Nkambisiso Wa Mahungu
Ku Va Ni Bibele A Swi Anelanga
Dyondzo ya sweswinyana yi kume leswaku eka vanhu lava nga ni Tibibele, hafu yi vule leswaku a yi ti hlayi. Leswi swi katse vo tala lava tivitanaka Vakriste lava tswariweke ra vumbirhi. Ku ringana 30 wa tiphesente ta lava tivulaka Vakriste lava vutisiweke a va nga swi tivi leswaku Yesu u velekiwe eBetlehema. Hi ku ya hi The Detroit News, “khume-nhungu wa tiphesente va hlamule va ku eYerusalema, loko 8 wa tiphesente va te eNazareta.” George Barna, murhangeri wa ntlawa wa vulavisisi u te: “Loko va nga dyondzisiwanga swilo swa xisekelo swo fana ni leswi, va nga languterisiwa ku yini ku bula hi vundzeni bya Matsalwa hi vutlhari ni la nga pfumelangiki kumbe ku hanya hi ndlela leyi fambisanaka ni misinya ya milawu ya Bibele?”
Muapostola Pawulo u xiye xiyimo lexi fanaka exikarhi ka van’wana lava a “va hisekela Xikwembu, kambe va hiseka va nga ri na vutivi.” U tlhele a kombetela eka van’wana lava a va “seketela vukhongeri byo titwa, ni moya wo tiyisa ehansi” naswona u vhumbe leswaku ‘masiku ya makumu’ ya ta funghiwa hi vukona bya lava nga “ta tiendla wonge hi loko va ri ni vukhongeri, kambe va ta ala matimba ya byona.” (Varhoma 10:2; Vakolosa 2:23; 2 Timotiya 3:1-5) Hambi swi ri tano, Vakriste va ntiyiso, va teka Rito ra Xikwembu ri ri ra nkoka swinene. Va swi xiya leswaku ku va ni Bibele a swi anelanga. Ku ri na sweswo, va yingisa xitsundzuxo xa yona hi mbilu hinkwayo xo “navela ntswamba lowu tengeke wa moya.”—1 Petro 2:2.
Ku Godzomberiwa Hi Vuhomboloki
Xin’wana xa swivumbeko leswi xaxametiweke hi Yesu Kriste tanihi xiphemu xa “xikombiso” xa masiku ya makumu ya mafambiselo lawa ya swilo i ‘ku andza ka vuhomboloki.’ (Matewu 24:3, 12) Ku tirhisiwa ko biha ka swidzidzirisi ku ve ni nkucetelo wa matimba eku andzeni ka vuhomboloki namuntlha. Hi xikombiso, phepha-hungu ra le Australia The Sydney Morning Herald ri vika leswaku nkombo ehenhleni ka khume ra milandzu leyi endliweke eNew South Wales yi mayelana ni swidzidzirisi, naswona kwalomu ka 85 wa tiphesente ta vukhamba byo hloma etikweni byi endliwa hi vatirhisi va heroin. Naswona xiphiqo xa ku tirhisiwa loko biha ka swidzidzirisi xa kula.
U.S. News & World Report yi vula leswaku “a ku na ndhawu leyi nga riki na ntungu lowu eYuropa.” Le Soviet Union, nhlayo ya vatirhisi va swidzidzirisi hi ndlela yo biha yi pimanyetiwe ku va timiliyoni. Eka matshalatshala lama nga tshembisiki yo herisa mukhuva wo tirhisa swidzidzirisi hi ndlela leyo biha, mfumo wa Soviet wu pfule minkanerisano ni tindzawulo leti yirisaka swidzidzirisi eka matiko ya 25. Hambi swi ri tano, mintshembo ya leswaku mimfumo yi ta ti fikelela tipakani teto yi vonaka yi nga tiyanga hi ku ya hi swiviko swa leswaku mimpindzulo ya swidzidzirisi yi tirhisiwa ku onha maphorisa, vachuchisi hambi ku ri vaavanyisi. Ku vule mutirhela-mfumo un’wana loyi a hlundzukeke: “A ku na vandla ra maphorisa emisaveni leri endleke swo vonakanyana eku siveleni ka mphakelo wa [swidzidzirisi] lowu taleke hinkwako.” U engeterile: “Swi khomisa gome hikuva a ku na matshalatshala lama endliwaka.”
Marito yo tano ma tsundzuxa hi vuprofeta bya Yesu mayelana ni masiku ya makumu. U vhumbe leswaku hi nkarhi lowu ‘vanhu va ta titivala hi ku chava, va nga xi tivi lexi va nga xi endlaka.’—Luka 21:25, 26.
Yesu Ni Tipolitiki
Nhloko-mhaka eka The Star ya le Joni, phepha-hungu ra Afrika Dzonga yi hlayeka hi ndlela leyi: “Kereke Ya Khatoliki Yi Paluxa Makungu Ya Vafundhisi-nkulu Hi SA.” Makungu i ya ku “tisa mfumo wa Xikwembu” eAfrika Dzonga hi ku tirhisa “goza ra kereke leri kongomeke ro herisa ku hambanisiwa ka tinxaka.” Leswaku yi fikelela xikongomelo lexi, Jude Pieterse, matsalani-jenerali wa Nhlengeletano ya Tibixopo ta Khatoliki ya Afrika Dzonga, u vula leswaku kereke yi lava nseketelo wa tikereke tin’wana kun’we ni “swivumbeko hinkwaswo swa vandla ra Afrika Dzonga.” Hambi swi ri tano, Makhatoliki man’wana ma ehleketa leswaku i “makungu ya Tibixopo yo hundzula Makhatoliki ma va vahisekeri va tipolitiki,” ku hlamusela bixopo wa le Joni, Reginald Orsmond. Hambi loko Pieterse a pfumerile leswaku makungu ya ni minkucetelo ya politiki, Orsmond u vule leswaku a “hi mantshwa” kambe i ya “khale tanihi Yesu hi yexe.”
Kahle-kahle, Yesu Kriste a nga va letelanga vadyondzisiwa va yena leswaku va va vahisekeri va tipolitiki. Loko a vutisiwa hi Pontiyo Pilato, Yesu hi ku tiyisa u hlamule a ku: “Mfumo wa mina a wu ti hi la misaveni leyi.” (Yohane 18:36) Nakambe, ku tlula timiliyoni tinharhu ta Timbhoni ta Yehova ti tsakela ku twanana ka tinxaka exikarhi ka tona hikuva ti hanya hi ku pfumelelana ni ‘nawu lowuntshwa wa Yesu wa leswaku va rhandzana; tanihi leswi Yesu a va rhandzeke.’—ku nga ri ntsena eAfrika Dzonga, kambe emisaveni hinkwayo!—Yohane 13:34.