava a va nga lavi leswaku ndzi va hosi ya vona, mi va dlaya emahlweni ka mina.’”

28 Endzhaku ko vula leswi a hundza a ya eYerusalema. 29 Loko a fika ekusuhi ni ximutana xa Betefage ni xa Betaniya entshaveni leyi vuriwaka Ntshava ya Mitlhwari,+ hiloko a rhuma vadyondzisiwa vambirhi,+ 30 a ku: “Yanani eximutanini lexi mi langutaneke na xona, kutani loko mi nghena, mi ta kuma ximbhongolwana lexi nga si tshamaka xi gadiwa xi tsimbiwile. Xi tshunxeni mi vuya na xona. 31 Kambe loko un’wana a mi vutisa a ku, ‘Mi xi tshunxela yini?’ mi fanele mi ku, ‘Hosi ya xi lava.’” 32 Hiloko lava rhumiweke va famba kutani va fika va kuma swi ri hilaha a vuleke hakona.+ 33 Kambe loko va ri karhi va tshunxa ximbhongolwana, vini va xona va ku eka vona: “Mi xi tshunxela yini ximbhongolwana xexo?” 34 Hiloko va ku: “Hosi ya xi lava.” 35 Kutani va ya na xona eka Yesu, hiloko va kapeka swiambalo swa vona ehenhla ka xona kutani Yesu a xi gada.+

36 Loko a ri karhi a famba, vanhu a va andlala swiambalo swa vona endleleni.+ 37 Kuteloko a fika ekusuhi ni ndlela leyi sukelaka eNtshaveni ya Mitlhwari, vadyondzisiwa hinkwavo va sungula ku tsaka ni ku dzunisa Xikwembu hikwalaho ka masingita lawa va ma voneke, 38 va ku: “U katekile loyi a taka a ri Hosi hi vito ra Yehovha!* A ku ve ni ku rhula etilweni, a ku dzunisiwe Xikwembu lexi nga le matilweni!”+ 39 Hambiswiritano, Vafarisi van’wana lava a va ri exikarhi ka ntshungu va ku: “Mudyondzisi, byela vadyondzisiwa va wena va miyela.”+ 40 A va hlamula a ku: “Ndza mi byela, loko vanhu lava vo miyela, maribye ma ta huwelela.”

41 Loko a fika ekusuhi ni muti wa Yerusalema, a wu languta ivi a wu rilela,+ 42 a ku: “Loko a wu twisise swilo leswi nga ta ku endla u va ni ku rhula, kambe swilo sweswo u fihleriwe swona.+ 43 Hikuva ku ta fika nkarhi lowu valala va wena va nga ta aka rirhangu hi timhandzi to tontswa ri ku rhendzela, va ku kayakayisa matlhelo hinkwawo.+ 44 Va ta ku lovisa wena ni vana va wena+ naswona a va nge siyi ribye ehenhla ka ribye rin’wana eka wena,+ hikuva a wu wu xiyanga nkarhi wa ku kamberiwa ka wena.”

45 Hiloko a nghena etempeleni a sungula ku hlongola lava a va xavisa,+ 46 a ku eka vona: “Ku tsariwile, ‘Yindlu ya mina yi ta va yindlu ya xikhongelo,’+ kambe n’wina mi yi endle bako ra swigevenga.”+

47 Siku ni siku a ya etempeleni a ya dyondzisa. Kambe vaprista lavakulu, vatsari ni vakulukumba va tiko a va lava ku n’wi dlaya;+ 48 kambe a va kumanga ndlela yo n’wi dlaya, hikuva vanhu a va tshama va ri na yena va n’wi yingisile.+

20 Siku rin’wana loko a ha dyondzisa vanhu etempeleni a chumayela mahungu lamanene, vaprista lavakulu, vatsari ni vakulukumba va ta eka yena 2 va ku: “Hi byele, u swi endla hi matimba ya mani swilo leswi? Kumbe i mani loyi a ku nyikeke matimba lawa?”+ 3 A va hlamula a ku: “Na mina ndzi ta mi vutisa xivutiso, ndzi byeleni: 4 Xana nkhuvulo wa Yohane a wu huma etilweni kumbe a wu huma eka vanhu?” 5 Kutani va sungula ku vulavula va ri voxe va ku: “Loko hi ku, ‘A wu huma etilweni,’ u ta ku, ‘Hikwalaho ka yini mi nga n’wi tshembanga?’ 6 Kambe loko hi ku, ‘A wu huma eka vanhu,’ vanhu va ta hi khandla hi maribye, hikuva va tshemba leswaku Yohane a a ri muprofeta.”+ 7 Kutani va vula leswaku a va ku tivi laha wu humaka kona. 8 Yesu a ku eka vona: “Na mina a ndzi nge mi byeli leswaku ndzi endla swilo leswi hi matimba ya mani.”

9 Hiloko a sungula ku byela vanhu xifaniso a ku: “A ku ri ni munhu loyi a rimeke nsimu ya madiriva+ kutani a endla ntwanano ni varimi van’wana leswaku va yi hlayisa, yena a endzela etikweni ra le kule nkarhi wo leha.+ 10 Hi nkarhi wo tshovela, a rhuma nandza wakwe eka varimi, leswaku va n’wi nyika mihandzu ya nsimu ya madiriva. Hiloko varimi va n’wi ba va n’wi tlherisa a nga ri na nchumu.+ 11 Kambe a tlhela a rhuma nandza un’wana eka vona. Na yena va n’wi ba, va n’wi poyila* va n’wi tlherisa a nga ri na nchumu. 12 A tlhela a rhuma nandza wa vunharhu; na yena va n’wi ba va tlhela va n’wi hlongola. 13 Hiloko n’wini wa nsimu ya madiriva a ku, ‘Xana ndzi ta endla yini? Ndzi ta rhuma n’wana wa mina loyi ndzi n’wi rhandzaka.+ Kumbexana va ta n’wi xixima.’ 14 Loko varimi va n’wi vona va sungula ku byelana va ku, ‘Hi loyi mudyandzhaka. A hi n’wi dlayeni, leswaku hi ta teka nsimu.’* 15 Hiloko va n’wi cukumetela ehandle ka nsimu ya madiriva kutani va n’wi dlaya.+ Hikwalaho, xana n’wini wa nsimu u ta va endla yini? 16 U ta fika a dlaya varimi lava, kutani nsimu ya madiriva a yi nyika van’wana.”

Loko va twa sweswo va ku: “Sweswo swi nga tshuki swi endleka!” 17 Kambe a va languta a ku: “Kutani, xana marito lawa ma vula yini: ‘Ribye leri vaaki va nga ri nyenya, hi rona ri veke ribye ra nkoka swinene’?*+ 18 Loyi a welaka eribyeni rero u ta phyandlaseka.+ Kasi loyi ri n’wi welaka, ri ta n’wi phyandlasa.”

19 Vatsari ni vaprista lavakulu a va lava ku n’wi khoma hi nkarhi wolowo, kambe a va chava vanhu, hikuva a va swi xiya leswaku a a vula vona hi xifaniso lexi.+ 20 Endzhaku ko n’wi veka tihlo, va rhumela vanhu lava va nga va thola exihundleni leswaku va tiendla onge va lulamile, hi xikongomelo xo n’wi phasa hi leswi a nga ta swi vula,+ leswaku va ta n’wi yisa eka valawuri ni ndhunankulu. 21 Kutani va n’wi vutisa, va ku: “Mudyondzisi, ha swi tiva leswaku u vulavula u tlhela u dyondzisa leswi lulameke naswona a wu na xihlawuhlawu kambe u dyondzisa ndlela ya Xikwembu hi ntiyiso: 22 Xana swa pfumeleriwa leswaku hi hakela xibalo eka Khezari kumbe a swi pfumeleriwi?” 23 Kambe a swi lemuka leswaku va lava ku n’wi phasa, hiloko a ku eka vona: 24 “Ndzi kombeni denari.* Xana yi ni xifaniso ni marito ya mani?” Va ku: “I swa Khezari.” 25 A ku eka vona: “Kutani, tlheriselani swilo swa Khezari eka Khezari,+ kambe swa Xikwembu eka Xikwembu.”+ 26 Xisweswo va tsandzeka ku n’wi phasa hi marito yakwe emahlweni ka vanhu, kambe nhlamulo yakwe yi va hlamarisa lerova va ku whii!

27 Hambiswiritano, Vasaduki van’wana lava vulaka leswaku vafi a va nge pfuxiwi,+ va ta eka yena va fika va n’wi vutisa va ku:+ 28 “Mudyondzisi, Muxe u hi tsalele a ku, ‘Loko makwavo wa munhu a fa a nga ri na vana naswona a siya nsati, makwavo wakwe u fanele a teka nsati loyi, a velekela mufi vana.’+ 29 A ku ri ni vamakwavo va nkombo. Lowo sungula a teka nsati ivi a fa a nga ri na vana. 30 Swi ve tano ni hi loyi wa vumbirhi, 31 wa vunharhu a n’wi teka. Swi ve tano eka hinkwavo va nkombo; va fe va nga ri na vana. 32 Eku heteleleni wansati na yena a fa. 33 Hikwalaho, loko vafi va pfuxiwa, u ta va nsati wa mani? Hikuva hinkwavo va n’wi tekile a va nsati wa vona.”

34 Yesu a ku: “Vanhu va misava leyi va teka va tlhela va tekiwa, 35 kambe lava Xikwembu xi nga ta va pfumelela ku hanya hi nkarhi wolowo ni ku pfuxiwa a va nge he teki kumbe ku tekiwa.+ 36 Ntiyiso hi leswaku a va nge he fi hikuva va fana ni tintsumi, naswona i vana va Xikwembu hikwalaho ka leswi va nga ta pfuxiwa eku feni. 37 Kambe hambi Muxe u swi kombisile leswaku lava feke va ta pfuxiwa, emhakeni ya xihlahla xa mitwa, loko a vula leswaku Yehovha* i ‘Xikwembu xa Abrahama, Xikwembu xa Isaka ni Xikwembu xa Yakobo.’+ 38 A hi Xikwembu xa lava feke, kambe i xa lava hanyaka, hikuva eka xona hinkwavo va hanya.”+ 39 Vatsari van’wana va ku: “Mudyondzisi, u vulavule kahle.” 40 A va ha vanga na wona matimba yo n’wi vutisa xivutiso xin’wana.

41 Hiloko a va vutisa a ku: “Swi tisa ku yini ku vuriwa leswaku Kreste i n’wana wa Davhida?+ 42 Hikuva Davhida ebukwini ya Tipisalema u te, ‘Yehovha* a ku eka Hosi ya mina: “Tshama evokweni ra mina ra xinene 43 ku fikela loko ndzi veka valala va wena va va vunavelo bya mikondzo ya wena.”’+ 44 Leswi Davhida a n’wi vitanaka Hosi; xana i n’wana wa yena hi ndlela yihi?”

45 Hiloko a vulavula ni vadyondzisiwa vakwe a ri karhi a twiwa hi vanhu hinkwavo a ku: 46 “Tivoneleni eka vatsari lava rhandzaka ku famba va ambale swiambalo swo leha, lava rhandzaka ku xewetiwa etimakete ni switulu swa le mahlweni emasinagogeni ni tindhawu leti hlawulekeke hi nkarhi wa swakudya swa nimadyambu,+ 47 va tekela tinoni tiyindlu ta tona naswona va rhandza ku endla swikhongelo swo leha leswaku va ta voniwa hi vanhu. Va ta xupuriwa hi ndlela yo vava swinene.”

21 Loko Yesu a langutisa a vona lava fuweke va hoxa mali emabokisini.+ 2 A vona ni noni leyi nga xisiwana yi hoxa tisente timbirhi,*+ 3 kutani a ku: “Ndzi tiyisile ndzi ri eka n’wina, noni leyi, leyi nga xisiwana yi nyikele ku tlula hinkwavo.+ 4 Hikuva lava hinkwavo va nyikele hi leswi va swi pambuleke eka leswi va taleleke, kambe yona hambileswi yi pfumalaka yi hoxe hinkwaswo leswi yi tihanyisaka ha swona.”+

5 Endzhakunyana, loko van’wana va ri karhi va vulavula hi tempele, ndlela leyi a yi khavisiwe ha yona hi maribye yo saseka ni swilo leswi nyikeriweke eka Xikwembu,+ 6 a ku: “Loko ku ri swilo leswi mi swi vonaka sweswi, masiku ma ta lawa ku nga ta ka ku nga vi na ribye leri nga ta siyiwa ehenhla ka ribye rin’wana ma ta hirimuxiwa hinkwawo.”+ 7 Hiloko va n’wi vutisa, va ku: “Mudyondzisi, xana swilo leswi swi ta endleka rini naswona xi ta va xihi xikombiso xa nkarhi lowu swilo leswi swi nga ta endleka ha wona?”+ 8 A ku: “Tivoneleni leswaku mi nga hambukisiwi,+ hikuva vo tala va ta ta hi vito ra mina, va ku, ‘Hi mina Kreste,’ va tlhela va ku, ‘Makumu ma tshinele.’ Kambe mi nga va landzeli.+ 9 Ku tlula kwalaho, loko mi twa hi ta tinyimpi ni mpfilumpfilu, mi nga chavi. Hikuva swilo leswi swi fanele swi rhanga swi endleka, kambe makumu a ma nge fiki hi nkarhi wolowo.”+

10 Kutani a ku eka vona: “Matiko ma ta hlaselana+ ni mifumo yi ta hlaselana.+ 11 Ku ta va ni ku tsekatseka lokukulu ka misava, naswona ku ta va ni ku kayivela ka swakudya ni mintungu+ etindhawini to hambanahambana; vanhu va ta vona swilo leswi nga ta va chavisa ni swikombiso leswikulu leswi humaka etilweni.

12 “Kambe loko swilo leswi hinkwaswo swi nga si endleka, vanhu va ta mi khoma va tlhela va mi xanisa,+ va ta mi yisa emasinagogeni, va mi pfalela ni le makhotsweni. Mi ta yisiwa emahlweni ka tihosi ni tindhuna hikwalaho ka vito ra mina.+ 13 Sweswo swi ta endla leswaku mi nyikela vumbhoni. 14 Hikwalaho mi nga vileli hi ndlela leyi mi nga ta va hlamula ha yona lava mi hehlaka,+ 15 hikuva ndzi ta mi nyika vutlhari naswona ndzi ta mi byela leswi mi faneleke ku swi vula, valala va n’wina hinkwavo a va nge swi koti ku mi kaneta kumbe ku mi hlamula.+ 16 Ku tlula kwalaho, vatswari va n’wina, vamakwenu, maxaka ni vanghana va ta mi xavisa, naswona van’wana va n’wina va ta dlayiwa+ 17 mi ta vengiwa hi vanhu hinkwavo hikwalaho ka vito ra mina.+ 18 Kambe a mi nge lahlekeriwi hambi ku ri hi nsisi wun’we.+ 19 Loko mi tiyisela mi ta ponisiwa.+

20 “Hambiswiritano, loko mi vona muti wa Yerusalema wu rhendzeriwe hi masocha,+ swi tiveni leswaku nkarhi wa ku lovisiwa ka wona wu tshinele.+ 21 Kutani lava nga eYudiya a va balekele etintshaveni,+ lava nga eYerusalema a va hume naswona lava nga ehandle ka muti va nga ha ngheni, 22 hikuva lawa i masiku ya Xikwembu yo xupula vanhu leswaku swilo hinkwaswo leswi tsariweke swi hetiseka. 23 Khombo eka vavasati lava tikeke ni lava nga ta va va mamisa hi nkarhi wolowo!+ Hikuva ku ta va ni ku xaniseka lokukulu etikweni naswona vanhu lava va ta xupuriwa. 24 Va ta dlayiwa hi banga, va ta va mahlonga ematikweni hinkwawo;+ naswona Yerusalema wu ta kandziyeriwa hi matiko* kukondza ku hela nkarhi lowu vekiweke wa matiko.*+

25 “Nakambe mi ta vona swikombiso edyambyini, en’wetini ni le tinyeletini+ naswona matiko ma ta rila, ma nga tivi lexi ma nga xi endlaka hikwalaho ka ku pfuma ka lwandle ni vukarhi bya rona. 26 Vanhu va ta titivala hikwalaho ko chava ni ku langutela swilo leswi nga ta endleka emisaveni, hikuva swilo leswi nga ematilweni swi ta tsekatsekisiwa. 27 Endzhaku ka sweswo va ta vona N’wana wa munhu+ a ta a ri epapeni hi matimba ni ku vangama lokukulu.+ 28 Kambe loko swilo leswi swi sungula ku endleka, yimani mi ololoxa tinhloko hikuva ku kutsuriwa ka n’wina ku le kusuhi.”

29 Hiloko a va byela xifaniso a ku: “Anakanyani hi nkuwa ni mirhi leyin’wana hinkwayo.+ 30 Loko yi hluka, ma swi tiva leswaku ximumu xi le kusuhi. 31 Hilaha ku fanaka, na n’wina loko mi vona swilo leswi swi endleka, swi tiveni leswaku Mfumo wa Xikwembu wu le kusuhi. 32 Ndzi tiyisile ndzi ri eka n’wina, xitukulwana* lexi a xi nge fi xi hela swilo leswi hinkwaswo swi nga si endleka.+ 33 Tilo ni misava swi ta hundza kambe marito ya mina ma nga ka ma nga hundzi.+

34 “Kambe tivoneleni leswaku timbilu ta n’wina ti nga tshuki ti tshikileriwa hi ku dya ni ku nwa ngopfu+ ni ku vilela hi vutomi,+ kutani siku rero ri fika mi nga ri langutelanga 35 ku fana ni ntlhamu.+ Hikuva ri ta wela hinkwavo lava tshamaka emisaveni. 36 Kutani tshamani mi rindzile,+ mi khongela nkarhi hinkwawo+ leswaku mi ta kota ku pona swilo leswi hinkwaswo leswi faneleke ku endleka ni ku yima emahlweni ka N’wana wa munhu.”+

37 Yesu a a dyondzisa etempeleni ninhlikanhi, kasi nivusiku a a famba a ya tshama eNtshaveni ya Mitlhwari. 38 Vanhu hinkwavo a va ya etempeleni nimpundzu va ya n’wi yingisela.

22 Nkhuvo Wa Swinkwa Leswi Nga Riki Na Comela, lowu vuriwaka Paseka,+ a wu ri kusuhi.+ 2 Vaprista lavakulu ni vatsari a va lava ndlela yo n’wi dlaya,+ hikuva a va chava vanhu.+ 3 Hiloko Sathana a nghena eka Yudasi loyi a vuriwaka Iskariyota, loyi a a ri un’wana wa lava 12,+ 4 kutani a famba a ya vulavula ni vaprista lavakulu ni vafambisi va tempele, mayelana ni ndlela leyi a nga n’wi xavisaka ha yona eka vona.+ 5 Hiloko va tsaka va pfumelelana leswaku va ta n’wi nyika mali ya silivhere.+ 6 Kutani a pfumela hiloko a sungula ku lava ndlela yo n’wi xavisa eka vona ku nga ri na ntshungu.   

7 Hiloko ku fika siku ra Nkhuvo Wa Swinkwa Leswi Nga Riki Na Comela, ku nga siku leri a ku dlayiwa xifuwo lexi a xi ta dyiwa hi Paseka;+ 8 kutani Yesu a rhuma Petro na Yohane, a ku: “Fambani mi ya lulamisa Paseka leswaku hi ta dya.”+ 9 Va n’wi vutisa va ku: “U lava hi ya yi lulamisela kwihi?” 10 A va hlamula a ku: “Maswivo! Loko mi nghena emutini, mi ta hlangana ni munhu a rhwale khuwana ra mati. N’wi landzeleni mi ya endlwini leyi a nga ta nghena eka yona.+ 11 Byelani n’wini wa yindlu mi ku, ‘Mudyondzisi u ri: “Ri kwihi kamara ra vaendzi leri ndzi nga ta dya Paseka ni vadyondzisiwa va mina eka rona?”’ 12 Kutani u ta mi komba kamara lerikulu ra le henhla leri nga ni leswi lavekaka. Lunghiselelani Paseka kwalaho.” 13 Hiloko va ya, va fika va swi kuma swi ri hilaha a va byeleke hakona, kutani va lulamisa Paseka.

14 Kuteloko nkarhi wu fika, Yesu a tshama etafuleni ni vaapostola vakwe.+ 15 Kutani a ku: “Ndza tsaka swinene ku dya Paseka leyi na n’wina ndzi nga si xanisiwa; 16 hikuva ndza mi byela, a ndzi nge he tlheli ndzi yi dya ku fikela loko swilo hinkwaswo swi hetiseka eMfun’weni wa Xikwembu.” 17 A amukela xinwelo, kutani a khensa Xikwembu ivi a ku: “Tekani mi siyerisana, 18 hikuva ndza mi byela, ku sukela sweswi a ndzi nge he tlheli ndzi nwa vhinyo kukondza ku fika Mfumo wa Xikwembu.”

19 A tlhela a teka xinkwa,+ a khongela, a xi phema, a va nyika xona, kutani a ku: “Xinkwa lexi xi fanekisela miri+ wa mina lowu nga ta nyikeriwa hikwalaho ka n’wina.+ Tshamani mi ri karhi mi endla leswi leswaku mi ndzi tsundzuka.”+ 20 Nakambe a endla hilaha ku fanaka hi xinwelo, endzhaku ka loko va dyile, a ku: “Xinwelo lexi xi fanekisela ntwanano lowuntshwa+ lowu tiyisekisiwaka hi ngati ya mina,+ leyi nga ta halatiwa leswaku ku vuyeriwa n’wina.+

21 “Kambe loyi a nga ta ndzi xavisa u na mina kwala tafuleni.+ 22 N’wana wa munhu u ta famba hilaha swi profetiweke hakona;+ hambiswiritano, u ni khombo munhu loyi a n’wi xavisaka!”+ 23 Kutani va sungula ku vutisana leswaku ku nga va ku ri mani loyi a lavaka ku n’wi xavisa.+

24 Hambiswiritano, va tlhela va sungula ku kanetana hi leswaku i mani lonkulu eka vona.+ 25 Kambe a ku eka vona: “Tihosi ta matiko ta ma tikisela, naswona lava ma rhangelaka va vitaniwa hi mavito yo hlawuleka.*+ 26 Kambe n’wina a mi fanelanga mi fana na vona.+ Lonkulu exikarhi ka n’wina a a ve lontsongo eka hinkwenu,+ kasi loyi a mi rhangelaka a ku ve yena loyi a mi tirhelaka. 27 Xana i mani lonkulu exikarhi ka loyi a nga eku dyeni ni loyi a phamelaka? Xana a hi loyi a nga eku dyeni? Kambe mina ndzi tirhela n’wina.+

28 “Hambiswiritano, mi ndzi seketerile+ emaxangwini ya mina;+ 29 kutani ndzi endla ntwanano na n’wina, hilaha Tatana a endleke ntwanano wa mfumo na mina,+ 30 leswaku mi dya ni ku nwa etafuleni ra mina eMfun’weni wa mina,+ kutani mi tshama eswiluvelweni+ leswaku mi avanyisa tinyimba ta 12 ta Israyele.+

31 “Simoni, Simoni, tivonele, Sathana u lava ku mi sefa ku fana ni koroni.+ 32 Kambe ndzi ku khongelerile leswaku ripfumelo ra wena ri nga tsani;+ kutani loko se u vuyile, tiyisa ripfumelo ra vamakwenu.”+ 33 A n’wi hlamula a ku: “Hosi, ndzi tiyimisele ku pfaleriwa ni ku fa na wena.”+ 34 Kambe Yesu a ku: “Petro, ndza ku byela leswaku u ta va u ndzi landzule kanharhu namuntlha nkuku wu nga si ringa.”+

35 A tlhela a ku eka vona: “Xana mi pfumale swo karhi loko ndzi mi rhumile mi nga ri na xipachi, nkwama wa swakudya ni maphaxani?”+ Va n’wi hlamula va ku: “A hi pfumalanga nchumu!” 36 Hiloko a ku: “Sweswi loyi a nga ni xipachi a a xi teke, ni loyi a nga ni nkwama wa swakudya a wu teke, naswona loyi a nga riki na banga a a xavise xiambalo xakwe xa le handle a ri xava. 37 Hikuva ndza mi byela leswaku leswi tsariweke swi fanele ku endleka eka mina, leswi nge, ‘A a tekiwa a ri mudyohi.’+ Hikuva leswi tsariweke mayelana na mina swi le ku endlekeni.”+ 38 Kutani va ku: “Hosi, hi lawa mabanga mambirhi.” A ku: “Ma ringene.”

39 Hiloko a famba a ya eNtshaveni ya Mitlhwari hilaha a a tolovele ku endla hakona, vadyondzisiwa vakwe na vona va famba na yena.+ 40 Loko va fika entshaveni a ku: “Yanani emahlweni mi khongela leswaku mi nga weli endzingweni.”+ 41 Hiloko Yesu a suka a ya ekulenyana na vona,* ivi a khinsama a khongela, 42 a ku: “Tatana, loko u swi rhandza, susa xinwelo lexi eka mina. Nilokoswiritano, ku nga endleki ku rhandza ka mina, a ku endleke ku rhandza ka wena.”+ 43 Hiloko ku ta ntsumi hi le tilweni yi fika yi n’wi tiyisa.+ 44 Kambe a a ri ni gome lerikulu lerova a ya emahlweni a khongela hi mbilu hinkwayo;+ naswona nyuku wakwe lowu a wu thonela ehansi a wu fana ni ngati. 45 Loko a heta ku khongela, a tlhelela eka vadyondzisiwa vakwe, kambe a va kuma va etlele va karhele hikwalaho ka gome.+ 46 Hiloko a ku: “Hikwalaho ka yini mi etlele? Pfukani, yanani emahlweni mi khongela leswaku mi nga weli endzingweni.”+

47 Loko a ha vulavula, hiloko ku humelela ntshungu lowu a wu rhangeriwe hi Yudasi, un’wana wa lava 12, kutani a ya eka Yesu a fika a n’wi tswontswa.+ 48 Kambe Yesu a ku eka yena: “Yudasi, xana u xavisa N’wana wa munhu hi ku n’wi tswontswa?” 49 Loko lava a va ri na Yesu va vona leswi a swi ta endleka, va ku: “Hosi, xana hi nga va hlasela hi banga?” 50 Un’wana wa vadyondzisiwa a tsema ndleve ya xinene ya nandza wa muprista lonkulu.+ 51 Kambe Yesu a ku: “Mi nga swi endli sweswo.” Hiloko a khumba ndleve ya nandza a yi horisa. 52 Kutani Yesu a byela vaprista lavakulu ni vafambisi va tempele ni vakulukumba lava nga tela ku ta n’wi khoma, a ku: “Xana mi te mi khome mabanga ni tinhonga onge hi loko mi ta khoma xigevenga?+ 53 Loko ndza ha ri na n’wina etempeleni siku ni siku+ a mi ndzi khomanga.+ Kambe lowu i nkarhi wa n’wina ni wa ku fuma ka munyama.”+

54 Hiloko va n’wi khoma va famba na yena,+ va n’wi yisa endlwini ya muprista lonkulu; Petro a n’wi landzela kambe a fambela ekulenyana.+ 55 Va fika va tshivela ndzilo exikarhi ka xivava* va tshama, Petro na yena a tshama na vona.+ 56 Kambe nandza un’wana wa xisati a n’wi vona loko a tshame ekusuhi ni ndzilo, hiloko a n’wi langutisisa, a ku: “Wanuna loyi a a ri na yena.” 57 Kambe a kaneta a ku: “Wansati ndziwena, a ndzi n’wi tivi.” 58 Endzhaku ka nkarhinyana un’wana a n’wi vona ivi a ku: “Na wena u un’wana wa vona.” Kambe Petro a ku: “Munhu ndziwena, a ndzi va tivi.”+ 59 Kutani endzhaku ka kwalomu ka awara wanuna un’wana a sungula ku phikelela hi matimba a ku: “Hakunene wanuna loyi a a ri na yena, hikuva entiyisweni na yena i Mugaleliya!” 60 Kambe Petro a ku: “Munhu ndziwena, a ndzi swi tivi leswaku u vulavula hi yini.” Loko a ha vulavula, nkuku wu ringa. 61 Hiloko Hosi yi hundzuluka yi languta Petro, kutani Petro a tsundzuka marito ya Hosi loko yi n’wi byela yi ku: “Nkuku wu nga si ringa namuntlha, u ta ndzi landzula kanharhu.”+ 62 Kutani a humela ehandle, a fika a rila hi xiviti.

63 Hiloko vavanuna lava khomeke Yesu va sungula ku n’wi poyila+ ni ku n’wi ba;+ 64 va tlhela va n’wi funengeta xikandza va n’wi vutisa va ku: “Profeta! I mani loyi a nga ku ba?” 65 Hiloko va vula marito yo tala ya ku n’wi rhukana.

66 Loko ri xile, huvo ya vakulukumba va tiko, vaprista lavakulu ni vatsari va hlengeletana,+ kutani va n’wi yisa eholweni ya vona ya Sanedri, va ku: 67 “Loko u ri Kreste, hi byele.”+ Kambe a ku eka vona: “Niloko ndzo mi byela, a mi nge ndzi tshembi. 68 Ku tlula kwalaho, loko ndzo mi vutisa, a mi nge ndzi hlamuli. 69 Hambiswiritano, ku sukela sweswi N’wana wa munhu+ u ta tshama evokweni ra xinene ra Xikwembu leri nga ni matimba.”+ 70 Hiloko va ku: “Xana u vula leswaku u N’wana wa Xikwembu?” A va hlamula a ku: “N’wina mi ri ndzi yena.” 71 Kutani va ku: “A ka ha laveki vumbhoni byin’wana. Hi swi twile, u tivulavulele hi nomu wakwe.”+

23 Kutani hinkwavo lava a va hlengeletanile kwalaho va teka Yesu va famba na yena eka Pilato.+ 2 Hiloko va sungula ku n’wi hehla,+ va ku: “Hi kume wanuna loyi a ri karhi a hlohlotela vanhu ku pfukela mfumo, a va arisa ni ku hakela xibalo eka Khezari,+ a tlhela a vula leswaku hi yena Kreste, naswona i hosi.”+ 3 Kutani Pilato a n’wi vutisa a ku: “Xana u Hosi ya Vayuda?” A ku: “Wena u swi vurile.”+ 4 Pilato a byela vaprista lavakulu ni ntshungu a ku: “Munhu loyi a nga na nandzu.”+ 5 Kambe va phikelela va ku: “U kucetela vanhu leswaku va pfukela hi ku dyondzisa etikweni hinkwaro ra Yudiya, ku sukela eGaleliya ku ta fika kwala.” 6 Loko Pilato a twa sweswo, hiloko a vutisa ku twa loko hakunene Yesu a huma eGaleliya. 7 Endzhaku ko kumisisa leswaku a a huma endhawini leyi a yi lawuriwa hi Heroda,+ a n’wi rhumela eka Heroda, loyi na yena a a ri eYerusalema hi nkarhi wolowo.

8 Heroda a a tsake ngopfu loko a vona Yesu. A a ri ni nkarhi wo leha a navela ku n’wi vona hikuva a a twe swo tala ha yena,+ naswona a a navela ku n’wi vona a endla masingita. 9 Hiloko a sungula ku n’wi vutisa swivutiso swo tala, kambe Yesu a nga n’wi hlamulanga.+ 10 Hambiswiritano, vaprista lavakulu ni vatsari va n’wi hehla swinene va nga lavi ni ku tshama ehansi. 11 Kutani Heroda ni masocha yakwe va n’wi phuntisa,+ va tlhela va n’wi poyila+ hi ku n’wi ambexa xiambalo xo hatima, endzhaku ka sweswo va n’wi tlherisela eka Pilato. 12 Kutani Heroda na Pilato va va vanghana ku sukela siku rero, hikuva a va nga twani loko ku nga si endleka mhaka leyi.

13 Kutani Pilato a vitana vaprista lavakulu, tindhuna ni vanhu 14 a ku: “Mi tise munhu loyi eka mina mi ku u hlohlotela vanhu ku pfukela mfumo. Mi ndzi vonile loko ndzi n’wi vutisa emahlweni ka n’wina naswona a ndzi kumanga nchumu lexi seketelaka leswi mi n’wi hehlaka ha swona.+ 15 Hambi ku ri Heroda a nga n’wi vonanga nandzu, hikuva u n’wi tlherisele eka hina, a nga endlanga xidyoho lexi endlaka leswaku a gweviwa rifu. 16 Hikwalaho ndzi ta n’wi ba+ ivi ndzi n’wi tshunxa.” 17* —— 18 Kambe ntshungu hinkwawo wu huwelela, wu ku: “N’wi dlaye, u hi tshunxela Barabasi!”+ 19 (Wanuna loyi a a hoxiwe ekhotsweni hikwalaho ko pfukela mfumo ni ku dlaya.) 20 Pilato a tlhela a vulavula na wona, hikuva a a lava ku tshunxa Yesu.+ 21 Kutani wu sungula ku huwelela wu ku: “A a beleriwe emhandzini! A a beleriwe emhandzini!”+ 22 A tlhela a vulavula na wona ra vunharhu a ku: “Hikwalaho ka yini? Xana munhu loyi u dyohe yini? A ndzi kumanga nchumu lexi endlaka a faneriwa hi rifu; hikwalaho ndzi ta n’wi ba ivi ndzi n’wi tshunxa.” 23 Hiloko wu sungula ku sindzisa, wu huwelela wu lava leswaku a dlayiwa, wu huwelele wu kala wu yingisiwa.+ 24 Hiloko Pilato a endla xiboho xa leswaku ku endliwa leswi wu swi kombelaka. 25 A tshunxa munhu loyi a wu lava yena, loyi a a hoxiwe ekhotsweni hikwalaho ka ku pfukela mfumo ni ku dlaya, kambe a wu nyika Yesu leswaku wu ya n’wi dlaya.

26 Loko wu ri karhi wu famba na Yesu, wu khoma wanuna un’wana loyi va nge i Simoni wa le Kirena, loyi a huma emakaya, kutani wu n’wi rhwexa mhandzi ya nxaniso* a landzela Yesu.+ 27 A a landzeriwa hi vanhu vo tala lava katsaka vavasati lava a va ri ni gome naswona a va n’wi rilela. 28 Yesu a byela vavasati volavo a ku: “Vavasati va le Yerusalema, mi nga ndzi rileli. Ku ri na sweswo tirileleni n’wina ni vana va n’wina;+ 29 hikuva ma ta masiku lawa vanhu va nga ta ku, ‘Va tsaka vavasati lava nga timhika, lava nga velekangiki ni mavele lawa ma nga mamisangiki!’+ 30 Kutani va ta sungula ku byela tintshava va ku, ‘Hi weleni,’ va byela swintshabyana va ku, ‘Hi funengeteni!’+ 31 Loko va endla swilo leswi loko murhi wa ha tsakama, xana ku ta humelela yini loko wu omile?”

32 A ku ri ni vavanuna vambirhi lava a va ri swigevenga, lava a va ya dlayiwa na Yesu.+ 33 Kuteloko va fika endhawini leyi vuriwaka Xipalapala,+ va n’wi belela emhandzini ni swigevenga, xin’wana exineneni xakwe kasi lexin’wana eximatsini xakwe.+ 34 Kambe Yesu a ku: “Tatana, va rivalele, hikuva a va swi tivi leswi va swi endlaka.” Va tlhela va avelana swiambalo swakwe hi ku hoxa vuhlolotwana.*+ 35 Kutani vanhu va yima va languta. Kambe varhangeri va hlekula, va ku: “U ponise van’wana; a a tiponise loko a ri Kreste Muhlawuriwa wa Xikwembu.”+ 36 Ni masocha a ma n’wi poyila ma tlhela ma n’wi nyika vhinyo yo dzunga+ 37 ma ku: “Loko u ri Hosi ya Vayuda, tiponise.” 38 Ehenhlanyana ka nhloko yakwe a ku tsariwe marito lama nge: “Leyi i Hosi ya Vayuda.”+

39 Kutani xin’wana xa swigevenga leswi hayekiweke kwalaho xi sungula ku n’wi rhukana+ xi ku: “Loko u ri Kreste, tiponise u tlhela u ponisa na hina.” 40 Xigevenga lexin’wana xi holovela lexin’wana xi ku: “Xana a wu xi chavi Xikwembu leswi u xupuriwaka ku fana na yena? 41 Hina swa hi fanela, hi xupuriwa hikwalaho ka leswi hi nga swi endla; kambe wanuna loyi a nga dyohanga nchumu.” 42 Kutani xi ku: “Yesu, u ndzi tsundzuka loko u nghena eMfun’weni wa wena.”+ 43 A ku: “Ndza ku tshembisa namuntlha, u ta va na mina eParadeyisini.”+

44 Se a ku ri kwalomu ka awara ya vutsevu,* hiloko munyama wu funengeta tiko hinkwaro ku fikela hi awara ya vukaye,*+ 45 dyambu ri nga voningi; kutani khetheni*+ leri nga etempeleni ri handzuka hi le xikarhi.+ 46 Hiloko Yesu a huwelela hi rito lerikulu, a ku: “Tatana, ndzi veka moya wa mina emavokweni ya wena.”+ Loko a heta ku vula leswi, a fa.+ 47 Hikwalaho ko vona leswi humeleleke, ndhuna ya masocha yi sungula ku dzunisa Xikwembu, yi ku: “Wanuna loyi a a lulamile hakunene.”+ 48 Ni mintshungu leyi a yi hlengeletane kwalaho loko yi vona leswi endlekeke yi muke yi ri ni gome swinene. 49 Hinkwavo lava a va n’wi toloverile a va yime ekule. Ni vavasati lava n’wi landzeleke ku suka eGaleliya a va ri kona naswona va swi vonile leswi endlekeke.+

50 A ku ri ni wanuna loyi a vuriwaka Yosefa, loyi a a ri xirho xa Huvo naswona a a ri wanuna wo lulama.+ 51 (Wanuna loyi, a nga yimanga na rona kungu ra ku dlaya Yesu.) A a huma eArimatiya ku nga muti wa Vayudiya, naswona a a rindzele Mfumo wa Xikwembu. 52 Wanuna loyi a ya eka Pilato a ya kombela ntsumbu wa Yesu. 53 A fika a wu hawula+ a wu tsondzela hi lapi ra xiyimo xa le henhla, a wu veka esirheni leri a ri ceriwe endzeni ka ribye,+ leri a ku nga si tshama ku lahliwa munhu eka rona. 54 Siku rero a ri ri ra ku Lulamisela+ naswona Savata+ a yi ri kusuhi ni ku sungula. 55 Kambe vavasati lava teke na Yesu va huma eGaleliya va ya esirheni ku ya vona ndlela leyi ntsumbu wakwe a wu lahliwe ha yona,+ 56 hiloko va tlhela va ya lulamisa mirhi ni mafurha yo nun’hwela. Kambe, va wisile hi Savata+ hilaha swi tsariweke hakona eNawini.

24 Hi siku ro sungula ra vhiki va ya esirheni hi matakuxa, va ri ni mirhi yo nun’hwela leyi a va yi lunghiselerile.+ 2 Kambe va kuma ribye ri khunguluxiwile ri susiwile esirheni,+ 3 naswona loko va nghena a va wu kumanga ntsumbu wa Hosi Yesu.+ 4 Loko va ha pfilunganyiwe hi mhaka leyi, ku humelela vavanuna vambirhi lava a va ambale swiambalo swo hatima. 5 Hiloko vavasati va chuha va languta ehansi, kutani vavanuna volavo va ku: “Hikwalaho ka yini mi lava loyi a hanyaka exikarhi ka vafi?+ 6 A nga kona laha, u pfuxiwile. Tsundzukani leswi a mi byeleke swona loko a ha ri eGaleliya, 7 a vula leswaku N’wana wa munhu u fanele a nyiketiwa eka vadyohi, kutani a dlayiwa emhandzini ivi a pfuka hi siku ra vunharhu.”+ 8 Hiloko va tsundzuka marito ya yena,+ 9 kutani va suka esirheni va fika va byela lava 11 ni vadyondzisiwa lavan’wana swilo leswi hinkwaswo.+ 10 Vavasati lava a ku ri Mariya Magadala, Yowana na Mariya mana wa Yakobo. Nakambe vavasati lavan’wana lava a va ri na vona va byela vaapostola swilo leswi. 11 Hambiswiritano, a va ehleketa leswaku vavasati lava va jamuka naswona a va nga va tshembi.

12 Kambe Petro a tsutsumela esirheni, loko a fika a hlometela, a vona malapi ntsena. Hiloko a famba a hlamarisiwe hi leswi humeleleke.

13 Kambe hi siku rolero, vadyondzisiwa vambirhi loko va ya eximutanini lexi vuriwaka Emawusi, lexi ku nga mpfhuka wa kwalomu ka tikhilomitara ta 11* ku suka eYerusalema, 14 naswona va ri karhi va vulavula hi swilo hinkwaswo leswi endlekeke.

15 Loko va ha vulavula hi swilo leswi, hiloko Yesu a humelela a sungula ku fambisana na vona, 16 kambe a va nga swi xiyi leswaku hi yena.+ 17 Kutani a ku: “Xana mi vulavula hi yini?” Hiloko va yima va ku whii, va ri ni gome. 18 Kleyopasi a n’wi hlamula a ku: “Swi tisa ku yini leswaku ku va wena ntsena loyi a nga swi tiviki leswa ha ku endlekaka eYerusalema?” 19 A va vutisa a ku: “Ku endleke yini?” Va ku: “Xana a wu swi tivi swilo leswi humeleleke eka Yesu wa le Nazareta?+ A a ri muprofeta naswona u vulavule a tlhela a endla swilo swo hlamarisa emahlweni ka Xikwembu ni vanhu hinkwavo;+ 20 ni ndlela leyi vaprista va hina lavakulu ni vafumi va n’wi nyiketeke ha yona leswaku a gweviwa rifu+ kutani va n’wi belela emhandzini. 21 Kambe a hi tshemba leswaku hi yena loyi a hlawuriweke leswaku a kutsula Israyele.+ Ku tlula kwalaho, leri i siku ra vunharhu swilo leswi swi humelerile. 22 Ku engetela kwalaho, vavasati van’wana exikarhi ka hina na vona va hi hlamarisile, hikuva va ye esirheni nimpundzu+ 23 kambe loko va nga wu kumi ntsumbu wakwe, va vuyile va fika va vula leswaku va vone tintsumi, leti va byeleke leswaku wa hanya. 24 Kutani van’wana lava a va ri na hina va ye esirheni,+ va ri kuma ri nga ri na nchumu hilaha vavasati va vuleke hakona, kambe a va n’wi vonanga.”

25 Kutani Yesu a ku: “N’wina vanhu lava nga twisisiki, lava hlwelaka ku tshemba swilo hinkwaswo leswi vuriweke hi vaprofeta! 26 Xana a swi nga fanelanga leswaku Kreste a langutana ni swilo leswi+ a tlhela a vangamisiwa?”+ 27 Kutani a va hlamusela swilo hinkwaswo leswi Matsalwa ma swi vulaka ha yena. A va hlamusela ku sukela eka leswi tsariweke hi Muxe ni hi Vaprofeta hinkwavo.+

28 Hiloko va hetelela va fike ekusuhi ni ximutana lexi a va ya eka xona, kutani a endla onge u hundzela emahlweni. 29 Kambe va n’wi kombela leswaku a nga hundzi, va ku: “Tshama na hina hikuva se ri perile.” Hiloko a nghena endlwini a tshama na vona. 30 Kutani loko a tshame na vona etafuleni a teka xinkwa, a khongela, a xi phema, a va nyika.+ 31 Hiloko matihlo ya vona ma pfuriwa va sungula ku swi xiya leswaku hi yena; kambe a nyamalala.+ 32 Kutani va byelana va ku: “Hi yona mhaka swi hi khumbeke timbilu leswi a hi byeleke swona loko hi ri endleleni, loko a ri karhi a hi hlamusela Matsalwa!” 33 Hiloko va suka hi nkarhi wolowo va tlhelela eYerusalema, kutani va kuma lava 11 ni lava a va hlengeletane na vona 34 va ri karhi va vulavula va ku: “I ntiyiso Hosi yi pfuxiwile naswona yi humelele eka Simoni!”+ 35 Kutani vadyondzisiwa lavambirhi va rungula leswi humeleleke endleleni ni ndlela leyi va n’wi tiveke ha yona loko a phema xinkwa.+

36 Loko va ha vulavula hi swilo leswi, hiloko a humelela exikarhi ka vona kutani a ku: “Onge mi nga va ni ku rhula.”+ 37 Kambe hikwalaho ka leswi a va chuhe ngopfu, a va anakanya leswaku va vona xivumbiwa xa moya. 38 Hiloko a ku: “Hikwalaho ka yini mi karhatekile, naswona i yini lexi endlaka mi kanakana etimbilwini ta n’wina? 39 Vonani mavoko ni milenge ya mina, hi mina hi xiviri; ndzi khumbeni, hikuva xivumbiwa xa moya a xi na nyama ni marhambu kambe mina ndzi na swona.” 40 Loko a ri karhi a vula sweswo, a va komba mavoko ni milenge yakwe. 41 Kambe loko va ha kanakana hikwalaho ka leswi a va tsake ngopfu va tlhela va hlamala, a ku: “Xana mi ni swakudya?” 42 Hiloko va n’wi nyika nhlampfi leyi oxiweke, 43 kutani a yi teka a yi dya va n’wi langutile.

44 Kutani a ku: “Lawa i marito lawa ndzi mi byeleke wona loko ndza ha ri na n’wina,+ leswaku swilo hinkwaswo leswi tsariweke ha mina eNawini wa Muxe ni hi Vaprofeta ni le ka Tipisalema, swi fanele swi endleka.”+ 45 Hiloko a va pfuna ku twisisa nhlamuselo ya Matsalwa,+ 46 kutani a ku, “Ku tsariwe leswi: Kreste u ta xaniseka kutani a pfuka eka lava feke hi siku ra vunharhu,+ 47 naswona mahungu lamanene ma ta chumayeriwa ematikweni hinkwawo+ hi vito ra yena ku sukela eYerusalema,+ leswaku vanhu va ta hundzuka eswidyohweni swa vona kutani va rivaleriwa.+ 48 Mi ta va timbhoni ta swilo leswi.+ 49 Ndzi ta mi rhumela leswi Tatana a tshembiseke swona. Kutani tshamani eYerusalema kukondza mi kuma matimba lama humaka etilweni.”+

50 Hiloko a famba na vona ku ya fika eBetaniya, kutani a tlakusa mavoko a va katekisa. 51 Loko a ha va katekisa, hiloko Xikwembu xi n’wi teka a ya etilweni.+ 52 Kutani va khinsama va n’wi dzunisa ivi va tlhelela eYerusalema va tsake ngopfu.+ 53 A va tshama va ri etempeleni va dzunisa Xikwembu.+