Tolovelana Ni Minkandziyiso Leyintshwa Leyi Humesiweke Entsombanweni
1 Minkandziyiso yimbirhi leyintshwa, buku ni broxara, yi engeteriwile eka mphakelo wa hina lowu fuweke wa swakudya swa moya. Ti humesiwe eMintsombanweni ya Muganga ya “Ririmi Leri Tengeke,” tibuku leti tintshwa ha tshemba leswaku ti ta va ni nkucetelo wa matimba evutirhelini bya hina bya nsimu ni ku hi pfuna hinkwerhu leswaku hi vulavula ririmi leri tengeke hi ndlela yo antswa swinene.—Sof. 3:9.
2 Loko ku humesiwa broxara leyintshwa, xivulavuri xa ntsombano xi te: “Evutirhelini bya nsimu—hi yindlu na yindlu, eka maendzo yo vuyela na hi nkarhi wa tidyondzo ta Bibele—hakanyingi hi vutisiwa leswaku ha yini hi nga yi amukeli ngati. Ku ku pfuna leswaku u hlamula xivutiso xexo, i ntsako ku humesa buku leyintshwa. I broxara leyi ya mpimo wa magazini, Xana Ngati Yi Nga Byi Ponisa Njhani Vutomi Bya Wena?” Xana u endle rungula ra nkoka eka broxara ri va ra wena n’wini hi ku yi hlaya hi vukheta? I swa nkoka eka wena ku endla tano leswaku u tiyisa ripfumelo ra wena ni ku lunghekela ku pfuna van’wana leswaku va twisisa langutelo ra Vukriste hi ngati.—Mintirho 15:28, 29.
3 Rungula leri kombisiweke kahle eka broxara leyi ri ta ku hlomisa hi laha ku engetelekeke leswaku u hlamusela xiyimo ni ku navela ka wena eka dokodela wihi na wihi. Hambi swi ri tano, broxara leyi yintshwa a hi ya madokodela ni magqhweta ntsena. Yi kunguhateriwe ni ku tsaleriwa vanhu hi ku kongoma. U nga vona ndlela leyi swikongomelo swa yona swa matlhelo mambirhi swi yi endlaka xitirho xa nkoka swinene xo xi tirhisa enkarhini lowu ha yona. Ku ringanyetiwa leswaku u famba na kopi yin’we kumbe timbirhi ta yona ensin’wini. Tirhisa rungula leri ra nkoka hi xitalo leswaku u pfuneka hi wexe ni ku pfuna van’wana leswaku va kombisa ku xixima ngati hi ndlela leyi faneleke.
BUKU LEYINTSHWA
4 Ehleketa hi nkoka wa buku leyintshwa leyi nge Ku Lavisisa Ka Vanhu Xikwembu wo hi pfuna evutirhelini bya hina. Ku yi dyondza swi ta hi nyika ku twisisa lokunene ka vukhongeri byin’wana ni xisekelo xa byona xa matimu. Yi ta hi pfuna hi va lava hlomeke ku antswa leswaku hi chumayela eka vanhu va Vujagana kun’we ni lava va khomelelaka eka vukhongeri byin’wana. Hikwalaho ka ku rhurha lokukulu ka vaaki eka lembe xidzana leri ra vu-20, hi nga ha kuma vanhu vo tala va tindzimi ni vukhongeri byo hambana-hambana loko hi chumayela hi yindlu na yindlu. Leswi swi tisa ntlhontlho wa xiviri loko hi nga tolovelananga ni tidyondzo ni mikhuva ya vanhu lava. Hi mpfuno wa buku leyi yintshwa, a hi fanelanga hi titwa hi heleriwe hi miehleketo loko hi hlangana ni vanhu va swisekelo swa vukhongeri swo hambana-hambana ensin’wini ya ka hina.
5 Rungula leri nga eka buku leyi yintshwa ri kambisisiwile ni ku pfuxetiwa hi vanhu lava va tolovelaneke kahle ni timhaka leti hlamuseriwaka. Hikwalaho, hi nga vulavula hi ku tiyiseka loko hi tirhisa tinhlamuselo leti kumekaka ebukwini leyi. Entiyisweni, ku nyikela rungula ro tano hi nkarhi lowu i vumbhoni byin’wana bya rirhandzu lerikulu ra Yehova eka vanhu va tinxaka hinkwato. A hi endleni matshalatshala lama lunghiseleriweke leswaku hi tolovelana kahle ni buku leyi yintshwa ivi hi yi tirhisa hi laha ku humelelaka ku pfuna vanhu vo tshembeka va swisekelo swo hambana-hambana swa tinxaka ni swa vukhongeri. Ina, ku tirhisa buku leyi yintshwa hi laha ku humelelaka swi ta hi nyika ku aneriseka ka ku tiva leswaku hi tivisa mahungu lamanene eka vanhu va tinxaka hinkwato loko hi va kuma ensin’wini leyi hi averiweke yona.—Mat. 28:19, 20; Tito 2:11.