Xiviko Xa Vahuweleri Va Mfumo

ENew Zealand—Siku Ro Ri Tsundzuka

“HI NYANYUKE hi laha ku heleleke ku va na n’wina. Hi nga ka hi nga swi rivali!”

“Eka swinakulobye swa mina hinkwaswo swa le tilweni, a ndzi si tshama ndzi tokota nchumu wo fana ni lowu.”

“A swi vonaka onge a hi tsakela siku emafambiselweni lamantshwa ya swilo.”

Leti a ti ri tin’wana ta tinhlamuselo ta vapfhumba va le ka nongonoko wo nyikela yindlu-nkulu ya rhavi ya Watch Tower Bible and Tract Society eNew Zealand, November 29, 1986. Ha yini vanhu lava va susumetekise leswi? Hikuva hakunene a ri ri siku ro tsundzukeka. A hi avelaneni na n’wina swin’wana swa swivangelo swa kona.

Xo sungula, miako leyo xonga leyi nyikeriweke yi endle leswaku siku leri ri tsundzukeka. John E. Barr, wa Huvo leyi Fumaka ya Timbhoni ta Yehova, u hlamusele Holo ya Mfumo leyi ya ha ku akiwaka ni miako leyi fambisanaka na yona ya rhavi tanihi “vuxongi lebyi nantswekaka, lebyi khavisiweke . . . Ntirho lowu hetiweke wu kombisa mianakanyo ya rixaladza swinene ya vuxokoxoko, yo saseka. Hinkwaswo swi vonaka swi fambelana.”

Vamakwavo Va Vukriste

Manuku ke, a swi ri leswi tsundzukekaka ku vona Timbhoni to tala ta khale ti ri kun’we, leti tirheleke Yehova hi ku tshembeka malembe yo tala swinene. Entiyisweni, lava a ku ri vona vo tala exikarhi ka 658 wa vaendzi lava rhambiweke. Loko va hlangane ni vanghana va khale, lava vo tala va vona va kalaka va nga si va vona hi makume ya malembe, va titwe ku fana na Pawulo, loko, endzhaku ka riendzo ro leha, a hlangane ni vamakwavo lava humaka eRhoma: “Kute loko Pawulo a vona [vamakwavo], a nkhensa Xikwembu, a tiyisa mbilu.” (Mintirho 28:15) Ku vona swikombiso swo tano swa vutshembeki lebyi tiyiselaka—van’wana va ri kona ku nga khathariseki rihanyo leri nga nyawuriki—a ku ri xihlovo xa xikhutazo ni ku tlangela.

Siku na rona a ri tsundzukeka, hikwalaho ka vuxaka bya vamakwavo va misava hinkwayo lebyi kufumelaka lebyi tokotiweke. Timbhoni ta Yehova i vamakwavo va misava hinkwayo, naswona leswi swi kombisiwile hi vapfhumba lava teke va huma ekule tanihi le Australia, United States, Canada, Britain na Taiwan, kun’we ni lava va humaka ePapua New Guinea, Samoa ni le swihlaleni swin’wana swa Pacific Dzonga. Tithelegramu ti tile ti huma eka vo tala lava a va nga ta swi kota ku va kona hi voxe, ku katsa ni marungula lama humaka eka Huvo leyi Fumaka, swirho swa ndyangu wa Bethele ya le Brooklyn ni ntlawa wa vu-82 wa xikolo xa vurhumiwa xa Gilead. Hakunene, a swi tiyisa ripfumelo ku vona ku tsakela ka vamakwerhu vo tala ematikweni yo tala ka ku nyikeriwa ka miako ya rhavi ra New Zealand.

Masungulo Ya Andlariwe Hi Timbhoni Leti Tshembekaka

Ku tsundzuxiwa hi ta matimu yo leha ya ntirho wo chumayela eNew Zealand lama yiseke eku akiweni ka miako leyi ya sweswinyana ya rhavi a ku nyanyula naswona ku endle leswaku siku ra kona ri tsundzukeka. (Ringanisa Vaheveru 10:32.) Hi laha xivulavuri xin’wana xi vuleke ha kona: “Hi laha masungulo lama vonekaka ya muako lowunene lowuntshwa wa Bethele ya nga ya nkoka ha kona, ya nkoka swinene i masungulo yo fanekisela lama andlariweke hi vamakwerhu va xinuna ni va xisati lava tshembekaka, lava tinyikeleke ku ya le ndzhaku eku sunguleni ka lembe xidzana.”

Leswi swi landzeriwe hi ku vulavurisana ni vavanuna ni vavasati lava tshembekaka va 11 lava endleke ntsengo wa malembe ya 680 ya ntirho wo tinyiketela. Va vulavule hi wun’wana wa mintsombano yo sungula eNew Zealand, hi 1913. Va tsundzuke swihinga swo phayona eXihlaleni xa Dzonga hi va-1930, swihinga swa malembe ya Nyimpi ya Vumbirhi ya Misava loko nhlengeletano yi yirisiwile, ku vumbiwa ka rhavi ra New Zealand hi 1947, ku fika ka varhumiwa vo sungula va Gilead ni ku akiwa ka Holo ya Mfumo yo sungula ya tiko hi 1950. Ntlhaveko lowu fanaka wa lava ku vulavurisaniweke na vona a ku ri lowu: “Hi tlangela swonghasi ku va kona laha ni ku vona vumbhoni bya ku andza loku, emasikwini yo sungula, a hi nga ta pfuka hi ku lorhile nikantsongo!”

Nkateko Wa Yehova

Kumbexana nchumu lowukulu lowu endleke siku leri ri va leri nga rivalekiki a ku ri ku xiya leswaku nkateko wa Yehova wu kongomise ntirho wo aka ni ku wu fikisa emakumu. Hi laha ku fanelaka, xiyenge xin’wana xa nongonoko wa siku a xi ku: ‘Voko lerinene ra Xikwembu xerhu ri le henhla ka hina.’—Nehemia 2:8.

Voko lerinene ra Yehova ri vonakile eka mpfuno ni ntirhisano wa van’wamabindzu ni tihosi ta kwalaho, kun’we ni timfanelo ta Vukriste leti kombisiweke hi vatirhi hi voxe emuakweni. N’wamabindzu un’wana, loyi a endzelaka xivandla xa muako, u te: “A ndzi si tshama ndzi tokota ku titwa ka ku rhula ni ku hola loko ndzi nga na kona loko ndzi ri laha kun’wana.”

Nkateko wa Yehova wu vonakile hi ku hanana ka Timbhoni ta kwalaho etikweni hinkwaro leti seketeleke muako hi swa timali. Nakambe ku xiyiwe ku tirhandzela ka lava va tinyiketeke ku endla ntirho wa xiviri. Hinkwavo, 1 237 va tate swikombelo swa ntirho wa vona wo tirhandzela, van’wana va famba va ta emuakweni va huma ematikweni ya le kule naswona hi timali ta vona vini leswaku va ta heta mavhiki kumbe tin’hweti ti nga ri tingani va pfuna entirhweni wo aka. Makwerhu un’wana u te: “Ku pfuna emuakweni a ku ri ku hundzuka lokukulu evuton’wini bya mina.”

Hi laha Makwerhu Barr a boxeke ha kona eka nkulumo yo nyikela, miako leyintshwa ya rhavi yi fanele ku langutiwa tanihi “vumbhoni bya le handle, lebyi xiyekaka bya Mfumo wa Vumesiya wa Xikwembu lowu sweswi wu tlhomiweke.” Ina, hakunene a ri ri siku leri tsundzukekaka eNew Zealand. Eku heteleleni, a ku ri na ku amukela loku humaka embilwini eka hinkwavo lava nga kona ka xiboho xo “seketela nhlengeletano ya Yehova hi xitalo hi laha yi yimeriwaka ha kona hi rhavi ra hina.”