Xana Vunharhu-un’we I Dyondzo Ya Le Bibeleni?

▪ Ku ni tindlela to tala leti dyondzo ya Vunharhu-un’we yi hlamuseriwaka ha tona, kambe leyi hi yin’wana ya tona: “Ku ni Vanhu vanharhu lava nga ni vukwembu (Tatana, N’wana, Moya lowo Kwetsima), ku vuriwa leswaku un’wana ni un’wana i wa hilaha ku nga heriki, ku vuriwa leswaku un’wana ni un’wana u ni matimba hinkwawo, ku hava lonkulu kumbe lontsongo eka un’wana, ku vuriwa leswaku un’wana ni un’wana i Xikwembu naswona loko hinkwavo va hlanganile va endla Xikwembu xin’we.” Xana leyi i dyondzo ya le Bibeleni?

Hakanyingi ku tshahiwa Matewu 28:19 leswaku ku seketeriwa dyondzo leyi. Ndzimana yoleyo yi tshaha marito ya Yesu lama nge: “Hikokwalaho fambani mi ya endla vanhu va matiko hinkwawo va va vadyondzisiwa, mi va khuvula hi vito ra Tatana ni ra N’wana ni ra moya lowo kwetsima.” I ntiyiso leswaku Tatana, N’wana ni moya lowo kwetsima hinkwaswo swi tshahiwile eka ndzimana leyi. Hambiswiritano, ndzimana leyi a yi vuli swona leswaku i nchumu wun’we. Yesu a a lerisa valandzeri vakwe va Vayuda leswaku va dyondzisa ni ku khuvula vanhu hi vito ra Tatana, ra N’wana ni ra moya lowo kwetsima. Tanihi tiko, xana Vayuda a va pfumela eka yini?

Loko tiko ra Israyele ri amukela ntwanano wa Nawu, lowu endlaka xiphemu xo karhi eBibeleni, ri lerisiwe leswi: “U nga tshuki u va ni swikwembu swin’wana emahlweni ka xikandza xa mina.” (Deteronoma 5:7) Xana i vanhu vangani lava a va vulavula laha? Handle ko ba mariri, Deteronoma 6:4 yi ri: “Yingisa, Wena Israyele: Yehovha Xikwembu xa hina i Yehovha un’we”—ku nga ri swikwembu swinharhu eka xin’we. Tiko ra Israyele a ra ha ku ntshunxiwa aEgipta, laha a ku gandzeriwa Osiris, Isis na Horus (leswi kombisiweke eximatsini) ku nga swin’wana swa swikwembu swo hlayanyana swa vunharhu-un’we. Hikokwalaho, Vaisrayele a va lerisiwe ku gandzela Xikwembu xin’we. Xana a swi ri swa nkoka hi ndlela yihi eka vanhu leswaku va twisisa xileriso lexi? Dr. J. H. Hertz, la nga rabi, u ri: “Xitiviso lexi xa le nawini lexi tlakukeke xa ku gandzela Xikwembu xin’we hi ku helela a ku ri ku sungula nyimpi yo lwisana na hinkwavo lava gandzelaka swikwembu swo tala . . . Hi ndlela leyi fanaka, Xema a yi byi nghenisi vunharhu-un’we bya dyondzo ya Vukreste tanihi ku lwisana ni Vun’we bya Xikwembu.”a

Tanihi leswi Yesu a a ri Muyuda, u dyondzisiwe ku landzela xileriso lexi, lexi fanaka. Endzhakunyana ka ku khuvuriwa kakwe, loko a ringiwa hi Diyavulosi, u te: “Suka, Sathana! Hikuva ku tsariwile, ‘U fanele ku gandzela Yehovha Xikwembu xa wena, naswona u fanele ku endlela yena ntsena ntirho wo kwetsima.’” (Matewu 4:10; Deteronoma 6:13) Emhakeni leyi hi nga dyondza swilo swimbirhi. Xo sungula, Sathana a a ringeta ku wonga Yesu leswaku a gandzela munhu un’wana handle ka Yehovha, ku nga ndzingo lowu a wu nga ta twala loko ku ri hileswaku Yesu na Yehovha i nchumu wun’we. Xa vumbirhi, Yesu u swi veke erivaleni leswaku ku ni Xikwembu xin’we lexi faneleke xi gandzeriwa loko a ku “yena ntsena,” ku nga ri “hina,” leswi a ta va a swi vurile loko a a ri xiphemu xa Vunharhu-un’we.

Loko vanhu va kuma vutivi lebyi kongomeke bya Xikwembu naswona va lava ku xi tirhela, va khuvuriwa hi “vito ra Tatana ni ra N’wana ni ra moya lowo kwetsima.” (Matewu 28:19) Va twisisa ni ku amukela vulawuri bya Yehovha ni ntirho wa Yesu Kreste eku hetisiseni ka xikongomelo xa Yehovha. (Pisalema 83:18; Matewu 28:18) Nakambe va twisisa xikongomelo ni ntirho wa moya lowo kwetsima wa Xikwembu, ku nga matimba yakwe lama tirhaka.—Genesa 1:2; Vagalatiya 5:22, 23; 2 Petro 1:21.

Se ku hundze malembe-xidzana dyondzo ya Vunharhu-un’we yi ri karhi yi pfilunganya vanhu. Hi hala tlhelo, Yesu u dyondzise valandzeri vakwe ni ku va kongomisa eka “Xikwembu xi ri xin’we xa ntiyiso,” ku nga Yehovha.—Yohane 17:3.

[Nhlamuselo ya le hansi]

[Laha Xifaniso Xi Humaka Kona eka tluka 23]

Musée du Louvre, Paris