I Yini Leswi Endlaka Risimu Ri Rhandziwa?

BINDZU ra vuyimbeleri ri fanele ri tshama ri ri karhi ri kamberiwa hikuva vuyimbeleri lebyi vanhu va byi rhandzaka bya cinca-cinca. Vuyimbeleri lebyi vanhu va byi rhandzaka bya cinca naswona byi hatla byi va phirha, leswi swi endla leswaku va rhandza tinsimu letintshwa hikwalaho ka ku antswisiwa ka thekinoloji. Kelli S. Burns la nga ni vutshila etimhakeni ta vuhungasi u vule leswaku vanhu lava navetisaka vuyimbeleri “va tshama va rindzele tinsimu letintshwa.” Kambe ku endla leswaku risimu ri tsakisa a swi olovi. Buku leyi pfunaka vanhu etimhakeni ta vuyimbeleri yi ri: “Vana vo tala va tibyela leswaku loko va kula va lava ku va swiyimbeleri swa ndhuma, . . . kambe sweswo a swi olovi.”—Vona bokisi leri nge “Ku Cinca Ka Bindzu Ra Vuyimbeleri,” eka tluka 6.

Ku Nghenisa Marito Eka Vuyimbeleri

Vatsari va tinsimu (1) va tsala marito lama khumbaka ndlela leyi vanhu va titwaka ha yona, lama endlaka va anakanyisisa hi ntshembo wa vona ni leswi va swi navelaka. I yini lexi ku vulavuriwaka ngopfu ha xona eka tinsimu? Vanhu vo tala va swi xiyile leswaku i rirhandzu. Vatsari va tinsimu va tlhela va tirhisa miloti leyi nga ta tshama emianakanyweni ya vanhu.

Endzhaku ka sweswo, mutsari u endla xikombiso xa ndlela leyi risimu ri faneleke ri rhekhodiwa ha yona. Loko valanguteri va khampani yo rhekhoda va swi xiya leswaku risimu leri ri ta rhandziwa swinene, va n’wi nyika kontraka yo rhekhoda (2). Kambe loko muyimbeleri wa kona va n’wi kanakana (kumbexana a nga dumanga), va nga ha xava risimu rakwe leswaku ri yimbeleriwa hi muyimbeleri un’wana la dumeke.

Leswi Endliwaka eNdhawini Yo Rhekhodela Eka Yona

Leswaku ntirho wo rhekhoda (3) wu famba kahle, tikhampani to rhekhoda ti tala ku hirha muhumelerisi wa vuyimbeleri la nga ni ntokoto. U hlela ndlela leyi risimu ri nga ta yimbeleriwa ha yona. U tlhela a hirha ndhawu yo rhekhodela eka yona, vanhu lava hlelaka vuyimbeleri, vakopi, vayimbeleri, vanhu lava nga ta yimbelela na yena, vanhu lava rhekhodisaka ni switirhisiwa leswi nga ta laveka leswaku ku humesiwa risimu leri vanhu va nga ta ri rhandza.

Tinsimu leti rhekhodiwaka ti rhekhodiwa hi ku landzelelana ka swilo leswi lavekaka, hakanyingi ku sunguriwa hi swigubu, katara, katara leyi nga ni bezi ni piyano. Endzhaku ka sweswo, vayimbeleri, tinotsi leti hlanganisiweke, swichayachayana ni mimpfumawulo yo hlawuleka swa hlanganisiwa leswaku swi endla risimu ra xiyimo xa le henhla (4).

Ku Xavisiwa Ka Vuyimbeleri

Tikhampani to rhekhoda ti endla tivhidiyo ta vuyimbeleri (5) leswaku vanhu va ta xava vuyimbeleri bya tona. Tivhidiyo teto leti tlangaka kwalomu ka timinete tinharhu ku ya eka ntlhanu ti nga ha endla leswaku vanhu va rhandza risimu ni ku vona muyimbeleri wa kona. Ti nga ha tlhela ti endla leswaku khampani leyi rhekhodaka yi kuma mali yo tala.

Tialbamu ta vayimbeleri vo tala ti xaviwa ngopfu loko va yimbelela emahlweni ka vanhu (6). Hakanyingi va endla leswaku vanhu va tiva albamu ya vona hi ku endla tikhonsati. Vayimbeleri vo tala va tiendlela Website (7) leyi nga ni swikombiso swa vuyimbeleri bya vona, swifaniso, tivhidiyo ta vuyimbeleri, tidayari ta vona ni rungula leri byelaka vanhu hi tikhonsati leti nga ta va kona ni laha vanhu lava rhandzaka vuyimbeleri byebyo va nga ta va va ri kona. Kambe xa nkoka ngopfu, website leyi yi va byela laha vuyimbeleri lebyi va nga byi xavaka kona eka Internet.

I mani la endlaka leswaku risimu ri tiviwa? Hi wena muyingiseri. Kutani i yini lexi endlaka leswaku u hlawula vuyimbeleri byo karhi? Xana u byi hlawula hi ku tsakisiwa hi risimu hi roxe, hi muyimbeleri wa rona kumbexana u landzela milawu yo karhi? Swivutiso leswi i swa nkoka hikuva vuyimbeleri byi ni matimba naswona byi nga hi khumba hi ndlela yo karhi. Leswi swi endla leswaku hi tsundzuka xitsundzuxo xa nkoka lexi humaka eka Muvumbi wa hina lexi nge: “Hlayisa mbilu ya wena ku tlula hinkwaswo leswi swi faneleke swi hlayisiwa, hikuva swihlovo swa vutomi swi le ka yona.”—Swivuriso 4:23.

Xana u nga xi yingisa njhani xitsundzuxo lexi xa vutlhari emhakeni ya vuyimbeleri? Loko u ri mutswari, xana u nga byi hetisisa njhani vutihlamuleri bya wena byo sirhelela vana va wena leswaku va nga thyakisiwi hi tlhelo ra moya ni le mianakanyweni?

[Bokisi leri nga eka tluka 6]

Ku Cinca Ka Bindzu Ra Vuyimbeleri

Internet ni swilo swin’wana swo rhekhoda swa vukanganyisi swi hoxa xandla eka hasahasa leyi nga kona etimhakeni ta vuyimbeleri. Namuntlha vanhu lava yimbelelaka va swi kota ku humesa vuyimbeleri bya xiyimo xa le henhla ni ku byi hangalasa va ri ekaya. Xiviko lexi humaka eka magazini wa The Economist xi kombise leswaku “vayimbeleri lava dumeke va rhekhode tinsimu ta vona ni ku tixavisa handle ko tirhisa tikhampani to rhekhoda.”