Famba Hi Ku Pfumela!

“Ku ṭhemba ka hina lo’ku tiyeke hi masiku ku kona, kutani ha ŝi tiv̌a leŝaku, loko ha ha akile mmirini, a hi le kaya, hi le kule ni Hosi, hikuv̌a hi famba hi ku pfumela, ku nga ri hi ku ŝi v̌ona.”—2 VAKORINTO 5:6, 7, Bibele Ya Xitsonga.

1. I mikateko yihi yin’wana leyi hi yi tsakelaka hikokwalaho ka tihlo ra munhu?

XIN’WANA xa swihlamariso swa miri wa munhu i tihlo. Hi ku tirhisa muchini lowu wo hlamarisa wa ku foda, a hi papalati makhombo ntsena kambe hi tlhela hi vona nhlayo leyikulu ya leswi tsakisaka, leswi swo tala swa swona swi khumbaka vuxaka bya hina ni van’wana. Swi le rivaleni leswaku Muvumbi wa tihlo a a nga swi lavi leswaku hi guguruteka emunyameni ekaya ra hina ra pulanete. Ku tlula kwalaho, a ku ri xikongomelo xa yena leswaku hi hlalela no tsakela swivumbiwa swa yena swo hlamarisa—vanhu ni swihari, tintshava ni milambu, mativa ni malwandle, swiluva ni mirhi yin’wana, xibakabaka ni mihlovo yo tala ya mpimavayeni. Vahlaleri lava tlangelaka va nga vula swin’we ni mupisalema va ku: “Oho Yehova! Mitiro ya wena yi tarise ku yini! U yi endlile hikwayo hi v̌utlhari. Misav̌a yi tele rifuwo ra wena.”—Psalma 104:24.

2. Hikwalaho ka yini swi nga ringananga ku famba hi ku swi vona, naswona Pawulo u te yini emhakeni leyi?

² Hambi leswi ku vona ku hlamarisaka, ku famba hi kona ku ri koxe i ku tinghenisa ekhombyeni lerikulu. Loko hi ta tsakela tintswalo ta Xikwembu, hi fanele ku famba hi ku pfumela eka Muvumbi wa tihlo ra munhu. Hi fanele ku lava nkongomiso wa yena leswaku hi ta endla leswinene. Loko a tsalela Vakriste-kulobye lava totiweke, hi laha ku faneleke muapostola Pawulo u te: “Ku ṭhemba ka hina lo’ku tiyeke hi masiku ku kona, . . . ha ŝi tiva leŝaku, loko ha ha akile mmirini, a hi le kaya, hi le kule ni Hosi, hikuva hi famba hi ku pfumela, ku nga ri hi ku ŝi vona; nḍi ri hi ni ku ṭhemba loku tiyeke; kutani leŝi hi ŝi ranḍaka, i ku rura e mmirini, hi v̌a e kaya, e Hosini [hi ku fa ni ku pfukela evuton’wini bya le tilweni]. Hikokwalaho hi endlaka hi matimba ku yi ṭakisa, hambi ha ha ri ndlwini leyi, hambi hi suka ka yona. Hikuv̌a hi ta fanela ku humelela hikweru e mahlweni ka šiṭhamo ša ku av̌anyisa ša Kriste, leŝaku uṅwana ni uṅwana a ta amukela le’ŝi ringanaka leŝi a ŝi endleke loko a ri mmirini, hambi ŝi ri le’ŝo biha.”—2 Vakorinto 5:6-10, Bibele ya Xitsonga.

3. Xana ku navela loku faneleke ku va ka malandza hinkwawo lama tinyiketeleke ya Yehova hi kwihi, naswona i swivutiso swihi leswi hi faneleke ku swi khathalela?

³ Malandza hinkwawo lama tinyiketeleke ya Yehova—hambi i ya masalela lama totiweke kumbe i ya “ntshungu lowukulu” lowu engetelekaka lowu nga ni ntshembo wa la misaveni—ya lava ku endla leswinene. (Nhlavutelo 7:9) Kambe hikokwalaho ka yini ku nga vuriwaka leswaku ku ni khombo lerikulu emhakeni ya ‘ku famba hi ku swi vona’? Naswona swi vula yini ku ‘famba hi ku pfumela’?

Makhombo Yo ‘Famba Hi Ku Swi Vona’

4. (a) Hikwalaho ka yini hi nga fanelanga ku languta xin’wana ni xin’wana tanihi xa ntiyiso? (b) Xana Muendli wa tihlo u swi vona njhani swilo?

⁴ Loko hi teka xin’wana ni xin’wana tanihi xa ntiyiso ivi hi tiseketela hi swivumbeko swa le handle ntsena, ku ni khombo ro kanganyisiwa ivi hi vaviseka. Hi xikombiso, munhu a nga ha va a famba esaveni ro oma loko hi xihatla a tikuma a bodlhomele etiveni ra sava. Kumbe munhu a nga ha xisiwa hi xivumbeko lexinene xa munhu loyi a hundzukaka ‘hlolwa edzobyeni ra nyimpfu.’ (Matewu 7:15) Kutani hi fanele ku tlhariha. Muendli wa tihlo a nga kongomisiwi hi xivumbeko ntsena xa le handle. U byele muprofeta Samuyele a ku: “Yehova a nga languti le’ši langutiwaka hi v̌anhu, hikuv̌a v̌anhu v̌a languta ngohe, kambe Yehova u languta mbilu.” (1 Samuel 16:7) Hakunene, Loyi a vumbeke tihlo u vona mianakanyo ya le ndzeni-ndzeni na swikongomelo-xidzi, naswona mpimanyeto wa yena eka un’wana ni un’wana kumbe xin’wana ni xin’wana wu hetisekile nkarhi hinkwawo. (Ringanisa Vaheveru 4:12.) Hikokwalaho ka mavonelo ni vutlhari bya yena lebyi hetisekeke, entiyisweni U vona hinkwaswo.

5. Hikwalaho ka yini swi ri swa nkoka leswaku hi tsundzuxiwa hi makhombo yo ‘famba hi ku swi vona’?

⁵ Hambi swi ri tano, tanihi vanhu ntsena, hi nge swi voni swinene leswi swi nga embiIwini ya munhu un’wana. Hambi hi vuswikoti bya hina lebyi hi byi nyikiweke hi Xikwembu, a hi hetisekangi naswona minkarhi yo tala hi nga xisiwa. Entiyisweni, timbilu ta hina vini ti nga hi kanganyisa, hikuva ti ‘ni mano ku tlula hinkwaswo, ti borile.’ (Yeremia 17:9) Kutani i swa nkoka lowukulu leswaku hi tsundzuxiwa hi makhombo yo famba hi ku swi vona. Xana Yehova u ma endlile malunghiselelo ya xilaveko lexi xa xihatla? Kunene u ma endlile! Ku hi dyondzisa, u endle leswaku ku endliwa rhekhodo ya swiendlakalo swo hlamarisa leswi kombaka makhombo yo famba hi ku swi vona ntsena.—Varhoma 15:4.

6. Ku ‘famba hi ku swi vona’ swi ve na vuyelo byihi eka Vaisrayele?

⁶ Mintokoto ya vanhu va Xikwembu va khale, Vaisrayele, yi ba nhloko ya mhaka. Hambi leswi a ku ri ni vukongomisi lebyi nga hava xihoxo bya Yehova eka tiko leri katekisiweke swinene, mintshungu ya rona leyi nga hava ripfumelo yi tiomise tinhloko yi famba hi “ŝitunḍušo le’ŝi nga ŝa v̌ona.” (Psalma 81:12) Hi ku ‘famba hi ku swi vona,’ va hundzukele eku gandzeleni ka swifaniso kumbe swikwembu leswi voniwaka hi mahlo ya ntumbuluko. Hi ku kongomisiwa hi swivumbeko swa le handle, va chavile tinhlayo leti khapaka ta valala va vona. Ku tlula kwalaho, hi mhaka yo ‘famba hi ku swi vona, hayi hi ku pfumela,’ Vaisrayele va lwisanile ni vurhangeri bya Muxe lebyi a byi nyikiweke hi Xikwembu ni ku vilela hi swa vutomi bya vona. (Ringanisa Yuda 16.) Ina, naswona entiyisweni vo tala va vona va naverile leswi va swi vonaka swi ri ntshunxeko ni ntsako eka matiko lama akelaneke na vona, va honisa mhaka ya leswaku vanhu volavo a va nghene eku onhakeni ni ku va mahlonga ya nkucetelo wa mademona.—Levitika 18:1-3, 30.

7. Ku endleke yini eka Vaisrayele lava aleke vukongomisi bya Xikwembu?

⁷ Ku endleke yini eka Vaisrayele lava aleke va famba hi ndlela ya vona, va ala nkongomiso wa Xikwembu? Va hlundzukisile Yehova, naswona u tshikile ku va khathalela loku a ku va fanela leswaku va hluriwa hi valala va vona! Hambi ku ri eTikweni ra Xitshembiso, Vaisrayele hakanyingi va vile mahlonga eka valala va vona va tihanyi. (Vaavanyisi 2:17-23) Ku hambana na Muxe, loyi a aleke ku tiphina hi mafehlefehle ya misava ya ntlawa lowu fumaka wa Egipta, vanhu va Israyele va lave “ku titsakisa nkarhinyana hi ku hanya eku dyoheni” naswona a va hambetangi va famba ‘wonge hi loko va ri karhi va vona loyi a nga voniwiki.’ A va kayivela ripfumelo. Naswona tsundzuka, “ehandle ka ku pfumela a swi endleki ku tsakisa Xikwembu.”—Vaheveru 3:16-19; 11:6, 24-27.

8. Hikwalaho ka yini malandza ya Yehova ya manguva lawa ma fanele ku kuma xitsundzuxo eka mintokoto ya Vaisrayele va khale-ke?

⁸ Malandza ya Yehova ya manguva lawa ya nga kuma xitsundzuxo eka swiendlakalo sweswo swa nkarhi lowu hundzeke. Na hina, hi le khombyeni ro tsana eku pfumeleni hambi ku ri ku lahlekeriwa hi ku pfumela ka hina. Xana a hi leswi hi nga kuceteriwaka swi nga fanelanga hi xivumbeko xa le handle xa swilo ivi nakambe hi sungula ku ‘famba hi ku swi vona’? Ina, hi yona mhaka leyi Yehova a va kongomiseke hi musa lava va nga ta n’wi tirhela hi ku pfumela. U tirhise Vaisrayele ni ndlela leyi a tirhisaneke na vona ha yona tanihi switsundzuxo eka tinxaka leti a ti ta tlhandlama, ku katsa ni ra hina. (1 Vakorinto 10:11) Hi mukhuva wolowo ha tiyisiwa hi vutivi lebyinene, hi ntshembo lowu tiyeke, na hi ku tiyisela.

9. Loko hi ‘famba hi ku swi vona,’ hi nga titwa njhani h swiendlo swin’wana na hi malunghiselelo ya mfumo wa le henhla?

⁹ Handle ka nkongomiso lowu wo tiya lowu humaka eka Muvumbi wa hina wa rirhandzu, hi nga va ekhombyeni ro lwisana na Muxe Lonkulu, Yesu Kriste, hi rivala leswaku Xikwembu na Kriste namuntlha va fambisa Vakriste va ntiyiso. (Ringanisa 1 Vakorinto 11:3; Vaefesa 5:24.) Hi nga teka nhlengeletano ya Timbhoni ta Yehova tanihi leyi sunguleke hi munhu ntsena naswona xisweswo hi nga titwa hi ntshunxekile ku endla leswi vonakaka swi ri swinene eka hina. (Ringanisa Vaavanyisi 21:25.) Tlhandla-kambirhi, hi nga wela eka xihoxo xa van’wana lava va nge ntsendze loko xiendlo xo karhi xi nga karhati mapfalo ya vona, swi lulamile. Van’wana va nga sungula ku ehleketa leswaku nhlengeletano ya le henhla i ya ku va rhula khwarha ni leswaku milawu ya yona hinkwayo yi fanele ku olovisiwa, ku ri hava ku tikarhata loku lavekaka eka vona. Khombo rin’wana ri nga ha va ku kurisa mianakanyo ya leswaku malunghiselelo ya nhlengeletano ya fanele ku endliwa leswaku ya pfumelelana ni ku rhandza ka hina ematshan’wini ya ka Xikwembu. Kasi, Xikombiso xa hina, Yesu Kriste, nkarhi hinkwawo a a endla ku rhandza ka Tata wa yena wa le tilweni hi ntsako.—Psalma 40:8; Vaheveru 10:5-10.

10. Langutelo ra hina hi vutirheli bya nsimu ni mintirho yin’wana ya Xikwembu ri khumbeka njhani loko hi honisa vukongomisi bya Xikwembu kumbe ku byi langutela ehansi?

¹⁰ Hikokwalaho ko honisa vukongomisi bya Xikwembu kumbe ku byi langutela ehansi, van’wana va nga ehleketa leswaku minhlangano ya hina yi fanele ku komisiwa, tindhawu to hlanganela eka tona a ti fanelangi ku va ekule, futhi mhaka leyi dyondzisiwaka nkarhi na nkarhi yi fanele ku olova, ku nga katsiwi “swakudya leswi tiyeke.” (Vaheveru 5:12) Ematikweni lawa Vakriste va tiphinaka hi ku rhula, van’wana va nga ha teka minkateko ya Mfumo yi nga ri ya nkoka, va ehleketa leswaku a ku fanelanga ku va ni ku tikarhata entirhweni wo kwetsima. Loko hi va ni malangutelo yo tano, hi nga va “lava rhandzaka ku tiphina ku tlula ku rhandza Xikwembu,” ivi mahelo-vhiki wahi na wahi ya hlayiseriwa ku titsakisa ematshan’wini yo tirhisa nkarhi wo tano evutirhelini bya nsimu ni yin’wana mintirho ya mfumo wa Xikwembu leyi kombaka ku tinyikela hi mbilu hinkwayo eka Yehova. (2 Timotiya 3:1, 4) Loko sweswo swi endlekile, hi nga vula hi ku tiyiseka leswaku hakunene a hi ‘famba hi ku pfumela, ku nga ri hi ku swi vona’ ke?

11. Ku titikisela ku nga va na vuyelo byihi, kambe ku na xilaveko xo va hi endla yini?

¹¹ Nakambe ku ni khombo ro titikisela. Swa olova ku heta hi ku ehleketa leswaku ku pandzanyana ka nhloko kumbe xiphiqo xin’wana xo fana na swona i xikulu ku tlula leswi hakunene xi nga xiswona. Nyama ya hina leyi nga hetisekangiki yi nga hi vangela ku tirhisa leswi tanihi xisirhelelo xa leswaku hi nga rhwali vutihlamuleri, byo fana ni ku nyikela nkulumo eXikolweni xa Vutirheli bya le Tilweni. Kambe xana swa koteka leswaku hi nga kali hi anakanya hi ku pfumelela mukhuva wo tano wu hi sivela ku hlanganyela eka swihungato swo karhi? Kavula, hi fanele ku tirhisa mianakanyo leyinene nakona hi nga languteli swikombiso swa ntikelo ehansi. Hambi swi ri tano, hi fanele ku tirha hi matimba. (Luka 13:24) Hakunene ku pfumela ku fanele ku lawula swiboho swa hina swinene-nene leswaku hi nga ‘fambi hi ku swi vona’ ntsena, hi ku pfumelelana ni switsundzuxo swa hina vini leswi nga seketeriwangiki hi nchumu.—Varhoma 12:1-3.

12. Xana hi tikuma hi ri ka nyimpi ya njhani, leswi tisaka langutelo rihi eka hina?

¹² U nga tshuki u rivala leswaku hi le ku lwisaneni na mavandla layo biha ya moya. (Vaefesa 6:11-18) Nala wa hina lonkulu, Sathana Diyavulosi, a nga tisa minkucetelo leyikulu eka hina hi ku tirhisa matlhari ya yena lama endleriweke ku herisa ripfumelo ra hina eka Yehova. Sathana u ta tirhisa ku navela kwihi na kwihi ka vutianakanyi ka vanhu naswona ku hava nsusumeto lowu nga soholotaka miehleketo ya hina lowu a nga wu honisaka. Loko hi tihlanganisa ni “lava saleke” va “rixaka” ra ‘wansati’ wa Xikwembu kumbe nhlengeletano ya le tilweni, hi le nyimpini. Hi leyi eka yona ku nga ta va ku nga ri na nkarhi wo wisa ku fika loko Yehova, loyi a hi nyikaka ntamu wo tiyisela nhlaselo wa vusathana, a herisa nhlengeletano hinkwayo ya Diyavulosi. (Nhlavutelo 12:16, 17; 1 Petro 5:6-11) Kutani ke, xana sweswi hi nga tiya matimba ni ku endla hi xihatla? Hakunene swa hi fanela!—Psalma 31:24.

Leswi Ku ‘Famba Hi Ku Pfumela’ Swi Vulaka Swona

13. Swi vula yini ku ‘famba hi ku pfumela’ ke?

¹³ Ku “famba hi ku pfumela” swi vula ku famba eka swiyimo swo tika hi ripfumelo eka Xikwembu, eka vuswikoti bya xona byo hi kongomisa, ni le ku naveleni ka xona ka ku hi vona hi hlayisekile. (Psalma 22:3-5; Vaheveru 11:6) Swi vula ku ala ku kongomisiwa hi swivumbeko swa le handle ntsena swa swilo kumbe hi mianakanyo ya vanhu leyi nga seketeriwangiki hi nchumu. Ku pfumela ku ta hi susumetela ku ya etlhelweni leri Yehova a kombetelaka eka rona, ku nga khathariseki leswaku ndlela leyi yi tika njhani. Loko hi ‘famba hi ku pfumela,’ hi ta fana na Davhida, loyi a vulavuleke hi Xikwembu a ku: “U ta nḍi tiv̌isa ndlela ya v̌utomi; ku šura ka ku ṭaka ku kona e mahlweni ka wena; ni ku ṭaka loku nga heriki ev̌okweni ra wena ra šinene.” (Psalma 16:11) Ku tlula kwalaho, loko hi pfumelela Yehova a hi kongomisa, u ta hi nyika ku rhula ka mianakanyo nakona u ta hi pfuna leswaku hi hlula, ku nga khathariseki leswaku valala va hina va tale ku fikela kwihi. (Yohane 16:33; Vafilipiya 4:6, 7) Exikarhi ka swilo swin’wana, ku “famba hi ku pfumela” swi ta hi hlanganisa nkarhi na nkarhi ni vamakwerhu va moya va xinuna ni va xisati leswaku hi va ni dyondzo ya Bibele ni xikhongelo xa vun’we.—Vaheveru 10:24, 25.

14, 15. (a) Langutelo ra Yesu a ri ri rihi eka rifuwo, xikhundla, ni ku nghenelela eka tipolitiki? (b) Hi laha swi paluxiweke ha kona eMatsalweni, Yesu u byi langute njhani vukongomisi bya Xikwembu?

¹⁴ Entiyisweni, ku “famba hi ku pfumela” nakambe swi hi endla vanghana va malandza lama tshembekeke ya Yehova ya nkarhi lowu hundzeke. Lonkulu exikarhi ka wona a ku ri Yesu Kriste, “musunguri ni muhetisisi wa ku pfumela ka hina.” Loko hi ri karhi hi ringeta ku ‘landza ntila wa yena hi le ndzhaku,’ hi kuma yini xana?—Vaheveru 12:1-3; 1 Petro 2:21.

¹⁵ Yesu u fularhele ku tinghenisa etimhakeni ta politiki ya misava naswona a nga zanga a lava rifuwo ni xikhundla, leswi vo tala a va swi hlongorisa. Kambe, u vule leswaku Mfumo wa yena ‘a hi wa misava leyi,’ naswona kule ni ku rhandza rifuwo, ‘a nga ri na laha a nga seketelaka nhloko ya yena kona.’ (Yohane 6:14, 15; 18:36; Luka 9:57, 58) Hambi leswi Yesu a ri na mianakanyo leyi hetisekeke, a a nga endli hi ku tirhandzela kambe a langute eka Tata wakwe wa le tilweni leswaku a n’wi fambisa.—Yohane 8:28, 29.

16. Hikokwalaho ka xikombiso xa Yesu, ku nga vuriwa yini hi malangutelo ya Timbhoni ta Yehova?

¹⁶ Hikwalaho ka xikombiso xa Yesu, xana ku nga vuriwa yini hi Timbhoni ta Yehova namuntlha? Ee, tanihi vayimeri va Mfumo wa Xikwembu wa le tilweni, hi xixima “tihosi” ta hulumendhe kambe hi hlayisa vukala-tlhelo etimhakeni ta politiki. (Varhoma 13:1-7; Matewu 6:9, 10; Yohane 17:16) Ku ri na ku lava rifuwo ni xikhundla eka misava leyi, hi ‘rhanga hi lava Mfumo,’ hi ri ni ku tshemba leswaku Yehova u ta hi nyika leswi hi swi lavaka evuton’wini. (Matewu 6:24-34; Psalma 37:25) Futhi tanihi Yesu, a ‘hi tshembi vutlhari bya hina’ kambe hi amukela nkongomiso wa Xikwembu xa hina xa rirhandzu hi ku nkhensa. (Swivuriso 3:5, 6) Kunene, leswi hinkwaswo swi hi pfuna ku ‘famba hi ku pfumela.’

Miringo Ni Minkateko

17. Vanhu va Yehova va fanele va tiyisela yini loko va ri karhi va ‘famba hi ku pfumela’? Kombisa leswi.

¹⁷ Ematikweni yo tala timbhoni-kulorhi ta Yehova ti fanele ti tiyisela miringo ni ku xaniseka leswi nga tolovelekangiki, hambi ku ri ku xaniseka ka tihanyi, loko ti ri karhi ti ‘famba hi ku pfumela.’ Kavula, miringo ya ripfumelo yi ta hi swivumbeko swo hambanahambana. Hi xikombiso, anakanya hi maxangu ni ntirho wa vutshembeki wa makwerhu un’wana la kuleke wa le Ecuador. U kume ntiyiso a ri na malembe ya 80, kutani a dyondza ku hlaya ni ku tsala. A khuvuriwa endzhaku ka malembe mambirhi. Leswi a a tshama endhawini yo pfumala swo famba, a a fanele ku famba tiawara tinharhu leswaku a fika eHolweni ya Mfumo. Nsati wa yena la nga tsakeriki a a n’wi tumbetela swiambalo ni mali leswaku a n’wi heta matimba yo hlanganyela eminhlanganweni ya Vukriste. Kambe swirhalanganya leswi a swi n’wi hlulanga makwerhu loyi wo tshembeka. U tirhe tanihi phayona ra nkarhinyana, kumbe leri pfunaka, n’hweti yin’wana ni yin’wana ku ringana khume ra malembe naswona a chumayela emitini yo tala, hakanyingi a rhukaniwa hi vaaki-ndhawu. Hambi swi ri tano, loko maphayona ni varhumiwa endzhakunyana va vekile vumbhoni etindhawini teto, vanhu vo tala va va tshinelerile va kombela tidyondzo ta Bibele. Kutani, ku vile ni vuyelo lebyinene eka ntirho wo tika wa makwerhu loyi wo chivirika. U dlayiwile hi khensa a ri na malembe ya 92 kambe a tirhe 40 wa tiawara ensin’wini eka n’hweti yoleyi a nga fa hi yona.

18. (a) Hi fanele ku endla yini loko hi ta tiphina hi tintswalo ta Xikwembu? (b) I tihakelo tihi leti nga ta va ta hina loko hi hambeta hi “famba hi ku pfumela, ku nga ri hi ku swi vona”?

¹⁸ Na hina, hi fanele ku tiyisela hambi ku ri ni swirhalanganyi ni maxangu. (Matewu 24:13) Loko hi ta tiphina hi tintswalo ta Xikwembu, i swa nkoka leswaku hi tirhisa ndzayo ya Xikwembu, hi tiseketela hi xona, hi tshama hi hambanile ni misava, malangutelo ya yona, ni tindlela ta yona. (Psalma 37:5; 1 Vakorinto 2:12; Yakobo 1:27) Manuku a hi ringeteni ku tekelela Ntila werhu, Yesu Kriste. A hi tinyiketeleni naswona hi rhandza ku tikarhata entirhweni wo vangama wa Yehova. Loko hi ri karhi hi endla leswi, hi nga langutela ku hetiseka ka switshembiso leswikulu swa Tata wa hina wa le tilweni eka vagandzeri va yena lava tshembekaka hi ku tiyiseka. Naswona mawaku mikateko yo hlamarisa leyi leswi swi yisaka eka yona eMafambiselweni ya yena Lamantshwa lama tshembisiweke! Ku tlula hinkwaswo, ku “famba hi ku pfumela, ku nga ri hi ku swi vona” swi ta hi tisela hakelo ya ku hlanganyela eku Iweriweni ka vuhosi bya Yehova bya hinkwakonkwako.

Wa Tsundzuka Xana?

◻ I makhombo wahi yo ‘famba hi ku swi vona’?

◻ Mintokoto ya Vaisrayele yi nyika xitsundzuxo xihi eka vanhu va Yehova namuntlha?

◻ Ematshan’wini yo titikisela, hi fanele ku endla yini xana?

◻ “Ku famba hi ku pfumela” swi vula ku endla yini-ke?

[Xifaniso eka tluka 10]

Loko timbhoni-kulorhi ta Yehova ti tirhisa mintirho ya mfumo wa le henhla, xana wena ni ndyangu wa wena hakanyingi mi ya eku tirivatiseni ke?

[Xifaniso eka tluka 12]

Yesu u hi vekele xikombiso lexinene. Ku fana na yena, xana u “famba hi ku pfumela”?