“Hi Yindlu Na Yindlu”

“MASIKU hinkwawo etempeleni na hi yindlu na yindlu a va hambeta handle ko tsana va dyondzisa ni ku twarisa mahungu lamanene hi ta Kriste, Yesu.” (Mintirho 5:42, NW) Timbhoni ta Yehova hakanyingi ti tirhisa tsalwa leri ni leriya ri nga eka Mintirho 20:20 ku kombisa xisekelo xa Matsalwa xa ntirho wa tona wo chumayela wa yindlu hi yindlu. Hambi swi ri tano, le Jarimani vasori van’wana va Timbhoni ta Yehova va lwisane ni ndlela leyi New World Translation yi hundzuluxelaka matsalwa lawa ha yona, va vula leswaku a yi xi yimeli kahle Xigriki xo sungula.

Xana mhaka yoleyo ya twala? Nikatsongo. Hi xikombiso, kwalomu ka ku hundzuluxela kun’wana ka tsevu ka Tibibele ta Xijarimani ku hundzuluxela tindzimana leti hi ndlela leyi fanaka. Exikarhi ka tona ku ni Zürcher Bibel leyi antswisiweke ni “Titestamente Letintshwa” hi Rupert Storr, Franz Sigge na Jakob Schäfer (ti antswisiwe hi N. Adler). Ku hundzuluxela ko tala ka Xinghezi ka pfumela.

Mudyondzi wa Mujarimani Hans Bruns u tiyisekisa ku hundzuluxela ka yena, “hi yindlu ni yindlu,” eka Mintirho 5:42, a ku: “Hi ku ya hi tsalwa ra masungulo, swi tikomba onge a va famba hi yindlu na yindlu.” Ina, kat’ oiʹkon, xiga xo sungula etsalweni leri, a xi tirhisiwanga hi mianakanyo ya riengeteri (“ekaya”) kambe hi mianakanyo ya vun’we, hi ku kongoma swi vula “hi ku ya hi yindlu.” (Xivumbeko xa vunyingi, katʼ oiʹkous, lexi vulaka “hi ku ya hi tiyindlu,” xi kumeka eka Mintirho 20:20.) Vadyondzi van’wana, tanihi Heinz Schürmann, va kombisa vun’we bya ku hundzuluxela ka tinhlamuselo leti. Horst Balz na Gerhard Schneider, va humesi va dikixinari leyi nga ni nhlamuselo ya Testamente Leyintshwa, va vula leswaku xiga lexi xi nga hundzuluxeriwa xi va “yindlu endzhaku ka yindlu.” Tibuku leti hlayeke ta tinhlamuselo ta Xinghezi ti hlamusela ndzimana leyi hi laha ku fanaka.

Kutani, nakambe New World Translation yi hlule minhlaselo ya vasori. Xa nkoka ngopfu, swi le rivaleni leswaku ku ni xisekelo lexi tiyeke xa Bibele xa vutirheli bya yindlu hi yindlu. (Ringanisa Matewu 10:11-14; 24:14.) Timbhoni ta Yehova ti ni lunghelo ro tekelela vanghana va tona va lembe xidzana ro sungula emhakeni leyi.